Thursday, April 7, 2011

هيبة الدّوله ما بين الهيّابه وفساد الحكم الستّيني


توّه مدّه على خاطر لحنينه توفّات معّادش نتبّع في الأخبار دونك معّادش إنّجّم نعلّق علّي قاعد يصير على خاطر مافي باليش بيه ..أيّا هنهارين دخلت علباج متاعي وعملت طلّه علأصحاب وياهول ما رأيت  قلّك السّبسي ينكّت ، شنيّه آخر ، إم ،جاب وزير داخليّه ملّي كانو في النّظام البايد تقلدو مناصب هامّه أمّا بالأساس في الفلاحه ،علاش لا تي حتى نحن كشعب ما نستحقّوش قانونجي يقرا القانون ويطبّق علينا آش يقول القانون كيف سي الرّاجحي يرحم والديه ..الدّاخليّه يلزمها تكون مِذرع ومن تحت إيديهم إي علاش لا موش جديد هذيّه إسمها طيحه بتكربيسه متاع لخرين  : الأغلبيّه الغاوغائيّه بقله تهزهم فرد إنهار.  هاك السرّاق ، القوّاده ،الشلايك ،الضبوعه ،الشّعبيسة ،الّاوطنيين وسطرين على ها الوصف لإنهم ما يلعبو كان على درابوهم وذاتهم لعزيزه . حشمونا حتى كيف فقنا بحجم نهبانهم لموال ..البيليك .. وحده منّاس دخت يا بوقلب لا خلّاو حتى مؤسسه عموميّه إلّا ما لعبو عليها الملك العمومي ، التهرّب الضّريبي ،الدّيوانه ،البريد ،الكملوط ،حرابش الهلوسه بيعان الشراب ، إحتكار بيعان الدجاج ، ،التيليكوم .. ليسته طويله يا العايش ! عجايب من عجايب و 2626 و 2121 .. والفساد الأخلاقي والتربوي شي يحشّم ، في نهار طاحت لقنعه بالسّيف عليهم طلعت الدّوله سوق عبد السلام منظّم أعليها سيبو المجرمه آلاف وهتكو لعباد ما بين شهداء مغدورين وهتكو لعراض وفي نهار رجعو يغنّيو  بهيبة الدوله يا معلّم شكون فضحنا مابين الأمم ياخي الشّعب هو إلّي كان يصحّح على إنتقال الملك العمومي لملك خاص وعلى خوصصة المؤسسات العموميّه ،ياخي الشّعب هو إلّي أشرف على مساعدة المؤسسات الخاصّه على التّهرّب الضّريبي .الشّعب إلّي غرّق لبلاد بالتجاره الموازيه .. الشعب هو إلّي ترّك الدّوله ؟ سوء السمعه جابوها حكّام لبلاد من لاستقلال التوّه ويلّي تفشلمو علينا بهيبة الدوله كان جات عندكم ذرّة إنسانيّه موش أخلاق لَمدو رواحكم والتخبّاو بالله الكريم ما ضيّع لبلاد كان إنتم ! في مصر كل  مجرم شد ببّوشتو والحاكم العسكري إمبعّد ثلاثه أيّام أعلن القبض على آلاف المساجين الفارّين وشد أهم رموز النظام البايد سواءا من الوزراء أو من إلّي شادّين مناصب هامّه وثبت تورّطهم في الإعتداء الجنائي على الشعب والفساد المالي .. وفي تونس يلقيو في القبض على المعتصمين و علّى ينسبولهم في تهم ذات صبغه جناحيّه ربّي أعلم بمدى مصداقيّتها .. ويأججو في الفتن ويحجّو للضريح إلّي لامم الدّكتاتور السّابق إلّي خلق عقليّة السّياسيين السّارفيتور بالعربي هاك إلّي إرادتهم مغلوله ومخاخهم متاع عبيد كان ما عندهمش سيّد يخلقوه ، ويفرعنوه ويدورو على الشّعب باش يركعوه  ..السّبسي الثمانيني والشّابّي كيفو ، الأوّل  ماهو وزير أوّل في حكومة تصريف أعمال والثاني للعدل بايعينها بلفته أهم إنجازات السّبسي لهذا التاريخ : التنكيت ..وأهم مواهب الثاني حتاش لتوّه السراح الشرطي لمساجين الحق العام ( ردّو بالكم ما عندوش دخل بالعفو التشريعي العام على سجناء الرّاي هاذوكمه سيبوهم الثوار ). واعجبي والمبزّع كيفهم  ..
هذا الوطن عجائبي الصّنعه لم تتحمّل أمّي رحمها اللّه وهي الستينيّة أوزار معاضدة أهل السّياسة وخاصّة التّجمّعيين بلا ريب ، فلم تنخرط ولم تنتخب في حياتها قط وبعض أولئك لا يتبرّئون من تجارة الكحول ولا من الإغترار بالكرسي وكأنّ لسان حالهم يقول : تصل متأخّرا خيرا من ألّا تصل أبدا للجلوس على الكرسي ..لا يهم إن كانت بعض الدّماء المسفوحة تتعلّق بالرّقبة  الهرمة أصلا ولا خوف فالماضي يبدو حافلا بكلّ شيء ما عدى بمحبّة ما يسمّى في لسان العرب بالوطن اليوم نتصالح مع فكرة تعثّر الإقتصاد لاعتصام شريف ضرب هناك بجوار ميدان القصبة . ويصيح المنادي "الهيّاب "بهيبة الدّوله وفجأة تترائى للنّاس الشرطه !
 جمعت أطراف ثوبي ولممت جناحيّ لجنبي أخاف أن يتّهمني جنود هامان الّذين ظلّو بعده بحمل ومسك السلاح الأبيض وحتى بالمسك بنيّة الإستهلاك لمخدّر الزّطلة .
 هيبة ..أشرقتموني بالضحكه ،إجمعوا أنفسكم يا هيّاب تونس بمنطقة القبّة في المنزه ورصّوا صفوفكم أولى لنا أن نعرفكم فنضرب دونكم قلعه نمسمرها فلا تقدرون على الخروج أبدا فأهل يأجوج مثلكم لا تهمّهم الفضيحة أبدا . ولكن تذكّروا إنعدتم يا أيّها الحمقى عدنا وليحيى الوطن النّاشىء في رحم الثّوره 

4 comments:

  1. allah yar7am emmimtek w'yna3amha w'ysakkanha jannétou. el barka fik.

    ReplyDelete
  2. allah yirham jm3ie elmoumnine w yerhim weldik yè khouya

    ReplyDelete
  3. allah yarham el wélida wel barka fik

    ReplyDelete
  4. الله يرحمها ويعفو عليها وعلى أمّة سيدنا محمد ..الله يرحم والديك وشكرا

    ReplyDelete