Monday, April 18, 2011

مواهب الدستوري : بيّاع شراب و ماتّور أون سان زكيم

ساعات تكثر همومي ولا عاد نتسوّق ولا نهز البردعه ،نولّي كيف الزّير المتّكّي  زوز أفكار ورا بعضهم يخلّيوني إنلهّج ونتنفّس بالباي . الله يرحمك يمّيمتي ياحسره كيف كنت تصلّحلي لمثله التونسيّه كيف ندخّلها بعضها وما نعاود منها شي بالصحيح ، اليوم قريب نولّي كيف أي ديناصور عربي نغنّي وجناحي يرد عليّ . يامّي قلّك عملو ( ما تسهلنيش شكون ) ميثاق موواطنه آآآآعععع مزّلت نسمع ونشوف ناقص كان باش يعملونا الأديان ( التحليل الجيني ) ويعملو تطهير للعناصر الدّخيله عليهم يمّيمتي وين باش نشب ؟! قلّك يلزم النّأي بالإسلام عن كل الصّراعات العقايديه والإيديولوجيّه .. إي أمّاله في ها البلاد وين يكوّر الإسلام فانا ديفيزيون خلّيني نقلب الفيسته آنا والمسلمين في ها البلاد ونعرفو وين نوظفوا دينّا . بالله قدّاش من ملحد في ها البلاد وقدّاش من يهودي وقدّاش من متورن وقداش من لاديني على خلفية الشذوذ الجنسي و التزبريط وما لفّ لفّه باش نشوفو رواحنا إلّي نشهدو لا إلاه إلّا الله قدّاش نحن و نرميو المنديل ونخلّيهم يقاودونه كيف المعيز كانهم  بالرّسمي كيف ما قال زميمهم الكلين الأغلبيّه الصامته..عندي مدّه وانا نتقلّى ومكشكشه كيف الحوته نخدم بفيزيبل واحد الله غالب ها البلاد مصيبه عظمى مليانه بالرقع مليانه بالفشلامه والشلايك النّاطقة قلّك التجمّعيين السرّاقين الضبوعه خرجو يعلنو دستوريّتهم ورفضهم القاطع للإقصاء ووووي ييييااااامزمّر ،تي كارو يتعمل محاكم تفتيش لكل منخرط في حزبكم ملإستقلال لتوّه ونبداو بجرايم الهرسله والصبّان والإثراء على حساب المجموعه الوطنيّه بداية من إلّي يخدم في الشعبه ناشط حتّاش للوزير ونشوفو مكتسباتكم من إمتصاص أموال الشعب ومبعّد نتبعو القوانين الجايره إلّي مرّرتوهم بالأغلبيّه متاعكم في مجلس الدّواب ومصادقاتكم على الأوامر المافيوزيّه إلّي ذهبتلنا شيرتنا .. تي قداش كل واحد منكم من موقعو لعب على درابّوه وستغل النفوذ إنّو تجمّعي خامج باش إنتهك أعراض النّاس ولهف أموالهم وبالصّبّه قدّاش بعثتو من بريء للحبس . قلّو هاك السّبسي عمر الفرططّو (هذيّه إستعرتها من زميل ملباهين )  ينبّه إنّو حرمان منخرطي التجمّع البايد مالترشّح للمجلس التأسيسي يهدّد السّلم لجتماعي هههعععع  الله يرحمك يا مّيمتي خلّيتني نعاني وحدي بعدك (قبلت كنت نحطها قدّامي ونخطبلها ساعتين على فساد مؤسسات الدوله ) يا سليل الدّساتره ياخي كيف 99 بالمياه متوانسه ما مارسوش السياسه مالإستقلال لتوّه نصبنالكم المشانق ..إي يا حاج ولّا قيلني بالك متحبهاش يا مسيو فارش ومعدّيها وما في بالكش ياخي ما حكاتلكش لحنينه متاعك على حاجه إسمها الأخلاق ..ترّكتو لبلاد بالمحسوبيّه والرّشاوي والكتاف والقواده ومحاصرة النّاس في أرزاقهم وانزلتو علينا بالفيسك حتّاش قطّعتونا وبهذلتونا وخلّيتونا نشهقو ما نلحقو إمبعّد ما بان حجم الفساد في مؤسسات الدّوله إلّي كانت تحت إدارتكم وضيّعتو عايلات بالآلاف تمارسو علينا الإرهاب الفكري والسياسي وتزييف الإنتخابات بتسعه وتسعين بالمياه وتحبّو تساهمو في إعادة البناء ! آآآآآآععع .الله غالب إمّيمتي حكاتلي على الأخلاق هذاكه أعلاش ما نيش باش نسب ونقول ما فمّاش حتى تجمّعي ولا دستوري مهواش مورّط فلّي وصلنالو ..شكون إلّي عملّنّا ملّيشيّات ؟ أهّوكه الصيّاح مستعرف . وشكون في 23 سنه ما فهمش إلّي أعلى هرم السّلطه سرّاقة؟ آش خلّاه ينشط ويخدم في الحزب ويشد وزاره ويعاون بن علي باش يتحوّل لقارون ويعاونو بالتصحاح على إنتقال الملك العمومي لملكو الخاص وفي لخّر يطلع هو بيدو شاري ملك الدوله إلّي تباعلهم مبعّد ما حولوه لملك خاص برخص التراب .. يا رقع كان تستخايلو باش تخوفونا بالفوضى الخلّاقة وتحكّمكم في الإقتصاد بروس لموال الفاسده والتخويف ماللإسلاميين وتخوفو السّوكارجيّة على الدبّوزه متاعهم ( نعرف إلّي أغلب سياسيّي التجمّع بيّاعة شراب تي موش في النوار بالرّخصه ،ماهم واااصلين عندهم الحق كيف يخافو على مواردهم الماليّه تصوروا الزّبراطه يتوبو عمّي الفرططّو ما يموت بالقهر) تخوفو بإنّو لبلاد باش تترّك ملإعتصامات هاو مافلستوش سيادتكم مالتجاره الموازيه إي البركه فيكم إستغناو إنتم يزّي مااعينّاش . وتخوفو من الإسلام ، بهيمه ليوم في قناة تونس طبعه سألة هاك لمريكانيّه قالتلها شقولك في نمو التيّارات المطّرفه في تونس هههههعععع ،ياخي في بالكم لمريكان راقدين على وذناهم برّاو أقراو وثايق ويكيليكس تي سيادكم فاقو باللعبه ومعّادش تنجمو تجلدونا بمحاربة الإرهاب راكم غالطين لعبكم مكشوف ياخي مبعّد  ما بانت فضيحة مجموعة سليمان وإنّو كو مونطي مالدّوله باش يتحصّل علي بابا على فلوس دعم لمريكان لمحاربة القاعدة يحطهم في جيبو مزّلتو مبعّد ما فضحكم ربّي باش تخوفونا ملاإسلاميين لاه قالولكم أعلينا ناكلو في الحشيش آش كون فيكم يا تواانسه يصدّق إنّو في تونس فمّه إرهابيين ..مانحكيش على وزارة الدّاخليّة :/ ... إلّي مزّال مصدّق برجوليّه يمشي لطبيب يا بوقلب تي نهارت إلّي فقت إلي المورطين في أحداث سليمان خاطيهم دخت وطلعلي السكّر حسّيت إنّو تلفيق جرايم القتل للأبرياء وقتلان الناس في ها البلاد كان عامل مسد ومجرّد التصديق لهاك الكذبه متاع نظام كنت نجزم إنّو فاسد ، توريطه  .. عمّي الفرططّو كل مرّه عامل كيف المخلوع تحط في كلام ربّي في كلامك يمكن تحب تأكّد على إستقامتك (ساعات تبلبز ) وناسي إنّو المولى يقول "كبر مقتا عند الله أن تقولوا ما لا تفعلون " (سكّر محل بيعان الشراب فمّاشي تترحم ) تنجّمشي تفسّر أعلاش لمّات القبّه ما يقلقوكش و ويني الماطراك والّاكريموجان في ساحة حقوق الإنسان ..كان عملتوها رانا ما ربطناش لخيوط مع كلامك إلّي قلتو في الليل برجوليّه تاعبيين في الإخراج راانا فايقيين . والصحيح يا عاقلين إنّو النّظام السّياسي الجاي ما يتعدى كان باستفتاء ونردّو بالنا من رياض بن عاشور ما حاشتناش بوصايه من حتّى حد ومن ها المدونه نأكّد الثّوره مزّالت ولازم ناقفو لأذيال الدكتاتوريّه وخاصة نردّو بالنا من أعوانهم الأمنيين وروس لموال الفاسده إلّي تدعم فيهم ولنا عوده ضاهرلي لازم إعتصام مليوني جديد باش ما يتّممسحوش أعلينا من إجديد!

6 comments:

  1. يا غيغوز حشى أختي ناس سقاط و بعد ما كانو يستعملو في لسان اللوح أصبحت وجوهم كاملة لوح ...

    اه اجة حاجتي بدوسي ههههه يضهرلي عرفتني علاش هع هع هع (نفرك في يديا كيف الذبانة) و بالله تعمل مزية على خوك الزوالي في أقرب وقت جاوبني (نحط في صبعي فن جبيني ونقول أمان مع تذبيلت عينين) حتى في الفيسبوك على خاطر نحب نعمل تدوينة توضيحية لهاك التدوينة إلي برشة ما فهموش قصدها ونحب نزيد نبرقش شوية دوسيات من عندي :)

    ReplyDelete
  2. Jamila ya 7mayda w gharghar ya ghourab xD

    PS. j'ai pas compris la moitié du titre xD

    ReplyDelete
  3. horr je ferai de mon mieux mais je ne te promet pas ena bidi chedda rouhi linfouchik iddoussiette vue les contraintes professionnelles mais de tte manières tes postes sont plus que clairvoyants c des chefs d'oeuvre amma nchouf win gollik ;)

    ReplyDelete
  4. primavera : le titre ; metteur en scène zkim hacha okhti on apprend de plus en plus que les rcdéistes font des longs métrages mais dieux ce que c nul :/

    ReplyDelete
  5. و راس أختي فيقنلهم مليح مليح، و نقلك ولاد الحومة لا يسكوتون ، هذي ناس خادمة مع المخلوع و بوه إشايب الأكبر، معناها في بالهم قافزين على اشعب المسكين خليهم إلى حين بش تتنحى علاهم السبة و معادش تجوز فيهم الرحمة و بعدها الحساب تحت التوتة، خاطر هل ولاد المتصليش كان تقص فيهم راس ولا ثنين راهي الكلها شدة جحورها أما قيد على اشعب التونسي متحضر

    ReplyDelete
  6. قدوتنا رسول الله "لا إكراه في الدين "سينون يا آنونيموز ههههععع زنقة زنقة حوش حوش وراس خويا هذاكه إلّي يلزم يصير ربّي يحيي الدّين ويعطي لدولة الحق في بلادنا ساعه :)

    ReplyDelete