غنّوشي .. يطوال ليلها وتعلف !

بيان الداخليّه : ثلاثة موتة  تم إستعمالهم كدروع بشريّه من طرف أطراف مشاغبه .. ووووووووه على جد بابا ورقدتو  . ياخي يا داخليّه  الأطراف المندسّه مسلحين بالكلاشنكوف جايينكم ملغمين عاد سيّبتو  عليهم الكرطوش الحي وفي عوض تقتلوهم قتلتو الصغيرات إلّي مروحين مالّقرايه .. بيان الدّاخليّه يندّب الخدّين بالطبيعه الماسونيّه قاعده تخدم على روحها في البلاد. وقتلان المدنيين العزّل إنّجموا نخرجو كيف نبداو بناي كلب ونقولو كسرو ونهبو وأحدثو الشغب وتلزّينا للحمايه باش نقتلوهم ..حتى شي ما يبرّر إستعمال الكرطوش كيف إنّو إستعمالكم لحكاية المليشيّات ولّات حكايه إتضحّك اللهم ولّاو يخدمو لحسابكم بدليل إنهم ما ينشطو إلّا ما يبدا فمّه تحرك شعبي سلمي للمطالبه بالحقوق السّياسية دونك مهواش بلّوشي يخرجو المجرمه تحت غطاء أمني باش يسرقو ويحطمو الأملاك ويبرروا الإعتداء بالأسلحه النّاريّه على المحتجّين السّلميين  ..الكل شفنا كيفاش الأعوان من فوق سطح الدّاخليّه بداو باستفزاز المتضاهرين ورماو عليهم الحجر إمبعّد جاو السرّاق والمجرمه ولاو يضربو بالحجر وكيف دخلت بعضها بداو يسرقوا في المحلّات وقد حاولو المتضاهرين منعهم رغم رشقات الرصاص المخيفة و قنابل الغاز الخانقه إلّي كان البولسيّه والجيش لاهين في إستهداف الجميع بيها . وينهم الجيش آش بيهم ما حماوش المؤسسات إلّي واقفين قدّامهم  حتى بمجرّد سد منافذه بآليّاتهم الكبيره لمنع المشاغبين من دخول محلات النّاس وسرقتها أو حرقها المصيبه إنّو أكثر من حداش ألف مدان تم إخراجهم من السجون إلى جانب الآلاف من عناصر المليشيات لحكومه وأجهزتها إمبعّد أكثر من شهر ونصف ما عطاطنا حتى أرقام على للّي تم القبض أعليهم أو إلّي سلموا رواحهم ..  المجلس الأعلى العسكري في مصر الوطني قام بالرغم من دقة الوضع في مصر وكونو عندو حدود مع الصهاينه بالقيام بحمله كبيره لإعادة المجرمين المدانين للسجن ومبعّد ما فرّق مضاهرات سلميّه ما غير وقوع حتى جريح قدّم إعتذاراتو للشعب على سوء المعامله .. ونحن الدّاخليّه قريب تحكيلنا بلوغة الملثّمين .. تي لا ! تحكي معانا بلوغة الدّروع البشريّه قولش أعلاهم أعوان الدّاخليّه الفاشيين والفاشلين ( فمّه زوز أصناف ) قاعدين يحاربو في مسلحين عملو هجوم بمدرّعات عليهم ؟ إلّي صار جرايم قتل بدم بارد ومرّه أخرى إلّي وراها الحكومه غير الشرعيّه التي نصبت روحها علينا باش تحتل منصب الجلّاد الجديد . بالعربي و ملّخّر دجاجة ممّاتي يرحمها عندها شرعيّه أكثر مالحكومه الغنّوشيّه ولا بد من محاسبة كل الوزراء بمن فيهم الغنّوشي على دورهم في الفساد المالي إلّي تعرّضلو  المال العام خلال إشرافهم على وزارات حكم بن علي وإحالتهم على القضاء مع مديري المؤسسات العموميّه والمشرفين على الصفقات العموميّه على معنى أحكام الفصل 95 و96 و 97 و 98 و 99 و 100 و 101 من المجلّه الجزائيّه وملّخّر بالكل غنّوشي يا براين دييييقااااااج ويطوال ليلها وتعلف الدّم ما يمشيش بالسّاهل :/

الأمن والزّطله ..حوّس إفهم

توّه نعرف إلّي موش معقول إنّو نجبد على حكايه موش مهمّه قدّام ها الحظة التّاريخيّه إلّي يعيشها الشعب التّونسي في النّضال من أجل الحرّيّه والقضاء ومحاسبة الفاسدين في البلاد ،أمّا الشيء ولّا مستراب ومعّادش فيها،  يلزم نحكي ..أوّل حاجه أنا من مناهضي كل أشكال الإدمان وبالطبيعه ما نراش مانع إنو يتم تجريم مسك أو إستهلاك الزّطله أمّا إنّو يتم منع القاضي من الإجتهاد باعتماد آليّة شخصنة العقوبة وإنّو قانون 1992 يمنع القاضي من إنّو يهبط عن عقوبه بعام حبس و مليون خطيّه هذا إلّي حارقني وزاد حرقتي تضاعف أعداد الشّباب إلّي تقع إحالتهم على المحاكم لمعاقبتهم من أجل الإستهلاك والمسك بنيّة الإستهلاك لمادّة مخدّره مدرجة بالجدول ب ، شباب عادة في بداية العشرينات نقي السّوابق العدليّة متمدرس في الثانوي وحتى في الجامعه تراهم واقفين واجمين كيف العصفور المذبوح كابريس دخّلهم للحبس لعقوبة ما تنجّمش تقل عن عام ... قبل كنّا نشوفو وضعيّه وكان كثّر ثلاثة في الشهر في المدّه لخرة ما أقلّش من عشره أنفار كان موش  أكثر في الأسبوع ، شبّان ضارّين رواحهم  إي نعم أمّا زاده هومه ضحايا موش مجرمه ،تبدا لحكايه بارتجال أعوان الأمن في الإسترابه في شخص ظهر عليه الإظطراب كيف شافهم وتنتهي بتحليل واعتراف وولاد وحتى بعض البنيّات إلّي يدخلوا لصورة جد قبيحه في التّعامل مع المجتمع موش أقلها الإحساس بالإضطهاد خصوصا في الوجود داخل نطاق تنفّذ مؤلم  لبعض المجرمين القساة ولكن زاده إنهيار مستقبل نتيجة لحظة تهوّر ..إلّي لفت إنتباهي إنو أعوان الأمن في مدّه وجيزه تمكنو من إرساء الأمن في البلاد بحيث شدّو القنّاصه الكل وتعرفو على عصابات السرقة إلّي تَرْكوا أصحاب المليارات في الدوله بالإستيلاء على المحلات التجاريه واتعرفوا على المخازن إلي مخبّي فيه المسروق ورجعوه لمّاليه ورجعت عجلت الإقتصاد كيف ما كانت . كما تمكنت قوّات الأمن الدّاخلي من إلقاء القبض على كافّة المخطّطين لإشاعة الفوضى في البلاد والمجرمين الذين تم إخراجهم من السجون  وشدّت إلّي خرجوهم وقضات على كل المحرّضين على الإنفلات الأمني وما قعدّلها كان الشباب إلّي غر بيه الشيطان وحب يجرّب الزطله واااعجبي :/  !

محمّصة أمّي وحكومة الغنّوشي :هي ّ هيّ

حلّيت عيني ليوم تاعبه ..حاجه عاديّه آنا ناقصه وزيد الثورات إلّي بداتها بلادي زادو على مرمتي ..ما نرقد في اللّيل إلّا ما نطّمّن  على الثوّار والزّزيره ، يحط قلب المعمّر غدوه نمشي نشري ريسيبتور جديد . ونعدّيها ليله كامله كولني ناكلك مع روحي وساعات مالتخلويظ في النّوم يجيو دارنا يتفقدوني وياخذو منّي وقت مستقطع ..حلّيت عيني نخمّم في الحكومه المقّوته و طول جا في مخّي محمّصة أمّي ..إزّوز يشبهو لبعضهم حتى واحد في دارنا ما يحب المحمصه ما  عدى أمّي وهذاكه أعلاش تطييبها في الدّار إستثنائي ومباغة خمّموا حكومة الغنّوشي ماهي كيف محمّصة أمي إستثنائيّه ومباغته يجيشي لبالكم يا توانسه إنو راجل المرحله هو سي بِنكِي إلّي جاب أعليه زابا  الماء مل عين .. تي نقصد الفلوس مالبنك المركزي لمغّارتو في سيدي بو سعيد أعععععع ...الرّاجل إلّي حليلو مسكين معدّي 15 عام في خدمة الزّابا السرّاق باغتنا كيف أمّي بفيض مالوطنيّه إلّي ما يهضمها حتّى تونسي وقال إلّي هوّ يحب يمنّع تونس مضياع والفراغ وباش يعتزل السياسه بعد ما يحضّر للإنتخابات وووه على بابا ووووه هذاكه إلّي مزّال فمّه مثال موش محترم هاو مانيش باش نقولو . محمّصة أمّي إطّيبها ساك ..ما معاها شي بلعاني باش ناكلوها بسّيف .. حكومة الإستبلاه حاشا إلّي فيها وعلى نيتو ..جاتنا ساك لا معاها صحيّن تونسي لكل مواطن ولا خمساميات مليون .. لا حل لمجلس النوّاب والمستشارين ولا والو ـ إتّجمّعيست إلي ساهمو في خليان لبلاد و قتلان لعباد مزّالو يخلصو في الشهاري من مال الشعب ـ الدّستور الملعون إلّي ساهم في تحويل رئيس البلاد وعايلتو لعلي  بابا والأربعين حرامي مزّال ما تعلّقش العمل بيه . الحزب إلّي خلّانا حاسّين رواحنا رعايا عند فرعون وزميمو سرّاق و يديه إمّسخين بدم التوانسه مزّال ما تحلّش ..حكومة النوايا الحسنه تعوّض في أهل الشّهداء من فلوس الميزانيّه قبل ما تعطيهم أسامي إلّي قتلوا ولادهم وآمروا بالقتل . فريعه إلّي عالخلوط أعمل منع جولان والكرطوش حصد من ولادنا الميّات حر كيف العصفور وعمل حزب خذا تأشيره وسمّاه كان المعلومه صحيحه الوطن , وعود بالمحاسبه .. حكومه ساك ،عيّنها واحد رغم أنف عشره ملاين عبد فالبلاد ويتلفّت مغشّش يتهمنا بلّي أحنا نحبو نقضيوا على البلاد ..حكومه ساك فيها وذره آآآآه يحمروا في وجوههم أعلينا ويقولو إلّي نحن كيفهم وقتلي كانو في المعارضه "نشوشو على الحكومه" أيواه يا متاع لحكومه!  إنت براس لحنينه والحقوق إلّي قريتها نهار 14 مارس إذا كان ما عندكش إفّاد وقعدتو إيجه غنّيلي حكاية لحكومه و تكلّم على سيدك حمّه الهمّامي وقول أعليه يحب يحكم بالسّيف .محمّصة أمّي بالرّغم إلّي هي مباغته واستثنائيّه كيف لحكومه الغنّوشيّه وإلّي فوق الكل تفرْضو علينا زعمه زعمه ما عنّا وين نهربو منها هيّ.. آنا وخوتي لقينا الحل في الأُملات والهريسه التونسيه ونحب نقول للغنّوشي إلّي عامل روحو سليل الأحرار و الوطنيّه : يا عمّي راك أعطيط تصحاحتك في تخصيص الأملاك العموميّه  ونحّيت أي ثقة ممكنه فيك مستقبليّه . حلنا التوانسه موجود مجلس تأسيسي يشرف على تسيير شؤون الدّوله ويحضّر دستور جديد ومجلّه إنتخابيّه جديده و على مراجعة النظام الأساسي للقضاة والوزارات يقوموا بيهم الأعوان الإداريين السّامين تحت إشراف المجلس التّأسيسي  إلّي يلزموا يحضّر لبلاد إنشاء الله لنظام برلماني يزّينا مالنّظام الرّئاسي إلّي يغوّل في السلطه التنفيذيه ، ألف حكومه ولا قطعيّه يعملو لبلاد خزنه يغرفو منها خيراتها ويعذبو لعباد آنا نحب الإسلاميين وفي تونس حرّه لو كان حمّه الهمّامي يشد الحكم إلّا ما نرقد مطمانه شنوّه هاذا ؟ ! راهو موش معقول نطمانو على تونسنا الجايه مع ناس ناشدت وعاونت على السرقة والظلم نحبّو القضاء التّونسي يشد ملفات الشّهداء والفساد المالي موش لجان ما عندهمش حتى فكره كيفاش إتّم الأعمال الإسقرائيّه ...إإإإيييه محمّصة أمّي مليانه طيبه والغنّوشي وحكومتو فاقدين لكل شرعيّه . إيجيش يمشي علي بابا ويخلّي وراه أربعين حرامي ما يساعدهمش الديموقراطيّه على خاطر إدارة الجبايه والدّيوانه ومجلّة الشغل والضمان الإجتماعي باش يولّيو يحكمو في البلاد عاد ملّي كانو يسرقو في الطّاكس وياكلو عرق الخدّام وما يخلصوش صندوق الضمان الإجتماعي في حقوق الخدّام ومدعومين باش يحتكرو قطاعات إنتاجيّه ويغرفوا الفلوس كيف عامله شركة المزرعه إلّي قطعو على جالها الدّجّاجه العربي ..جا وقت إلّي التوانسه الكل باش يولّيو كيف كيف الغني يدفع الطّاكس كيف الفقير والعامل يدكلاري عليه عرفو في السيآن آس آس ومال الدوله يتحسب بالدّورو ولّي يدخل لحكومه يوزنوه قبل ما يدخل للحكم وإمبعّد ما يخرج منّو كان يزيد في الميزان يعدّيوه على التّحقيق ويثبتو في الأسباب ... كان غيغوز معروف تاريخها مع الماكله ! ويرجع الدّجّاج العربي وفي عوض ما تمرمدنا المزرعه كيف ما تحب وتربح البليارات ترجع المنافسه الشريفه ونقضيو على الإحتكار ! نبقّيكم على خييييررر : حل التّجمّع .. مجلس تأسيسي .. دستور جديد .. نظام برلماااني ...مجلّه إنتخابّه جديده 500 مليون لغيغوز وميسالش 5 شهر حبس وصرصي .. يا معلّم باش نمشي إنّخّب أوّل مرّه في حياتي !

إعلام وين أعملت أوّل بوسه والحديث في الثّوره!

عندي مدّه ما نجّمتش نكتب مخّي مخلبز تقول واقفة بحذه جبل وسيزيف يجري خالط على الحجره باش يعاود يطلّعها لراس الجبل وهي سابقتو الّوطه ساعات نطمان وساعات كان نلق ندوّرها بونيه باش نفش غلّي . أكيد إنّو البعض فيكم شاف هاك الكونفيسيون  متاع الغارد كور القديم متاع الزّين على نقمه تي في ، توّه بالله ها المخلوق يحكي بجدّو ياخي معلومات كيف فلانه تسكر وتتعاطى في الكوكايين يهم أمن الدّوله وإلّا باش يفسّخ إلّي تعدّا ياخي أحنا ما كنّاش في بالنا إلّي الرّئيس ومرتو كانو على علاقة خنائيّه قبل ما يطلّق مرتو بنت الجنرال وزيد ياخي هتك أعراض لعباد مهما كان فعلهم مشوم ياخي مقبول في عقيدتنا و أخلاقنا . السيّد ثلاثه معلومات قالهم يهمّوا الوطن ومستقبلو لو كان جا عندو غرام مخ  راهو ما حكاهمش بصوره علنيه على فرض إنهم صحاح حكاية تورّط الرئاسه مع الموسّاد وحكاية المليشيات التابعه للرئاسه وحكاية الخمسين بالميا من مداخيل صندوق 2626 . لولانيّه مسأله أمنيّه عندها إمّاليها إلّي تتقاللهم باش يردّو بالهم وبحتّى صوره ما يهم الشعب ليوم إنّو تتعطالو ها المعلومه إلّي تضر الدّوله أكثر ما تنفع الشفافيّه و انفسّر: توّه بكلنا نعرفو إلّي عنّا مكتب علاقات مع الصهاينه والديل إنهم جاو يحجوا في جربه جايين من الأراضي المحتلّه بالآلاف وتفرشتلهم زربيه حمره على عينك يا شايف ،حكايه خطيره كيف هذيكه تعدات لأنّو من الواضح إنّي الدّوله مطبعه مع الكيان الصهيوني بشكل رسمي وتوّه جا الوقت باش المجتمع المدني يمارس حقّو في المطالبه بإيقاف كل أوجه التطبيع حماية للثوابت وحماية أمن الدوله من شر ها الكيان القاتل أمّايجي جاكي شون ويحكي إنّو مؤسسة الرئاسه عاونت الموساد بصوره مباشره هذه قالتلهم أسكتو ...الزّين ماهو غطّع ، أمّاله الدوله هي إلّي باش تكون مسؤوله عن الخرمه إلّي جبدها الصحيّب ولّي يسوّق فيها على إنها حقيقة مطلقة على خاطر لو كان جيت إنمثّل السلطة الفلسطينيه راني طلبت بكشف لحقايق حول مقتل أبو الهول ولّي معاه فضلا على إنّو هذا يطيّح مصداقيّة الدّوله بكلها في الماء وموش معقول إنّو يتحكى قولش أعليه يحكى فى قصّة ليلى والذيب وقتلّي ملمفروض إنّو بعض لمعلومات كيف ما قلت فمّه جهات مختصّه تتلقّاها وتثبّت من مصداقيّتها وتحصر المسؤولين أعلاها وتاخو الإجراءات ضدهم وإذا إقتضى الأمر من الدوله ذلك تخلّيهم طي الكتمان .
بالنسبه لحكاية المليشيّات ولو أنها حكايه قديمه حتّى ولد أختي الصغير يعرفها ،ياخي يا شريف يا وطني ماو لو كان جيت هكّاكه راك على الأقل قدّمت لتونس خدمه خاصّة وإنّك غادرت البلاد وحميت الشعب وكشفت الحكايه على بكري أمّا وقد وقع قنص العباد من بنزرت لبنقردن معّادش تنجّمش تقلب الفيسته  ومن شيطان أخرس تولّي روبوكوب تونس لا تباركلك إنت وأمثالك .
بالنسبه 2626 إستنّاني ...o____O  ياخي ناس تر فر ولّات عندهم الفلوس بالباله نستنّاو فيك إنت باش تكشفلنا على مصادر ثروتهم وشوف هاكه الحكايه الحوله يخلطو ويقسمو قدّامك عاد كيف إنت مخزن مسكر ومثيقينك لاها الدّرجه مشّاولكش حاجه ؟..
التّدوينه هذه عندها غايه وهي رساله لكل الطّفيليين الحمقى والوطنيين المنافقين والسماسره الإنتهازيين والشرفاء المخلبزين اليوم البجله بتونس تاقف على ساقيها أعطيونا مجلس تأسيسي يحمي الثوره ويا شعبي ماهو خبز وماء والتجمّع لا ! هاتو ننهضو ببلادنا ياخي ما نعرفش قدّاش من مرسونار مسيبين في البلاد كيفاش نشدّوهم والبلاد خايضه ؟! ويا إعلام زكيم متواطىء بهيم إنتهازي حقير ولّيتو تتعلمو الحجامه في روس اليتامه ! تحشدو في النّاس بالتفاهه والمغالطه لقيتوها خاليه قيّمتو فيها الآذان من وقتاش صحافي بروفيسيونال يعدّي مادّه إعلاميّه ما  غير ما يثبّت في مصداقيّة المعلومه والمصدر وإلّا يثبّت من تأثيرها على الأمن الوطني وإلّا بهايم تفركسو على سكوب وهف يهزكم إلّي تسألو على الأنتان منين ليك يقلّك الشعب قلّي ! بالله أعملو مكتب ظبط وسجلو فيه هويّات أفراد الشعب إلّي خاطبوكم بمظالمهم خلّيونا نتحاسبو معاكم علّي قالهولكم الشعب ولّي قاعدين تمرّروا فيه لغاية في نفس يعقوب كيف ما عامله حنّبعّل تي في وبالتحديد وليد الزرّاع ولّي ما إعتبروش من درس سيدهم الزّين إلّي تحاسب حساب عسير نقوللهم ما كمش أخبث منّو باش تنجموا تعملوا أي مكاسب ممكنه من الرّمكجة على ظهر الوطن .. ستبتلعكم حناياه !

باش الحوّافه ما يسرقوش دم الشهداء

 .توّه حكاية الفوضى الممنهجه ضد المؤسسات التعليميّه والممتلكات الخاصّه وخطف الأفراد ما ينجّمش يكون مجرّد أعمال إجراميّه لعصابات لأنو وجود العصابات في بلادنا ماهياش حاجه ممكنه باعتبار الثقافة السايده في لبلاد دونك مليشيات التجمّع هي إلّي وراء ها الإعتداءات لمحاوله إجهاض أي نتيجة إيجابيه للثوره وهذاكه أعلاش باش يتم محاصرتهم نطالب الدّاخليّه باش تظطلع بمسؤوليتها في حفظ الأمن وتحاسب كل عون ما يلتحقش بالعمل متاعو موش معقول إنّو القصرين تقعد بلاش حضور أمني نعرفو إلّي الأعوان إلّي تورطو في عمليّات القتل جابوهم من خارج كل ولايه دونك لإرجاع الثقة مالأحسن إنّو يقع إلحاق أعوان الأمن كل واحد بموطنو وبحومتو هكّاكه لعباد ينجّم تاثق في العون إلّي هو معاهم موش ضدّهم وزيد يلزم الإسراع بإعادة لمراكز الأمنيّه لسالف نشاطها ومن الأحسن إنّو تاقف حركات الإحتجاج الشعبيّه باش يمكن تحييد العباد من المليشات ونسهلو على الجيش عمليّة لقبض على العناصر المشبوهة ولّي مازّالت تخدم على روحها .. كما الحاجه ولات مؤكده لاجتثاث القيادات متاع التجمّع على نطاق الدوله بكلها لأنهم ماهمش ناوين يريضو وقاعدين يتآمروا على أمن الدوله توّه لبلاد في حالة طوارىء وهومه يعطيو في الفلوس للمجرمه باش يهدّو على المعاهد والمغازات يا سيد وزير الدّاخيه شد كل قيادات التجمّع وابحثهم باش  نوصلو نعرفوا  المخربين والملثمين بالحق ولي خاطيه سيبوا هومه الوحيدين إلّي عندهم مصلحه باش يزعزعو النّظام ويوحيوا للشعب إلّي جابها لروحو كيف دار على قيادات الكرفه والحوفه ونهب تونس .. البوليسيه إلّي يخدموا في القاعده ويحبّوا يتصالحوا مع الشعب توّه وقتهم باش يورّيو إلّي هومه وطنيين وياقفوا كتف بالكتف مع المواطن لحماية الدوله نطالب السيد لوزير باش يحل ملف من أمر أعوان الداخليّه بإخلاء مقراتهم مما سهل حرقانها كما نطالبوا باش يحل ملفات كل القيادات الأمنيه ويبدا التنظيف من غادي ومبعد يحل البوليس السياسي وفرقة مقاومة الإرهاب لأنهم ما عندهمش محل مالإعراب ما دام ثبت إنّي الدوله وفي إطار النظام السّابق هي إلّي إحتكرت الإرهاب المنظم :'(  أهّوكه 219 إستشهدوا على يدين المليشيات متاع الحزب وراس الدوله إلّي هو الرئيس وانسابو والحمدوالله الشعب موش إرهابي ومهواش مسلّح يكفي جهاز أمن الدوله باش يحمي الجمهوريه أما زاده لازم تفلاشيوه على الحياد وحماية البلاد والنّظام الجمهوري موش أشخاص الحكّام بالعربي يحلّو عينيهم على أي مصدر ممكن لزعزعة النّظام حتى كيف يكون الرّئيس بيدو وماذابيّه يكون ها الجهاز فيه إطارات ساميه إلّي يفهموا وينجموا يفرقو ا بين مسلم وبين تكفيري وفي عوض ياقفوا قدّام الجوامع يحسبوا عدد إلّي يصلّيو في الصبح حاضر يراقبو الحسابات البنكيّه للّي شادّين مراكز حسّاسه في الدوله و علاقاتهم بالأطراف الخارجيّه ويعسّولنا بالذات على الوزره و الولات والإطارات المركزيّه ما نعرفش إذا ها التّدوينه تنجّم توصل بين يديك أمّا نتمنّى يهديك ربّي وتستبدل الإطارات لجاهله في الوزاره بناس واعين ما يدينوا بالولاء كان للوطن وماذبيّه كان تعدّيهم على لجنه من الأطبّاء النّفسيين إلّي يأكدولك إنهم أسوياء موش بسيكوباط و كيف واحد مالوخيّان قال ننصح باش تبعث الأعوان القاعديين في الدّاخليّه عام جيش بالتّور دو رول باش يتعلموا الوطنيّه يا وزير الدّاخليّه 219 شهيد دمهم في رقبتك مادامك قبلت لوزاره وإنت إنسان نظيف تحميلنا الثوره بالذكاء يبارك فيك ويا شعب إلّي عينيه مسكره يحلهم وماذبيّه في ها الفتره الإستثنائيه نحافظوا على الّلجان الشعبيّه و نتعاونوا مع الجيش باش نقضيو على مليشيّات التجمّع باش تاقف تونس على ساقيها والله يدبدب كل إمّسّخ مزّال يحب يظلم التوانسه ويضرهم

تخديم المخ

تذكّرت خرافه في كليله ودمنه تحكي على ثعلب معّادش ينجّم يصطاد عاد عمل روحو تنسّك وصدقتّو الحياوانات البهالل فما كان منو إلّا إنّو إصطادهم بخبثوا إمبعّد ما كان يتعب مالجري وراهم باش يستقات .أعلاش تذكّرت لحكايه ، سامبل ملّي صاير من عناصر ما يسمّى بالحكومه "الوطنيّه " إمبعّد 14 جانفي و استماتت 14 ممّا يسمّى بوزراء النّظام السّابق تسويق فكرهم النّضالي مبعّد ما أثبتولنا بالدّليل وقوافل الشهداء وأرقام الإستيلاءات المذهله على طول يدهم إمّا في التّهاون في الإظطلاع بمهامهم الوظيفيّة أو تواطئهم في تسهيل كل الخروقات و لَبسولنا توّه ثوب المنقذين والمنظّرين لإنقاذ البلاد والإقتصاد إلّي شدّو عندكم الزين ثروتو خمسة بلايين تنهبو على مدى 22 سنه على مرأى ومسمع من الوزراء المعنيين جهارا نهارا ويمكن بلّوشي معنتها توّه بلاد مقمله كيف تونس تتنهب بالصوره المهوله هذيكة شكون فيكم يصدّق إنّو حتى وزير ملّي صدّو بجنب بن علي خاطيهم لا في بالهم ولا  عاونوه .. ليوم قلنالهم برّاو على رواحكم نحبو ناس ما سبقلهمش الخدمه مع المعلّم لقديم ينهضو بتونس عاده حضبوا كيف فرقة التّدخّل و جندوا تونس طبعه كيف لعوايد ونساو التّاريخ بل الأصح إنهم شيْتوه وقاموا يغنّيو في خرافة أمّ السّيسي تونس باش تبحر كان يمشيو هومه مالحكم مالمتربصين بالثوره والجاني ولّى مبني للمجهول أنساو يا ناس إستماتتهم لِخّردقيقة في التسويق لبن علي كيف عمل مرجان إلّي كان يغنّي بالعصابات المأجوره من لكسترام غوش والدّروات ولّي كانت الحكومه باش تميط الّثام أعلاهم وأنساو لوزير إلي خرج يحكي على الخساير المادّيّه في نفس الوقت إلّ فشل فيه رغم عدد قوّات الأمن الدّاخلي باش يحافظ على أرواح النّاس والمكاسب العامّه وما وجّه إهتمامو إلا للتنديد بالمظاهرات إلّي شلّت عجلة الإقتصاد في البلاد .. ولّي ما يحشمش لا تباركلو .
23 سنه سرقه لأموال الشعب و تجويع للشعب و إرهاب للشعب وإهانه للشعب و سوء إداره لرزق البليك قوانين فاشيّه و مكرسه للانعدام العداله وتغليب المصالح الخاصّه صاغوها إلّي إسمهم نوّاب الشعب ، حكومة المكبشين في السلطة رغم معارضة الشعب باش تدير البلاد في مرحله إنتقاليّه إنتخابات رئاسيّة باش يتم الإعداد ليها تحت إشراف مجلس الدّواب من أغلبية من يمقتهم الشعب هاك إلّي ما يحشموش يخرجوا قانون ماليّه على قياس فرعون تونس المكنّى ببن علي هومه باش يحددوا شرعيّة المرشحين للرئاسه لفترة يمكن أن يأخذ فيها الصعاليك فرصتهم في الإستحواذ مجدّدا على حياتنا واستعبادنا مجدّدا ممن فقد ماء الوجه .. الأكيد إنّو إلّي يمّن الثعلب المنسّك واحد من ثنين يا قطّوس عمرو ما يصطاد لربّي يا ثعلب حرباوي قاعد يتمسكن باش يتمكّن ..بلاين تنهبت من بلادنا ما قلقت حتى حد وما تكلّم عليها حد ، ومظاهرات شعبيّة تطالب أبرز وجوه نظام قمعي وسارق باش يمشيو على رواحهم وتطالب بإجراءات قانونيّه سبق لأرقى الثورات الشعبيّه إعتمادها في المرحله الإنتقاليّه ولّاو يغنّيولنا بعدم حضاريّة إستمرارهم في  التضاهر الشعبي والفراغ المحتمل في السلطه ..لعنة الله علّي ما يحشمش لو كان خرجو خمسه لاف قالولي يا فاعله يا تاركه أقسم بالله ما نصدّقهم على روحي  50 ألف في صفاقس ناداو " الشعب يريد إسقاط الحكومه " ولباقي في القصبة ملتحين السماء ومتوسدين الرصيف يقولو "خبز وماء والتجمّع لا " والثعالب مزّالت لابستلنا لباس النّسّاك وتقول باش نقعد نعاون بلادي من الأطماع الأجنبيّه والدّاخليّه .. يا أوباش إقلبوا وجوهكم أعلينا حسبنا الله ونعم الوكيل والله الجنّه من يدكم شبهة المسيح الدّجّال يارقع يلّي مازّلتو بعوايدكم لقديمه القمعيّه والملتويه أسأل لله العظيم أن يريكم دلائل قدرته في قمع مكركم وإثباط عزائمكم ويجعلكم في العالمين آيه يلّي الحشمه ما تسمعوش بيها يا من فقدتم نعمة الحياء !
يسقط حزب الدستور يسقط جلادالشعب ! وإن لم تستح فاحذر أن تفعل ماشئت ولكم في بن على عبره أيّها المكبّشون في السلطه لغاية في أنفسكم !

يسقط حزب الدّستور يسقط جلّاد الشعب

كيف أي مواطن تونسي عمري ما حفظت حتى إسم مالوزره والسبب هاك المثل إلّي يقول ما عندك في الهم ما تختار ليوم ولّيت نشد لسامي على خاطر لمّارك لزّونابفجاجة أرواحهم العفنه وقلّة حيائهم أن ننتبه لأسمائهم لأنهم ولّاو اضحين للعيان و أكثر دلالة على إنّو الدكتاتوريّه تخلّف كان المصايب سواء على مستوى الأنظمه القانونيه و السياسيه والإجتماعيه و بتفريخها لجراثيم من المتمسكين بالكراسي لدرجة تحمل المجتمع على القيء . أيّه سيدي نبداو بالفكره التافهه إلّي يسوقوا فيها وزرة التجمع إلّي عددهم 16 على إنهيار الدوله في صورة صرفهم وكوادر التجمع من السلطتين التنفيذيه والتشريعيه وهنا إنجم ناخو وقت مستقطع لطرق صالحي ونرجعلكم ..
أوّل حاجه إنّو الدوله التونسيه هي دوله مدنيّه وكل هياكلها المرفقيّه تقوم عليها إطارات إداريه موش سياسيين دونك إنهيار الدوله بدون الوزراء التجمعيين إلّي عندهم مسؤوليه مباشره على عمليّات  القتل المباشر للشهداء ولتنفّذ الرئيس السابق وعايلتو وربما إستغلالهم شخصيا للنفوذ حكاية أمّ السيسي وهاو باش نبدا بوزرة الحقايب السياديه ما عدا العدل عل خاطرو ما كانش في السلطه  :
الغنوشي : وزير أول  في عهد الزين السيد هذا من المفروض إنو يعرف قدّاش الرئيس كان يطلق الريح من مرّه بحكم إنّو طبيعة العمل متاعو تخلّيه يتردد ياسر على القصر ولأنو عندو 21 سنه على  الأقل في الحكم خرج بلوغة الفصل  56 قولش أعليه وقت هرْبو الرئيس وببراءة الذيب الغنوشي ما كانش في بالو بيه ماشي ما غير رجعه ..هذاكه لفصيّل الرابع متاع المسرحيّه إلّي من غدوه مشاو للفصل 57 يقول القايل أعلاش على خاطرهم مطمانين إنّو الحكم باش يقعد في يديهم تره طلّه على الفصل أربعين مالدستور إلّي عنّا ولّي باش تتعمل الإنتخابات الرئاسيه في ظلّوا هاو شي قول :
" الترشح لمنصب رئيس الجمهورية حق لكل تونسي غير حامل لجنسية أخرى، مسلم مولود لأب ولأم وجد لأب ولأم تونسيين وكلهم تونسيون بدون انقطاع.


كما يجب أن يكون المترشح يوم تقديم ترشحه بالغا من العمر أربعين سنة على الأقل وخمس وسبعين سنة على الأكثر ومتمتعا بجميع حقوقه المدنية والسياسية.


ويقع تقديم المترشح من قبل عدد من أعضاء مجلس النواب ورؤساء المجالس البلدية، حسب الطريقة والشروط التي يحددها القانون الانتخابي.*


ويسجل الترشح بدفتر خاص لدى المجلس الدستوري.


ويبت المجلس الدستوري في صحة الترشح ويعلن عن نتيجة الانتخابات، وينظر في الطعون المقدمة إليه في هذا الصدد وفقا لما يضبطه القانون الانتخابي."
ما تنساوش إلّي أغلبيّة الموجودين في البرلمان ومجلس المستشارين آرسدييست بالعربي جلّادو الشعب باش يحطّو لعصا في العجلة بالقوانين الموجوده ويتحكموا فينا كيف العاده  (ما نعرفش أعلاش حاسّتهم ناوين على هاكه مرجان إلّي خرج قبل درج من تهريب الزين ـ قلوبهم حنينه ـ يحكيلنا بالفصيّل لوّل متاع المسرحيّه جماعه الملثمين و المأجورين وكيف سألو المذيع شكون قلّو المتطرفين اليساريين و الإسلاميين معنتها كذّاب مع سابقيّة الإضمار )
باهي يمكن تخممو إنّو إذا تكب سعدنا وجانا رئيس تجمّعي ما نخافوش على خاطر السيّد مهواش باش يحكم وحدو نقوللكم دوّيو لأنو الفصل 50 من الدستور يعطيه مهمّة تعيين رئيس الوزراء إلّي بيدو يعيّن باقي أعضاء الحكومه توّه مبعّد ما خلات البلد ومليشيّات بن علي إستهدفت الشعب شفتو الغنوشي شكون حط  16 وزير مالتجمّع منهم  سته ملّي خلاو لبلاد و ما كانش عندهم الحشمه باش يستقيلو مالحكومه أويدعمو الشعب وإنّما شمروا على ساعد الجد بكل حزم بكل حزم باش يعاونو سيدهم و يقمعوا الشعب وخرجوا بالطوارىء لتسهيل قنص الجماهير وليس حماية للشعب و أكبر دليل إنهم ما استعرفوش بأخطائهم وتقصيرهم ولم يستقيلوا من العمل السياسي إلى اليوم باعتبار مسؤوليّتهم المباشره على إلي صار ي عند لغورّه فضيحة واتر غايت (فضيحه جنسيّه للرئيس ) أدّات لسقوط الحكومه ونحن إلّي ملطخه إيديهم بدم الشعب مزالو شادّين في الحكومه .
يزّيه الغنّوشي الكذّاب إلّي صرّح إنّو ما كناش على علم بحجم الفساد المالي و تجاوز السلطه إلّي كان يمارسها الرئيس (   بالرغم إعترافوا بأنّو تكلم معاه إمبعّد مغادرتو للبلاد وشرحلو حقيقة إلّي صاير .) غنوشي ما في بالوش وعم علي لحلايبي يجبدلكم على الفساد المالي متاع التجمّعييّن من الألف  للياء على هكّه عم علي أولى يشد وزير أوّل .
نمشيو لفريعه الرجل هذا أوّل ما شد عمل الطوارىء في لبلاد و أكثر المؤسسات إلّي وقع حرقها
 و لإنفلات الأمني صار وقتلّي هو شد الدّاخلية وحتى إنّو إستشهد حوالي عشرين تونسي في اليوم الأول إلّي شد فيه ما تفهمونيش بالغالط السيّد موش هو إلّي أمربقنص الشهداء لأنّو ثبت وهاتوّه يتأكّد ذلك إنّو القنّاصه تم إعدادهم كفرقة خاصه وسريه بالخارج وهي مرتبطه أساسا برئاسة الدوله موش  بالأمن الرئاسي .والأكيد إنّو المواطنين ومن مصدر موثوق ساهموا في شدّان البعض منهم السيّد وزير الداخليه ما عمّمش المعلومه على الشعب باش ياخو حذرو ويمنع هاك التخبّط إلّي وقعو فيه الناس بالظن أنّو البوليسيه هومه إلّي كانو يقتلو في الشعب . السيد ما نجّمش حتى يحافظ على الترابط الأمني لأعوان الدّاخليّه وهيّ غلطه كان جات الدنيا دنيا راهو تقدّم للمحاكمه من أجلها لأنّو هو المسؤول الأوّل على موتان هاك أعوان الدّاخليّه السبعه ولّي لا ذكر عددهم ولا أسماءهم حتى إنّو وبعد إعلان تسلّم الجيش لمقاليد الأمن في البلاد  ما كلفش روحو إنّو يخرج يفسّر للشعب شنيّه إلّي صار ويقدملهم إرشادات أمنيّه للحفاظ على الأمن العام ولّي نعتقد شخصيا إنو كان مقصود باش إنّاس تفد وتخاف ويجهضو الثوره لأنهم يحبو يزيدو يحكمو في البلاد .. السيد خرج يحكي على الثوره على أنها إنفلات أمني أدّى إلى خساير ماليه وبرر التهجم على المتضاهرين في تضاهرهم السلمي نهار  14 بأنهم طلعوا فوق مقر الدّاخليّه وحاولو تنحية العلم كرمز سياده ،تصريح صحافي مبتذل وكاذب وحقير لأنو الثوره سببها شرعي يا سعادة المكبّش في السلطه وهو كثرة الفساد المالي والسياسي وقمع الحريات وكثرة الظلم من الفيّه الحاكمه وكوادر التجمّع و 78 شهيد سببهم يا تواطئكم يا نقص مهنيّتكم وعدم تنفّذكم في إستباق التآمر على الدوله ممن كان يشاركم الحكم أو تشاركونه وأكبر دليل إنهيار المنظومه الأمنيّه إلّي بسياستكم لم تكن موضوعه إلّا لتطحن عضام الشعب فين مخابرات الدوله إلّي كارها كشفت مليشيّات السرياطي ولّا حتى تمكنتش من إجتثاثها وتطويقها أمنيّا ، يحرز الجيش  . . يقول القايل إنّك شدّيت الدّاخيّه آمس في ليّام .. لو كنت سياسي وطنيا و شريف لما قبلت حقيبة الدّاخليه لما تم عرضها عليك من  بن علي ولو لم تكن جزءا من المسرحيّه وواحدا من المتنفّذين فيها لما خرجت ترمي بالاّئمة علينا وتكذب على الشعب فمنذ  17 ديسمبر أثبت هذا الشعب حسّه الوطني و رفع العلم دائما ولم يدنّسه علاش تكذب وتقول إنّو تفريق المضاهره نهار 14 كان بسبب محاولة واحد مالمتضاهين تدنيس العلم وإزالته من مكانه وقتلّي النّاس الكل شفنا المتضاهرين ملتحفين العلم وسعى بعضهم لرفع العلم فوق عواميد الإناره أمام مقرّكم أيها الجلف الذي إذا أردنا الترفّق بك سمّيناك إنتهازيّا وينهم أعوان الدّاخليه الموضوعين تحت إمرتك في أسود أيّام تونس تركتموهم دون أي تعليمات كل مؤسسة حرقت أنت ضالع في حرقها كل شرطي مات يعود لك جرم قتله كل مواطن ذهب ماله ترجع المسؤوليّة في بطالته و ضياع ماله . تخرجو علينا وكأنّكم غير مسؤولين يا سيد مسؤوليّتكم مفترضة بحكم الواجب الوظيفي وإن كانت أيديكم نظيفة من القتل و السرقة فهي مسودّة بالتواطىء علينا وبالإنتهازيه . هذه الدولة سيكون حالها بخير بدونكم فارحلوا جميعا و احتفظوا برتبكم الإداريّه فهي حقّكم الوحيد لدينا كتقنوقراط أمضيتم حياتكم في الإدارة التونسيّه فارحلوا واحتفظوا بمعاشاتكم التي يكفلها القانون .
أيّها الشعب نحن بحاجة لتعديل الدستور والمجلّة الإنتخابية قبل إجراء لإنتخابات الرئاسيّه وإلا فالأربعين حرامي سيعدون لحكمنا كما أننا بحاجة لحل مجلسي البرلمان والمستشارين و الإحتكام لحكومة إنتقاليّه تدير البلاد ثم إخضاع إنتخاب الرّئيس للإنتخاب المباشر من الشعب ممن يترشّحون من التونسيين من كافة الأحزاب و المستقلين وحتى المعارضه غير المعترف بها ورفع كافّة القيود الدستوريه والمذكورة بالمجلّة الإنتخابيّة و خاصّة تلك المتعلّقة بتأشيرتي أعضاء مجلس النوّاب والمستشارين كما نطالب بتغيير النظام  السياسي إلى نظام برلماني يمكن بيه نحاسبو رئيس الدوله والوزره و أهم مطلب حاليا إقالة الوزراء إلّي سبقّلهم المشاركه في حكومة بن علي من الحكم جمله فضلا عن كافّة المطالب إلّي تقدّم بيها الإتحاد التونسي للشغل .وامبعّد لحساب تحت التوته .. يارب من أراد شعب تونس بكيد فاجعل كيده في نحره . آه وهاني إنبّه عليكم تصدقوهم وقت إلّي يخوفوكم مالإرهابيين من 56 مانا عايشين كان الإرهاب إلّي يمارس فيه التجمّع ومسرحيّاتهم في حماية الجمهوريّه كذب ، هومه إلي معبّين الحبوسات بالنّاس فقط بتهمة الإختلاف الفكري السرّاقة والمتنفذين موش عايلة بن علي أو الطرابلسي برك حتى عساس في شعبة كان عامل بعمايلو وفي إنتظار الحساب يسقط حزب الدّستور يسقط جلّاد الشعب !

منصف المرزوقي والمعارض المحنّك برهان بسيّس

موش ساهل انو العبد يفهم إلي قاعد يصير . وإنا نفهمو حاجه ضروريه باش حتى حد ما يعاود  يسرق منا الكرامه و هذاكه أعلاش أهم حاجه إنا نفهمو . آش يلزمنا نفهمو باهي توه مسألة  إحترام الدستور إلي يأكد أعليه برشه عباد كلام معقول لو كان هذا الدستور في فصولو كان حيادي و إذا كانت المجله الإنتخابيه إلّي صاغها جلاّد الشعب الحزب الدستوري من خلال الإلتفاف على الإراده الشعبيّه والتمثيل الفعلي لمختلف فاعليّاته . وانا كيف التوانسه ما نيش مقتنعه بحكومه إئتلافيّه يكون الفاصل فيها محمد الغنوشي ولّي إذا كانت ذمتو الماليّه قد تكون نظيفه ألف بالمائه من سرقة أموال الدوله أو الرشوه إلا أنّو ذمّته السياسيه مهياش في نفس النصاعه وما نيش باش نحكي على عدم الوقوف في وجه الحجاج تي نقصد الرئيس السابق ولكن الإنفلات الأمني المنظم إلي قاعد يصير ولّي الغايه منو تدمير ثورة الشعب إنّجموش نخرجو منو الغنوشي ؟. إنو يحاولو يقنعونا بإنو قسم من أعوان الأمن المختص بأمن الرئيس ولّي قعدو يقنصو في الشعب قرابات ثلاثين يوم وتوه يدورو في الحوم كلهم مليشيا تابعه الصرياطي هومه برك المسؤولين نقوللهم  دوّيو. لا موش صحيح ، المتنفذين في البلاد وهومه جماعة الحزب و الإقطاعيين متاع البلاد عاملين الشارع صاك بوكس باش يحافظو على نفس المسرحيه توه كيف الغنوشي عمل مسرحيّه هاك الجلسه الإستثنائيه متاع مجلس النواب والمستشارين بيدو ما كانش فاهم الشعب وامبعّد ما هَرْبو الزين فهم الشعب ولّا سيادتو ديغول تونس . سلاح الداخليه و أعوان الأمن وتهريب رأس النظام شكون الموراليست العظيم إلّي وقف وراه  ياخي رئيس الحكومه   الغنوشي مغلوب على أمرو حتى مبعد ما مشى الزين وفصع السرياطي . أماله مادامو ضعيف موش ممكن نستنّاو منو يختارلنا حكومه إئتلافيّه تنجم توقّف لبلاد على ساقيها في تونس فمّه نخب فكريه وقانونجيه كبار مستقلّين يدرسو في الجامعات التونسيه نطالبو بإنهم يشكلو لجنه لإعادة صياغة الدستور والمجله الإنتخابيه وذلك بعد إجراء مباحثات مكثفة مع النخب السياسيه المعارضه الفعليه والنقابيين الشرفاء وهومه معروفين نطالبو بأنو يقع التشاور مع  حمه الهمامي و المنصف المرزوقي و ميه الجريبي و راشد الغنوشي وكل أقطاب المعارضه المحضوره . نحن لن نقبل بأي وجه من وجوه النظام البائد ليحكمنا أو ليساهم في تأطير المرحله المستقبليه ونتعامل بكل حذر مع وجوه المعارضه إلّي تحالفو مع المتنفذين في البلاد للعيش برفاهيه داخل البلاد ما غير ما يهتمّو بعذاب العباد  . ولكن ما تنساوش إنو كل وزاره فيها إطارات إداريه مصدرها جامعات تونس و المدرسه العليا للإداره وهومه ناس تقنوقراطيين مهومش تجمّعيست . البلاد عندها مؤسساتها وموظفيها إلي ينجموا يحافظوا على إستمراريّة المرافق العموميّه في  إنتظار تشكيل حكومه وقتيّه واتضاح صورة النخبة السياسيه إلّي لازم تشد البلاد .. وخصوصي تمكين الشعب من التثبت ملّي لازم يختارهم إمبعد سته شهر على الأقل .. نتوقع إنو أصحاب الثروات في تونس باش يحاولو التعميه على رجالات البلاد ظنا منهم إنو ثرواتهم في خطر وانا نقوللهم إلّي ما عندكمش ماش تخافو ماناش سراقة ومناش باش نأمّمولكم ثرواتكم عاد بالله قيلونا وسيبولنا كرامتنا ما حشتنا منكم بشي . كنت أشرت لضرورة تنقيح الدستور و المجله الإنتخابيه لأنو هذاكه المهم أما أكيد إنّو لازم يتم مراجعة برشه قوانين إنجم نقول إنها تكرس الإرهاب والقمع الإجتماعي بداية من قانون الإرهاب الذي يجب إلغاءه إلى قانون الجمعيات إلى مجلة التأمين إلّى جاء فيها تنقيح  يدعم في أرباح شركات التأمين على حساب التونسي وردّوه أرخص من الكفن  إلي يتدفن بيه إمبعّد حادث مرور . فمّه برشه خدمه على مستوى السلطه التشريعيه في تونس لأنو ما غوّل السلطه التنفيذيّه إلّا القوانين المقحوله إلّي وضعها نوّاب الشعب باش يمكّن الخمّاج من إستعباد الشعب . هذه المرحله فيما يتعلّق بالأمن في حاجه إنّو الجيش يحتكر السلاح داخل البلاد مع التنسيق الأمني مع قيادات الأمن الدّاخلي النظاف وهم أغلبيه لأنّو الإنفلات الأمني المنظم أكيد إنو إعتمد على سرّيّة التحرّك باش تنجح المؤامره  موش ممكن إنهم عملو بوق وقالو فيه على مخطّطهم في قنص الثوره الشعبيّه . ما نجموش نكونو متحققين زاده من إنّو الأمن الرئاسي هو إلّي قاد عمليّة التقتيل لكن نحب نوضحلكم إلي فمه فِرق متعدده تخدم في القصر الرئاسي وهذيك خبزتهم لاهم قتالة أرواح ويمكن ما فاتوش الباب البرّاني من القصر وعلى كل حال الناس الكل نقعدو توانسه عاد حتى حد ما ياخذ أعوان الدّاخليه بالشبهة ريت فيديو متاع شباب شادين ثلاثه من أعوان الأمن الرئاسي تي يمكن فمّه ألف عون ملحقين بالقصر وهومه أعوان داخليه وموظفين عموميين ومن الشعب بكل ما تحملو الكلمه من معنى ياخي نقتلوهم و إلا شنيّه . توّه إلي عندو مشكله مع النظام السيادي للدوله (البوليسيّه  ) يقوم يصطادهم ولّا كيفاش بوه على خوه ياخي يفشّو في غلهم ولّا كيفاش ؟ لا يا سيدي ما ينجم يكون إلّا  مخالف لقواعد القانون إلّي تنص على أنو المبدأ  في بنادم  البراءة ونحب نذكّر إنو تسعه وتسعين بالمائه من البوليسيه يدهم نظيفه من الإستهداف المنظم للشعب .عاد موش معقول نتقاتلو بينات بعضنا والبروطاغونيست الحقيقيين متاع الفوضى الأمنيّه قاعدين يجهضو في كرامتنا  .  ياناس فيقوا ! وكلمه في لخر الأعمال   لإنتقاميه  من العايله الموسعه للزين حرام و مادام بالإمكان التحاسب معاهم بالطرق المؤسساتيه فأي عمل يستهدف شخصهم فيعتبر إجرام لأنّو القصاص من الذين يثبت إرتكابهم للإجرام يلزم يقعد بين يدين الدوله والحق العام موش الأشخاص أمّا حرقان  الممتلكات  او السطو عليها فهو إجرام محقق في حق الدوله لأنو معظم أرزاقهم جابوها بقروض من البنوك التونسيه بالسيف كيف حالة صخر الماطري وإلّا أرزاق ناس أخرين عاد بجاه ربي  خلّيو البنوك تسرجع شويه من خسايرها وكذلك الناس  يرجعوا أملاكهم راكم  باش إتّركوا البلاد وتقضيوا على أرزاق الآلاف مالتوانسه .. آنا غيغوز و في الواقع مع إني باش نقعد  هكّاكه نحب نقوللكم إلي آنا قاضي تونسي ( لا يجوز التأنيث ) وراهو معظم مؤسسات الدوله تنجم تكون حياديّه مع الكثير من الإصلاحات شرحتلكم الصفه باش تاثقو في كلامي لأنّو على الأقل النظام الأساسي متاعنا يمنعنا من أي  إنتماء حزبي لضمان الحياديه وباش بالنسبه لشخصي تتأكدو من موضوعيتي تنجمو تخزرو للتدوينات  الْقدم متاعي .الأهم حاليّا إنّا نثبتو مليح في التحول الديموقراطي للدوله و إذا وثقتو فيّه وانجّم نتعزّز أعليكم إتنجموش تعملو صبونصورينغ لسي المنصف المرزوقي باش يكون رئيسنا للمرحله المقبله راهو كاريزماتيك وفي رواية أخرى سياسي محنّك وفي رواية غيغوز عاقده فيه النوّاره والسلام أعليكم وربّي ينجّي تونس ويعطي لدولة الحق جوله عاجلا غير آجل آآآآآمين . 
العنوان حُصّيله باش تقراو التّدوينه على طولها :/ 

كلمة أخيره : الحداد على من رحلوا

الكلام ماهوش عندي شجاعه و لا هو محاوله للفهم الله لا فكّر بعرقي لولاني أصلا وحده مفطسه كيفي كان يهبطوني لسوق النخّاسين ما نجيبش ميتين فرنك أمّاله شنيّه الهدره .. حزينه ، شانعه باش نهبل يا بوقلب النّاس قتلها المقت و حياة الجيست جيست باش في لخّر يقتلها الرصاص الحي : ثمنية ولاّ خمسه عشرين ياهشومييي عهههههععع ندبي وخيّاني ما بين العشرين والتسعين وخيّاني تتفقس عينيهم ليوم ولّا بعد جمعه راقدين تحت الثرى و نار فوق الثرى شاعله في جواجي إلّي يحبوهم وفي جواجيّ وجواجي كل حر ..علاش نكتب سامبل مانيش سياسيّه وما نستعرفش بحتى طيف سياسي في لبلاد لا محترفي التّبسيس ملمعارضه ولا إلّي قاعدين يوزنو في موازين القوى ما بين الشعب والحكومه باش يعرفو آش يعملو وبيان سير ما نستعرفش بالتجمّعيين إلّي يلزم يعملوا دي تاست بسيكياتريك لرواحهم من لكبير للّي يدبي على الحصير ويطردوا من بيناتهم كل إلّي يعانيو ملّي بسيكوز  حتى لو كان الأمر يؤدّي لانقراضهم الكل ..المهم توّه القصاص للّي ماتو كل حالة موت تقتضي فتح بحث تحقيقي كل رصاصه خرجت وضربت معروف مولاها دونك من الضروري إتخاذ إجراءات في حق كل واحد منهم مدى توفّر عنصر الدفاع الشرعي من عدمه لا تحدّده وزارة الدّاخليّه ولا وزارة الإعلام وإنّما القضاء وهذا شيء بديهي في دولة مؤسسات وقانون ، يلزم إيقاف كل أعوان الأمن الذين أطلقوا النّار وإجراء التحقيق قضائيا معاهم ثم محاكمتهم حسب ما تسفر عليه لبحاث .. لا آلهة تمشي بيننا ، لستم أفضل من الشعب ولن أسب ! علّمتني دراسة القانون ألّا أخلط الأوراق وألّا أترك المهم للأقلّ أهمّيّه وألّا أرتكب المحضور عند الحديث عن  الفاجعه لكي لا أخسر النّاس أشياءهم .. عندي ثلاثه جمعات نبلع في الغصّه وانّشّف في دموعي حتى شيء ما يبرر قتل المتضاهرين العزّل في دزاير خرج سياسي مالحزب الحاكم يحكي إنّو تم إصدار أوامر قطعيّه لأعوان الأمن باش ما يطلقوش الرصاص مهما كان التهديد وإنّو سيقع البحث في أسباب إطلاق النار الفرديّه إلّي أدّات لوفاة بعض المتضاهرين وعنّا شنيّه صار ؟
 بالنسبه لقناة تونس طبعه ما لقيتش أبلغ من هذا النص لأولاد أحمد بعنوان : نبي من نيجيريا (على فكره حتى لو لم أكن يساريّه فأنا أقبل بالفكرة الجيّده مهما كان مصدرها لأنّه ألا تنتمي لتيّار فكري لا يعني إستعداءه )
"المذيع الذي مزق أوراق النشرة الإخباريّه ، في مثل هذا الفصل من العام الميت ،أمام سبعين مليون مشاهد نيجيري ، بما في ذلك رئيس الدوله وحرمه ،وفرق التدخل السريع ، وصاح بأعلى صوته وكأنّه يصارع نمرا فارا لتوّه من إحدى حدائق الحيوان :
"لا أستطيع قراءة الكذب "
هذا المذيع الأسمر..
ذو الشجاعة الأسطوريّه ..
والضمير المهني الشاذ ..
يستحق أن يكتب إسمه بماء الذهب على قائمةالأنبياء العاديين .
هؤلاء الذين يدخلون التّاريخ بكلمة واحدة .
ويقادون إلى المقابر من أجل كلمة واحدة .
ويكلف الجيش بحراسة قبورهم خوفا من أن يقول الجن ـ على لسانهم ـ 
كلمة واحده !! 
إنه اللحظة الفاصلة ما بين وظيفتين :
القواد ،،
والصحفي .
وما بين راتبين :
راتب يتضاعف بتضاعف نسبة الكذب ،
وراتب يتضاءل كلما تضاعفت الحقيقة 
... اللحظة التي يحس فيها أي طفل بنه أدفع أخلاقا من الدوله ، وأنّه يستحق حكاما يتحلون بفضيلة واحده غير حمل مذيعيهم على تلاوة الكذب ، و مواطنيهم على تصديقه ، دون شك أو مساءلة إنه .. 
ولا مانع عندي أن يضيف القارىء ما طاب له من النعوت ،تكريما لهذا الرجل النيجيري ، الذي ذكرنا بأن علاقة المواطن الإفريقي بتلفازه ليست في النهايه سوى علاقة مستهلك الكذب بمنتجه .
أو بعبارة أقل تطرّقا : 
علاقة " مواطن في بيته " بمؤسسة وطنية تكذب دائما ... 
فقط ،،
ولكي نكون من مواطني الجنّه ،، علينا أنن نقوم بالفريضة التاليه :
عندما يطلع مذيع على الشاشه ، ويهدد بافتتاح نشرته الإخبارية ،، نستأذن .
ونسرع باتجاه الحمّام "
لن يهمّني بعد هذا أن تعدم مدوّنتي فكاتبة هذه المدوّنه أرخص من حبّة عرق يفرزها أيّ غرّ في شوارع تونس أرخص في وجودها من الألم الجاثم على قلب كل أم فقدت إبنهاإلا البارحة أنا لست مازوشيّة تحب سبّ نفسها ولست أغلى من أي فرد في هذا الوطن أيّا كان طيفه ولن يكون كلامي بالغا ولا مؤثّرا في العشرات الذين يقرؤون لي .. أنا فقط تافهة أعلن قلبها الحداد وفي رواية أخرى أتنفّس بصعوبة من شدّة الحزن .. لن أكتب بعد اليوم فلا آمن على الأحرار أن توفّيهم كلماتي النّافرة حقّهم !