Tuesday, November 30, 2010

مالذي تريدون بالظبط

كنت أظنّ بنفسي الأهمّيّه ، بعد أن صار ركب الحياة بي نحو الكهولة ما عاد ممكنا لما صار خلف ظهري أن يؤرّقني فقدانه أو أسره أو حتى التنكيد عليه ..ظننت أنّ مرابطة الأعوام خلف ظهري وقد إشتدّ عودي ستشفع لي من أن أكون رقما عابرا داخل سجلاّت البلديّه وقد صرت قاب زمن من مضمون إنتفاء لأهليّة الوجوب وانتبهت داخل وطن إزدرته الفئويّة أنّي مهما كنت رقما باهتا للخرس ولتقييد اللّسان و الحرّيّه وقرأت  لنا كلام الشّاعر أولاد أحمد  من كتابه "تفاصيل" لخاطرته :   جحيم الصّفحة 73 فانظروا صدقيّة العقل الحر :
"قبل عشرة أيّام ذهبت إلى شبابيك الدّولة لأتسلّم راتبي ، فكاد يغمى عليّ من شدّة الزّحام .
وعدت في اليوم الموالي ، وفي اليوم الذي يليه ، وكنت في آخر الطابور كمحارب إغريقي  ينظر إلى حبيبته الأسيرة وراء القضبان ولا يستطيع أن يفعل شيئا سوى أن يدعو على الذي ألمها ،ويرسم لها قبلة في الريح ثم يكركر ساقيه الجريحتين ويختفي بين النباتات البرية كالحنش المهزوم .
حدث ذلك منذ أن كففت أن أكون سارحا ودخلت الوظيفة العموميّة من شباك الإحتياج . " :) "
وكنت في كل مرة أتسائل مالذي جرى في البلاد ؟
القطار يتأخّر ، والرّاتب الشّهري يتأخّر ، وشهادة الحياة تتأخّر ،وتقرير الطبيب الشّرعي يتأخّر ، و الدّيموقراطيّة تتأخّر وكل شيء يتأخّر بغير حساب !؟
وأنت تسأل إلاّ لتجيب :
منذ عام لم أرى مواطنا يضحك !
الكل هائمون ، يتمتمون .
تدمرت أعصابهم من الرشوة ،و الجهويّة ، والقوّادين ، والحجّاب ،والإنتظار والخطب التي لا تقول شيئا ، وصاروا يشترون الخضر والغلال والملابس من القواميس بعد أن صعدت الأسعار إلى المرّيخ .
نعم !
كل شيء يسير وكأن تونس تريد ،بعد 28 سنة من رحيل الفرنجة، أن تصبح غابة إفريقيّة عذراء ، تنظمها الغريزة و الفوضى و تحكمها الغيلان و الأفاعي و السباع الجائعة  !
فهل يراد لنا بوضوح أن نهب ألسنتنا للقطط ، و أعصابنا لبائع المطاط ، ونصبح شعبا مجنونا يأكل  الحجر و النّفايات ، وينام على الأرصفة ؟
مالذي تريدون بالظبط :
طيب ، إحترموا العباد .
أن نكون شعبا متمدّنا ؟
هل تمثّلتم جان جاك روسّو على الأقل ؟
ماهو المطلوب  بالظّبط  منا :
ـ أن نؤثّث عزلة الحزب الواحد ، ونذوب في حامضه الفوسفوري ؟!
ـ أن نباهي بتخلّفنا في هذا القرن ؟ 
ـ أن نقتنع بأنّنا بلاد متقدّمة لأن حاكم الشيلي يقتل خمسة آلاف مواطن في السنة ، في حين لا نحفر نحن سوى مائة قبر سنويا ؟!!
لقد كان الجحيم نصا ..
فأصبح واقعا . 
ونحن نريد أن لا ننقرض قبل أن نقيم دليلا على أننا وجدنا في عصر ما من تاريخ البشريّة . 
فاتركونا نمضي إلى حيث نريد "
إنتهى النّقل عن الشّاعر تمتّعوا ،حتى إذا شعرتم بالألم مثلي فمن الجيّد أن نألم ونمضي حيث نريد لا أن نساق كالقطيع .

Monday, November 29, 2010

لم نولد لنموت كلّما أرادت فكرة أو جماعة أن تتأبّد

أحيانا يكون اللّؤم باهتا كانتكاسة للضّوء زمن عبور الغيم لا أكثر .. و بهتان الظنّ بحسن السّريره يناهضه سخط النّاس منك وفيك ، زمنا يركن فيه الحمق للحكمة ويتحدّث بها ، لم أكن أهذي فهذا الكلام مع إختلاف عقيدة كلينا صدرت عن رجل حق وكلامه حجّة له وأجد كلامه نافذا وقد فرحت عندما توقّفت أمم كتابه و أشرعت منتصفه فعاودني حنين الدّرس من معلّم حتّى وإن كانت عقيدتينا على طرفي نقيض فأنا أقرّ له بالحكمة وهذا ودّي لكم إسمعوا ما كتب أولاد  أحمد  في مجموعته القصصيه " تفاصيل " ستذهلون بلذّه :
يحدث في تونس ما لا يجب أن يحدث !
وأعصابنا ليست حجرا ، أو زنكا حتى تصبح المشنقة و السّجن والرّصاص كلمات عاديّه في مرتبة صباح الخير.
يحدث في تونس ما لا يجب أن يحدث !
ونحن لم نولد لنقدّم أجسامنا قربانا لأحد .
لم نولد لنموت كلّما أرادت فكرة أو جماعة أن تتأبّد .
لم نولد لنموت في غير الحروب  الواجب خوضها 
فهل بهذه السّرعة ندخل زمن الموت ، بعد أن فشل المشروع الدّيموقراطي الذي لم يتخطّى عتبة الكلام ، والإمكان ، وسين المستقبل النّاتئة كسنان منشار حديدي غليظ .
هل كتب علينا أن نظلّ شعبا يمدح علانيّة ويقهر علانيّة ؟
وعن أيّ حكومة سندافع ، ولكل حكومة رصيدها الوافر من الضحايا و العاطلين والرافظين ؟
يحدث في تونس ما لا يجب أن يحدث !
وليس صحيحا أنّ القانون الذي لا يسنّه كلّ النّاس يمكن أن يعلو على كلّ النّاس .
 تلك دعوة قديمة حفظناها عن ظهر قلب .
ولو كانت فيها لحظة معقوليّة واحدة ، لما أجبر أصحابها على تكرارها .
وليكن واضحا من الآن أنّ الأسود ليس أفضل ألوان الطبيعة .
وأنّ البكاء لا يمكن أن يكون نشيدا وطنيّا .
وأنّ نعمة الصّبا التي تربّت عليها آذاننا لا تزيد المواطن إلّا مزيدا من الوعي بعمق مأساته . 
هل كتب علينا أن نظلّ نمدح علانيّة ونقهر علانيّة ؟
وأن نظلّ نعامل دائما على أساس أنّنا لم نبلغ سنّ الرّشد المدني ؟
أيّتها الأخبار كفّي عن أن تكوني مزعجة !
أيّها الخراب المسرع باتّجاه وطني : تأخّر قليلا !
إفعل أيّ شيء !
إربط خيطي حذائك على الأقل !
حتّى نجد دقيقة واحدة لمنطق آخر غير منطق الرّصاص ، والسجون و المشانق .
أيّها الخراب المسرّح باتّجاه بلدي : مالّذي نفعله لنقنعك بأنّك ضيف مستحيل ؟  "

Saturday, November 27, 2010

تعب كلّها الحياة

توّه خمسه سنين لتالي خدمت مع زميل لازم في النهار يقول الجمله هذه إمبعّد ما يخرّج تنهيدة تنّين : يقول "تعب كلّها الحياة "وانا ما غير ما نكون حسوديّه ومن باب كوني من أنصار الآيه إلّي تقول " وأمّا بنعمة ربّك فحدّث "كنت نعض على لساني باش من شدّوش من خناقو ونذكرو إلّي الدّنيا ماشيه معاه و عيب يتفافا عليها و يجبد في التعب على خاطر أمورو هانيه وحساباتو ياسر ضيقة بالعربي ما علابالوش بالنّاس لخرين باش يرمي كلام ما يطلعش أعليه ..تذكّرت كلام سي وخينا وانا نتفرّج في تلفزيون الفضايع على الطّريقة التّونسيّه وحكاية الولد إلّي طردتّو أمّو الزّانيه باش تعيش حياتها .. ولد ظلمتّو أمّو فاستغلّوه باش يعملو بيه فقره في برنامج وقت الّي راس الفتله في عذابو كان كلام النّاس قعد ستّه سنين في الكيّاس على خاطر عذبوه النّاس بلساناتهم جابوه قام فضح روحو قدّام ملاين .. ولو كانت النّيّه صافيه ، ويحبّو يعملولو حل بطلب المساعده من أهل البر ، كان من الممكن إنهم يطلبو منّو باش يستر ما ستر ربّي ويقول إلّي أمّو طردتّو إمبعّد ما عرست واكهو ، راهو عيب تعملو بأعراض لعباد برامج عيب ..تعب هي الحياة يقولها كل صاحب راي في ها لبلاد يجري وراه نزق شلاكه ما يعرفش من الفكر حتّى شيء ويستهدف النّاس برك على خاطرهم يصلّيو الصّبح حاضر في الجامع ..تعب كلّها الحياة يقولها كل واحد يقول ربّي الله يتّهموه بالإرتباط بالخارج ونشر الأخبار الكاذبه على خاطر حكى في الجزيره وقتلّي سفارات أمريكا في بلدان العرب تقدّم للحكومات في تقنيات لوجيستيّه للتّجسّس على المواطن و زاده كيف يجي الدّور تعمل مناورات مع عناصر الأمن باش يحكمو القبضه على الشّعب وتبعث طيّارات بدون طيار تقتل بيهم النساء والصغار ..تعب كلّها الحياة ، تقولها كل عيله باتت مفجوعه في عايلها كلاتو الحبوسات وهو بريء ..قدّاش سوم الكيلو سردينه يا سيّدي الرّئيس ؟ قالتها غيغوز ثمّ أجهشت بالبكاء. شنيّه اللّينك ما بين لحكايات ؟ سامبل معّادش خالطين على السّردينه وهذا أعلاش غيغوز عندها الحق تقول تعب كلّها الحياة . في الختام نطالب رئيس الدّوله يعمل رسكله تثقيفيّه في حاجه إسمها العلوم السّياسيّه للعفارت إلي يخدمو مع فرقة مقاومة الإرهاب باش يعرفو يفرقو ما بين الديك و الدّجاجه على خاطر ضاهرلي فيهم أجهل من صبّاطي ويذكرونا ياسر بهاك البهيم رامسفيلد وفي رواية أخرى يخدمو على النّومبر وموش فاهمين منها والو ..وفي رواية أخرى  :تعب كلّها البلاد .

Tuesday, November 23, 2010

ما أَبْرككْ يا راجل أمّي لوِّل

نذّكّر وقت كنت صغيره كاميكاز ناكل التراحه نبّاش القبور وإلّي عندي يا نقولوا يا نعملوا .. صحيحةْ راس مالبريما أمّه يلزمكم تعرفو إنّي كانت عندي ظوابط خاصّه باش ما نطيحش في العوج ،أوّل حاجّه إسقاط الحسابات الضيقة متاع نزعة بنادم الغيره و الحسد والمعيز ولو طارو ثاني حاجه كْلِين لا أتباع ولا متبوع ولا صاحب طاطا ولا ولد خالة العروسه بالعربي القواده لا وثالث حاجه كنت نقتل روحي باش نقرا ونفهم وامبعّد نستنبط رايي الخاص ومعّادش نتزحزح عليه ..هي طرايح كليتهم حاله حليه وبرّه من الدّار للدوّار ..إي ومبعّد كبرت وكبرت الفاتوره من شَحْطتين على .. موش لازم إنقول خير ..رصّات الحكايه في كولني ناكلك أيّه تناقش البروف في جرد شرح نص يقلّك ..ولاّ موش لازم نقول لا تعملوهالي كنّايه ..تعدّى الزمان وخرّجت روحي بكيفي من الطّرح لا ننشط لا في بوليتيك لا جمعيّه أهليّه عايشه مع أفكاري وآنا نمنّي في روحي بسَكِينة الكِبَر .. قلت فمّاشي نرتاح من كلام الوالد : "إنت خالف تعرف ..موش باش يجيب منّك ربّي".. إي العنب في الليالي نلقى عباد ..باش إنقول عباد على خاطر خليقة ربّي ـ ظاهرلهم إلّي رغم عمري مازّلت في حاجه لدروس في الحياة متاع من أين تؤكل الكتف و تسكير الجلغه في المصالح و أخطى راسي واعمل جينوسيد ـ باهي يمكن ما تصدقونيش وتقولو غيغوز عامله فيها عم الطّيّب ..أيّه ياحلوّين تلفتو لجنابكم واحسبوا قدّاش من واحد عامل فيها فرعون ومن عقدة الإظطهاد إلّي عايشينها في البلاد هو زاده شد كرافاش وولاّ يحب يكون صاحب قرار .. حسبتوا ! أمّاله تلفتوا واحسبولي مليح قدّاش من واحد يستخايل روحو يحكي مع غشّير وما عندوش الدّليكتاس باش يفراني شواطنو ويستخايل إنّو مع هاك الكرسي الي قاعد أعليه أحنا نخدمو في رزق بوه ونحن من الكولاك وما في بالناش عاد قام يذكّر فينا .. حسبتوا ! أمّاله هيّ نحسبوا قدّاش من كبير في هذه البلاد مهواش أطرش وعندوا آليّات الحوار و الذكاء و البعد على الذّاتيّه ويتعامل مع روحو كحاجه بسّجار ..حسبتوا ! يزّيو عاد وينهم !. تّوه الدّنيا طايره بالنّاس ونحن مشاكلنا مفتعله يمليها الفيس والبهامه والغيره و ذاتية الشلايك حاشاكم ساعات نتذكّر طرايح بكري ونتوحّشهم على تدريع خواطر توّه ..كيف يقول المثل ما بركك يا راجل أمي أعليّه ..والله كان ما جاش المولى عاطيني شويّه صبر راني إطّرشقت كيف الفوشيكه .الهم إلّي آنا يه ذكّرني بهاك السطاتيات متاع الثلاثه قروده إلّي واحد مغمّض عينيه بروحو ولاخر مسكر فمّو ولاخر ساد وذنيه .وانا مادام ربّي خلقني حرّه ما ني باش نقول ولا نعمل إلا إلّي يقلّي أعليه مخّي وجات في تدريع لخواطر هاتوّه نشرب غافيسكون :'))

Sunday, November 21, 2010

هازني الواد يا حاكم !

هاك إنهار وانا نقلّب في القناوات وقفت شويّه على فرانس٢٤ نلقاهم يحكيو على صدور حكم بتبرئة مسيحيين جزايرييّن من تهمة الإفطار في رمضان هههه بيناتنا آنا مخونجه شويّه عاد قعدت نحاول نفهم في هاك المتّهمين إلّي حكاو على الحرّيه العقائديّه إممم شكّيت فيهم مسلمين ماهو ربّي أمر الرّسول باش إيقول "لكم دينكم ولي دين " دريّج وفات الفقره جبدو على عزوف الشّباب التّونسي على السّياسه و باش ما يتّهموش صاحبة جرد مدونه كيفي بنشر أخبار كاذبه ما عليهم كان يشوفو برنامج أسبوع بالمغرب العربي على فرانس ٢٤ بالعربي ..المهم لولاد إلّي سألوهم كلهم طلبه و على الأقل في التارمينال كلهم قالو ما نتبعوش السياسه.. إمليح أمّاله شكون يعبّي في هاك المؤتمرات الشعبيّه ! إنهم لوليدات ما نجموش يسمّيو أي حزب سياسي في تونس موش هذاكه الّي لفت إنتباهي أمّه وقت واحد كسّر كرايم إسم الحزب الحاكم ـ مانيش باش إنسمّيه الإشهار ممنوع في بلوغي ـ طحت على ركايبي بالضّحك يا بوقلب حزب يحكم في البلاد من ٥٦ و الشّعب ما يعرفش إسمو ..الحزب إلّي مشارك المولى في صفة الوحدانيّه ما يعرفوش ولد يعمل عمرو ٦٠ ملّ قوّة ولاء وملّ هومه ..أيّه شربة الضحكه وقلت نكمّل نشوف وليداتنا آش يْبيعوا ،عاد يا هول ماسمعت الوليّد يمكن سألوه على مفهوم المعارضه كان جوابو هكّه "المعارضه ..هذوكم مايعجبهم شيء ..المعارضه موش باهيه" .. إي هذا كلام جهّال متفاهمين أمّه لبلاد باش تكمّل القدّام مع أمثال ها الولد يا خي كيفاش نقوْلْبُو العباد باش ما يقعدوش مخاخهم إسطل مَنْقوب ..لولد لاخر إلّي سألوه جاوبهم إلّي هو ما يتبّعش السياسه بإضمار لتجنّب أشياء ما ذكرهاش ولكن الكل نعرفوها ..زعمه إنغلاق الشّباب على السياسه أهم تمظهر إنساني بيه تتحقّق المصلحه العامّه وين باش يرصّي بينا .إذا نحكي على روحي  إنّجّم ندّعي وعي بالسّياسه بدون تحزّب وإنّك ما تخلّيش روحك لقمه سايغه لضْبوعه موش معنتها تفقد إنسانيتك وتولي ميّت حي ..توّه عشرين سنه لتالي قرّرت إنّو باش إنقاطع التّحزّب لإنها رحله محفوفه بالمخاطر..لحكايه بدات عام ثمانيه وثمانين وقتلّي صحيّب مالقسم متاعي قرينا مع بعضنا خمسه سنين ثانوي بعثوه لدار العمّه من أجل الإنتماء لجمعيّه غير مرخّص فيها وأطلبوا اللّطف يلّي تعرفوني بالّيمانات السّبعه الغشّير بوماطان و جيغا على كلام ناس بكري لا يعرف القبله منين وحتى على وقتنا كانوا يطلبوا منّا باش نحفظوا شويّه قرآن سي وخينا كركار ما كانش يحفظ أمّه وتات في مظاهره عُنْقيّه في المدير أعطاهالو عاد ما خرج ملّيسي كان ما فرقة التّدخّل فرحت بيه وبات في قلبو ..باهي بالمنطق كان البهيم يسرح وين جا باش تفرح بيه الضبوعه عاد إستقلّيت بفكري وخلّيت أهل البلاء في البلاء و اعتكفت من غير تحزّب لكن خلّيت روحي منفتحه على الفهم وهذاكه أعلاش ما عمري ما خمّمت إلّي الشيوعيين ملاحده يحبّوا الفساد وما عمري ما ظنيت إلّي الإسلاميين يحبّوا يقيموا دوله إسلاميّه على صيغة دولة الفقيه وإلّا باش يقصّوا الإيدين والريوس ..اليوم آنا بكل وضوح ضد دكتاتوريّة الحزب الواحد لكن زاده حايره في شعب شبابو جاهل وفات فيه الفوت آش كون باش يرجّع الوعي ويفيّق الموتى في جمهوريّة البنديري يا بنديري و ذراعك يا قوّاد والتّيكطونيك كيفاش نلقاو أجيال تفهم آش معنتها المصلحه العامّه وإحترام ذاتيّة الفرد ..حسب البرنامج الشباب منقسم في إهتماماتو بين الستاد و المهرجانات الصّيفية ..إي أعلاش لا آنا زاده نعدّي إسّيزون كامله نخمّم في الجمعيّه والرّشوه وشريان الحكم والبيلانتي الغالطه أمّه زاده كيف نمشي في الكيّاس ونرى العزايز إلّي يكنسو في الكيّاسات و نقرا الرّيفورم متاع الضمان الإجتماعي نعرف إلّي مصيبتنا كبيره بلأغلبيّه البنفسجيّه ونتمنّى تكون عنّا معارضه قويّه كيف في بعض مالبلدان .. في كل الأحوال آنا عزوزه مالّبلاد هاززني الواد أمّه وراس أمّي يا تجمّع عمري لا نقوللكم العام صابه .

Friday, November 19, 2010

بات الرِّزْق يا بندير

أيّه هاني باش نقول الحقيقه ...إففف ما نعرفش أعلاش عندي أزمة ثيقة مع روحي .. أمّه القلب يغلبو ديمه القالب تالمون في النهار بنادم يتعارك مع شواطن روحو و يدخل في ميكماك متاع نفاق إجتماعي ولاّت العيشه تبهذيله موش حاجه أخرى ..نقوم إصباح نعمّل على رّبي نهبط دروج دارنا ندعي :يا ربّي جيرنا من ولاد الحرام و الظلّام ..اليوم كمّلت الدّعاء إنسب .. بالله توّه أعلاش وحده كيفي تبدا النهار شادّه الغارد ..سامبل لإنّي في بلاد الفرح الدّايم و مانيش منسجمه .. بالمشطه حبّيت نبدّل من روحي كل ما ندخّل روحي في القالب نلقى روحي ديفازي .. فايضه على لجْناب ، خوضه على معارضه على بعوضه و ساعات بهيمه يعدّيها عليّ الخرشف نستخايلو سلاطه سوري ..سكّرت جلغتي إمبعّد ملايكة اليسار فدت منّي من كثرة ماهو يقيّد عليّ في السيّئات ..غيغوز محترفه في التّقطيع و التّرييش يا حبيبي نستعرف آنا البقره إلّي زوكت مالغلب ..المهم قلت حسن أدب مع المولى نسكّر جلغتي و نهبط نكوّر في المجتمع دِيفُونسيف .. زايد إلّي فيه طبّه .. قعدت نتعارك مع ذبّان وجهي ونستنبط في الشّر لزميلي إلّي مطبوع تونسي مع علامة م ت ..توّه الشّر هاو نحكيلكم أعليه شويّه حقره على ضريبات في العظم مشى يشكي لزميله قلِلها إلّي آنا عامْله فيه ..بعثتو يقلي السّمك ..الله غالب ما عنديش الهواء وين يدور والنّفاق الإجتماعي إلّي وصّاو بيه علماء كبار كيمه إبن الجوزي ما لْقيتلوش دخْله بالرّغم إنّي مقتنعه بمخذان الخاطر أمّه موش في العوج يا ديني يا خي نلحسو الصباط وإلّا أمورنا تولّي تاعبه ..نتبوهمو بالإضمار و إلّا نولّيو مشاكليّه ..إي الشّيء هذا قْدام بينا متفاهمين ..أمّه مادام راسي بالفلوريتونجْ ما يرى كان المستوي نفلقو على حيط باش يرضاوْ لسيادْ ..توّه روحي قامطه بثلاثه نقاط على القاف ولا حبّت تِنسجم نسفِر بيها ..دوّيوْ شاء من شاء مادام خذا فيّه الموْلى ما أعطى تعيش السّياحه الدّاخليّه و ليوم أعلمت نفسي إنّو باش نحيلها على برنامج إعرف بلادك :)) إلّي ما فهمش شيء مالتّدوينه هذه ينجِّم يِتّصل بأقرب موظّف عمومي من معارفو يفسّرلو أعلاش نحكي بشرط إنّو يكون برا كاصّي موش مطبوع .. باهي إنهارْ إوفى عليّ وعلى غيري من بلاد البنديري يا بنديري لملايكه عند المغرب طوات صفيحتي اليوم وهبطو ملايكة اللّيل بالنّسبه لِيّ آنا باتْ الرِّزق كيمه يقلو أهل القصرين يذكرهم بالخير و بالنّسبه للُّخرين أهّيّه دعيوَه نوفى بيها النهارْ "كل واحِد حسيبو ربِّي "

Wednesday, November 17, 2010

طبرْنه لكل مواطن

مادام اليوم نهار عيد مانيش باش نحكي على أهل السياسه و الحوّافه الكبار و إلّي جَبْدانهم ما يجيب كان النّكد و الغصّه أمّه على راي كلندو العزيز باش نحكي على شعب بلاد السّروال الأعظم ـ  عجّل الله بفرجك يا كلندو باش يرجع للعالم الإفتراضي قيدوم التّدوين الصّندي ويكسّر إيدين عمّار و إلّي مخدمينوـ المهم عندي نهارين قبل العيد وانا نفركس لأمّي في كبده للدوّاره عاد إسترعى إنتباهي وانا نخيّط في البلاد من جزّار لجزّار ومن مغازه كبرى لمغازه عظمى حركيّه ونشاط كبير في بيعان الشراب و بالأساس إشراب لحمر على إختلاف تسمياتو و جمهور خايض قدّام المغازه تسمع كان تشرنين متاع الدبابز حتّاش العبد ولاّ باهت في إلّي وصلنالو زعمه آنا وين ؟ و البارح آنا نحلف وإيميني صادق إلّي البلاد راتات دخول غينس للأرقام القياسيه بأكبر طبرنه أو خمّاره مفتوحة للعموم في العالم الإسلامي ..بالطبيعه أهل الذّكر لا تباركلهم ما يهمهش إذا الشعب حالف على الضحيّه تمشي كمْيَه ..اللّيالي العشر ما همش داخلين في ليّامات المحرّمه وموش لازم نوقفوا فيهم بيعان الشراب ..وآنا أوّل وحده نستعرف إلّي يسرق يغلب إلّي حاحي أمّه زاده كثّرتولها بالتّشجيع على الفساد وتسهيل الموبيقات والأنفيستيسمون في الشراب والخمج ومن هاك اللّاوي . سمعت إحصائيّات على تضاعف بيعان الخمور أضعاف مضاعفه قبل سيدي رمضان إلّي تعدّى و إنّو ليلة العيد فمّة نزق في البلاد حل مخازنو للسوكارجيّه يبيعلهم في الشراب تقول صراواتو على باب فلسه الله لا تربحو ..معنتها آنا متأكده إنّو لو كان سكروا الخمّارات و المخازن متاع الشراب راهو الجماعه خزنوه على بكري ، أمّه زاده يِتْرحموا العباد إلّي يحبّوا يعيشوا معنى العيد ويعلموه لولادهم من مناظر تأذي مشاعرالمسلمين في أجلّ الأيّام ..راهو موش مالمعقول إنّو بنادم ما غير ما يطّرّف بروحو يلقاها في طبرنه كبيرا وآش قلّك حرّيّه .. ياخي الحرّيّة كان في المفاسد عاد يا شسمك براس لحْنينه رانا أقلّيّه مسلمه في البلاد نطالبوا بمراعات مشاعرنا وقت تجي مناسباتنا الدّينيه تعملو معانا اللّازم وتفضّيولنا البلاد شويه مالخمج وما فيها باس كان كيف بناي عمنا اليهود تعملونّا تسهيلات باش نمارسو طقوسنا معاكم في البلاد ونحييوا أعيادنا وكان تعملونّا مرافقه أمنيّه وتسكرو البلاد أيّامات العيد ميسالش ..في بلاد السّروال الأعظم كل شيء عظيم إلّا إلّي قالو ربّي ! يا شسمك يلّي باش تتحاسب بينا ياخي ما سمعتش بالآيه هذه "والفجر و ليال عشر  والشّفع والوتر واللّيل إذا يسر هل في ذلك قسم لذي حجر .."

Saturday, November 13, 2010

البارازيط

توّه مادامني نجبِد في ها لحكايه وبما أنّي مطمانه إلّي البلوغ متاعي يقراو فيه بعض العشرات من الشعب وإلاّ في الحقيقة في حدود العشرين منهم كعبات ملّي يجعل كلامنا خفيف عليهم ..وإنّجّم ندّعي إلّي لو كان التوانسه يقراو ها السطور إلّا ما يعملو منوحه وتصير فياضانات مالدموع وأوّل وحده تفتّق مواهبها العبد لله حتّاش يسمعونا في الدّول المجاوره وكل تونسي نظيف ينحّي خمجه على قلبو ـ هذيه إلّي تعدّات فراز  دطّاك هاو الرّسمي ـ أيواش الكل نعرفو إلّي بلادنا ملْيانه بلبرازيط ،على كل لون يا كريمه :أيواش بارازيطات من أنواع مختلفه و متعدّده و متشعبه ومكلفه على ميزانيّة الدّوله وبعضها الآخر على أرزاق أولاد الشّعب ..الحمدو الله يا ربي خلقتني تِر فِر .. أيواش البارازيط إلّي يشوّش على الكونّكسيون ويخلّيك ديفازي وإلّا الوحيّد إلّي يبدّلّك جار بجار آخر تولّي متوسّد همومك وحاط يدّك على قلبك منّو لا تلقى روحك إنت وولادك من هواة التّخييم ..أو البرازيط إلّي كيف الوشواشه يجري من شيره الشيره خدمتو النبيح وبيعان الريح للمراكب باش آخر النهار يرقد مطمان على خاطر عرفو راضي عليه ويصبر على نتونيّة الفم وشيحان الريق حتّاش نهار يولّي جربوع مرمرم يسطنبط في الشّر يمِد لسانو كيف الكامليون يعصر بيه نعجه مطمانه جايبه الواد الواد باش يرضاو أعليه الأسياد .. يشد هاك المخلوق المطمان يبعثو لدار خالتو باش يوضّح إلّي هوّ خدّام على روحو ..جربوع مالبريمه يحفر هنا وغادي سقّط البلاد وهتّك في العباد يجري على قفّه قضيه تطعطالو وبعّد تكبر طموحاتو ويولّي يجري على تركتور باش يحرث الأرض إلّي مدّوهالو زايزه على الولاء متاعو . بارازيط إنسانيتو مهياش أكيده ، بدا حياتو يلعق في صبّاط مسهول وعدّاها كيف رقّاص المنقالة يضرب على الشيرتين نسأل الله العظيم في هذا العيد الكريم يموتو الكل سكته دماغيّه من قوّة الشّرب وإلاّ يغصّو يطلعو النفس ما يهبطوه .. نرجعو التوانسه ستّه ملاين و إنشجعو على النّسل النظيف الخالي من البارازيط والجرابع و هزّازة القفة والمظلومين زاده و نولّيو إمبعّد البكاء و الغصّه هانين مطمانين يا رب

Friday, November 5, 2010

الشُّعبه وعيد ميلادي و التّغيير !

توّه علاش الصّدق ؟ الكذب أنجا و أنجا عندي عمر مخبيه حقيقتي المرّه أمّا في هذا الشهر العظيم قرّرت باش نستعرف بكل شيء : إلّي الميداليّه الّي خذيتها وانا نقرا في الكتّاب سببها الدّوبّاج ولّي أي ماكله تفقدت في الدّار راهي انتهى بيها المطاف في كرشي والحقيقة الأمر إنّي تولدت في شُعبه ! تي فاش تخمّموا راهي حقيقة مش مجاز ..هي أمي ضياقة عليها الدّنيا في أوّل السبعينات كانت تسكن في المدينة العربي باش تقصّر الوقت مع جاراتها كانت تمشي تقعد شويّة تفرغ قلبها لجاراتها وتروّح حتّاش صارت الطامّة وما ظهرلي نتولد كان غادي ..إي الوسط الضيّق متاعي كان إذا يحبّوني نخدّم باليدين و السّاقين يجبدولي على مكان الولادة وملّي ركّحتها بونيه كل واحد فهم قدرو ومعّادش يجبدولي على الهدره ـ السّاعه نحب نطمّنكم إلّي أمّي يبارك فيها لاهي من مناضلي التّجمّع ولا والو أمه زمان إلي تولدت آنا الحزب الديموقرطي كان مازّال يتسمى جديد و حبيب الأمّه شاد روحو والنّاس يحبّوه إزعيم على راي ممّاتي يرحمها.. أمّه عرشنا مالشيرتين خبزيست بالإضمار والتّرصد ـ أيواش عدّيت سنين المكتب وانا نعاني في آثار مكان المولد متاعي كل عيد ميلاد يجي عون مالشُّعبه للدّار يذكّر أمّي باش تتعدّى بيّه من غدوه ناخو الكادو متاعي ..أيواش تهزني بالسّيف عليّ و ستّلاف إيد تتمد تقرصلي خدوددي "بنت التّجمع "ويعملو بيّه تصاور وهومه يمدّولي في الكادو تقول يصورو مع شانبونزي المهم إنّو مبعّد العام لوّل تنحّى عنصر المفاجأه على خاطر الهدية كانت هيّ بيدها : كاشكول أحمر . ما رتحت من المناضر المقلبة يسامحني ربّي كان كيف نقلو دارنا و زمانها كان التّليفون فال ما تلقاه كان عند الغنيه عاد إرتحت .. امبعّد بعدت على الشعبة وولّيت كيف بقيّة الشعب إنّجّم ما نحتفلش بعيد الميلاد ومن الطروماتيزم إلّي عشتو أوّل عمري طلعت نكره الشُّعب في الدّم و بالطبيعة الحزب الديموقراطي ولكشكول الأحمر زادة و نسيت مكان الولادة و الشُّعبة وقعدت ممتنعة عن مظاهر الإحتفال على خاطر جماعتنا نبّارة وانا ما عنديش الهواء وين يدور ! الى أن جاء السّابع من نوفمبر وأحيا مواجعي الكل إي ماهو على سعدي المكبوب ولدت في نوفمبر- إي لا عاد ! كان جاء نهار سبعة راني عملت كوردة ورتّحت روحي ! -ملّي جاء الّي يسمّيوه التّغيير ـ ما فمهتش شنيّة تغيّر ! التجمّع إلي هو الحزب الديموقراطي شاد البلاد من 56 لتوّة بدلو إحتفالاتهم من أوت النوفمبر يتسمّى صار تغيير في البلاد؟ بالأمارة الحكومة مزّالت قايمة بيهم ـ تي موش هذا المهم ـ ياخي العهد إمبعّد تلاثه وعشرين سنه مازّال إجديد ؟! إي موش هذا المهم زاده , المصييبه إنّو في هاك التخميره متاع الشُّعب و مظاهر الزّينه يولّيوا واضحين للعيان معّادش إنّجم نطفيهم عاد نتفكّر تاريخي الأظلم وتبانلي برشة عوار من كثرت الغل  متاعى! ياخي شفتوشي هاك الدرابووات البنفسجيين بجاه إلّّي خلق الدّنيا ونشاها آش محلهم مالإعراب ؟ اللّهم طرحت التّجمّع ولاّو إخوانجيّة وقتها ماذبيّة تعفيو على طرحت الإنتماء الكل , شنوّه قاعده نخلوظ ؟ أمّاله شكون وقتها هبط بالقايمة البنفسجية التّجمّع ؟ يا خي الألوان باهين والعباد لا . في هذا الشهر العظيم ـ على خاطرو طاح مع ذي الحجّه  ـ نحب نقوللكم إلّي حاشتي بزوز مالطّوعين يشهدولي قدّام قاضي الحاله المدنيّه إنّي مولوده في عزيزة عثمانة في شهر فيفري - عملت قرعة بين الأشهر ـ و الله لا يضيع أجرالمحسنين و الناشطين في الشُّعب يقطع أعصابكم آش تقدروتبندرو أهفتو شويّه !