Saturday, April 9, 2011

كان عمرك ثمانين شد دارك واعمل ركعتين

ساعات ما نلقى ما نقول كل شي يبدا واضح لوحدو يحكي على روحو موش مستحق تفسير والتوانسه الكل فاهمين حتى أصحاب العمايل في بالهم إلّي هومه مكشوفين أمّا ماهم سانتير نوار في الرّقعه وعندهم بوط في عوض وجوههم وهذاكه أعلاش ماعلابلهمش بالطرح على خاطرهم .. إي هذيكه هي ،عيب نكتبها .. أيّ سيدي ماهو اليوم عيد الشهداء ، موش باهية  المناسبتيّه بيناتنا بلاد تحترم نفسها تكرّم شهداءها كل يوم على دورة العام موش ملعام للعام والتكريم يكون بالعمل على احترام الحريه الفرديّة للمواطن وإرادتو الحرّه ..أمّا مادامنا من 56 لتوّه محكومين بالكامورّا فيا خيبة المسعى ! ستنّاو موش علينا  وإنّما  عليهم  حكيت  توّه  نهارين  على  هيّابة الدوله وفي الحقيقة كارني نجبد عليهم بحقيقتهم رقع تونس ماكم تذّكرو مرجان وسسمو فريعه ..تي هذاكه إلّي خرج عاقد حواجبو إمبعّد نهار  14 وقال إلّي لبلاد صار فيها آش وسبعين قتيل الله يطوّلّو في عمرو ويقتلو عرق بعد عرق حتّاش يفهم إنّو الله حق . لوحيّد كيف شد الدّاخليّه أعلن الطوارىء ومبعّد سيدو ما قلّو موش معقول ، الكرطوش لا !.. إستشهدو وهو شادد الدّاخليه آش ومياة راجل ومرا من بنزرت لبنقردان وسي وخينا موقوف على ذمّة الّي صار في عهدو ؟ لا : مزّال مسيّب لأنّو آكس حزب رقع .. ما كلّفش روحو الكو دو تياتر متاع الغنّوشي وما انسحبش من حياة الرّذيله عفوا الخطأ في الطّبع ، ملحياة السّياسيّه وإنّما عمل حزب سمّاه وقيله "الوطن " والوحيّد مزّال ناشط .. أيواش الوزف تي مرجان العيب على ذاكرتي ما تشدّش أسامي المسهولين مبعّد إستماتّو البطوليّه في الدّفاع على الزّين حتى آخر رمق وخدمتو لمدّه طويله في تدعيم النّظام متاع معلمو ومبعّد ما وضاح حجم النهب والخمج متاع النّظام الكلّو مزّال ما عافش السياسه و كرشو ما ضربتهاش التخمه مالإعتداء السّافر على حرّيات الشعب وعمل هو زاده هزب .. لمبزّع  ، توّه صحيح هو راجل كبير أمّا بالله حتى حد ما نصحو وهو مكهّب على الثمانين ينحّي هاك الشوفاليي الذهب من صبعو .. باهي آش يهمني فيه بينو وبين مولاه ،السّيّد عامل روحو خاطيه  كل مرّه يقدّم ويوخّر ويعيّن وزير أوّل على كيف لخرين السيد  غالط  يستخايل روحو بالرّسمي عندو شرعيّه ،يفصّل ويخيّط مع نشطاء التجمّع،لأنّو ما نتصوّرش أي فرد في هذا الشعب يقبل إنّو يتحط آكس آرسديست وثمنّيني فوق مالكل باش يقود مرحله مهمّه من تاريخ بلادنا ما بعد سقوط الدّكتاتوريّه والأكثر وما نيش باش نتدخّل في السّبسي ومعطياتو الشخصيه والبزنس متاع عايلتو الصغيره :/ لأنها ما عندهاش علاقة مباشره بتسميتو لكن أكيد إنّو هذا الشيخ إلّي كيف ولد بنادم الكل إلّي في عمرو ، فارش ومعدّيها .. تذّكروشي وقتاش بورقيبه فد منّو الجمهور ؟ إي ، وقت إلّي كهّب عثمانين ولّاو الوزره معدّينها عليه ويتناحرو ما بيناتهم قولش علاها البلاد تركة بوهم وكل واحد يجبد ليه . نكذب ! برّاو تفرجوا في شهادة مزالي في المستقلّه توّه تشوفو الخنّار. آشنوّه الخير إلّي باش يجي من آكس آرسديست والله راهم الشهداء المغدورين تقلبو في قبوراتهم ! آبان السيّد صدّق روحو إلّي هو في هرم سلطه  ، سمّى روحو رئيس حكومه والكلام هذا موش الصحيح هو شبه وزير أوّل باعتبار غياب الشّرعيّه الإنتخابيّه  عليه  . بابا عزيزي  ، أقال سيّد قانونجي يتعامل مع الكل في البلاد بالتشريع الجاري بيه العمل  وبالقوانين الدوليّه سي الرّاجحي يرحم والديه إلّي بدا ينظّف فيها عاري ولابس ، وجابلنا آكس آرسديست ، أوّل حاجه عملها ضو أخضر لعربدة الشرطه وارتكابهم  لجريمة تجاوز السلطه وماهو شفنا الفيديو متاع إلّي صار بفضل راديو كلمه البوليسي شاهر سلاحو  على مواطن أعزل ويرهب فيه وقيّد على هيبة الدوله متاع السّبسي .. في أخّر الحلقة يتشدّو وليدات جامعيّين بدعوى مخالفة قانون الطوارىء ومتأكدة بالرّغم إنّي مالطّلعتش على نصوص الإحاله إنّو تم إتّهامهم بالإضرار  بملك الغير ويمكنشي حمل ومسك سلاح أبيض لتكتمل الصوره لإرهاب الدوله إمبعّد ما ظهر فضايع النظام السّابق واعتداءوا السّافر على أرواح وأعراض وأموال وحقوق الشّعب كان من المنتظر إنّو تسير محاكمات تاريخيّه لرموز النّظام السّابق وللّي خدموا في  الدّواير الحكوميّه متاع بن علي تقطع فيها تونس مع جرذان وقطاطس الخمسينيّه الأخيره من حياتها ولكن يظهر إنّو ها القطاطس أشرس من ميغالو و أسقط من شرشبيل .. في هذا اليوم العظيم من تاريخ تونس آنا متفائله بلّي جاي قد ما يخلبزو لعزايز وبيّاعة الشراب قد ما يطلع سقف المطالب متاع شباب تونس وقد ما يكبشو في تصحيح مسار البلاد ..أهّوكه في بالكم ، أوّل حاجه تطهير القضاء وضمانات إستقلاليّة القضاء باش حتّى منظر ما يمنع بجرايمو وحتى واحد ما يكسكي من أجل آراءوا . ثانيا التشديد على حياديّة أعوان الدّاخليّه والدّفاع و قطع إرتباطاتهم بالحكومه بتدعيم المؤسساتيّه وإنهاء كل دور سياسي داخل أروقة وزارة الدّاخليّه وهذا ما يكون كان بالعسّه ، كيفاش ؟ يلزم نثبتو من كل المترشحين للمجلس التأسيسي فرد فرد ونجبدو تاريخهم وتاريخ عايلاتهم ونثبتو في الشقيقة والرقيقه ومبعّد إلى الزّحف إلى الأمام إنّخبوا الشرفاء و الأذكياء ..أزلام النّظام البايد نفوشكوهم  إنطهرومنهم مستقبل بلادنا وامبعّد نرجعوا  للمنزل فرحين مسرورين مع الضمانات القانونيّه إلّي يحطهالنا المجلس النّاس لكل توّه تولّي كيف كيف  .. صحّه لينا وربّي يرحم الشّهداء ومّيمتي ..أم قيقوز سلام !

8 comments:

  1. ربي يرحم الشهداء و يرحم أميمتك يا غالية ... ويرحمنا أحنا بالمناسبة من هالشياب إلي حاكمين فينا
    :(

    ReplyDelete
  2. فنّان ، ما حاكمين كان في الزّهايمر يلعبو معاه طرح خربقة .. تعرف هذوكمه كيف ما غنّى الشيخ الإمام يضحكو في ضحكة الديوك والروح حلوه قول قالتها غيغوز آه يرحم إمّيمتي وجميع المومنين يا خويا

    ReplyDelete
  3. ان شاء الله يا قيقوز وخيتي... الحق ما انجمش نكون متفاءلة كيفك. ربي يقدر الخير واكاهاو
    الله يرحم الشهداء و ميمتك

    ReplyDelete
  4. تفاءلوا خيرا تجدوه .. ستفايل .. التشهدير إلّي عاملينو الآكس آرسدييست ما عندهم وين يوصلو بيه واستقواءهم بالدّاخليّه توّه يوفى . ستفايل !

    ReplyDelete
  5. ستفايلنا يا للا :)و خاصة بعودتك و طلتك البهية علينا و الله ليك وحشة (معجبة سرية هيهي)

    ReplyDelete
  6. إي علاش لا هاو في بالي : سريّه يا بوقلب شتهبّطني كردياك براس لحنينه قلّي شكونك مادام في لخّر ضحكت معنتها معرفة .. عيّش أختي إكشف على روحك ونوعدك ما نبيبليش الكومّنتار ..نفذلك شكرا للمرور يا ملثّمه وهاني في الخدمه (جورناطّي بخمسه لاف هههه)

    ReplyDelete
  7. هههه للاسف موش معرفة يا قيقوز الباهية :( اما ...شيقولولي..متابعة وفية للبرنامج ^^ ايا ليلتك زينة

    ReplyDelete
  8. immmm :) behi bonne nuit yè galiya

    ReplyDelete