لبلاد .. يا حكومة

هموم قلبي نسلم عليكم برشه ونقوللكم سايسو رواحكم وبراس لحنينة أنزعوني خليولي علقليلة فيزيبل نخدم بيه يا رسول الله قريب تردوني عبد غير درج و"هضايه" علاش حبيت قبل ما تعملوها فيّ نزرب روحي ونحكي مع لحكومة الجاية بالكشي رئيس الجمهورية المدون يدّعثرشي  في هتدوينة ..
أيا سيدي : يا حكومة كان ناوين تحنو على تونس وتخدمو البلاد أعملو إشاس ألوم معنتها شدّو الأيادي إلي من  15 جانفي تسميو فيهم بلخفيه وفلول التجمع إلي قاعدين يقتنصوا في الفرص باش يبثوا الفوضى في لبلاد ويضربو في الإقتصاد من خلال حرق المنشئات العمومية ونهب الممتلكات لعامة والخاصة وقاعدين يضعفو  في الدولة باش يستولاو علحكم .. إذّكرو أحداث مركز الحرس في الكاف وفيلم المرا إلي خذات كف وفيلم الأنطوكس متاع المتلوي إلي خلفت 17 ضحية و أحداث سيدي بوزيد كلها أحداث ثبت إنو وراها محرضين ومجرمه عدليين قاعدين يحمشو في شباب يتخمّر في الفول ..
الشاس ساهلة ، مبدئيا لزمكم تحطو كل الناشطين التجمعيين سابقا تحت المراقبة و تكون الأولوية الأمنية تحديد الجناة في تلك الأحداث وأساسا المحرضين وراهو مهواش صعيب إسهلو التوانسة ما فماش تونسي ما يعرفش الرّكاي متاع التجمع وزيد البوليس متاعنا كان يحط في بالو يطيحهم والله لا يمنعو أعطيوه إلفو فار شيخدم الدوسيات الصندي وبرّه 
ياحكومة حددوا الأولويات الأمنية وركزوا خطابكم على علوية القانون موش الهيبي متاع الدولة دو سو فات أي إضراب في القطاع العمومي يلزم تكون عقوبتو العزل على خاطر الموظف العمومي إلّي ما عندوش همّة  باش يلتزم بلقانون ويستضعف  الدولة باش يعمل إلّي في مخو نصيحة نعزلوه هاو البطّالة الكادر بلمشطة يا خويا خلي نجيبو شكون يحب تونس ويحب يخدمها موش يبرّكها ويليق عليها .. 
ثاني نصيحة باش تحققوا مطلب الشعب في المحاسبة وهذايا ما تنجموش تعملوه بلاش إبعاد البعض ملقضاة من مواقع القرار والمسؤولية وتحطو في عوضهم قضاة معروفين بطابعهم الإستقلالي ورغبتهم في تحقيق العدالة الإنتقالية و الحل في كليمتين تلقاووه عند جمعية القضاة إلي هوما أهل الداخل ومحضرين ليستة فيها 214 إسم بالحجة علّى يلزمهم يبعدو عن مواقع المسؤولية في مباشرة الأعمال القضائية يا سيدي إجتمعوا معاهم راهم عاملين خدمة صحيحة وعندهم تصور عملي للعدالة الإنتقالية بداية من تطهير القضاء إنتهاء بإرساء العدالة و إيقاف مسلسل المماطلة في المحاسبة وارتهان العمل القضائي من طرف وزارة العدل لصالح فئات بعينها وهو ما خلق نقمة شعبية و باش تخلطو لصبر جماعي على أزمة البلاد برهنو  إنكم جادين في المحاسبة !
 النصيحة الثالثة .. موش معقول والأزمة الإقتصادية بركة معاها بلدان كيف اليونان و إيطاليا هوما يعملو سياسة تقشف ونحن وزارة الثقافة تسيب قرابة المليار دعم ثقافي لأفلام برونوغرافيا هابطة فنيا ومضمونا موش معقول إنو الدول المتقدمة تتقشف ونحن إلّي بيلكونا السراق والناس مزالت تعيش تحت القزدير نعملو في الدعم الثقافي .. هات نمَنعو الناس ملموتان بلجوع وكيف يرحمنا ربي نشاورو الشعب كان حب يبقشش على النوري وأمثالو  وقتها  يعمل الله دليل !
الحاجة لخرى يا  حكومة تسريع مصادرة كل أملاك العايلة " المالكة  " و اعطيو إيطا بلأملاك للشعب باش تسحبو القوات الأمنية والعسكرية إلي قاعدين قدام هاك المؤسسات -مثال قدام مقر شمس آف آم ولا سياج بنك الزيتونة - كيف عسكر الكردونة والحال إنا حشتنا بيهم باش يخدمو البلاد  و أمنها !
النصيحة الرابعة  طيحو  شهاريكم ما تتقاضاوش نفس الشهاري إلي تقاضاوها سيئي الذكر قولش عليهم ردو البلاد سنغفورة  تقشفو وكونو شفافين فلمعلومة وتذكرو إنكم جيتو شتخدمو لبلاد موش شتستغناو ولا تتسيدو .
آه وأهم حاجة  بالنسبة للإعلام لحكومي ماذابية توجهو للناشطين في الإعلام العمومي  تحذير رسمي بالإنظباط ياخي نخلصو فيهم من ميزانية الدولة باش يمارسو التشحين السياسي والمس بالسلم الإجتماعي بإسم حرية الإعلام ؟ بالله وقتاش بنادرية بن علي ولّاو إعلاميين وماخذين لنيسياتيف في طرح المواضيع نهار كامل وهوما يتبكاو على الحريات كلي كانو غارقين فيها وتحرموا منها .. علوية حرية التعبير يلزمها وعي والناس هذوما بعاد برشة عليه دونك يستويو رواحهم .. تخلص فيهم الدولة باش يكون ولاءهم للوطن موش لفئات معينة ..
في لخر موش لازم التحليل رانا موتى .. أووف تضربو كابلووات مخي ! شمدخلني في غناية الترشي ..إمممم سي جعفر نشاالله تعملو خلية مساندة باش تقضيو على عمليات التشويش داخل المجلس بالله ردو الصاع صاعين والتسامح خليوه وقت يولي عمركم ثمانين .. كنزة ماما  موش شتخليك تلبس بيكيني .. كنزة ماما موش شتهستر و تخلفلك العار ..كنزة ماما شتوب لربي وتستغفر لذنوبها .
هموم قلبي ... أيّا مرحبا شتشربو !