Wednesday, March 28, 2012

نهضة فيق الشعب هو إلي ينخب فيك !




حكاية موقف النهضة مالتنصيص على الشريعة حسسني بروحي قولش علي هاك السنجاب في الكوميك تاع العهد الجوراسي إلي فلق الدنيا على خاطر كعبة البوفريوة إلي طايح فيها لوف .. أول حاجة عملت سياسة ظبط النفس باش ما نشدش الحزب نسلخو بإبرة وباش كيف ما قال ولدي كينغ وهو يمخط  في خناينو  ما نشمتش أبلا طازا فييييااا .. إي وعملت شوية يوغا تي حكاية عشرين  ثانية تنفس  عميق ، جاوني فيها الشقنوس نوفل الورتاني والكاينات الهلامية إلي لا عندها وجه لا قفا أمثال بن مرزوق و بن تيشة وجوهر من مبارك وبياع الشراب الشبسي آاااه هو في الأصل جلاد من جلادي بورقيبة والنسا الديموقراطيات آااه وأبطال فرانسا إلي حالتلهم بلاتووات فرانس 24 باش يرعشو ويبكيو من سلفيي تونس ويطلبوا حماية أمهم فرانسا يحرقهم ربي هومة وياهم فرد النفس تذكرت ولد بووه الحنين ال **** .. تسكر علي النفس آآآبي ووالوزرة تاع النظام البايد مرجان البكوش فريعة .. الدساترة السراق .. قتالة الأرواح اللحاسة العواينية الشبيحة إعلام البرونوغرافيا .. تونس سبعة ..التمويل الأجنبي للجمعيات المشبوهة وقلت فيها وووووه .
وذكرت الغناية الحولة هاو قالو عملنا ثورة أبّي وقتاش .. حزب إسلامي لايت .. يديه باردة  على الثوابت نهار كامل وهو ينادي بحرية التعبير وعلويتها حتى مع ماخور كيف نقمة تي في ! ..الديسيبسيون عنوان المرحلة .. يا ولادي آش مدخل المسائل المبدئية في التعايش السلمي آش مدخل إنو رعاع تونس وعرابيدها يحبو يقررو للأجيال الجاية ما يجب أن تكون عليه حياتهم وتواصل الإفلاس القيمي في حياة بنادم في هالبلاد  إلي خلى واحد فاشل دراسيا وسارق وعميل للكيان الصهيوني يحكم في شعب بمثقفيه والنخب تاعو وإطاراتو وابطالو ربع قرن . 
يا ولدي كلمة التوافق فلقتولنا راسنا بيها .. آشبيه عنا أقليات ، يا نهضاوية الحكم شبيكم ديما تتنازلو على المواقف المبدئية يا خويا تعلمو من حليفكم في الترويكا بن جعفر رئيس المجلس التفصيصي الحداثي على قوة جهدو مسكين " التنصيص على الشريعة على جثتي "   توة بالله شينخبوكم أعداكم إذا مشيتو بهواهم شنوة المفسدة إلي باش تمنعو لبلاد منها يا خويا ماو عبرو على موقفكم وخليوهم يربحوكم بالتصويت في التأسيسي .. تعرفو مليح إنو الشريعة عماد حياة بنادم وإنو التنصيص عليها كمصدر من مصادر التشريع باش يحمي الناس من إصدار قوانين مجحفة مخالفة للعقيدة منها إلي يتعلق بالسلوك وإلا بالنظام المالي والإقتصادي .. دونك أعلاش تخليتو على موقف مبدئي وهل إنو باش تواصلو في نهج التوافق في الثوابت سورتو كيف يبداو رعايا البلاد من أصحااب المحن و المثليين يتبكاو باش تضمنولهم حقوقهم وبرة عاد آش باش يسلكها . 
فمة برشة ملجهال أربكو فكر العامة  بالحديث على ثقافة بلدان عربية إلي مبنية بالأساس على أعراف  خاصة وإثنة للمجتمعات هذيكة ويمررو فيها على إنها سلبية القراءات المختلفة للشريعة .. والنهضة عاونتهم ، الإئتلاف السياسي لمجابهة فلول التجمع وبقايا النظام البايد وفهمناها أما باش يولي عندكم آداء علماني وتنصهرو في التقدمية التافهة متاع إلي ما يعرفو ملقرآن كان سورة الإخلاص فيا خيبة المسعى .
خترتو الطريق  الساهل في مواجهة خصومكم السياسيين .. تنازلكم على أهم رافد لحياة الفرد والجماعة فوط غراف يا سادة ! وحدة مالناس كان عيني بالعلمانيين راني نخبت المؤتمر على خاطر فيه سياسيين  نحترمهم ياسر .. أما نخبتكم لأنكم إسلاميين عاد نستناو منكم تحكيو بيقين العارف بالله ياخي حلفاكم ماو يعرفو إختلافكم عنهم شنوة هتخلويض ياخي جبناكم تعاونو فينا على قبر بونا هربتولنا بالفاس .. أمالة هوكة الجورشي هاك التقدمي الهمام شكركم ويستناو فيكم تزيدو تسهلو عليهم تضمين مجلة الأحوال الشخصية بالدستور .. المسكين يحب بالدكترة يمنع مراجعة أحكامها على الأجيال اللاحقة..  وانتومة أقعدو الدروشو علينا بالحفاض على السلم الأهلي وانساو قول الرحمان "تلك حدود الله فلا تقربوها ". 
بقراركم حسيت بالرسمي قداش بلادنا مفلسة أخلاقيا ، إذا كنتم أبتليتم لدرجة كبيرة لأكثر من عقدين في ميدان نزال ربحكم فيه قليل فما بالكم توة وقتلي المولى مكنكم في الأرض فتخليتم عن نصرة الحق .. يا إسلاميي الحكم إنظبطو بأخلاق السلف الصالح ولا تجعلو من أنفسكم الشر الذي لا بد منه فوالله لو دعيت للإنتخاب الساعة لانتخبتكم على مضض لأنه لا وجود لحزب آخر ذي مرجعية إسلامية  . آداءكم السياسي رديء وموش منطقي دييور تعرفو مليح إلي فزاعة السلفيين سبلة للجيعان بالظبط كيف ما عملولكم فإذا كنتو متحفظين على نصرت إلي عذبهم النظام البايد ووليتو تدعيو فيهم للإنظباط وقتلي هومة يعملو في رد فعل على الإعتداءات  الممنهجة على عقيدة الناس إلي تكررت بطريقة ماصارتش حتى وقت المخلو فيا خيبة المسعى وإذا كان باش تغفلو مشكلة بلادنا الأمنية وعصابات الإجرام المنظم إلي قاعدين يستعملو فيهم باش يحرقو المؤسسات ويسرقوها وتوليو كيف حداثيي البلاد مركزين على فزاعة السلفيين فيا خيبة المسعى . وهاي في لخر نصيحة : 
نهضة فيق الشعب هو إلي ينخب فيك !

Friday, March 23, 2012

تزغررررييييت ..


هنهارين قوادة تونس  بالمفهوم العربي للكلمة موش الدارج المتمعشين من خيرات البلاد لستين عاما والمتاجرين براحة بال التونسيين وبأجسادهم وبأرواحهم وبشرفهم وبقوتهم وبإنسانيتهم .. خرجو علينا كالتماسح إلي تتشمس وكروشها مليانة قلك تونس مسلمة عندها قرون ولم يتم المساس بقيم الدين فيها .. أيا فاضل موسى يسهل : ماو عنا فصل يقول تونس دولة دينها الإسلام أعلاش التزيد وانصو على الشريعة  ؟ عاد سألوه وشنية المشكلة مع الشريعة قلهم الناس مفجوعة من الإنغلاق و من خسارة قيم الحداثة  ومكاسبها التنويرية مع بقاء البلاد حضن عامر بالقيم الإسلامية وأن التضييق على الإسلاميين ممارسة الحاكم وليس نتاجا للحداثة ..
إي ، تونس تعيط ملإيمان يا شيخ فاضل موسى عنا دور ورع نصونو بيهم في عفاف المرا التونسية دو فاسون يصير ركريتمون ممن ضاقت بهن الدنيا ليسسن دور البغاء العلني .. وعلى ما كرمتو نسا تونس ولات السياحة الجنسية سبب في إنو إلي يجي للبلاد يخبي على أهلو إنو جاي لبلادنا وكان تحب نجيبلك إحصائيات من خدمة البريغاد دو ستيب : وحدة وقاية الأخلاق يا شيخ !
تونس هاك حدها من تشبثها بالإسلام يا مرضي الوالدين ساعات تحوس في البلاد تقول دخلت لسينما تتفرج في فيلم للنوري بوزيد وإلا المفيدة التلاتلي .. الجبابن مليانة بالسوكارجية تزبرط حذا الموتى والديار التونسية معمرينها لي زلكوليك والشباب على ما غرقتهم الدولة بالإرشاد الديني يحربشو يا شيخ فاضل .. وعندك الحق توة بالله عنا المدينة الفاضلة على النهج الأفلاطوني شنعملو بحكم المولى 
نغمقو في الربا إن الله غفور رحيم .. يا معلم تونس مسلمة على قوة جهدها ما فيهاش نظام مالي إسلامي باش انخافو من " فليأذنو بحرب من الله ورسوله " ملي تولدت وانا نسمع في رقبة بورقيبة .. في رقبة بورقيبة .. شنوة يا شيخ فاضل موسى ( أونتخ باغونتاز إسمك يقطر تقوى ) تحب تخلف زميم الأمة في أفّير كيف الرقبة أمورك يا مومن .. 
إدّوّخ تونس بالإيمان  يا شيخ .. قرى الآسوآس في جمهورية تونس مليانة بمجهولي النسب إلي يتجرعو في مرارة فقد الإطار الطبيعي لوجودهم شنعملو بمنطق الشريعة في  "أدعوهم لآبائهم " نشرعنو للتبني خلّي تختلط الأنساب  .. والمال  إلي ماشي للعيلة  طبرنات الغنية أولى بيه ...
ووووه على تونس ! صاحبة الإنجازات : الأولى عربيا في نسبة الطلاق والرابعة عالميا ، السابعة في نسبة الأمية و غير مصنفة في البحث العلمي ، مات الشعر العمودي مع الشابي والحديث مع المنور صمادح .. ضاع إبداع الشعب في حانات الدولة ..
بلادنا فايض منها الإيمان يا شيخ بلعمل ولاو ينكتو علينا قلك ندخلو لجوامع بلكارت مانييتيك مادام حداثيي الدولة يتناداو لجوامع فيبرور ويحكيو  على التلوث السمعي الناجم عن الآذان .
وقتل جامع الزيتونة بأمر أبو النسك بورقيبة ثم ضيع القرآن والسنة من المناهج التربوية حتى أن غالبية الشعب لا تزيد على فاتحة الكتاب غير سورة الإخلاص والمعوذتين وصودرت العقيدة وسمي الميسر تنمية رياضية .. والإجهاض لم يعد مسألة أخلاقية و الدياثة صارت رياضة وطنية و ضيّع الناس الحدود وجرأوا على المحارم وكانت النتيجة إنا عشنا عبيد عند أراذلنا ..
قانون الجباية المحلية سكين حافي تذبح بيه تونس في ولادها الزواولة والحال إنو المكس حرام .. عاملين مجلة   تشجيع إستثمار للغنية ومعطلين ركن الزكاة .. تونس مسلمة على قوة جهدها يا كبدي  
تخوف فينا يا شيخ من الدولة الثيوقراطية ( هذه يا صحاب غيغوز معنتها الدولة الدينية ) ! توجدت عند النصارى ونوعا ما عند الشيعة للإرتباط بين رجل الدولة ورجل الدين أما عند السنة فالدولة الثيوقراطية مهياش في الأجندة .. هات نشوفو تره فماش في كتاب ربي ما يؤسس لهذا  النوع من الدولة : بالمستحيل .. السنة إلي هي تشريع من المولى " وما تنطق عن الهوى إن هو إلا وحي يوحى" : مع السنة ، الدولة الثيوقراطية  غير موجودة .. ولذلك يا شيخ الفاضل موسى الكذب على المولى ما عندوش مبرر سانتير نوار سيادتك في الإسلام أمالة تعرف كلام الرسول إلي يقول لا يكون المسلم كذابا !
الشريعة يا سليل الحداثة  كما تقول أغلب مؤلّفات أصول الفقه، نصوص القرآن الكريم من جهة والسّنّة النّبويّة الشّريفة من جهة أخرى. وتمثّل السّنّة شرحا وتفصيلا لما جاء مجملا في القرآن. كما أنّها تطبيق عملي لمختلف أنواع الأحكام التي جاءت فيه (الوجوبات، والمحرّمات، والإباحات، والمستحبّات، والمكروهات). وكلّ ما ثبت صدوره عن الرّسول صلّى الله عليه وسلّم واتّصل بالتّفسير وبالتّفصيل وبالتّطبيق ليس رأيا من عنده، بل هو وحيٌ من الله تعالى. وفيها كل أحكام إدارة الحكم و المجتمع وحقوق الفرد وفي لخر يا تقي الدين شنعملو برحمة العزوزة في كلام ربي إلي يقطع بأن " الحكم لله " 
وأنو كل من يعترض على الإحتكام للشريعة إلي هي نهج حياة العبد المسلم في تقنين مختلف القوانين الوضعية يصح فيه قول الله :
"أَلَمْ تَرَ إِلَى الَّذِينَ يَزْعُمُونَ أَنَّهُمْ آمَنُواْ بِمَا أُنزِلَ إِلَيْكَ وَمَا أُنزِلَ مِن قَبْلِكَ يُرِيدُونَ أَن يَتَحَاكَمُواْ إِلَى الطَّاغُوتِ وَقَدْ أُمِرُواْ أَن يَكْفُرُواْ بِهِ وَيُرِيدُ الشَّيْطَانُ أَن يُضِلَّهُمْ ضَلالاً بَعِيدًا


وَإِذَا قِيلَ لَهُمْ تَعَالَوْا إِلَى مَا أَنزَلَ اللَّهُ وَإِلَى الرَّسُولِ رَأَيْتَ الْمُنَافِقِينَ يَصُدُّونَ عَنكَ صُدُودًا


فَكَيْفَ إِذَا أَصَابَتْهُم مُّصِيبَةٌ بِمَا قَدَّمَتْ أَيْدِيهِمْ ثُمَّ جَاؤُوكَ يَحْلِفُونَ بِاللَّهِ إِنْ أَرَدْنَا إِلاَّ إِحْسَانًا وَتَوْفِيقًا " 


وفي لخر زادة .. مفهوم  ، خايفين على كل تجاراتكم المربحة مع شعب من السوكارجية والمدخنين والمستهلكين وأيضا سياستكم لقوافل من العبيد والمأزومين الذين لا يملكون الدنيا ولا الآخرة لتتربحوا من الحكم بإفساد مؤسسات الدولة .. والله ..سيدحركم ولن تمروا .

Sunday, March 18, 2012

جريح الثورة يتسول العلاج ؟ أي عار !


يقول الراوي وقد شهد صيام أمي وأبي عن الطعام أن أصل الشقاء فيّ أنا .. كانا قد استبشرا بي حين احتظنني أبي أول مرة وسماني محمد الجندوبي ويقول الراوي أنني أدعى رشاد العربي ثم أربكني حين قال عني وائل القرافي كنت خالد و مسلم قصد الله وجهاد مبروك ونبيل الهبلاني وشكري الرياحي وطارق الدزيري  ومنتصر ونبيل الجنداني ..لم أكن أعرف من بين من أعدمت عافيتهم من أكون أنا ..  إلتحف أبي صبره حين سقت هذرات من دمي إسفلت أرض الوطن وولوت أمي بالدعاء . وبعد تأجيل مراسيم تأبيني فرحت أمي وأملت أن يكون مولدي الجديد صفحة أخرى لكلينا .. لعنت رجلي المبتورة  بوجهي .. ووقفت حذو رأسي بفم باسم تصر علي بأن عيشي فضل من الله و تسقط فوق وجهي تلثمني وتديره جيدا نحو عينيها تحجب دموعها عني وتبالغ في تقبيلي عيني وتردد " يا روحي .. ياروحي " كان رأسي فارغا .. معاملة الرضيع تشعرني بعدم الفهم .. تصر علي لكي أتكلم فأرفع رأسي لأرى قدمي .. أرى واحدة فأبهت .. وقد شعرت بالثانية فتلاحقني محبوبتي برأسها وتحجب عني كل شيء عدى أرنبة أنفها .."أمي .. النفس " .. " عيش ولدي قول  حمد لله .. عيش ولدي غيرك تحت اللحود " ..
أشرق بدمعي فتمسك بكأس تسقيني الماء وتتشاغل بي تديرني ، تغسل حزني ، تغير ألمي ، تضع العطر حول وجهي ولا تتوقف حين أشخص بعيني حيث يجلس أبي مهزوما ينتظر دوره ليريحني على الجنب الآخر يخاف تقرح جلدتي فأموت بعد عام مثل محمد بن رمضان .. أتأوّه  أنا فيبكيان ..
ومضى الزمان ، يقول الراوي أنني عدت للعجز وكأنني لم أبلغ سن الواحدة ، وأن من سرق عافيتي ظل طليقا فقد نفى مسيلمة الكذاب خبر القناص وخرج لص البارحة ليقدر عافيتي  بثلاثة آلاف دينار وكان رئيس مجلس الدواب سابقا قد صار رئيسا مؤقتا توافقيا للجمهورية يتقاضى ثلاثون ألف دينار شهريا و أحيط بي المكر وظلت بين يدي ذلك الفاجر " الكاس النوار " .. وطرد محمد بن رمضان لموطنه النائي ليموت بعد عام ..
بحثت أمي موضوع حاجتي للعلاج بساحة بالقصبة .. نبهت عليها أن الأموال العمومية بعد إبعاد الشعب لممتهني اللصوصية لن يكون ممكنا إلا بأمر بالصرف وبعد مناقشة الميزانية التكميلية .. لطمت أمي صدرها  وأقسمت أن تموت قبلي قالت " سأضرب وأبوك عن الطعام لن أفرط فيك يا كبدي بالساهل وليكن لعذاب روحينا وجهة واحدة حكومتنا الشرعية " 
لوظننت أن خيبة الأمل أن تسلب روحك وتعيش غريبا داخل الوطن .. عاجزا أن تسير مرة أخرى تغلق دونك أبواب المؤسسات الإستشفائية العمومية .. ويداس عليك مرتين بالمماطلة : بأن ترى حكما نافذا على الجاني ورجلا صناعية عوض تلك التي منحتك العناية الربانية عيل الصبر بي أنا جريح الغدر وأحاط بي الظن يا أمي لا تجوعي .. ففي وطني لا نزال  نلاحق الصبر لإنسانية لا تأتي فتبا لوعينا النخبوي بما تكون عليه الأولوية .

Saturday, March 17, 2012

جواب مسوغر للحكومة : لا دخل للقرآن في حسابات الربح والخسارة



في تونس طلعوا عنا دي ديتخاكي و عفوا لأني نمارس في سياسة ضبط النفس لأنو ربي قال " إنا كرمنا بني آدم " ما كانش راني جبت لي كاليفيكاتيف إلي يصلح بيهم .. حلوف بو زمزومة أشرف منهم .. ملي مشى بوهم وهومة سيبو هواهم وعبدونا نحن .. هاو مسو من عقيدة الناس هاو جابولنا شيطان عزوز يسب في أم المومنين عايشة ومبعد سكير لحس الشراب لحمر مخو يشكك في خلود القرآن وقدسيته بمماثلتو مع كتابات شكسبير إلي وصفها بالمعجزة وفي لخر جابلنا مسيلمة الكذاب القروي فيلم تاع واحد كافر يجسد الله !
ولاد إبليس مزاهمش , ومبدئيا في تحرك موسادي تاع بني صهيون تعمدوا تدنيس المصحف بتمزيقه ثم إلقائه بدورة المياه الله يقطع أيديهم و أرجلهم ويكشف حالهم كشفولنا حالنا وبعد ما فضحونا خمسين سنة من تحويلهم لبلادنا لبلد سيء السمعة وأشبه بالماخور .. باش يزيدونا  سمعة  النرويج  والمليتار  المهبلة تاع أمريكا الله  يقطع عصابهم ويفضحهم .. اليوم تشد المشتبه فيه والمصيبة إنو عقوبة هذه الجنحة إلي تتزلزل منه السماء والأرض .. القرآن كلام الله تتجرأ عليه نفس واحد جبان والعقاب في الوضع الحالي تافه ولا يليق بذات الله وبكتابه ومع الإسراف في إيذاء مشاعر غالبية الناس من الواضح إنا بحاجة لتجريم الإسلاموفوبيا وبالأساس الترفيع في العقاب .. رئاسة الجمهورية المؤقتة ولحكومة المؤقتة والتأسيسي إلي باتت على خاطرو الرجال في الكياس لا حياة لمن تنادي وكأن تدنيس القرآن وقبله الجامع وقبل ذلك الإعتداء على المصلين لا يثير حفيظتكم فتعسا لكم جميعا إن الدين والله ورسوله ما همش فيكسيون .. الله لا يحتاجكم فهو متم نوره ولو كره الكافرون ولكن تذكروا قوله مهما كان مبلغ إيمانكم " وإن تنصروا الله . ينصركم ويعزز أقدامكم " فالله الله يا إسلاميي الحكم إن الغيرة  على الله وكتابه ورسوله لا تقبل التأجيل ولا انتظار تطور المجتمع وتأصيل قيم الدين فيه أفأمنتم مكر الله  أن يخسف بنا الأرض ...
ننتظر أن تعتمدو الإيماء عن فرنسا في تجريم الإعتداء على عقيدة الناس ولا تكتفوا بتجريم الاعتداء على الاعلاميين الذين طعنوا في الدين وتتفرنسوا في تكريس علوية حرية التعبير لدرجة إعطاء أشد التونسيين غباء ومعاداة لنظام الجمهورية حصانة فعلية فقد كانو سباقين في التحريض على الأمن العام  وكنتم سباقين في تخييب آمالنا في التصدي لمن ينال من عقيدتنا .. فاحذروا أن تصيرو في وجداننا الشر الذي لا بد منه واحذروا أن تختبروا مقت الله !

Tuesday, March 13, 2012

الحقيقة كاملة ببعض تصرف أدبا مع الشهداء




لم يرف له جفن وهو يمضي الحكم بالسجن ولم يكن له لسان حال .. كان الفتى أحد التفاصيل التي لن تعلق بثنايا تردده وليس لتلك الدموع التي غادرت محاجر عيني أمه أية أهمية .. لم يرى تلك الرجفة بيد الفتى ولا بشفته ولم يبد أنه لاحظ يأس العيون من عدالته .. غادر مكتبه متأخرا توقف ليمازح زميلا له ببهو المحكمة كانت أخبار فوز فريقه المفضل تأخذ معه أسبوعا من النقاش والتحليل وإظهار الفرح ثم دخل لمكتب الرئيس ليعلمه بمنطوق الحكم ..
كان بالكاد قادرا على فتح جفنيه ورأسه خادرا يفكر غريزيا بالعطش .. نودي عليه فتقدم حيث أشار الحاجب .. أعلمه القاضي بالتهم المنسوبة إليه وكان بالكاد يفهم ، سأله إن كان متمسكا باعترافه المسجل عليه وبالكاد سجل عليه إنكاره و أذن لمحاميه للمرافعة ..  إلتفت عله يرى أمه فنهره القاضي  : وين تستخايل روحك ?! .. إنتبه إلى أن لوعة قلبه لدموع أمه زادت عناءه من جفاف حلقه .. كان سينخرط في البكاء لبكاء أمه .. جذبته يد السجان وتم أخذه نحو غرفة التوقيف لم يتمكن من رؤية أمه وسمع عويلها وصوت القاضي وهو يطالبها بالهدوء منذ أشهر لم تره فأنى لروحها أن تهدأ .. 
كان رأسها خدرا .. خرجت بعد أن أخذ حبيبها من قاعة الجلسة كانت عيناها مجهدتان من الألم أسرعت إلى باب الخروج حيث كانت شاحنة السجن في انتظار المساجين ... بلغها الصوت 
" إبعد يامرا .. إبعد يا مرا " ترجت الصوت أن تعطي إبنها أكلا .. قال الشرطي : "ممنوع هزلو للحبس " . " يا ولدي سبعة شهر مانعين علي الزيارة " جفل لحظة ثم قال " ما تخافش راهو يوكلوه " وضعت يدا مرتجفة على خدها الزلق بالدموع وسمعت نداء حبيبها " يا ! يامي  ! " 
ولولت .. يا كبدي وغاب صوته داخل الشاحنة .. " وخر يا مرا وخر " كان السوط قاسيا فخرت مغشيا عليها مستسلمة لعذاب الشهور الثمانية .
جلس في ردهة المحكمة ينتظر التصريح بالحكم المنتظرة  قسوته ، كره مهنته في هذا البلد المهلك لشبابه كان خلال المرافعة  قد رأى في عين الرئيس ذلك التحفظ البارد وفهم . بذلك القانون الإرهابي المقاوم للحرية كان الفتى في مرمى جورين قانون لمقاومة الإرهاب وذلك القاضي المنسجم جدا مع النظام .. كان يشعر بالألم و بحرارة بعينيه .. كان الخدر برأسه .. لا يكاد يعتاد قسوة انتظار التصريح بالحكم .. سمعة الدائرة لا تنذر بخير .. قرر الخروج لشرب الماء كان الإنتظار يكاد يخنق أنفاسه .
عفونة السجن ووحدته كان يبكي بحرقة إغماء والدته بالشارع .. أي شيطان جعله يستطلع ذلك الموقع  لمجاهدي العراق وانخرط في البكاء .. " أمي .. أمي ، كان يحس بأنه في عمر الخامسة واشتاق إليها" 
تقدم من الكاتب .. نظر  إليه من خلف زجاج النافذة .. فتح ملف القضية وقرأ " وسجن المتهم (  ) مدة ثمانية أعوام من أجل ..كسجن المتهم زيادة على ذلك مدة أربعة أعوام من أجل ...
مسح عرقا باردا وبلع ألمه وخرج لوالدة الفتى بكلام جامد عن إستئناف الحكم !
ماتت كمدا بعد شهر من سماعها بالحكم ، كانت الملائكة تتحلق حول جسدها تزف نبأ إستشهادها للسماء .. لحقها زوجها الفحل كان تونسيا بقلب أم رؤوم وبالجبانة إجتمعا بدون أي زيادة دراماتيكية عن الواقع ..
ضاع الفتى داخل الحبس وماتت روحه ..أماتها القانون الإرهابي وطموح القاضي للترقية ثم مات الفتى .. الآخر شوقا لأمه . ( الإهداء إلى روح كل شهيد قضى تحت نير قانون الإرهاب الذي لا يزال وصمة عار على جبين تونس الثورة )

Sunday, March 11, 2012

الكزدغلي من القطب الحداثي لحركة التجديد : أيقونة السقوط العلمي بالتأكيد




في بلادنا هليامات عملية لإعادة إنتاج تونس تاع بونا الحنين إلي بخلفية إنقلابية تم تهريبو بقوة التخويف للسعودية ملي كانو معاه في البوفوار ، بحيث تم خلق فزاعة السلفيين وردو بالكم لتخويف الخارج  وقلة من العاملين بمؤسسات الدولة والهدف خلق جو من التشاحن الإجتماعي حتى تتوصل  ذات الفئة السياسية للوصول  لحكم  الدولة من جديد وما فاتهم أنو المجموعة الوطنية لا تبادلهم الخوف  وأنو بوهم الحنين كان في الحكم وقتلي حسب شهادة رئيس المخابرات السابق كان يمشي يهز كعبتين غروناد و كلاشينكوف للمجاهد الأكبر إلي زفر ترينوه بالقوي ويقلو هانا شدينا الخوانجية وظبطنا عندهم السلاح ..  كسب بهذاكه تسميتو وزير أول وشد رئاسة الدولة من مبعد قام وقتها باستعمال مؤسسات الدولة لارتكاب أبشع جرائم التعذيب والقتل ضد الإسلاميين ومبعد والا يستعمل فيهم للحصول على الدعم المالي الأجنبي باش يكنز الفلوس وبالطبيعة يتأبد في الحكم . 
الذاكرة الشعبية أكيد باش تقعد تتفكر آلاف الشباب إلي دخلو للحبوسات و تحطمت  حياة عايلاتهم لمجرد إنهم دخلو على مواقع إلكترونية ومن ذلك محاكمة تلامذة من معهد ثانوي بجرجيس على أساس قانون الإرهاب فضلا على ما أكده مدير المخابرات الأسبق من إفتعال النظام لعمليات إرهابية .. 
اليوم الحثالة السياسية الفرنكوفونية وغير الفرنكوفونية يا عم الطاهر هميلة بهدف تعكير الصفو العام  ولاو يخوفو مالسلفيين إلي ما وصلوش بلادنا بشر وتاريخ دولة الفساد في تاريخ تونس يؤكد ذلك !
يا سيدي بالكشي آنا مندسة تسلحت بالسوبجكتيفيتي وجيت نحامي على عباد ما يعترفوش بالدولة القطرية .. 
البرهان على إنو فكرتي أوبجكتيف هو  واقع الدولة الحالي ،  نشوفو مصدر الإعتداءات على الأمن العام الممنهجة وذات الصبغة الجنائية من نهب للأملاك العامة والخاص والإعتداء  بالحرق على الأملاك  العامة ملي كبد المجموعة  الوطنية خساير بالمليارات إلي وراها عصابات إجرام فمة شكون يمول فيها وإلا جات على خلفية هروب مجرمين من السجون بمحكوميات كبيرة ما ضاهرلي تهديدات الفكر السلفي  المناهض لدولة القطرية يمثل واحد على ألف من مخاطر أذناب التجمع الي بزوز سوردي فتنو بين زوز عروشين بمجرد زعم إنو سيقع إنتداب ولاد عرش بنسبة أكثر  ملعرش لاخر والنتيجة كانت سبعطاش  ضحية ولليوم تم التعامل مع الواقعة إلي أشبه بعملية القتل الجماعي والإرهابي على إنها حادثة عابرة ومع إنو كل التجمعيين ماعدى من أسند له الإنخراط بالسيف وماعمرو ما نشط سياسيا كانو آداة هامة لإرهاب الدولة وحاليا منخرطين  بقوة جهدهم مع ماعون  صانع التغيير من أمثال كمال مرجان باش يعملو عمق شعبي في أوساط  اللحاسة وولاد الشعب والتنسيق الحزبي وهاي لحيتي كان حركة التجديد في الإنتخابات الجاية ما توليش زابا بيس تخوف  في المواطن من الخطر الإسلامي .. أمالة لا ! إلي هلكو بلادنا وحطمو سمعتها بين الأمم ولاو يفتيو بالخطر الداهم على الدولة باعلام ساقط في حساب الوطنية ولاو يدروشو علينا و يعتمدو عملية بروفوكاسيون ممنهجة لإهانة لناس في عقيدتهم ويقلك السلفيين  خطر على تونس .. بأمارة ماخرجو ضد هاك الملحدة الجرثومة إلي جاتنا من فرانسا تسب في  المولى مع إشهار من قناة جهلبغل ولا زادة هسلفيين ميشونات كيفاش يخرجو يعبرو  على غضبهم من بث فيلم فيه  تجسيد للذات الالاهية وتحريض واضح على الفجور وخدش الحياء العام والمساس بالأمن العام ومع ذلك كل إلي تخرخطو في العلم واعتبرو ما قام به ذلك السلفي طامة كبرى في حين إنو جنحة يمكن إنو بعد التثبت من سوابق المشبوه فيه ووضعو الإجتماعي إنو يقع تمتيعو بظروف التخفيف إلمنصوص عليها في الفصل 53 من المجلة الجنائية ! 
آكهو مزاهمش التخويف من قضاء الإسلاميين على مكاسب المرا التونسية بما في ذلك إستمرار عملها  بدور البغاء العلني وبرامج التلفزيون الواقعي في أبحث عن أمي  ولاو السراق أعداء الحرية يسبو في السلفيين للتخويف من عموم  الإسلاميين  .. 
آنا في الأصل ما يروقنيش إقامة محاكم تفتيش في ضماير الناس هذاكة علاش كتبت هذه التدوينة لأحد أشرف الفئات الإجتماعية في تونس ولأنو تمت مطالبتنا بطي صفحة الماضي تاع أعتى مجرمي تونس من عصابات حزب التجمع إلي عملو أحزاب إيكرون لأعمالهم  و تاريخهم الاجرامي و زادة باش نستذكرو جميع شكون عدو الشعب إلى كان يلقى يعملنا مصلي كوشة وفي لخر كل واحد وفكر نشالله يول عنا ساكت تاع هندوس .. أما التفكير الإقصائي تاع قوادة الحزب والسراق إلي قعدولنا بعد بوهم الحنين فتنجمو تعملو بيه ضميدة في انتظار إلتحاقكم بمزبلة التاريخ 

Friday, March 9, 2012

مضى عام






مضى عام .. وفي بعض الزمان من ذاكرتي للاجهاد في أناي انك لم تعودي .. ذلك اليوم من البارحة أذكر ، ما أطيب آخر الأمن معك وروحي لحظة صفو بسيط معك و كلمات قليلة تبادلتها معك .. وما احلاك انت و لم يعد منه سوى ذاك .. الألم  .
البارحة أذكر ، لم يكن يهمني كيف يفسر الشوق ما دمت معك . للالم هذا اليوم عنوانان الاشتياق ورغبة في بعض الإهتمام منك .. كيف أطلب أكثر ولطالما أعطيت ..
يكاد يمضي العام وقبل اليوم كنت .. وأنا الموصومة بانسانيتي غافلة عن نفاذ العمر معك فقد صار العيش  بعدك غربة .. ينفذ الفهم والصبر إلا الحزن يبقى ..
يا أيها الليل تمهل ، لي كلام أقوله لحبيبتي قبل أن تغفو مطولا .. ليت العذاب لم يكن بهذا البأس ... هل أذكر حين جاء الصباح وتلك  الدقائق .. أنظري الفوضى تعم رأسي ، ولو ظللت لأمكن لي أن يهدأ جزعي ..
مضى عام .. طال الغياب ، وكلما شرق  الصبح بسباتك إنكسرت أنا و ضاع خطوي بغير مسافة عدى الإنكفاء نحو الفراغ وانتظار المضي حقا .. يرتبك النهار من المالوف  الذي لا يجد بد بركة عينيك ولطف يدك الحانية ويختلف  علي الإدراك حول سنين عمري .. 
البارحة أذكر أن يديك مالتا وسقط معهما اللطف كان المنزل هادئا و بنفسي الملتاعة كنت أرقب الغربة كمارد يلتهم روحي وأنا لحظة جلوس مرير إليك ظللت أرتاب إغماضة عينيك وقد عييت بعد بالفراق ..
يا أيها الصباح إجمع كل سفسطائية العبارات .. وتعال بعد عام لنجلس كلينا إليها .. وخذ بخطوتي لتتأهب للصبر لحظة عناق لصفحة الصبر البارد .. وملل علي ريب  ما لا أفهم من إرهاصات نفسي وصد عقلي لبدائية الجهد .. وانظر ليتمك يا أيها النهار فأنا أجتمع بها داخل وجدي أما أنت فكلا ..
سألني الطريق ذات وجوم على خطوات بر لحبيبتي بقدميها المجهدة ، وكان شهد آخر خطوها وأطرقت الرأس نحو جزعي لن أجيب فحبيبتي ترقد منذ عام حيث تستوطن منزلة أولى للآخرة وأنت يا أيها الطريق قد عيت حبيبتي منك فخلعتك وكان لها من الفضل والحياء والجهد وجمال العطاء ما جعلها ترحل عنا كلينا  !
مضى العام وبعد الفجيعة عييت من الدنيا .. وتذكرت ثبات اللطف فيك ولم أتفاجيء من وجيعتي .. حيث يألم المحبون من الفقد أألم أنا .. إبتليت بفقدك وقد أمليت الحمد مرة بعد أخرى هو فضل منح إليك   ولقيت روحه أنا .. 
حيث ترقدين أي أمي تثبت مهجتي و تلك نعمة أخرى .. يا أيها الصبر تمهل لا تتلبس قلبي لا شأن لي بك .. طب أيها الثرى بحضرتها .. سبحان الحي الذي لا يموت ، و الحمد لله من قبل أنك أمي والحمد لله على نعمه عليك .

Monday, March 5, 2012

لن أقسم على هذا


رجعت أدراجي و نظرت جيدا لم يكن عسر الانتباه يخالج ادراكي بالوهم ..كان ذلك الرئيس على مرمى حجر يعانق فتى أشعث أغبر و يربّط على ظهره و الفتى يتملّص ينشد الفكاك منه فهناك حريف ينتظر شراء كيس أسود بمائة مليم ... لم يكن يسع الصبيّ خسارتها .. تسمّرت حيث أنا .. أفرك عيناي و أقرص وجنتي الممتلئتين من البدانة .. و راجعت نفسي..هل شربت شيئا يا بنت ..لم أشرب غير قهوتي الحلوة ..و كان الرّئيس لا يزال حيث هو يعانق الصّغير و الفتى يتلوّى.. كان الأمر على درجة من الجسامة لم يكن هنالك على مرمى عيني حرس و لا شرطة فقط روّاد السوق من بني جلدتي المبالين بحبات الطماطم والبطاطا ..و حادثت رجليّ المتسمرتين فضولا أسرعي بالمضي يا مجنونة .. حين انتبهت لتركه الفتى و تقدّمه نحوي كنت سأبدأ لحظات جنون مراهقة التقت فنّانها المفضّل مع تعديل في المقاصد و الأحاسيس ... صرخت عاليا و جريت في الاتجاه المعاكس ..تعال يا فتى ...لا تذهب .. مدّني بكيس أسود ..
 (هذا البوسط كبته في ديسمبر 2009 للمخلوع أما اليوم فلن أستغرب قيام رئيسنا الحالي بما كنت اعتبره ضربا من الهلوسة ) 

Saturday, March 3, 2012

ذيل الكلب واعلاميو العار : الملهاة

البارح كتبت بوسط عايلي على قوة جهدو بالامارة حضرت روحي باش كيف سخافيي تونس نتمسك بحرية التعبير.. برقشتو منا فسخت من غادي ! النافع ربي .. ايا قلت أش فيه بأخي كلام جايبتو من عندي ؟ بالله كيف يخرج معز بن غربية ويمد وجهو من جديد في التلفزة .. تقول هاو باش يهبط على ركايبو ويطلب السماح من شهداء ما قبل 14 / 1/2011 وتستنى القمح من باجا أش يصير تلقى روحك فاص أفااص مع ذيل كلب ! نحن عم الطيب وهو عم الطيب ورجع للمنزل فرحا مسرورا ! يا بوقلب صنايعي بالضبط كيف ولد مخنان مع فوشيك باني باني في رحبة علالش يرمي ويفصع .. بالله كيف تجيب متحدث باسم وزارة وتقلو هاكم ذكرتو الرعية بممارسات النظام البايد .. شدو عندكم يحكي. على إجراءات ضبط المشبوه فيهم في حرق ونهب الأملاك العامة والخاصة في بوسالم ردو بالكم الخدمة الاصلية تاع الضابطة العدلية هي إحضار المشبوه فيهم وفي العادة هذا يكون في الجنايات وفي العادة تكون الأبحاث العدلية متواترة وأكيد انو في بلاد صغيرة كيف بوسالم الناس تعرف بعضها الشرطة عندها قائمة في المشبوه فيهم سواءا من تصريحات المتضررين والا بناءا على معلومات مستقاة من المخبرين .. جاوبو المتحدث قلو عيب تقول النظام البايد ( سي نورمال الناس ماخذة الريسك وتخدم على روحها ) قلو تي هبطو على ديار الابرياء وقتها عرفت انو اعلاميي العار عندهم هوديني والا صانع الطيب عمار الله يرحمو ونحن ما في بالناش اذا كان حاكم التحقيق والا النيابة العمومية ما تحدد شخص الجاني الا بعد استيفاء الأبحاث مع مجموعة مشتبه فيهم .. معز بن غربية كيفاش عرف الي حملات المداهمة شملت الأبرياء : واحد خدم مشعوذ ، اثنين بهاماس ، ثلاثة إعلامي من طينة الخزي والعار الي عنا منهم ياسر وقاعد يمارس في هجوم مقنع على الحكومة باش يشحن العباد ضدها ، في تونس الإعلاميين والمثقفين والأكاديميىن ناقصين ياسر في حكاية الإبداع هوكة علاش عنا كعبتين مؤرخين وشعراء وأدباء ومسرحيين من طينة العمالقة شادين بيهم رواحنا باش ما نقولوش فيها ووووه ! اما في الصحافة المرئية والمكتوبة فالنجمو نندبوهم وما يلوم أعلينا حتى حد ! اما بعد انتخابات التأسيسي ومبعد النقص في الإبداع بنادرية البارح ولاو ابطال اليوم ، موش في البوزيتيف أكيد لأنهم فرززو و وانما في التامر على امن الدولة وخدمة أسياد البارح فلم يحتفو بالحرية ولم ينظمو شعرا للشهداء ولم يشجعو الشعب على الصبر على دولة الخراب التي خلفها الفاسد الاكبر ومن بعده مرجانة وعلي بابا. وانما انضموا الأربعين حرامي .. اعلاش هاك النهار بالسيف علي نسمع في هاك المفلسة من طينة هيفاء وهبي بثينة قويعة ومبعد ما ندبتهم على إحساسها بالقهر السياسي بصريح العبارة تاعها خذات اتصال على المباشر من مواطن يعيش على حدود دزاير مع خمسين نفر في دوار قتلو احكي لنا حكالها على معاناتهم مع الثلج والبرد ونقص لي مينيسيون قتلو جاكمش شكون من الحكومة قلها لا قتلو جاءكم في الانتخابات قلها لا قتلو مشيت نخبت قلها اي هبطت لغارديماو نخبت .. أيا انهات معاه المكالمة وطاحت تت.. هكذا إذن حال التونسي المسكين لا يجد من ينتبه اليه وهو لا يجد خبزا لأبنائه وعود كثيرة ايام الانتخابات (موزيكا) هزوهم في الكيران شينخبو.. (موزيكا) واليوم لا احد يذهب الحقايق يتركون ليموتو .. على المباشر التسخين وقلب الحقائق والتزفريت والتعليق الي لا علاقة مع شهادة المواطن جايحة قدرها المولى في اعتى الديموقراطيات يقبلوها كقدر ولات مسكونطية على حكومة ستين يوم من اول نهار جيشنا الوطني والحماية في الثلوج يفرقو في الخبز والغاز وغاطسين في مجردة ويلحلحو بالمواطنين باش يسيبو الديار والسخافيين اليساريين والا تو سامبلومون المزبلين يعملو في سكوبات على إخفاقات الحكومة .. معز بن غربية اركب في زودياك مع الحماية معنتها وقت الي ارتفع منسوب الماء في المجرى الطبيعي الجغرافي لواد نابت في دزاير عدا تم أوساج يندد فيه المواطن برئيس الحكومة ووزير الداخلية ويطالب باش يهبط لو للبلاد ! ا لا ليميت المواطن عندو الحق روفز يخرج من دارو وقت الي تشحتوه الحماية والجيش .. الجمهورية ما عملتلو حتى حل من عام ستة وخمسين لعام 2012 اما زمعة معز بن غربية كيف يعلق على انو كيفاش رئيس الحكومة مشى لستاد بهيليكوبتر زعمة سنية غريبتو : يحب الخليفة السادس يهبط يمقدف في زودياك والغارد كور يتشتشو كيف الحوتة بحذاه ، يحب الخليفة السادس يفرحو بيه لي بارتيزون تاع الوطد في بوسالم ويرفع ولو التحديات على النهج النوفمبري ويتشتش هو كيف الحوتة ! معز بن غربية يعمل في اليوغا على المباشر باش يوري روحو وليدها ووطني كيف قائد السبسي ! السخافي صاحب التاريخ المخجل تناول ردود الفعل الشعبية على اعلام العار وطرح سؤال حول الأسباب عاد زميلو بن حديد عطاهالو قلو فينا المورطين في دماء التونسيين : حمارو. وذنيه وبلعها وسكت ! قبلها شوية يدز في كتافو على زيتون قريب يكش اعليه كيف ايام المخلوع ويقلو : أنا ندير في الحوار ! غصرو حول موضوع السيادة الوطنية في انتداب فنيين قطريين في ندوة أصدقاء سوريا كيف شرحولو الموضوع والسكوب تاعو حول العمالة لقطر طاع فيشك باني باني هبقط رأسو كيف الخراي وسكت ..عدنان المنصر ياسر حليم كليشيات قديمة تاع جهال بابجديات تأطير المعلومة وتنزيلها في إطارها واسأله موجهة و إدارة حوار تاع بهاليل .. ويقلك شبيه الشعب مقاطعنا ومغشش سامحكم كيف بعتوه وسبيتوه وجرمتوه وحتى في همو طفيتوه لا همكم ملف الفساد المالي ولا المال العمومي ولا الأربعين حرامي ولا مجرمي التهرب الضريبي ولا ملف الثنين وعشرين الف الي في الدول الاوروبية والبحر ضاعت حياتهم وما همكمش تشحذو همة المواطن باش يصبر حتى واحد منكم ما خمم باش ياخو بالتحليل أدبيات المرحلة التأسيسية في بعدها القيمي والاجتماعي والقانوني لا عمل تو نهار بلاتو كبوت فيه الأكاديميين يفسرولكم الي في هل فترة استمرارية الدولة لا تقتضي وجود معارضة باعتبار انو بالمنطق البلاد تسيرها شبه حكومة تصريف اعمال والباقي الكل أحزاب و مجتمع مدني ننصرفو للبناء ورفع انقاض دولة الفساد .. شرعية الحكومة في عوض ما تكون حافز على تطمئن الناس الكل ولات سبب للمسائلة كلي هومة خدمو مع المخلوع ونحن ما في بالناش وأزلام النظام البايد يحكمو فينا وما في بالناش واعلاميي العار هومة الي كشفوه ، صبعطاش مواطن ماتو تحت الساقين حتى ملف ما تعمل عليهم .. دعوة لانفصال الحوض المنجمي من عدنان الحاجي وهي جناية ما أثارت حتى رد فعل من اعلام العار تكديس الزبلة نتيجة اضراب عمال البلدية لمدة اربعة ايام للمطالبة بزيادة من و الفساد الحكومة ما يقلقش اعلاميي العار والفساد المالي ما يهمش اعلام العار ملف قتلى الثورة و الجرحى ما يثيرش اعلام العار .. ملفات لجنة تقصي الحقايق ونتيجة أعمالها موش مهم باش تعرفوه تستعملو في المرافق العمومية باش تعملو لا سيادكم بروباغندا إعلامية تبينو فيها فشل الإسلاميين كلي وحدهم قاعدين يخدمو. ولا دخول على امارة موناكو وهتكوها التجمعيين والمرتزقة تاع الشعب هاجرو من تونس ومعادي يمثلو خطر لا عاد حسب نظرية سيدكم قائد السبسي عاد هذوكمة شملهم العفو الأميري تاعو والمصائب الإسلاميين هومة الي هتكا البلاد هل خمسين سنة الي تعداو سرقوها وجهلوها ونهبوها واستعبدوهم شعبها اي هومة سبب المصائب إمالة نركزو عليهم ونرفعو شعار لن تمروا . في اخر الحلقة طلع الإعلاميين في تونس كيف المومس الي زفر عليها الترينو طول لها المولى في عمرها عوض ما التوب قررت تولي بناكة في الماخور تنظم الحرفاء للوافدات الجدد الشعب الي اعتصم قدام البنفسجية سبعة في انتظار تكشف حقيقة الأسياد الجدد الي يخدموا فيهم جماعة تونس سبعة مندس وملثم والعيب فيهم راو خاطر التسامح الي خلالنا مدلسي البارح هو عيب كبير ارتكبو الشعب في حق نفسو ! غيغوز تتأسف للقراء على دونية الصورة اما مادام الحديث على اهل العار والا وطنية ما ينجم الادب الا يتنفس بالباي في انتظار كشف الغمة يعطيك دودة يا بثينة قويعة قداش أسلوبك التدليسي على المباشر منحط ! تحبو الحق بوسط البارح طار قبل ما تسجلون خير ولا نلقى روحي في قلوب هذا هاو عايلي سلام يا وطني المسكين