بات الرِّزْق يا بندير

أيّه هاني باش نقول الحقيقه ...إففف ما نعرفش أعلاش عندي أزمة ثيقة مع روحي .. أمّه القلب يغلبو ديمه القالب تالمون في النهار بنادم يتعارك مع شواطن روحو و يدخل في ميكماك متاع نفاق إجتماعي ولاّت العيشه تبهذيله موش حاجه أخرى ..نقوم إصباح نعمّل على رّبي نهبط دروج دارنا ندعي :يا ربّي جيرنا من ولاد الحرام و الظلّام ..اليوم كمّلت الدّعاء إنسب .. بالله توّه أعلاش وحده كيفي تبدا النهار شادّه الغارد ..سامبل لإنّي في بلاد الفرح الدّايم و مانيش منسجمه .. بالمشطه حبّيت نبدّل من روحي كل ما ندخّل روحي في القالب نلقى روحي ديفازي .. فايضه على لجْناب ، خوضه على معارضه على بعوضه و ساعات بهيمه يعدّيها عليّ الخرشف نستخايلو سلاطه سوري ..سكّرت جلغتي إمبعّد ملايكة اليسار فدت منّي من كثرة ماهو يقيّد عليّ في السيّئات ..غيغوز محترفه في التّقطيع و التّرييش يا حبيبي نستعرف آنا البقره إلّي زوكت مالغلب ..المهم قلت حسن أدب مع المولى نسكّر جلغتي و نهبط نكوّر في المجتمع دِيفُونسيف .. زايد إلّي فيه طبّه .. قعدت نتعارك مع ذبّان وجهي ونستنبط في الشّر لزميلي إلّي مطبوع تونسي مع علامة م ت ..توّه الشّر هاو نحكيلكم أعليه شويّه حقره على ضريبات في العظم مشى يشكي لزميله قلِلها إلّي آنا عامْله فيه ..بعثتو يقلي السّمك ..الله غالب ما عنديش الهواء وين يدور والنّفاق الإجتماعي إلّي وصّاو بيه علماء كبار كيمه إبن الجوزي ما لْقيتلوش دخْله بالرّغم إنّي مقتنعه بمخذان الخاطر أمّه موش في العوج يا ديني يا خي نلحسو الصباط وإلّا أمورنا تولّي تاعبه ..نتبوهمو بالإضمار و إلّا نولّيو مشاكليّه ..إي الشّيء هذا قْدام بينا متفاهمين ..أمّه مادام راسي بالفلوريتونجْ ما يرى كان المستوي نفلقو على حيط باش يرضاوْ لسيادْ ..توّه روحي قامطه بثلاثه نقاط على القاف ولا حبّت تِنسجم نسفِر بيها ..دوّيوْ شاء من شاء مادام خذا فيّه الموْلى ما أعطى تعيش السّياحه الدّاخليّه و ليوم أعلمت نفسي إنّو باش نحيلها على برنامج إعرف بلادك :)) إلّي ما فهمش شيء مالتّدوينه هذه ينجِّم يِتّصل بأقرب موظّف عمومي من معارفو يفسّرلو أعلاش نحكي بشرط إنّو يكون برا كاصّي موش مطبوع .. باهي إنهارْ إوفى عليّ وعلى غيري من بلاد البنديري يا بنديري لملايكه عند المغرب طوات صفيحتي اليوم وهبطو ملايكة اللّيل بالنّسبه لِيّ آنا باتْ الرِّزق كيمه يقلو أهل القصرين يذكرهم بالخير و بالنّسبه للُّخرين أهّيّه دعيوَه نوفى بيها النهارْ "كل واحِد حسيبو ربِّي "