طبرْنه لكل مواطن

مادام اليوم نهار عيد مانيش باش نحكي على أهل السياسه و الحوّافه الكبار و إلّي جَبْدانهم ما يجيب كان النّكد و الغصّه أمّه على راي كلندو العزيز باش نحكي على شعب بلاد السّروال الأعظم ـ  عجّل الله بفرجك يا كلندو باش يرجع للعالم الإفتراضي قيدوم التّدوين الصّندي ويكسّر إيدين عمّار و إلّي مخدمينوـ المهم عندي نهارين قبل العيد وانا نفركس لأمّي في كبده للدوّاره عاد إسترعى إنتباهي وانا نخيّط في البلاد من جزّار لجزّار ومن مغازه كبرى لمغازه عظمى حركيّه ونشاط كبير في بيعان الشراب و بالأساس إشراب لحمر على إختلاف تسمياتو و جمهور خايض قدّام المغازه تسمع كان تشرنين متاع الدبابز حتّاش العبد ولاّ باهت في إلّي وصلنالو زعمه آنا وين ؟ و البارح آنا نحلف وإيميني صادق إلّي البلاد راتات دخول غينس للأرقام القياسيه بأكبر طبرنه أو خمّاره مفتوحة للعموم في العالم الإسلامي ..بالطبيعه أهل الذّكر لا تباركلهم ما يهمهش إذا الشعب حالف على الضحيّه تمشي كمْيَه ..اللّيالي العشر ما همش داخلين في ليّامات المحرّمه وموش لازم نوقفوا فيهم بيعان الشراب ..وآنا أوّل وحده نستعرف إلّي يسرق يغلب إلّي حاحي أمّه زاده كثّرتولها بالتّشجيع على الفساد وتسهيل الموبيقات والأنفيستيسمون في الشراب والخمج ومن هاك اللّاوي . سمعت إحصائيّات على تضاعف بيعان الخمور أضعاف مضاعفه قبل سيدي رمضان إلّي تعدّى و إنّو ليلة العيد فمّة نزق في البلاد حل مخازنو للسوكارجيّه يبيعلهم في الشراب تقول صراواتو على باب فلسه الله لا تربحو ..معنتها آنا متأكده إنّو لو كان سكروا الخمّارات و المخازن متاع الشراب راهو الجماعه خزنوه على بكري ، أمّه زاده يِتْرحموا العباد إلّي يحبّوا يعيشوا معنى العيد ويعلموه لولادهم من مناظر تأذي مشاعرالمسلمين في أجلّ الأيّام ..راهو موش مالمعقول إنّو بنادم ما غير ما يطّرّف بروحو يلقاها في طبرنه كبيرا وآش قلّك حرّيّه .. ياخي الحرّيّة كان في المفاسد عاد يا شسمك براس لحْنينه رانا أقلّيّه مسلمه في البلاد نطالبوا بمراعات مشاعرنا وقت تجي مناسباتنا الدّينيه تعملو معانا اللّازم وتفضّيولنا البلاد شويه مالخمج وما فيها باس كان كيف بناي عمنا اليهود تعملونّا تسهيلات باش نمارسو طقوسنا معاكم في البلاد ونحييوا أعيادنا وكان تعملونّا مرافقه أمنيّه وتسكرو البلاد أيّامات العيد ميسالش ..في بلاد السّروال الأعظم كل شيء عظيم إلّا إلّي قالو ربّي ! يا شسمك يلّي باش تتحاسب بينا ياخي ما سمعتش بالآيه هذه "والفجر و ليال عشر  والشّفع والوتر واللّيل إذا يسر هل في ذلك قسم لذي حجر .."