شيء عن الكتاب

 لإنّوالفان عزيز عليّ لقيمة أفكارو.. قرّرت باش ندخل في لعبه جميله راس مالها الحديث على الكتب وإلّي جات من مدونين مغاربه ولأنو معظم المدوْنات إلّي نتبّع فيهم "مدوّنة على الشورابي و بنت عايله و الكلندو و أفكار ليليّة تصنصرو "نحب إنقلّك يا الفان إلّ ماقعدتلي كان إنت و "هذا آنا "و"البرباش" هذا علاش باش نخِل بقواعد اللّعبه لإنّو عمّار خلانا نتنفسو بل              .
أوّل حاجه أهّومه سؤالات اللعبه : paille


§  Quels sont les livres d’enfance dont vous vous souvenez ?
§  Quels sont vos auteurs préférés ?
§  Quels auteurs avez-vous décidé de ne plus lire ?
§  Quels sont les livres que vous apporteriez avec vous si vous étiez isolé dans un désert ?
§  Quel auteur dont vous n’avez rien lu encore trouvez-vous nécessaire de lire ?
§  Quels sont vos livres préférés ?
§  Quels livres êtes-vous en train de lire ?
وأهّوْمه الأجوبه :
عدّيت حياتي نعوم في الكتب على خاطر بابا ما يستعرف كان بالمطالعه للترفيه بالأماره ما ريت البحر كان وقت إلي صار عمري ١٣ سنه ولتوّه ما نعرفش إنعوم ..أمّاله الكتب كانو عالمي ونتذكّرهم الكل وأوّل كتاب قريتو كتاب حروف شراهولي بابا من معرض الكتاب وكانو عاملين فيه تصاور حيوانات في هيأة بنادم وهاك الكتاب عمري ما ننساه إمبعّد جحا في المسبح و مغامرات جلبّانه وصاحب المزمار السحري حتّاش كمّلت سلسلة المكتبه الخضراء مبعّد كليله ودمنه و سلسلة المغامرون الخمسه و الشياطين ١٣ ورجل المستحيل وكل روائع طه حسين و المنفلوطي وجبران خليل جبران وميخائيل نعيمه و العروسي المطوي ( هذومه قريتلهم كتبّتهم الكل ) إمبعد قريت كتبّة ننساهمش : le rêve متاع voltaire
 و أكثر كتاب نحبّو:la brute متاع Kafka 
le petit chose d’Alphonse Daudet- 
candide de voltaire -
  إمبعّد قريت كتاب "رحلتي من الشّك لليقين " لمصطفى محمود 
  وإنتهى الحب مع الكتب حتّاش    ..
   كمّلت القرايه رجعت نقرا لأفضل الكتّاب على الإطلاق الإمام أبي الفرج عبد الرحمان إبن الجوزي وكاتبي المفضّل وإلّي نموت عليه وأكثر كتاب أذهلني هوّ كاتبو "صيد الخاطر" وكان موضوع تدوينه " رحْمة الله  " 
ندمت برشه إلّي قريت قصص عبير ونعتبرهم وصمة عار لأنهم إشتملو على ركاكة الترجمه وردائة المضمون .
الكتاب إلي نهزّو معايا إذ نويت الإعتزال في الصحراء بكل صدق "لقرآن الكريم "
الكتاب إلي قاعده نعاود فيه "صيد الخاطر " وكلّ ما أردت أن ألامس حكمة البشر قرّبته ونهلت منه حتى يطمئن قلبي . وبما أنّي في التكنلوجيا طاسه هاني باش ندخل لمدوّنة البرباش ونبعثلو الأسئله .. أكثر من هكّه يقعد بعدي .. شكرا يا الفان رجّعتلي ذكريات جميله عن الّذي مضى .. بالأساس كيمه يقولو في الجزيره "خير جليس في الأنام كتاب "

الى هامان..يعرف نفسه

اليوم عدت لشرب القهوة في مرارة الحنضل ،أردت أن أعطيها بعض الواقعية لكي لا تكون نشازا على حاضر النّاس الذي إستوى في طعم العلقم .وفكّرت و أنا أشرب أن أخطّ لك استفهاما خارج أروقة النّفاق الوطني : سيّد الوطن متى ينقشع الضّباب ونرى حقيقة البلاد ؟ 
ما خلف مزامير النّبيّ الّذي لم يكن لغيره من بعده ملكا كاللّذي كان له ..إجتهدتُ في الفهم إن كانت الشياطين قد أطلقت بعده ..والجنّ و الطّير قد إستقلّتا بأسرارهما والظِّلّ ..فلماذا يا سيّدي لن يدُلَّنا على قضاك الّا دابّة الأرض زمن إنشغالها بك ؟هي الفضيحة تشغل النّاس بردِّ السّتْرِ والتّداعي على آدميَّتِنا كما تَدَاعَى الجياع إلى القصعه .وعندما قضى الرّضيع نحبَهُ صريعَ الذُّلِّ أوهمتنا بالتّريُّض و العصبِيَّة ونسينا الفتى قضى عليه السرطان ..ما دمتم فِينا شُبِّه لنا من جهلِنا أنَّا بِخيْر .. ما فهمت كيف إحتكر الغراب بيع الدّجاج فصارَ يُفَاصِلُ نفْسه ..إضحك بلُؤم فلا حول للمرِّ و لا قوّه ..لقد نظرت يا سيِّدي إلى منازل من قبلنا ولم أجد فيك رِيادة سوى التّباه بِحسن الصَّنْعه ..مددت يدي للضّباب أعضُّ على عضُدهِ ..سقطت كلُّ أسناني وقد تحجَّر ..صرتُ أرقُص لِتجنّيك عليّ ضُمّني لنعاجِك واعتقِد فوق صرْحِ من سبقك أنّك بلغْتَ الأسباب .. فإنّك ناجِ ببَدنِك وحينَ تُسؤَل قُل إنَّك لم تَعُزَّ قومَك في الخِطاب و أرسلت عليهم رجْلَكَ و خيلَكَ واحتنَكْتَنا وادّعي أنّك آتيتنا ما وعدتَنا وليكُن أمْرُ الاستفتاء اللّذي إجترحته ما بينَك وبيْنك على إحتكار أَرواحِنا و أموالِنا وأنفُسِنا وادّخِر لنفسِك ما شئت . يا جاري لا تأخُذْ برأْسي و لا بأسمالي فقَد خِفتُ أن تقول أهلكتِني بفعل الفضول فآليت أن أدعك لولدك فلا يأخُذوك منه وقد إختلط المرُّ بالمرّ وهامان قد شبّه لنا أنّه قد قَضَى وهاك إنّهُ لا يزال بيننا يسمعُ ويرى .

يِجِّي ! أهّيْتْ

ناس قْبل ماهم يقولو إن لم تستح فافعل ما شئت ..إي وكيف يبدا العبد حشّام شنوّه يعمل ؟خمّمت ..نضرب راسي على حيط لقيت الحيط خاطيه قلت برّه نعمل فوتينق ينسّيني الدّاعي و الّي اكسب نلق ساقيّ معلقين الصبّاط عندهم عشرين سنة وانا ما في باليش..كيف معّادش بيها وين تذكّرت جرايد تونس وقفت قدّام أوّل كيوسك، شريت جريده مبتكره ياسر في إلّي حشت بيه جيت في الخلاء بجنب المزفّت ووقفت ..بالقليله إنّجم نلق حل ما غير ما يخرجلي شكون يمرجلي الكبيده بالزّين الحزين وهو أو لا أحد أمّاله آش كون مزهرتلو الأيّام ـ من فضلكم راني نحكي على هاك السيّد الّي خرجلي كالرّوح وانا قدّام الجبّانه ما تستأولوش كلامي ـ أيَّه سيدي حلّيت جريدة الجمهوريّه و مالدّاء الّي حاسّه بيه طحت نقرا في المقالات الدّرويش الكل نلقاشي الحل باش نرجع لنوم البيات الشِّتوي إلّي كنت عايشه بيه ما صدّقتش حتّى كعبه ،عاد قرّرت باش نمشي لأقرب دجّال حاطّينو ومنها عمِّلت على شيطاني يِخْزِيه وقلت أربعين يوم ما تتقبلش صلاتي و لا منّْوبه وتمرميدها ..كيف وصلت نلْق صف للدّوره البرّانيّه عرفت الّي البلاد بألف خير.. أناثي و ذكوره الكتف في الكتف ..الله لا ترجّع أيّمات الكار الصّفره و الترينو ..وياخالقي كل من نعق بالإختلاط و المساواة خلصو بالدّنيا و كافيه على التبهذيل الّي شافتّو كل وليّه ..أيّه تسكْرت في وجهي قرّرت باش انروّح ..آنا والدّزّان ماناش صوحاب هذاكه علاش عمري ما دخلت الشعبه و لا المهرجان حتى لين عزْوِزْة ..وكل قدير وقدرو . دخلت للدُّوره في صالة دارنا ترميت على البنك وعملت روحي إنخمّم ـ ملّي رجعت ملخدمه من مدنين هذاكه أعلاش خلط مع أخوتي ـ أيواش ضربت أخماسي و أسداسي ما لقيت حتّى حل كان إنّي نصبِّح و ونرقد في النهار في الخدمه .. مشيت عملت قهوه قطران و شدّيت القارد للنّوم ماضي ثلاثه متاع الصباح طحت نلقى روحي في القصر متاع الحجّاج دُخْت في أمري ياخي ما نروّحش الدرنا جِمْله؟ والّي زاد على ما بيَّه إنّي نلقى روحي في عجاجه متاع بخور سكّرت غشاشي بالصوابعي و خرجت ننفرفط لجْنينه متاع القصر..ياخي حضرت جناب معالي سيادتها تبخبخ سيادتو وانا يلحقني الطّش.. سي فيني مالتبهليل آنا بيدي باش إندعّم روحي بإجراءات حمائيّه و نعفّس على التّاريخ وباش إنطالب بحقوقي النّقابيه وبحقّي في الماء و الهواء و الشَّفافيّه .. إيْ لا ماحاله آنا ديفيزيون كانز أمَّ على الأقل عندي الحق في البطاله و الصّوفيزم ..إي أعلاش لا؟ تنجمو تعتبروني أقلّيّه لا تخبّش لا التنبّش أيواش ..إنّجّم نلبس الطويل و النغطّي راسي ..وانسيّب اللّحيه ..باهي اللِّخره ما عنديش باها دخل إنّحّيوها ..نفخت صدري و شدّيت القارد ..واحد ..إثين ..إثنين و نصف ! ضربتني الفشله ..آنا المقمْله باش إنقول للحجّاج معّادش نخدم ..قلت نعمل روحي إنطلّع في الرّوح ، إتذكّرت ١٣٠ ألف بنادم الّي  قضى عليهم الحجّاج آنا نخمّم لا تباركلي و تجيني زميله  تفرفط من بعيد ..إجري خلات عليك ولي العهد يبكي ولِللَّه تفركس فيك .. إيْ دخلت نجري الهم كاسيني من راسي لساسي ..لا مِرْواح ..لا خلاص ..لا راحه . ياخي يا سيد روحك حتّى ملك الموت يعطي راحه .إتذكّرت جيُوش من خدّامة الحزام  الِّي كيفي نستاهلو على كثرتنا : يا فرْعون آش فرْعنك ؟ قال : اعْبيدي . خذيت كفّين قبل ما ندخل للّولد من حضرت جنابها الّي في وجه ولدها ملايكه و كيف تستفرِد بيَّه سكّينه ..جاني غطُس في شوني سكِت توَّه إِنْعوشه فوق راسي وما فمّاشْ فايْده .. هيَّه قام الولِد يحكيلي :قزقز ـ اسمي كيمه ينطقو ولد سيدنا مع ثلاث نقاط فوق القاف ـ قزقز إِمسي زدّي وْلي ..نسيت روحي جاوبتو: يا جنابك جدودك أقوى من جْدودي آرى آنا فين ..عاد خزرتلي زميلتي ـ إِتَّسْتي فِيَّه ـ قتْلي : ياخي عامْله عْباك من سيدنا الصغير .. ما جاوبتش شدِّيتها شَفَّرتْها جِبْتها البرّه وزِدت خزرتلها قلتلها : برّه قوِّد ..طلعِت تخاف منّي كلاتها في عْضامها وسكتِتْ . ثاني قوّه جبّاره داعمه لسلطة جنابو هاكه الأَحَّيْت الِّي مخَبْيه في الصْدور .. كلمة يزّي المكبوته في اللَّاوعي نِستنّاوْ في الدّنيا لُخرى باش نقولوها .. آنا نتّكرم والولِد يعاوِد أهّيْت ، يِجِّي . قتلو : قول أحّيت .. يزِّي ..إِنْراني فيه كاينُّو وِلد الشّعب ناسْيَه الّي هوّ ولد تمساح حال جلغتو ياكِل فيها عاري ولابِس ..ميسالشْ ..خير منْ بلاشْ ..شدُّوا عندْكم ..يزِّي ..أَحَّيْتْ والولِد ورايَا يْعاوِد : يِجِّي أَهَّيْت ..هكّاكه وحاجه كمْشِتْلِي على صِدْرِي ترُصْ فيَّه قمت إنصيحْ ..خاطِيني موشْ آنا ..موش آنا ..جارنا التّالانِي .. طلع خويا لقانِي نتصكِّكْ شدْني يستخايلنِي خدِّمتْ .. إِيْ بلْأَماره نلقى دارْنا الكلْ يبكيوْ .. سخّفْتْهم ؟ مهّأَّهْ .. على خاطر قيَّمتهم مِالنّومْ ..كُل واحِد يِلعب على درابوه أيْواش ..ما غير إرتِباطات بالخارجْ . إِيَّهْ !

فمّاش إحتمالات ؟

توّه يعجبكش سيدنا في القصر وإذا كحّيت كحّه في آخر البلاد تتعاودلو بالنّغمه ..برشة قوّاده ..سمعت إنهم جندوا  من ولاد بسم الله كعيبات يستعانوا بيهم علّي تقال ولّي متقالش .. يعجبكشي ندعي لربّي في زاويه يوصل الدعاء للقصر قبلي .. آنا نحكي للبسي تي الطبيب النّفسي على الحلم ونغلي خيوطي مسّو في بعضهم و السيّد قام قلّي : حنك الباب آنا علماني نطبّق في سياسة فصل السياسه على العياده واحمد ربّي إلّي آنا في القطاع الخاص . ما ناقشتوش ياخي جيتو باش يعاونّي على قبر بابا هدّو بفاس هذاكه علاش سكت والتعدّيت الباب عليوه قعدت في المحطّه البرانيّه نغزر للجبانه ونتذكّر في الّي صار مع الحجّاج و عيلتو .. ماهو شدني هو و عيلتو هيّ تقلّي بكّيت ولدنا يا مشومه وهو يقلّي تدعي على شكون يا مذمومه والولد مكبّش فيّه كيف القرنيطه يكركر فيّه وانا نخمّم ومنها خزرت الفخامة جنابها ـ البجله بيها ـ : يا لللّه راهو تغصر في الثنيّه حب ينقص الماء .. كان تحب افحصو .. والغشير يتّكرم : خمشه أمّنا هاتهوْـ آكهو لولد ألثغ ما ينطقش الكاف ـ نحن أغبعه و عثغين .. جاب ربّي كلامو كودي ماكانش .. سكتت الفخامه تلفّت للحجّاج : يا سيدي راني ندعي على سعدي نلعب على البلاص و مازّلت ما تزوّزتش .. أفحمتهم الزّوز سيبوني خصوصي إنّو الغشّير مكبش فيّه تقولش من بقيّة أهلو ماكانش سيدنا الحجّاج ماكم تعرفوه قتل مائة وتلثين ألف بنادم لكلهم بعقاب جماعي إستباقي بتهمة التعاطف مع الأشعث التاريخ أنساووه هاني نحكيلكم . المهم إمبعّد في جناح ولد سيدنا ومبعّد ما عطيت وحيدات الجلغتي قعدت إنخمّم .. جاب ربّي ما تخمّرتش أكثر ولّا راني .. توّه نعرف إلّي القواده تمثّل٩٩.٩٩ بالمائه من بوفوار الحجّاج وهيمنتو وقعدانو على راس الإماره . أمّا ياسر بهامه عاد , ياخي كل شيء نعاودوه المهم و التافه ! أهّوكه أعلاش برشة مزمرين ما يفهمو مالسياسة شيء مشاوْ في الساقين !وزيد القواده برجوليّه داء خطير !أمّاله كمشه قوّاده .. - أيواش موش كميشه على كلّ حال برشة يكبهم في الحطمة - ..هذوكم يخدمو على رواحهم صباحا مساءا ويوم الأحد و البقيّه رادّين بالهم يا يتملقوا في القوّاده (الوشاة) يا جايبين الواد الواد كيف حالتي ويطلبوا من ربّي السّتر .. هذاكه أعلاش آخر حاجه نتعبو منها الخدمه لأنّو القواده وردّان البال مالين الوقت وما يخلّيوش الفرصه للعبد يعمل حتى شيء..آنا نخمّم وصوت فيّقني أيواش .. شدّوا عندكم : آش بيه الزّين أحزين ..ـ أهّوّ منافق حسدني في التّخمام وظهرلو باش يمرجلي الكبيده ـ خيّرت باش ما نجاوبش عاد عاودلي نفس الجملة .. كيف ما عادش بيها وين جاوبتو: فمّاش إحتمالات ؟ . ما فهمنيش ولّيت قمت مالموقع الإستراتيجي متاعي إلّي قدّام جبّانة الجلاّز وطلعت في الكرهبه و قلت اذا الطبيب ما حبّش يلقالي الحل يلزمني ننهض بروحي ونلق حل عند الطب الرّعواني . اليوم يلزم يتفسّخ الحجّاج و عيلتو من منامي .أيواش يزّي تعبت . 

القواده

للّي موش فاهم الحكايه نحب إنفسّرلو إلّي آنا قيقوز عندي عشرة أيّام نحلم إلّي آنا عايشه في عهد الحجّاج والأمر إنّي بونيشه في قصرو .. مدعيّة والدين أهّوكه علاش المهم ,نهار كامل وآنا نجري وراء الغشّير ولدو الّي بهذل بحالي .. نطحي دخلاني و نليزردي كيف بوكشّاش فمّاشي نمنع .. لكن يا حسره الّي برجو بالمرمّه .. خدمة ولد يسيدنا عملتلي مشاااكل عويصه .. أهّوكه جارنا الحسودي كل صباح ياقفلي قدّام باب دارنا ما يتحرّك كان ما يقيسلي الطّاي .. يحسب في نسبة إستغلالي لمقدّرات الإماره كاينّي تحطّيت أمينة الخزنه وانا ما في باليش وجارنا مقدور عليه أمّه لمصيبه إنًّو فقت بوزير التّخطيط  يقحترلي كان يلقى يفسّخني ..شكّكني قلت بالكشي العبد لللّه ماكغيفر وعنصر خطير وجماعه عندهم الحق و كيف إرعبني  قلت معّادش بيها وين نمشي لجدودي نستخف بيهم على الظلّام ويكفيوني شر الوزير . لصقني الغشير ما حبّش يسيّبني عاد قبل ما نجبهي بالوليه جبهيت بفخامة جناب سيادتها تسيّبني نمشي انزور .. قصدت ربّي نحسب في الخطوه وصلت للزّاويه نلقاها نظيفة مالعباد أعوان سيدنا كنسوها مفهوم مبعّد ما كنت ندخل عومان دخلت نتبختر قريت الفاتحه وطحت إنجبهي ـ يا ربّي منّعني مالظلّام .. يا ربّ ياجبّار عاونّي على الّي يسعاولي بالشّر وانخص منهم من أنت بهم أعلم واتخمّرت نبكي و ندعي حتى تحطت إيد على كتفي قلّي مولاها يزّي .. يزّيت .. إنسيت روحي الحرس دايرين بيّ ..  لقفت روحي..يا ربّ سامحني على أعمالي لخايبه الكل - ومنها رميت الشمع والجاوي في المقام وخرجت للصحن غسلت لولد سيدنا وجهو ورميتلو شويّه صماط في فمّو وحطّيت شويّه في قصيعه باش إنقصّر إثنيّه وتمّيت راجعه للقصر ..آنا مانيش إنخمّم ونسمع في الولد يحسب واحد ..شبعه ..أغبعه وعشغين ..تسعه وغشعين .. في العاده كيف نبدا ناكل ما نسمعش .. باش نتبنّن أمّه حساب الغشّير غصّصني .. بلعت الحيمه بشويّه ماء و تلفّتلو - يا وليدي موش هكّه الحساب قول ..واحد ..إثنان .. تلاثة..أربعة.. خمسة ..واقف .أيّه عاود -قام يحسب كيف عادتو..تسعه وعشغين ..ركبتلي ..يا ولدي في راس العدو وعاودت نمل عليه .. آنا نقلّو عاود وهوّ شاد في بحثو ومنها زهق بالبكاء..طحت نندب ..حتى الوليه غضبانين عليّه ..يا ولدي احسب كيف ما تحب ..شبعه .. أغبعه وعشغين .. أغبعه وثلاثين ..بطّلت الماكله ونفخت على عويناتو شيّحتهملو ..وحكيتلو خرافة أم السّيسي قلت إنّسّيه لا يحكي لجنابها ..الخيل مزّالو كيف دخلو للقصر و نلقاهم الزّوز واقفين مالتحزمين .. توحشو ولدهم؟ مهّأّه القواده عطات مفعولها ونلقاهم صبّو بيّ الصبّه والدّالّه .. لا تباركلهم .معّدش فيها غدوه نمشي لبسي ..

الحكم الرّشيد

الحكم الرشيد يا شعبي حاجة صعيبة ياسر,توّة آنا مرّه غلط بابا وطلب منّي باش نتلهى بالدّار وفوّضلي الصّلاحيات متاعو ..تي الأذون للجماعه أش يعملو آش ما يعملوش و المصروف و العلاقات مع الأجوار ما نحكيلكمش فضايحي ..مصروف الدّار صرفت ثلاثة أرباعو على روحي و اربع لاخر شاركتهم فيه ..وبلبزتها دكترة ووصايه على أخوتي تقولشي معاقين وانا كيف موسلّيني ناقص انلبّسهم بوط كردونه وكان ما لحقهمش بابا راني عملتلهم حبس دياري شدّيتهم فيه ..العربي واعطاه البي حصان والاّ زاده جيعان وطاح في الدشيشه ..عاده مرجوع الحديث لسيدنا الحجّاج راهو طالعلي شاكّة الّي آنا أكبر منّو بعامين -المهم طلع يتبّع في نفس السياسة بدائي مالبريمة ..ما تسألوش كيفاش شد الحكم في الامارة وكان تعرفو التاريخ أنساووو... راهو مالعترة يا بوقلب و صفوة الصفوة     ..        بعيد          على السامعين تجري في عروقو انزيمات الذكاء كيمه تجري  في عروقي البهامة حاشاكم ..نذكّر الّي خرج مرّة على الرّعيّة وطلب باش        نتحملو مسؤوليّتنا في تبذير خيرات الامارة والخبز بالأساس ..دوحي يا    مباركه باحمد ما كم تذّكرو الّي آنا كنت مطّلعه على كوجينة الحجّاج نأكدلكم الّي شفت هوايش وخيرات ما نقدرش انسمّيهم بحكم انّي مالديفزيون كانز ..نهارة سمعت كلامو على الخبزة انّجّم نستعرف الّي مشيت نحّيت زوزين دم ..والحكاية سياسة.. نتلهاو في المم كيف البهيم الّي معلقينلو جزرة قدّام وجهو معّاد يرى شيء غيرها يتخمّر ينسى الكرامه وعلاش مزْال يتنفّس ويولّي الذّل خبزو اليومي باغ ديفو ..نعرف الي قاعدة نقول في الحق ماني هايشه حاش خليقة ربّي ..الولاء يا سيدي ما يجيبو كان الدّم ..اهّوك بالأماره الجري على المم يلهّي العباد ويضمن الاستقرار..رفاهيّة الرّعيّة تعمل المشكل امبعّد يولّي عندهم وقت يخممّو ويبربشو..البرباش براس أمّك كن.. أمورك هانيه وكان يتلهاو بيك يقصّوا عليك المونة باش تجرى بيدك على المم..المهم سيدنا قال الكلمة والوذرة عملو جهدهم ولاّ الخبز يتشدلو الصّف -كيما في مصر لا تبارك الفرعون و لا  لمّاليه - عاد ماني من أهل القصر ..الّ مستكثرها عليّ شد الصّف توّه نحكيلكم حكايه..كنت انشوف سياسة التقشّف خارج أسوار القصر أما داخلو ماانجمش نقوللكم أسرار البلاط الأميري ..اسمعو ها الكلمتين..ما لا عين رأت و لا أذن سمعت ووفات الهدره ..شنوّه تقشّف في القصر؟ يقولو علينا بلاد مقمله ..أمبوسّيبل..نموتو بالشّر النّاس الكل وما يقولش علينا البرّاني جواعه..توّه صحيح الّي الحجّاج امّسّطها كل شيء أمبورتي امّه شكون كيف سيدنا يحييييه !ويدبّرهالنا رّبي يا سيدنا ..بالسياسه الحكيمه متاع جنابو ثلاثة أرباع الشعب عيّاشه و الباقي قلاّبه..حوّافه ..حلالك حرامك..وأقوى سياسة للحجّاج هاك الرّؤووس التي أينعت وحان قطافها الشعب يمشي راص على راسو يونعشي يلقاه بين ساقيه هذاكة علاش الكلنا محسوب ولّينا بلاش كرومة ..السّر الأخير انّو انا انهار نجري وراء العاهل متاعنا يحييه سمعت الحجّاج يتنهّد -إي مهواش تقنية من تقنيات الحكم الرّشيد هذيكه يمارسها سيدنا في وقت الفراغ :)) - بهّمة سيدنا يتنهّد امّالة نحن شنعملو ؟ خمّمت ولقيتلكم الحل ..هيّا نتحولو لتنّينات باش انّفسو على لواعجنا بطريقة ماينجّمهاش سيدنا ..يا شعب التّنانين قصيرة العمر ..الخبز غلا .. إيّه فينا !

في حضرة الحجّاج٩

بنادم حكايتو مهْأه بلعربي فارغة ..ماكمش مصدقين الّي زهرتلي الأيام والّيت نفعل يابوقلب عشت امبعّد ما خاصمني الحاكم ..الحجّاج بيدو.. لا ..لا ..م تغلطوش برشه ..راني مومنه ونفهملها يبدا الّي منّعني قدرة ربّي مزّال العمر أمّا نانا..نقصد فخامة جناب حضرتها صبّابت ماء على اليدين كان من خوفها على ولدها لا تمرض نفسيتو لا رماتني للضبوعه يمشمشوني ..المهم ليلتها سمحولي باش نروّح لدارنا و هزّوني تشريفات لقصر -يزّيني ملحلفان هذاكه الّى صار - الحصيلو دارنا قبلوني.. بوس وتحميل تقول مروحه مالحج ..ما يعرفوش الّي استقبلو العدوة الأولى متاع الحجّاج امبعّد الشّعب الكل نحّيو منّو الوذره تي ..الوزراء ولفيف سيدنا ..خزرت لدارنا بشماته وفي قلبي قلتلهم ..استنّاو ولد سيدنا يتّمسح كيف باقي العايله المالكه وجاه الّي خلق الدّنيا وصوّرها الّ ما الحجّاج يطهّرنا عرقيّا..خديم الحاكم آش يصلح ..كان سيدو على مراد الله ..أهّوكه بالأمارة بلقيس قالت -انّ الملوك اذا دخلوا على قرية أفسدوها وجعلو أعزّة قومها أذلّة - أيواش أمّاله ذليلة كيفي وزاد تخدم في الحجّاج ماتنجّم تولّي كان ذليلة مكرّر  ..نحب انقوللكم الّي ولّيت مشهورة وبرشة حاجات تبدلو في حياتي واحد ..ولّيت عند الجيران بيّوعه كلهم رادّين بالهم منّي ..أيواش واثنين دارنا ولاّو دوبل كاسكات قدّامي يحكيو كلام وورايا ماخذين راحتهم ..باينلي معّادش عاطيني الأمان..ثلاثة ولّيت صاحبة شأن ومنّي للخزنه متاع الحجّاج نغرف منها قد ما نحب هذايه حسب اذاعة قالو متاع الرّعيه ..الحاصيلو حتى حد ما قعد عاطيني الجنب ..ياحسره على هاك الضريبات موشحات عقاب العشيّه على سيدنا وعايلتو ..سي فيني ..معّادش فمّه فيراج انبّر معاه ..آش باش تكون حياتي بلاش هاك الدّعوات في الفجرعلى الظلاّم والخدّام امبعد الّي ولّيت منهم ..في الامارة كانت البلاد سوق ودلاّل حوت ياكل حوت ..تي خديم من تحت خديم ..وكل واحد عامل روحو سيد روحو..يفيق سيدنا يحل شبّاك القصر يشوفها مغيمة يصيح على السحاب باش يمطّر بعيد ويهدّد باش يمكّسنا بمكس جديد نفيقو الصباح نخرجو عناكشنا مالباب نلقاوشي شباك تذاكر متاع مكس المشية في الكيّاس ..الشعب ستانس بالضّربان على القفاء وعلى الجيب يضرب أخماسو وسداسو وتوفالو الحسبه سوالات ..يا حسرة على عهد سيدنا أبو بكر وعمر وعلي وعثمان وقت الّي كانت الزكاة تتّاخذ مالغني وتطّعى للفقير, وقت الّي كان المكس حرام..على زمان سيدنا يحط الفقير نهد قلبو على الّذي منو في الاماره والغني عندو حصانة ..أيواه بالله ما تنساوش راني نحكيلكم على عهد الحجّاج الّي عايشتّو في المنام برّاو هاتوّه المرّه الجايه نعطيكم أسرار الحكم الرّشيد ومولاها ربّي ..

المنعة

تحت الرقابة كنت مركحة عينيّ على اللاترال بعد ما نفذت من الحجّاج حلفت باش معّادش انكلّم روحي ..فينيتو .. يزّي .. كفايه ..انتهى حديث الذّات اللّي شعره ولاّ حطني بين يدين هادم اللّذّات..شوف هاك الهدره الكبيره اللّى شعره لرصّاتلي من جرايرها لا ولّيت من اهل السماء..آش خفّفت عليكم ذنوب يا أهل القصر عمري عدّيتو في سيرتكم تعملو والا ما تعملوش ...ودد ودد ودد ..مغلغلة ربّاني ..حقد طبقي .. لا ..أصلا الحكم مهواش طبقة أمّا مصيده للّي يفهم ..من فعايل ريوسنا وذنابنا..لا تباركلهم ..المهم ولّيت بكّوشه بالقوّة .المهم تحت ساقين ولد سيدنا ولّيت نعدّي في الأيامات الغشّير ما يعرف شيء من دنيتنا وأول رعاع شافو العبد لله ومنْو فهمت الّي الحجّاش ما يعيّن خيط في ابره الاّ ما يراجع عيلتو نقصد حضرة جناب فخامتها ..انساو الوذره هاذوكمه صبّابت ماء على اليدين ..ينفذو التعليمات والاجتهاد ممنوع اللهم في صورة التضييق على أهل البلاد وتوعيتهم بالسياسة الرشيدة للحجّاج وتحديد وعي العباد برزق اللّي بالي بالك ..سيدنا الحجّاش عطاتو الدّنيا طغى , سيدنا بيدو يقتل في الوقت كيفنا يا بوقلب نهار كامل متكّي على جنبو يحط في ختمو على فرامانات التضييق و القتلان  ما يخممش مرتين.. الفساد عم والظلم زوّك منّو البقر ياخي خير الحجّاج جايبو من دار بوه ..طلعت نحكي مع روحي بصوت عالي  واسمعني الحجّاج وامر باش يخدموالسيّاف ..الحجّاب يكركرو فيّه من ساقيه وآنا نتصكّك بالايدين والساقين حتّى عمر الغبينة عزيز ..انا نتبلحص كيف البغل بين يدين زبانيّة سيدنا و تشوفني مراحم عظمة عينين جنابها ..حتى الوحوش تلقى فيها الرّحمه الاّ سيدنا لا تباركلو ..أمرت فخامتها الضبوعه سيبوني ..وآنا هات أعطيه نتصكّك ما وقّفتش عروقاتي شرتلّه وادموعي تتناطر نبكي على عمري ومنها جمدت في بقعتي ومسّيت عنقي مزّلت حيّه ..وقفت في وضعيّة الاطاعة الظهر محني ودموعي تقطّر سألتني للّه أش عملت وما ظهرّلهشاش باش تسمع الجواب ..أمرت الحرّاس ينصرفو و أمرتني باش انتبعها لجناح ولد سيدنا ..خلاتني نعمل في الأنيماسيون متاعي شويّه بكاء على تبلحيص قولش عليّ نودّع في حياة السلاطين ..دق عليّ شاهد العقل امبعّد ما فد منّي ..قعدت نخمّم توّه كيف انموت آشباش نخسر ..عدّيت أيامي كيف الناس انهز ساق تغرق الأخرى ..دايخه ما بين الأيامات عايشة تصنيفي في الكائنات العشبيه- اللحم يقعد  بعدي -آنا نخمّم وادخل ولد سيدنا يجري ترمى في حضني يدحنس عليّ ومن وراه الحجّاش وفاخمتها ..وخزرتلو قالتلو أهيّه الأماره تحب اتضيّع الولد ..وقف الحجّاش بالفم والملا ساكت الطشاش يتناطر من عينيه و فمّو ساكت ..حبّيت نشطح نعمل كربيستين القدّام ووحيدة لتالي يا شعب العلا العمر ما يوفّيه كان ربّي أمّاله علاش فرعنّا الحجاش وقت العمر ما يوفه كان ربّي علاش هزّينا الغلب والعمر ما يوفيه كان ربّي ..ولّيت نفعل قيدوني في غينس متاع المنعان من سيف سيدنا ..السّر ..المحبّه ..يرحمك يا ذكرى