توه فمه نهارين حذرت صفحة كوره تونس من سناريووات ممكننه لبث البلبلة في البلاد لأنو الأقليه المافيوزية في البلاد تعرف روحها ما عندها شتعمل بكراضن التاي والطماطم ولا بكسكروتات التن ولا بالدخان المذرح هكاكا وخرج علينا هوديني متاع وزارة خارجية أمريكا يحذر مالسفر لتونس والتبسي عندهم وقتها وضاحة الصوره ردو بالكم أمريكا السحاره تشم على ظهر إيدها ما حذرتش رعاياها وقت كتايب القذافي تقصف في الذهيبه وراس جدير وتحوس عتريتوار متاعنا والجيش يرجع فيهم للقرذافي ما نبهتهمش وقت كلات بعضها في المتلوي ثلاثه ايام ولا وقت عدات مدينة جبنيانه وبعض قرى الساحل مشاحنات كبيره مع أعوان الأمن ولا وقت إنتفضت القصرين على إستهداف العسكر لبنيه وقتلها ومانبهتش أعليهم وقت عصابات السرقة عملت في خلاها ما والاها .. توه تحذرهم وما يجيوش ملا راحه أما معشر الفايسبوكيين ( باجات بعينها ) قعدو خممو لولاد وبيناتنا خممت كيفهم : أكيد إنو المقصود بالفيلم الهوليودي الجمهور التونسي !
يخوفونا كيف ما عمل باعث القناة مبعد 14 جانفي نكلم بابا نقلو يا معلم رد بالك هاو بحذاك مطارده هو يقلي موش صحيح وانا نكبشلو رد بالك تخرج ..
التحذير يلزم يخلينا نخمموا في شنيه ممكن يصير إستهداف بالمتفجرات لمؤسسات خاصه وإلاعامة ولا لمراكز الإقتراع إممم ديما يقعد تأمين البلاد واجب وزارة الداخليه وتوه مع الطوارىء ولات زادة عند الدفاع وأي تقصير هاو إنبهو المواطنين الوزره أي حاجه في رقبتكم والقيادات إلى تخدمو معاهم بما فيها قايد الجيوش الثلاثه لبلاد تسعة شهر في يدكم و مسؤوليتكم إلى ينجم يصير ..
وهنا لازم نحمل الداخلية مسؤولية تغاضيها على تعمد قناة نسمه الإخلال بأمن الدوله من خلال تعمدها عرض فيلم يمس من عقيدة التوانسه وفيه تجسيد للذات الإلاهيه والتعريض بيه
وإنو أي إدعاء باستهداف هذه القناة المتصهينه باش يقع إعتبارو آن كو مونتي لأنو هلقناة تبث في البلبله وتشوش على الإنتخابات وقاعدة تشحن في الراي العام إلي فد من تغاضي وزارة الداخلية على الإستهداف الممنهج للنظام العام باستهداف عقيدة الناس والتحريض على طيف سياسي بعينو !
الحاجة لخرى تذكرو غناية السلاح إلى تسرق من بعض مراكز الأمن ولا إلى أكدو مخابرات نسمه على دخولو من ليبيا تذكروش في هاك البلاطو شصار وشنيه تقال سفيان بن حميده كبش وقتها في إنو البلاد تسيب فيها السلاح و مبعد حين ونصف عاودولنا هاك المقابله متاع القرذافي يمكن باش يقنعونا بسيناريو إنتقامي كلي هو ما عندو ما يصنع .. براف كل شيء يذكرنا بنظرية الفوضى الخلاقة متاع الخارجية الأمريكية هاو طلع عندهم دي بارطيزون في تونس !
دونك ، ساو ،دونكوي ،إذن يا شعب تونس : التوثيق ! إناس الكل نتسلحو بمصوره المره هذه يلزم يكون عنا تصاور للمجرمه و ضبط للجرايم المتلبس بيها يلزم لجان حماية الثوره يروكريتيو دي زنديكاتور في كل زنقة ملحومه كل غريب شيشرب وشنيه يعمل في الحومه وشنيه يحكي ومراقبة لصيقة لولاد الشعب وأعضاء أحزاب التجمع الجديدة نحميو رواحنا ونحميو بلادنا من الحثاله إلي يحبو يرجعولنا النظام الشمولي ويأبدولنا الدوله البوليسيه إلي نتعاملو فيها كإنا مواطنين ديفزيون كانز وفي صورة الكشف على أي جريمة نحملو الداخليه مسؤولية ضبط المجرمين ونتمنى على الأحزاب الشعبيه في تونس وهي النهضة والمؤتمر من أجل الجمهورية وحزب العمال ياخذو تدابير أمنيه لحماية قياداتهم و خصوصي ضبط قواعدهم باش يحميو بلادنا وفي إنتظار إنو المولى يحمي تونس البيه تذكروشي هاك الكلمة التونسيه كلب ينبح على طياره هذيه العقليه إلي يلزم نتعاملو بيها مع قناة مشبوهة كيف نسمة ولا حنبعل إلي قاعدين يخدمو في أجندات معينة ومبعد يطوال ليلها وتعلف يا حلالف .. آه وقبل ما ننسى بالله يا ولاد الحومه أمنولنا السطوحة
No comments:
Post a Comment