برجولية ماينة باااااع شكبو عليّ وفكوني .. يا بوقلب تدخل إدارة تونسية قولش عليك داخل لتكيّة شتاخو قفة إعانات وكيف تبدا ظلامي كيف غيغوز وعامل شوليقة على طاسة مخّك بيناتنا لبستو خاطر شعري حكاكة قلت نوفر فلوس الحجامة ونستر ما ستر ربي .. إي ، آنا كيف كنت من طرحت عنقني ما كنتش طوليرونت مع الظلاميين في لحقيقة كنت نحشم منهم على خاطرهم متبعين شقال ربي ونبي وانا الطوليرونس إحساس مخليتو لليهود التوانسه لأنو بالمفهوم الدياليكتيكي لكلمة الأقلية ما فمّة في تونس أقلية كان هوما حسب التفرقة العقيدية لأنو إثنيا هتوانسه ما فيهمش حتى أقليات عرقية تغزستي وناويا على درابو خاص بيها .. أيا كيف نقول ظلامية إفهموني حسب القاموس اللغوي تاع بنو علمان ..
دخلت للبوسطه ، نلقى فيها سيناريست ملعامة شادة موظفات البريد تحكيلهم في فيلم خلطت على اللحظة الدرامية فيه :
- فاقت بيهم لمرا فلبالكون .. جاب ربي طلبت البوليسيه شدوهم يلقاوهم مرا وراجل ( قلت في قلبي وانا نفركس على لامبريمي تاع المانده : تحكي علقناصه ) .. فركسو المنقبة يلقاو تحتها سكينه قد هكه ..
- وتلفتولي ، وغزرتلها الموظفة قاتلها : هذاكة شنّجمو نستناو والله كان تجيني وحدة منقبة لنخدملها ..
- جاوبتها السيناريست رد بالك تقلّكش دخلني لداخل نوريك وجهي راي السكينة قد هكه ..
آنا فلكلوف سلكتيف دونك عمرت المانده وخرجت لفلوس من جيبي ، رجعتهالي الموظفه طلعت نسيت شنكتب كاتخوفان .. هههههه معنتها ثمانين .. قبل الديس : ولاّ فمه فرق ما بين المبلغ بلسان القلم والأرقام .. أيّا عندي وين نكتب كملت الناقص ورجعتلها الورقة إلي ولات كونفورم وأمورها هانية ضحكتلي ضحكة صفراوية وطول فرواصّيتها ورماتها فلبوبال ومدّتلي سبيسيمان جديد قتلي عاودها خير بالكشي في مركز البريد لاخر يختلط عليهم الأمر ..
تذكرتوشي موقف الب د ب مبعّد الإنتخابات وقتلّي لعبوها جنتي وعطات ميّة هاك التصريح .. آنا حسيت نفس الإحساس قدام هاك الموظفة تاع الغيشي إلي شدًّت وحدة ظلاميّة كيفي شتفكسيها وتجيب عليها الماء ملبير .. أيا بدون تردد قلتلها ما كاركش طيشت الأولى ، الفايدة آنا شنعطيك فلوس أما موش مشكلة هاني شنعاود نكتب ..
حسبتلي لثمنية وقتلي كملتش ( تقولش عليّ في حصة تدارك عند معلم سوري ) .. طفيتها قامت هزت لفلوس إلي حطيتهم بحذة إيدي وقامت تحسب فيهم ما غير ما نمدهملها ، عاد وانا نكتب قلتلها رجعلي لربعين ألف الزايدة وسبعة دينارات وخمسميه مبعّد ما تاخو حق الماندة
طفاتني مديتلها المانده وقعدت نستنى .. كملت تحسب ومنها قتلي أعلاش مديتلي لربعين زايدين ؟ ..
قلتلها : ما مديتلك شي إنت هزيت فلوسي وحدك وهتشغشيب إلّي تشغشب فيه في روحك يا حرّة هاو لربعين فوقي وما فماش مشكله ..
شفتوش خزره صفراويه ؟ خزرتهالي وقتلي لا إنت مشغشبة ههههععع جبتلها ملّخر :
- سيادتك يا مدام فو مونكي دو طوليرونس .. دينا راو سمح .. بون جوغني ( فهمتوها ) توه برشه منكم شيعتقدو إني مجرابة حكوها مرافقها وهذوم أحرار شيخمموا إنو لوصتيليتي تاع هاك الموظفة واستغلالها للوظيف شتمرمدني على خاطر الحجاب إلي لابستو .. بتطييشها للامبريمي إلّي عمّرتو ومافيه حتى تشطيبة شتشكب عليّ وتشّيف عليّ تصرف عادي وهي تعرف خدمتها دييور قالتهالي ..
قبلها بمدة واقفة في الصف ورا مادام أيا تلفتت تلقاني عملت روحها تفجعت وهزتني من فوق لوطة ..تبسمت في وجها على خاطر نهارتها لابسه كيف طالبان ( لبسه جابتهالي أختي من فرانسا شنصلي بيها التراويح وليت نخرج بيها وقتلي نمشي نزور أمي في الجبانة ) أنا عملت غريماس تاع تعب وهي كبشت قتلي :
- ظاهرلي اللبسه مرزنتك ! شخت بالضحك وجاوبتها بالحقيقة :
-قلتلها : اللبسه حتطلي في صدري فرططو خفف على قلبي همومو .. أما التعب راو بجبج علي السّمن ! في لحقيقة آنا قلتلها لكلام بالسوري ماخذه راحتي كيف العادة شنحكي ثلاثة لوغات فرد جملة باش نعبر على مقصودي ، عاد قربتلي شويه موش ياسر ، وقتلي : حاسه روحك مرتاحه هكة ؟ قلتلها حسب سورة النور أختك هكه وليت نغزستي مبعّد ما كنت مارجيناليزي وإنت يا مومنة أعمل كيفي إذا ماكش طايعه ربي علقليلة ما تتفقهاش وتنجم تاخو ملفرنسيس قيمهم في الطوليرونس مع البوذيين واليهود نفرضو تطلعلنا ملّه كيف السيخ في تونس الراجل عندو لبسة تدين خاصه منها عمامة ما يلزموش ينحيها نهججوه ملبلاد على خاطر عمامة ..
ميزافينتير تاع غيغوز ما تجي شيء قدام لاغسالمون متاع هاك المومنة إلي المجلس "العلمي " تاع الفاك حرمها متّعليم على خاطرها منقبة ..
أول هام الحق في التعليم حق دستوري ، مطلق وما عندوش حتى إستثناء وحتى إعتبارات بما فيهم الإرهاب ما ينجم يحدد الحق في التعليم أهوكة علاش برشه نجموا يتحصلوا على الدكتوراه وهوما في حبوسات الكيان الصهيوني ويسامحوني مناضلي الحرية في فلسطين لأنهم عندي مجاهدين أما سقت الكليفيكاسيون تاع الصهاينه شنقيم الحجة على صهاينة بلادي .. دونكوي هاك الدوايان تاع التطبيع كيف يجتمع شياخو قرار مع أساتذة الشُّعب وتونس جودة الحياة .. ما يلزموش ياخو قرار فيه جهل بالقانون وتعدّي علحريات سينون يولّي قرارو هدف لقضاء تجاوز السلطة و للإلغاء ملمحكمة الإدارية . أما قبل هات نفهم ياخي الجامعه ملك المجلس العلمي ولا ملك الدولة ؟ وتحكم فيها قوانين الدولة ولا عنتريّات المجلس ؟ حتاش توه ومادام لوزارة تاع التعليم العالي يحكمها لبوليميكور تاع صفر فاصل صفر على راي مجاهدي الفايسبوك الكليه ملك الوالد تاع أعضاء المجلس العلمي ، أمّا هاي جاتنا فرصة شيعرف الشعب باش نعملو كنسه للمجالس العلمية من الفسّاد زادة ، إلّي وقت كانو الطلبة يتخطفو ويدخلو الحبوسات على خاطر يصليو الصبح فلجامع ولا عملو مضاهره على المبيت الجامعي ما كانوش يهتموا ولا تتحركلهم شعرة وتوّه ولاو يعملولنا في الريل تي في قولش عليهم بناو الكليات من كاسة السيد الوالد ولّا متكرمين على الدولة يخدمو بلاش .
آخر حاجة شنحكي فيها بوليميك الدستور الصغير إلي جوهر ولد مبارك نبه من خطورتو وتجندتلو تونس البنفسجية و الإذاعات اللاوطنيه واحزاب الكسكروت والزيرو صفر ! نقلو يا ولد مبارك يا جمعياتي : إي هاو القايد السبسي سليل الدساتره إلي سرقو لبلاد وهمشوها ولي معاه خلق بورقيبة مليشيات شيحميوا حزب الدستور ولي عندو رخصة بيعان شراب ( معنتها عندو مصالح مادية تخوف منو ) وتاريخ أزرق! ما قلقكمش عام كامل يحكم لبلاد بلوغة حب من حب وكرخ من كرخ جاب الصيد ووزروا عدّاخلية وماقلكمش إنهم خرجو مراسيم فضائحية تسقط جرايم التعذيب بالتقادم وتعطي المحامي حصانة قضائيه و صححوا على معاهدة تناهض الإعدام و بركوا لبلاد في المديونية توّه عام ما خرجتو كان باش تساندو حرية الفاني وقناة نسمة في التعبير ..
وقتلّي ياض ولد عاشور خرّج قانون إنتخابي علقوايم تعيس وفيه إلتفاف على الثورة أموركم هانيه والبلاد داخلة في حيط توّة وليتو تحكيو على الوقوف ضد هيمنة الحزب الواحد في شخص رئيس الحكومة وتعملو في الإعتصامات اليوميه ؟ والله الأتلاف يتناقش ويتفاهم على تسيير الدولة هوما شيهزوها نشا الله لبر الأمان ونتوما أقعدو مبهذلين خايفين على مكاسبكم النوفمبريه ..
وتعيش بلادي .. وتسقط الأفكار الشلايكية للي على شيخة مخهم و من خوفهم علي نهبوه من رزق البليك مشيخينا بوليميك وتونس هاو انبه عليك للدمار متاع السراق والصعاليك قالت يستحيل نخلي روحي ليك وقتلي نخلطو لانتخبات البرلمان ورئاسة الجمهورية معادش تبكيو من إكتساح الظلامية هّوكة قاعدين تعملولها في كومباني إلكتورال قوية شعب تونس ظهر بلمكشوف ما يفاوضش علهوية
No comments:
Post a Comment