جوستيس دو بوفر والقانون الإرهابي

موش منجم نكتب إيتا داليرت آخر فيزيبل في مخي  تحرق .. ندخل على كلافيي آغاب نخربش كلمتين نهارين بلاش نوم حطمني النموس .. سيناريوات الإيشوفمون للموعد الإنتخابي .. عضوي الحزب " الجمهوري " متكلفتين على معتصم التأسيسي بعد ما "منعوه" الميليتار ، دعوة الإمام الأكبر صاحب أكبر كتلة في التأسيسي للتظاهر نهار الجمعة نصرة للدين .. آاااه يا حسرة كيف كنت طوليرون وندخل للحسينية نعمل ضريبات .. توة كان نلقى شيعي نقسمو في أربعة ..
سبحان إلي حرّم عليّ ماكلة القرط  .. توّة كيف تحرق الفيزيبل لخر نجّم نجرب ماكلة النخالة ..
برشة حاجات واحل معاهم  وباش نكتب هتدوينة فسخت  برشة حاجات وخليت مصيبتين : 
-  محمد فاضل السايحي المسؤول بوزارة العدل التونسية أعلن الثلاثاء الماضي في مؤتمر صحفي أن أعمال العنف والتخريب التي شهدتها تونس بداية الأسبوع "وكان محمد فاضل السايحي المسؤول بوزارة العدل التونسية أعلن الثلاثاء الماضي في مؤتمر صحفي أن أعمال العنف والتخريب التي شهدتها تونس بداية الأسبوع "جرائم إرهابية بامتياز وسيكون القانون المنطبق على مقترفيها من جنس الفعل (أي) قانون مكافحة الارهاب"
- ومبادرة خليفة علي بابا والأربعين حرامي بارون بيعان الشراب المجرم الفالت من العقاب أول من يجب إخضاعه لقانون من أين لك هذا الرقيع بامتياز ديناصور التجوعيين المجرمين الفاسدين الدساترة الأشرار البذيء في شيبته المدمن على الذنوب قايد الشبسي  .
الحكاية لولة  كيفاش نوصفها تكخور .. حكومة شرعية بعد إنتفاظة شعب على نظام قمعي كان يفصّل القوانين لمصلحة الجلادين يخرج ناطق رسمي لوزارة العدل فيها يهدد الملتبسين بارتكاب جنايات وفق القانون الجزائي العادي بتطبيق قانون إرهابي كتبه كلاب زين العابدين بن علي لسيدهم الذي كان يغازل أسياده في الغرب لسببين الحصول على الأموال من الخارج بدعوى مكافحة الإرهاب وترهيب الشعب وتصفية المحتجين على النظام بغطاء شرعي من جهة ثانية .. هي الملهاة ، الفضيحة ملّول دخت قلت تي تصريح متسرع ياخي يسبق في أعمال التحقيق ويعمل في عملية إسقاط على العمل القضائي حتاش طحت بأرتيكل يحكي على إصدار حكم بالسجن بستة أعوام على طالبة ما عنديش حيثيات الحكم ما نجمش نحكي فيه هاو ضريبات مالقانون شتندبوهم معايا شوفو :
الفصـل 4 :
توصف بإرهابية، كل جريمة، مهما كانت دوافعها، لها علاقة بمشروع فردي أو جماعي من شأنه ترويع شخص أو مجموعة من الأشخاص، أو بثّ الرعب بين السكان، وذلك بقصد التأثير على سياسة الدولة وحملها على القيام بعمل أو على الامتناع عن القيام به، أو الإخلال بالنظام العام أو السلم أو الأمن الدوليين، أو النيل من الأشخاص أو الأملاك، أو الإضرار بمقرات البعثات الديبلوماسية والقنصلية أو المنظمات الدولية، أو إلحاق أضرار جسيمة بالبيئة بما يعرّض حياة المتساكنين أو صحتهم للخطر، أو الإضرار بالموارد الحيوية أو بالبنية الأساسية أو بوسائل النقل أو الاتصالات أو بالمنظومات المعلوماتية أو بالمرافق العمومية. 
شوفو هلمصيبة :
الفصل 12
يعاقب بالسجن من خمسة أعوام إلى اثني عشر عاما وبخطية من خمسة آلاف إلى عشرين ألف دينار كل من يدعو، بأي وسيلة كانت، إلى ارتكاب جرائم إرهابية أو إلى الانضمام لتنظيم أو وفاق له علاقة بجرائم إرهابية أو يستعمل اسما أو كلمة أو رمزا أو غير ذلك من الإشارات قصد التعريف بتنظيم إرهابي أو بأعضائه أو بنشاطه.

زعبع الحرايمي دخّل الحبس وليدات خاطر دخلو تفرجو في مواقع إلكترونية للقاعدة ـ في أي بلاد الحكاية هذه تتسمى دروا آ لانفورماسيون - في بلادنا هبطت وليدات من جرجيس للعاصمة باش ضربو أحكام مريعة وزادها قساوة القضاة إلي تفننوا في الترفيع في العقاب .. 
نرجعو للأحداث إلي صارت ليامات ليفاتو متطرفين علمانيين ركزو على فية مالمواطنين وعاملين تشحين إجتماعي ضدهم " الملتزمين دينيا " جا عدل منفذ قالو عليه تجمعي  سابق وعالأغلب  بتنسيق مع هاك الركاي إلي مسمين رواحهم فنانين وبخلفية إجرامية منظمة مع قوى إنقلابية معروفة في رؤوس الأموال الفاسدة وعمل معاينة شيء بالحق وشي منّات حسب ما كبشو المجرمين يلي يسميو في رواحهم فنانين إلّي أنكرو وجود لوحة تجسيد النبي يقولو إنو  جرى هو والعصابة يفكتيو على الجوامع في التصاور ويعلم الله عاد خاطر حتى حد ما يعرف الحقيقة مادام القناصة إشاعة وأحداث العروشية و عمليات الحرق الممنهج للمنشئات العمومية تعدى قولش أعليه صار في الصومال برجولية قعدنا في الكيل بالمكيالين كل ما كان طرف سياسي مورط في الحكاية تتكلفت القضية تقولش ما صار شيء الدليل جرايم عدنان الحاجي وآثار تحريضو الممنهج في الحوض المنجمي والخساير الفادحة للدولة إلي تعدات جرايمو في لامبونيتي بينما إمام جامع يلقى روحو في الحبس بعد خطبة جمعة .  نرجع للي صار ديرنيارمون ، الضاهر للي يأموا الجوامع صدقو بدون خلفيات أو أغراض إنو ولاد الكلب إلي سبق و جاو في التلفزة والراديو من النقب المثقفة سبو المولى وشككو في قدسية القرآن وطعنو في الرسول و عدّاو فيلم إلحادي يجسد الله سبحانو أساسا بغرض سياسي إسقاط الحكومة وخرجو كل مرة صابونهم نظيف قادرين شيعملو ما أنتن .. 
إلي عملو عدل االتنفيذ إلي طلع من حزب شكري بلعيد يقعد جناية ما انجموش نسقطو عليه القانون الإرهابي إي ولي حرقو وأغلبهم من بياعة شراب هذومة زادة إلي يثبت إنو حرق فيعتبر مرتكب لجناية .. عمليا السلفيين إلي خرجو يعبرو على غضبهم وهذا حقهم ما همش مسؤولين على إلي دخلو في صفوفهم باش يكملو سيناريو عصابة المعرض دونك أي إدانة على أساس قانون الإرهاب في رايي إنزلاق جديد لإرهاب الدولة  حسب المعلومات إلي عندي النيابة العمومية ما وجهتش تهم بالإرهاب للي تم توقيفهم وهذا يطمن إنو التصريح إلي كبش فيه السايحي حتى كيف جابوه في الجزيرة طلع فشيك بنّي بني والحمد لله ولكن 
بعد هلفضيحة بالتلويح بتطبيق هاك القانون سيء الذكر ولو كان إلي شادين الحكم ما يعلقوش العمل بهالقانون الإرهابي  مع المجلس التأسيسي فنجمو نحن الشعب نغنيو غناية الراب " هاو قالو عملنا ثورة .."


آاااه بالنسبة للتبسي ههههههععع ناقص كان الخرا نعملو مغارف ! في كلمة العمل السياسي والحكومي ماهوش حق للمجرمة وكل الدساترة والتجوعيين إلي تقلدو بمناصب حكومية وحزبية خصوصي في 30 سنة لخرة كانو ذراع لدولة الفساد والقتل المنظم إلخ ويجب إصدار قانون يمنعهم من ممارسة السياسة  ..

 وهنا نقترح على الحكومة " الثورية " تفعيل القانون الإرهابي فيما يتعلق بجرايم غسيل الأموال وحذف ما زاد .. قريب تفرقوا الكافيار على الخماج إلي قاعدين يحاربو فيكم باش يحاربو علي المال إلي جمعوه من إشتغالهم بالفساد ..  هكاكة يتلهاو شوية وينقصو عليكم الضرب موش على خاطرنا راو .. ياخي تهزو في الطحين للخماج ونازلين على أيمة جوامع 
ها خليفة السادس كيف إمام يحكي في الجامع بما له أصل ثابت في العقيدة .. توقفوه! فأذنوا بغضب من الله ورسوله .. لا مغالاة في سوق الأحكام الشرعية ياخي باش توليو كيف الركاي تؤمنون ببعض الكتاب وتكفرون ببعض .. ملّخر يا خليفة أعملو مراجعاتكم حد ما جبركم على الأمانة ، لذا إتقييو الله في المومن كيما السوكارجي .. واعملو دي سي يونس يوغا للي يخدمو معاكم  باش يتأناو في إصدار التصريحات إلي تحسس فينا إلي يطلع علكرسي ينسى روحو إلي هو مؤقت مؤقت مؤقت ويتعامل مع الشعب كالإقطاعي .. ليس بالخبز فقط يحيا الإنسان ولا في غياب النوايا الحسنة يمكن أن تبنى الأوطان مع إصداعي لكم بأنكم أفضل الموجود في وحوش مقترفي السياسة

خرافة غيغوز على جمهولوكية تونس بتصرف

إبيزود 7 
عاد ماهو تعرفو اللي الحجّاج عصامي مكوّن ذاتو وثقافتو من العدم وعندو ديوان وزره ايّاكش تولع كلهم دماغات .أيواش كل عام يخرجولنا نحن الرّعاع ومستحقّي الوصاية بشعار جديد نشدّو بيه رواحنا للعام الجاي عام اسمو التضامن .. وعام رفع الغلب .. وعام للعانسات ..وعام الصراحه راحه .. وتوّه من مصدر موثوق - ولد سيدنا - نعطيكم أوّل سر مالأسرار الحكم الرّشيد ..قلّك سيدنا يزرّد للأولياء الصالحين و يقدملهم الذبايح و من يوم غدوه يكون كاتب الاماره تحت راسو سيدنا يمل و الكاتب يكتب ..وافهم يا شعبي المعفّس كيفاش أمورك الهانية الكل تعتمد على تقنيات مبتكره من سيادتو حسب المنامه .. في هاك العام الشعار كان افرح انها بغداد ..ما نجّمش انقوللكم اذا كان الفرح موجّه لأهل الدّاخل ولاّ للنّاس لخره على خاطر ماكم تعرفو الّي أيّامنا كرب .كل واحد مخبّي راسو خايف عليه يونعش يلقاه يلعب بين ساقيه ..متعلمين عند نفس المؤدّب أخطى راسي واضرب يا حجّاج على السّاقين ..على الكرش ..على الكرومه ..آنا غاطسه نحكي مع روحي نذكّر فيها بالدّرس ونسمع من وراء ظهري صوت سيدنا يأمر فيّ نعاود آش قلت ..حطّيت يديّ في خدّيّ ..وداعا يا رعاع شعبي ..وداعا يا حياة الغبينه اتشدّيت بالكمشه وراسي ونع .. طبّست وقدّمت جوابي - يا سيدي راني نحضّر في سكاتش نضحّك بيه ولد جنابكم - الكذب في المصالح جايز ..خرجو طشاشتين من عيننيه حرقولي مسلاني واسمعت فحيحو وهو يتوعّد فيّه - يا جارية الشوم تفسّد في أفكار ولدنا علينا - خْلت و جْلت وما نجّمتش نسكّر فمّي قلت نلعب للتسعين ومولاها ربّي موش سيدنا . ثبّت شويّه في القاعه وحسدت نمّالة متعديه ومنها قلت - يا سيدنا راهو لازم تحضّر ولي العهد للحياة العامّه يسمع كلمة مطيشه من هنا والا من غادي يتصدم ويمرض تعرفنا كيف نبداوو ملمدين يطيش الكلام .. آنا حبس باش يلمنا .انحط سيدنا الصغير في الصوره أضمن . دقيقة صمت بعدها بلمهماز متاعو هزلي الحجاج راسي وقلّي - ما عندك وين توصل ولدنا نحن نحطّوه فين انحبّو, عس على روحك آش تقول ما كانش - وبالمهماز رسم خط أفقي على رقبتي .. السّيّاف عندو نهارين بطّال ..سيدنا كذّاب ساعتين التالي السيّاف فتّق مواهبو على جار ولد عم بريكة بنت خالة سفيان الأموي الله يرحمو .. غلط عاد جات براسو ..الشعب مليان خطايا .. اي ..الحق ما فمّاش كاينات نورانية الّا سيدنا وعايلة سيدنا وما لفّ لفّ حواشي سيدنا . الحقيقة انّو فمّه تصنيف للبشر .. بشر ديفزيون ناسيونال و الشرفي وحتى بشر ديفزيون كانز وفمّه طرحه يلعبو على الطيوح حسب علم الأجنّه والمواريث والمهم ذراعك يا علّاف .. آنا ؟ آش يهمكم فيّه .. باهى الحقيقة آنا من طرحة الديفزيون كانز .. تحيا تصيفاتكم يا لفيف سيدنا .
أيواش مزّالت المنامة 


إبيزود 8 
تحت الرقابة كنت مركحة عينيّ على اللاترال بعد ما نفذت من الحجّاج حلفت باش معّادش انكلّم روحي ..فينيتو .. يزّي .. كفايه ..انتهى حديث الذّات اللّي شعره ولاّ حطني بين يدين هادم اللّذّات..شوف هاك الهدره الكبيره اللّى شعره لرصّاتلي من جرايرها لا ولّيت من اهل السماء..آش خفّفت عليكم ذنوب يا أهل القصر عمري عدّيتو في سيرتكم تعملو والا ما تعملوش ...ودد ودد ودد ..مغلغلة ربّاني ..حقد طبقي .. لا ..أصلا الحكم مهواش طبقة أمّا مصيده للّي يفهم ..من فعايل ريوسنا وذنابنا..لا تباركلهم ..المهم ولّيت بكّوشه بالقوّة .المهم تحت ساقين ولد سيدنا ولّيت نعدّي في الأيامات الغشّير ما يعرف شيء من دنيتنا وأول رعاع شافو العبد لله ومنْو فهمت الّي الحجّاش ما يعيّن خيط في ابره الاّ ما يراجع عيلتو نقصد حضرة جناب فخامتها ..انساو الوذره هاذوكمه صبّابت ماء على اليدين ..ينفذو التعليمات والاجتهاد ممنوع اللهم في صورة التضييق على أهل البلاد وتوعيتهم بالسياسة الرشيدة للحجّاج وتحديد وعي العباد برزق اللّي بالي بالك ..سيدنا الحجّاش عطاتو الدّنيا طغى , سيدنا بيدو يقتل في الوقت كيفنا يا بوقلب نهار كامل متكّي على جنبو يحط في ختمو على فرامانات التضييق و القتلان  ما يخممش مرتين.. الفساد عم والظلم زوّك منّو البقر ياخي خير الحجّاج جايبو من دار بوه ..طلعت نحكي مع روحي بصوت عالي  واسمعني الحجّاج وامر باش يخدموالسيّاف ..الحجّاب يكركرو فيّه من ساقيه وآنا نتصكّك بالايدين والساقين حتّى عمر الغبينة عزيز ..انا نتبلحص كيف البغل بين يدين زبانيّة سيدنا و تشوفني مراحم عظمة عينين جنابها ..حتى الوحوش تلقى فيها الرّحمه الاّ سيدنا لا تباركلو ..أمرت فخامتها الضبوعه سيبوني .. وآنا هات أعطيه نتصكّك ما وقّفتش عروقاتي شرتلّه وادموعي تتناطر نبكي على عمري ومنها جمدت في بقعتي ومسّيت عنقي مزّلت حيّه .. وقفت في وضعيّة الاطاعة الظهر محني ودموعي تقطّر سألتني للّه أش عملت وما ظهرّلهشاش باش تسمع الجواب ..أمرت الحرّاس ينصرفو و أمرتني باش انتبعها لجناح ولد سيدنا ..خلاتني نعمل في الأنيماسيون متاعي شويّه بكاء على تبلحيص قولش عليّ نودّع في حياة السلاطين ..دق عليّ شاهد العقل امبعّد ما فد منّي ..قعدت نخمّم توّه كيف انموت آشباش نخسر ..عدّيت أيامي كيف الناس انهز ساق تغرق الأخرى ..دايخه ما بين الأيامات عايشة تصنيفي في الكائنات العشبيه- اللحم يقعد  بعدي -آنا نخمّم وادخل ولد سيدنا يجري ترمى في حضني يدحنس عليّ ومن وراه الحجّاش وفاخمتها ..وخزرتلو قالتلو أهيّه الأماره تحب اتضيّع الولد ..وقف الحجّاش بالفم والملا ساكت الطشاش يتناطر من عينيه و فمّو ساكت ..حبّيت نشطح نعمل كربيستين القدّام ووحيدة لتالي يا شعب العلا العمر ما يوفّيه كان ربّي أمّاله علاش فرعنّا الحجاش وقت العمر ما يوفّيه كان ربّي علاش هزّينا الغلب والعمر ما يوفيه كان ربّي ..ولّيت نفعل قيدوني في غينس متاع المنعان من سيف سيدنا ..السّر ..المحبّه ..يرحمك يا ذكرى

بالفلاقي عنا مصيبة في بلادنا : السياسيين

هاو بلفلاقي للي يحب يفهم وضعية سلاطة " سلطة " القضاء  في تونس .. 

بالنسبة لقضايا الشهداء إلي كانو يموتو حتاش ماي 2011 نذكركم إلي ماكانتش فمة ظروف تحقيق عادية بل وفمة رفض كلي لتنفيذ البطاقات القضائية وحتى رفض كلي من وزارة الداخلية لتقديم المعلومة الإرادة السياسية أبقت على الإختصاص الحكمي للمحكمة العسكرية وخرجو قانون نقحو بيه ما نقحو في القضاء العسكري أما باش يسندو الإختصاص للقضاء العدلي إلي توزيعو الجغرافي على تونس كاملة وإمكانياتو أقوى خصوصا مع ظابطة عدلية متمرسة فما يساعدهمش ـ مططو الوقت وضعفو القراين على مدى ستة شهر ـ سياسيي 6 أشهر قبل ومبعد 14/1/2011 عملو في خلاها ما والاها الفوضى الخلاقة آلاماريكان ..
 وبالنسبة للفساد المالي كيف كيف عملو  لجنة فسّاد وقفت حاجز ( إيكرون)  قدام مباشرة القضاء العدلي للقضايا الملحة غربلو شحبو وعطاو فرصة للفسّاد يكاموفلي شيحب و أبقاو على منظومة تشريعية بقوانين تحمي الفساد وتكرسو ياض بن عاشور وحكومة السبسي بالأساس وسياسي تونس هومة سبب الداء ! حسيبهم ربي 


هاو شقال أحمد الرحموني  على الهيئات ما تلوموش على القضاة إلى عام ونص يعديولهم الكسكسي مغربل وهوكة الشخصيات النزيهة  قاعدة تبحث توة

خرافة غيغوز من وحي الميزيريا التجمعية

إبيزوود 4
ماهو حلّيت هاك العينين متاعي وصوت خرج من هاك الرّاس بوزيزين يسأل فيّه على شكون حرّضني و الجمعيّه الّي ننتميلها و المذهب متاعي و كيفاش وصلت الكوجينة القصر ،آنا الّي عمري ما وقفت في حضبة ولا تجمّع كان في سوق الحومه هلكوني أسأله وانا ما فاهمه والو.. عاد طالبت بمترجم ..قاموا جابولي منسّق الشؤون المحلّيّه في بوفرده - السجن - واستعرفت بكل شيء حتّى الّي ما عملتوش جبتّو الله يهلك الخيال الشّعبي كيفاش هزني للفينقه ..قعدت في المضافه أيّامات وآنا باهته كيفاش ما تعدّيتش للسّيّاف ..حتى بانت الحكايه ظهر ولد سيدنا كان حاضر مع بوه في هاك الزيارة الفجاعيّه متاعو و شاف الشّاو متاع قيقوز عاد زهق بالضحك و عمل كيف و طلب من سيدنا باش يعملني الكراكوز متاعو .. و هذاكه علاش صدّر سيدنا الفرمان متاعو باش يخرجوني مالحبس ..روّحت لدارنا ما عرفونيش زوز أسباب للنّكرة واحد الضرب بدّلي العرق متاعي من كحلوشة ولّيت زرقه  . ثانيا دارنا عملو بهاك المثل الّي يقول أخطا راسي و اضرب عاد نكروني .. الباقي المرّه الجايه تعرفوه 
  5إبيزوود
بت ليلتي الأولى بعيد على الحبس وأنا نمارس في هوايتي المفضله بالفم والملا لاصقه حيط دارنا كيف البوكشّاش -اسم سحليّه -نحسب في دقّات قلبي ونتغبّن على الرّاقو متاع الحبس وندعي على ولد سيدنا الّي حرمني منّو ..يهلكك ياولد ثيدنا ويدبدب رايك أكثر ملّي ماهو مدبدب يا ثيدنا..هكّاكه ونطرشق روحي بكف على هاك اللّقمة الّي سرقتها الحرام ما يطلعش عليّه ..طاح فيّه الحجّاج على لقمة جايبها بعرق جبينو ..آنا هكّكه وجات دوريّه راجله فرحو بيّه كفوف و مشطه  باعتباري من ذوي السوبق الأمنيّه ..تطوّع موش حاجه أخرى لو كان ما سيّبنيش سيادتو راهم قتلوني بالضّرب .المهم مبعّد هاك الطريحة الفوّاحة رقدت كيف الملوك ..الصباح طلع .خرج خويا الرّجّال ما تلفّتليش تقول ما يعرفنيش ناديتلو عاد نظرلي وقلّي - شِر - اي هاك الكلمه الّي تتقال للكلاب .رصّاتلي كرمت لحيتي و أيّست من دارنا قلت بالكشي يرحمني الشعب عاد يا خيبت المسعى .. نمشي و نتكب على وجهي لا واحد تلفّتلي ..لا واحد سألني على هاك لوجه الكنفوره ولا واحد مدلي شربه ماء ويعيش التضامن و باب الجديد زاده ..كيف معّادش بيها وين وقفت في ساحة السوق وقلت فيها وووووه ..يا شعب الهناء و الابتلاء أرحمو رعروعة قوم ذلّت شربة ماء و الا شويّة ماكله .. بح صوتي حتى حد ما تلفّتلي..لا كبير لا صغير لا الّي يدبي على الحصير كيف معّادش بيها وين حطْت ذيلي بين سنّيّه وقلت يا قاتله يا مقتوله دراكسيون دارنا بش ندخل ..ندخل قاتله والّا مقتولة .كيف قربت من دارنا اتجمّدت , نلقى تشريفات القصر تستنّ فيّه ..
لا أخماسي لا أسداسي اللّون ما ساعدنيش ..نتشاف على بعد كيلوماتر ..آناعملت خطوة التالي و قائد الحرس صاح فيّه - آقف عندك - أمر من سيدنا باش تحضر للقصر يا قيقوز ..مشات بيّه الدّنيا وجات .جيعانه والسّكّر طايح وسعدي طايح ..سلّمت أمري لربي قلت نمشي عل الأقل ناكل الراقو بتاع الحبس . وقفت في بقعتي عاد جاوو هزّوني  مدّولي زي .. تلفّت لجناي قالولي البسو راك باش تدخل للقصر . ما عندي وين نستر روحي تخبّيت وراء شجرة والبست لباس الاهانة خرجت كيف البقميطه ..الّلبسه ضيقة و قصيرة ندبت وجهي على كشف الحال و صحت في هاك التّشريفات  - ياه شومي يا خي لازم تعرّيوني براس أمّك خلّيني نستحفظ على الزّي متاعي .. جوابو مانيش باش انقولو باش مانشمّتش فيّ حتّى حد ...يكشف ربي حالك يا ثيدنا ...قعدت انخمّم في ذنوبي ونحسب فيهم, لقمة هلكتني أمّاله لو كان دغبرت على سانية جارنا .. شعلت ناري طحت نسب في شيطاني و نعاود حتى وصلت للقصر .دخلوني لقاعة كل شيء فيها يلصف مالبلاط للسقف شويّة ودخل عليّه رّجال ملامحو أنثويّه قلّي - تبّعني - شدّيت جرتو هوّ يمشي وانا وراه حتى وقف قدّام باب دقّوا ستنّى شويّه ومبعّد حلّو و براسو أمرني باش ندخل وسكّر الباب ورايا .نلقى سرير كبير قاعد فيه الحجّاج ومعاه كعبات مالعايلة المالكة ..تسمّرت في بقعتي نغزر فيهم بالألوان على الطبيعة .أمرني سيدنا باش انقرّب ساقيّه قالولي دوّيووو..لا نجّمت نتحرك القدام ولا لتالي ولا على اللاترال ..بهت تقول باش نطلع الرّوح هكّاكة و طحت دايخه - الله يهلكك يا ثيدنا - بلعتها قبل ما نطيح انسف في القاعة .
إبيزوود 6
يا شعبي المرهص..يا شعبي المطحون..يا شعبي المكلوم  يا شعبي المن..الكلمة الاخيرة مهياش عايليه - على وزن المنسي -ههههه .. آنا قيقوز خديمة كوجينة القصر عدّيت ستة و أربعين سنة ممروجه أغلى حوت تعرّفت عليه السردينة ..نشوف العلوش كان وهو حي يرزق و البقاري نخاف منّو من جنود الخفاء ..يا شعبي المهبول اجريلي حلّيت عينيّ نلقى خمسة أزواز عينين يغزرولي ويد لطيفة تشمّم فيّه في العطر ..اجريولي طلعت سيادة فخامة عيلة سيدنا تبخبخ  فيّه بالبارفان ..اطّرشقت بالبكاء عظمة حضرة جناب فخامتها تفيّق في القامطه الّي هي أنا ..خمّجتها بالبكاء هومه يسكتو وانا نزيد و قلبي يدق كيف الطبل نهار العيد و أنا آش مدخْلني  للمغّارة حتّى الدّور بيّه الضبوعه..ماكم تعرفو ما أقوى مل الحجاج كان فخامة عظمة جنابها ..تخرج علينا مالسنه للسّنه  مبتسمة أيواه شحروره على حالها ..رجعلى شاهد العقل وقفت حنيت ظهري وتلفّت الكل واحد من هاك الخمسه ..يحييك يا سيدي .. يحييك يا للّه ..يحييك يا للّه .. يحييك يا للّه ..يحييك يا للّه ..حتى قطّوسهم قدّستلو.. حسيبي ربّي يخزرولي  قولش عليّ خنفوس مبهذل .تكلمت فخامتها ورّاتني بقعة في القاعه و أمرتني باش نجلس ,قعدت واسكت على خاطر كلمتين التبندير اّلّي نعرفهم قلتهم وكان نزيد نتكلم نخمّجها .خزرت على جنب سي الحجّاج قاعد في نفس الوضعيّه هازز حواجبو تقول معبّيهم بوتوكس يخزر على طرطوش عينيه ..كان ما تصدقونيش ثبتو في سيادتو واتأكدوا آنا شاكّه الّي مدير الإضاءه متاع عينيه ماخو كونجي ..سيدنا عامل ترشيد مستهلك في عينيه وما يحبّش يملى عينيه برعروعه كيفي ..المهم علمتني فخامتها انّي عجبت ولي العهد , ما يمشيش مخكم لبعيد الوليّد فزغول ويحكم بأحكامو ماهو تصرع مالضّحك في هاك اتشقليبه الّي عملتها في المطبخ عاد طلب من سيدنا باش يعملني المشاشو متاعو .الخديمة الجديده ما تحقروهاش راهي خلّاتني نطّلع على دواير القرار في الامارة  ونالطّلع على أسرار الحكم الرّشيد  بداية من تأمين حاجيات العايلة الملكيّه نهاية بتوفير العيش الهاني .. للعايلة الملكيّه وامتداد نفوذها بحاجتين موش ثلاثه جبروت سيدنا و بطش سيدنا.. وامبعّد كفّين لروحي موش ثلاثه حلفت معّادش نلحّف على حتّى ماكله السّرقه نيشت سي فيني تعيش محمّصتي لعزيزة تسقط ماكلة سيدنا.
اهمممم .. اي المرّه الجايه أيواش .

خرافة غيغوز ما قبل إنتفاظة الشعب .. موش حتقدر تغمض عينيك

إبيزود 1
البارح قمت مالنوم فرحة مسرورة .. شنوة ؟ قمت مفجوعة تقول
 شفت عفريت..يا سيدي حلمت بروحي عايشة في زمان الحجاج والى انا جارية كحلوشة نخدم في الكوجينة متاعو ـوخياني راني مانيش راسيست وما عنديش مشكلة مع الالوان اما لضرورة الصدق في الحديث عن الحلم الكذب مهواش باهي ـ حاصيلو وانا نخدم في الكوجينة اللى ما فيها شيء ملى تعرفوه يا خلق يا رعاع يلي انا منكم يجيوني زبانية الحجاج يتفتفوني ـ لطفت العبارة ـ يشوفو رميتشي حاجة في المغارة متاع راسي وانا بامر الحجاج في غيبتوكيف الهايشة لا نخبش لا ندبش النفس اللى انخرجو مطاكسيهولي سي الحجاج اللى ما يخافش من ربي وما يعرفش حتى اللى المكس حرام . وبما انى جهلوت ما نفهم والو في هاك لي زانغرديون اللي يستعمل فيهم طباخ الحجاج المستورد ما عمري ما قربت مالطناجر كان باش نغسلهم ..عاد افهموني جاروشة نعفس في خير سيدنا بعيني ..لا انجم انذوق ولا نزرط تي حتى ما يلزمنيش انطول الخزرة .. الحجاج يضر في بقتار قدرو .. نخرج من قصرو نغلي بما لا عين رات ولا اذن سمعت  نعقب على سوق الحومة مانخلطش على طرف دجاج .. الله يرحم الدجاجة العربي    اللي ماعاد نشوفها كان في التصاور ..ويرحم الدجّاج العربي اللى الاحتكار و الرغبة ما كانوش من خصالو عاد خلفوه فيّة استثمروا في قوت الشعب و وصلوا سوم الصدر متاع الدجاج لسبعة دراهم .. ماهو الدجاج قوى قدرو ومادام الشعب نازل اعليه ..هيا نستثمروا كيف العادة في قوت الشعب.. وررري .. الدجاج تحول الى ضيف عزيز مخفف ساقو و عنكوشو من منازل العامة يا فرحنا يا هنانا .. الله لا يباركلك يا سيدنا ..مرجوع حديثنا ماني نخدم في القصر و في الحقيقة عندي انا زادة مثل نعيش بيهم منها السارق كيف يسرق سارق كيفو فخار يكسر بعضو اهوكة بالامارة روبنهود اسالوه.. عادة نهارمعّادش انجم خيّبت طبعي وانا انّظف مدّيت ايدي لصحن متاع ماكلة سيدنا ونخطف حاجة ماننجمش انسمّيها وزرطها ـ ناكلها ؟ معنتها نمضغها ؟ هذاكة اللى مزّال راهو تكتبت في تقارير حفظ النظام وبعثوني للسيّاف بتهمت المساس بالامن الغذائي متاع المملكة ..تلسعت في لساني.. السرّاق لا تباركلو .. ياخى وين يتلسع الحجاج كيف يزرط امال الشعب واحلامو ؟؟؟ انا نخمم وخدمت ابواق القصر اللى في الكوجينة تذكرفي الرّعاع في اهم ماثر الحجاج حكمة -هناك رؤوس قد اينعت وقد حان قطافها- شدّيت كرومتي نطمّن عليها وطيّحت المصلحة ..دخل سيدنا لي التران متاعي عامل زيارة فجئية للكوجينة ..الباقي تعرفوه المرة الجاية ..
النّبّه عليكم اي تشابه مع الواقع المعيش محض خيال !
إبيزود 2
انا مغصورة بهاك الّلقمة وتحل باب الكوجينة على فردة ..تضربت الساقين في بعضها ويا هول شكون دخل علينا ..في زيارة مفاجعة سيدنا الحجّاج بعينيه الزوز ..عاد وين تلقاوني ..المصلحة قدّامي وعينيّ مدمعين من لسعة هاك اللقمة المسروقة . تشدّيت بعملتي يا رجال ..ما نعرفش كيفاش نجّمت نستوي روحي في الوضعيّة المفضلة متاع سيدنا ..حنيت ظهري القدّام وطبّست راسي اللّوطة تقول نفركس على كنز .. ودخل سيدنا  ما ريت منّو كان السّاقين ..اي .. ماهو طلع عندو رجلين كيفنا يطيّش فيهم على اللاترال وحدة يمين, وحدة يسار . فهمت وقتها علاش سيدنا ما عندو في الوسطيّة ما يذوق وسياسة الحكم الرشيد متاعو يا اسود يا اسود .. الله يحييك يا سيدنا ..زارنا الن..يا سيدنا -قوّادة امّه موش لهاك الدرجه- الله يهلكنا و يحييك يا سيدنا ..الشّعب في الكوجينة يصيح وانا عملتلهم روفران .. ياثيدنا ..يا ثيدنا .. امبعّد الساني ملشلش من اللّقمة الّي سرقتها و اشياء اخرى .. المولى عاقبني ليه .. ليه .. نستاهل .امبعّد تخمام فهمت مغزى زيارة الدّولة الّى عملها الحجّاج للكوجينة .. ماهو طلع بوليميك كيفى ما كفاهوش صفرة الباي تتحطلو عاد قرّر يعمل زيارة ميدانيّة .. هذاكة اصلا ما كنّا انّجموا ننتظروا من سيادتو اهتمام أوّل وأخير برفاهيّة سيادتو ..يحييك يا ثيدنا .. يحييك ياثيدنا ..يا شعبي الجيعان لو كان شفتو سيدنا وهومهتم بتقنيات الانجازات في كوجينة المملكة الّي ماشية الكرشو.. راكم ندبتوهم باشقوفة المرّة الجاية نحكيلكم الكمالة برّاو توّه .
إبيزوود 3
ماهو في بالكم اللّي سيدنا الحجّاج دخل للكوجينة واللّى انا بالرّغم مالأرتروز ونقص الكلسيوم في العظم طبّست ما عاودتش طلعت ..انشوف كان في السّاقين مقدمة في الكوجينة .. وذرة يا شعب وذرة ..يا جمهور الافريقي اجريولي راني شفت برشة وذرة ..تخبلو عينيّ .. الحجّاج يهمهم .. وهومة يقودو فيه في زيارتو تقول افتتحو صبيطار لسرطان الأطفال .. الله يرحمك يا شعبي  المهلّل والمصفّق والذّبلان .. الوذرة ضياقت بيهم المملكة مكمشين وراء ثيدنا تقولش بوساق مضيّع السّرب متاعو..كيف تعبت ومعّاد بيها وين تلفّت لجنابى نلق المطحونين كيفي مزّالو الكل في وضعيّة الوضاعة .. ساعة غير ربع امبعّد صفقلنا وذير المراسم عاد وخّرنا لتالي باش نوسعو في المكان .. وقتها لقيت روحي ندّهمك ..ندّعثر في المصلحة اللّي نسيت باش نهزها ونطيح على ماعون الكوجينة كيف الفكرون مقلوبة على ظهري ..يا رعاع ما رمشتش يا بوقلب ونلقى ميتين ساق على صدري ..الله لا ترحم اللّي ما ضربش ..فطسوني ..أمن سيدنا كلّفني تراحة نبّاش القبور ..قبل ما ندوخ وصلني صوت نعرفو برشة - الله يرذينا فيك ..ويحيينا يا ثيدنا -الضّرب خجّجني .. عادة وعدت روحي اذا فقت مالدّوخة وما متّش ننزل على كرومتي نرتاح مالدّنيا ..خير ما نطيح في يدين زبانيّة سيدنا ونستكشف وضعيّة الدّجاجة و ما لا عين رأت و لا أذن سمعت ..دوّيو يا قيقوز دوّيو.. عمر الكلاب صنف بوكشّاش طويل ..ماهو فقت .. امبعّد مدّة ..يقعد بعدي كان نعرف قدّاش ..حبّيت انمد ايديّ لعنكوشي نقتل روحي ما نجّمتش نلقى ايديّ مكتفين وعلى راسي رجال شداد غلاظ . قلت لروحي يا مرهزة إتخذت وفات فيك الفوت أهّومة ملايكة العذاب  .. في حياة البرزخ وتخمّم باش تنتحر ..خلّص القديم والجديد يا منافقة ..الباقي المرّة الجاية تعرفوه