تخديم المخ

تذكّرت خرافه في كليله ودمنه تحكي على ثعلب معّادش ينجّم يصطاد عاد عمل روحو تنسّك وصدقتّو الحياوانات البهالل فما كان منو إلّا إنّو إصطادهم بخبثوا إمبعّد ما كان يتعب مالجري وراهم باش يستقات .أعلاش تذكّرت لحكايه ، سامبل ملّي صاير من عناصر ما يسمّى بالحكومه "الوطنيّه " إمبعّد 14 جانفي و استماتت 14 ممّا يسمّى بوزراء النّظام السّابق تسويق فكرهم النّضالي مبعّد ما أثبتولنا بالدّليل وقوافل الشهداء وأرقام الإستيلاءات المذهله على طول يدهم إمّا في التّهاون في الإظطلاع بمهامهم الوظيفيّة أو تواطئهم في تسهيل كل الخروقات و لَبسولنا توّه ثوب المنقذين والمنظّرين لإنقاذ البلاد والإقتصاد إلّي شدّو عندكم الزين ثروتو خمسة بلايين تنهبو على مدى 22 سنه على مرأى ومسمع من الوزراء المعنيين جهارا نهارا ويمكن بلّوشي معنتها توّه بلاد مقمله كيف تونس تتنهب بالصوره المهوله هذيكة شكون فيكم يصدّق إنّو حتى وزير ملّي صدّو بجنب بن علي خاطيهم لا في بالهم ولا  عاونوه .. ليوم قلنالهم برّاو على رواحكم نحبو ناس ما سبقلهمش الخدمه مع المعلّم لقديم ينهضو بتونس عاده حضبوا كيف فرقة التّدخّل و جندوا تونس طبعه كيف لعوايد ونساو التّاريخ بل الأصح إنهم شيْتوه وقاموا يغنّيو في خرافة أمّ السّيسي تونس باش تبحر كان يمشيو هومه مالحكم مالمتربصين بالثوره والجاني ولّى مبني للمجهول أنساو يا ناس إستماتتهم لِخّردقيقة في التسويق لبن علي كيف عمل مرجان إلّي كان يغنّي بالعصابات المأجوره من لكسترام غوش والدّروات ولّي كانت الحكومه باش تميط الّثام أعلاهم وأنساو لوزير إلي خرج يحكي على الخساير المادّيّه في نفس الوقت إلّ فشل فيه رغم عدد قوّات الأمن الدّاخلي باش يحافظ على أرواح النّاس والمكاسب العامّه وما وجّه إهتمامو إلا للتنديد بالمظاهرات إلّي شلّت عجلة الإقتصاد في البلاد .. ولّي ما يحشمش لا تباركلو .
23 سنه سرقه لأموال الشعب و تجويع للشعب و إرهاب للشعب وإهانه للشعب و سوء إداره لرزق البليك قوانين فاشيّه و مكرسه للانعدام العداله وتغليب المصالح الخاصّه صاغوها إلّي إسمهم نوّاب الشعب ، حكومة المكبشين في السلطة رغم معارضة الشعب باش تدير البلاد في مرحله إنتقاليّه إنتخابات رئاسيّة باش يتم الإعداد ليها تحت إشراف مجلس الدّواب من أغلبية من يمقتهم الشعب هاك إلّي ما يحشموش يخرجوا قانون ماليّه على قياس فرعون تونس المكنّى ببن علي هومه باش يحددوا شرعيّة المرشحين للرئاسه لفترة يمكن أن يأخذ فيها الصعاليك فرصتهم في الإستحواذ مجدّدا على حياتنا واستعبادنا مجدّدا ممن فقد ماء الوجه .. الأكيد إنّو إلّي يمّن الثعلب المنسّك واحد من ثنين يا قطّوس عمرو ما يصطاد لربّي يا ثعلب حرباوي قاعد يتمسكن باش يتمكّن ..بلاين تنهبت من بلادنا ما قلقت حتى حد وما تكلّم عليها حد ، ومظاهرات شعبيّة تطالب أبرز وجوه نظام قمعي وسارق باش يمشيو على رواحهم وتطالب بإجراءات قانونيّه سبق لأرقى الثورات الشعبيّه إعتمادها في المرحله الإنتقاليّه ولّاو يغنّيولنا بعدم حضاريّة إستمرارهم في  التضاهر الشعبي والفراغ المحتمل في السلطه ..لعنة الله علّي ما يحشمش لو كان خرجو خمسه لاف قالولي يا فاعله يا تاركه أقسم بالله ما نصدّقهم على روحي  50 ألف في صفاقس ناداو " الشعب يريد إسقاط الحكومه " ولباقي في القصبة ملتحين السماء ومتوسدين الرصيف يقولو "خبز وماء والتجمّع لا " والثعالب مزّالت لابستلنا لباس النّسّاك وتقول باش نقعد نعاون بلادي من الأطماع الأجنبيّه والدّاخليّه .. يا أوباش إقلبوا وجوهكم أعلينا حسبنا الله ونعم الوكيل والله الجنّه من يدكم شبهة المسيح الدّجّال يارقع يلّي مازّلتو بعوايدكم لقديمه القمعيّه والملتويه أسأل لله العظيم أن يريكم دلائل قدرته في قمع مكركم وإثباط عزائمكم ويجعلكم في العالمين آيه يلّي الحشمه ما تسمعوش بيها يا من فقدتم نعمة الحياء !
يسقط حزب الدستور يسقط جلادالشعب ! وإن لم تستح فاحذر أن تفعل ماشئت ولكم في بن على عبره أيّها المكبّشون في السلطه لغاية في أنفسكم !

يسقط حزب الدّستور يسقط جلّاد الشعب

كيف أي مواطن تونسي عمري ما حفظت حتى إسم مالوزره والسبب هاك المثل إلّي يقول ما عندك في الهم ما تختار ليوم ولّيت نشد لسامي على خاطر لمّارك لزّونابفجاجة أرواحهم العفنه وقلّة حيائهم أن ننتبه لأسمائهم لأنهم ولّاو اضحين للعيان و أكثر دلالة على إنّو الدكتاتوريّه تخلّف كان المصايب سواء على مستوى الأنظمه القانونيه و السياسيه والإجتماعيه و بتفريخها لجراثيم من المتمسكين بالكراسي لدرجة تحمل المجتمع على القيء . أيّه سيدي نبداو بالفكره التافهه إلّي يسوقوا فيها وزرة التجمع إلّي عددهم 16 على إنهيار الدوله في صورة صرفهم وكوادر التجمع من السلطتين التنفيذيه والتشريعيه وهنا إنجم ناخو وقت مستقطع لطرق صالحي ونرجعلكم ..
أوّل حاجه إنّو الدوله التونسيه هي دوله مدنيّه وكل هياكلها المرفقيّه تقوم عليها إطارات إداريه موش سياسيين دونك إنهيار الدوله بدون الوزراء التجمعيين إلّي عندهم مسؤوليه مباشره على عمليّات  القتل المباشر للشهداء ولتنفّذ الرئيس السابق وعايلتو وربما إستغلالهم شخصيا للنفوذ حكاية أمّ السيسي وهاو باش نبدا بوزرة الحقايب السياديه ما عدا العدل عل خاطرو ما كانش في السلطه  :
الغنوشي : وزير أول  في عهد الزين السيد هذا من المفروض إنو يعرف قدّاش الرئيس كان يطلق الريح من مرّه بحكم إنّو طبيعة العمل متاعو تخلّيه يتردد ياسر على القصر ولأنو عندو 21 سنه على  الأقل في الحكم خرج بلوغة الفصل  56 قولش أعليه وقت هرْبو الرئيس وببراءة الذيب الغنوشي ما كانش في بالو بيه ماشي ما غير رجعه ..هذاكه لفصيّل الرابع متاع المسرحيّه إلّي من غدوه مشاو للفصل 57 يقول القايل أعلاش على خاطرهم مطمانين إنّو الحكم باش يقعد في يديهم تره طلّه على الفصل أربعين مالدستور إلّي عنّا ولّي باش تتعمل الإنتخابات الرئاسيه في ظلّوا هاو شي قول :
" الترشح لمنصب رئيس الجمهورية حق لكل تونسي غير حامل لجنسية أخرى، مسلم مولود لأب ولأم وجد لأب ولأم تونسيين وكلهم تونسيون بدون انقطاع.


كما يجب أن يكون المترشح يوم تقديم ترشحه بالغا من العمر أربعين سنة على الأقل وخمس وسبعين سنة على الأكثر ومتمتعا بجميع حقوقه المدنية والسياسية.


ويقع تقديم المترشح من قبل عدد من أعضاء مجلس النواب ورؤساء المجالس البلدية، حسب الطريقة والشروط التي يحددها القانون الانتخابي.*


ويسجل الترشح بدفتر خاص لدى المجلس الدستوري.


ويبت المجلس الدستوري في صحة الترشح ويعلن عن نتيجة الانتخابات، وينظر في الطعون المقدمة إليه في هذا الصدد وفقا لما يضبطه القانون الانتخابي."
ما تنساوش إلّي أغلبيّة الموجودين في البرلمان ومجلس المستشارين آرسدييست بالعربي جلّادو الشعب باش يحطّو لعصا في العجلة بالقوانين الموجوده ويتحكموا فينا كيف العاده  (ما نعرفش أعلاش حاسّتهم ناوين على هاكه مرجان إلّي خرج قبل درج من تهريب الزين ـ قلوبهم حنينه ـ يحكيلنا بالفصيّل لوّل متاع المسرحيّه جماعه الملثمين و المأجورين وكيف سألو المذيع شكون قلّو المتطرفين اليساريين و الإسلاميين معنتها كذّاب مع سابقيّة الإضمار )
باهي يمكن تخممو إنّو إذا تكب سعدنا وجانا رئيس تجمّعي ما نخافوش على خاطر السيّد مهواش باش يحكم وحدو نقوللكم دوّيو لأنو الفصل 50 من الدستور يعطيه مهمّة تعيين رئيس الوزراء إلّي بيدو يعيّن باقي أعضاء الحكومه توّه مبعّد ما خلات البلد ومليشيّات بن علي إستهدفت الشعب شفتو الغنوشي شكون حط  16 وزير مالتجمّع منهم  سته ملّي خلاو لبلاد و ما كانش عندهم الحشمه باش يستقيلو مالحكومه أويدعمو الشعب وإنّما شمروا على ساعد الجد بكل حزم بكل حزم باش يعاونو سيدهم و يقمعوا الشعب وخرجوا بالطوارىء لتسهيل قنص الجماهير وليس حماية للشعب و أكبر دليل إنهم ما استعرفوش بأخطائهم وتقصيرهم ولم يستقيلوا من العمل السياسي إلى اليوم باعتبار مسؤوليّتهم المباشره على إلي صار ي عند لغورّه فضيحة واتر غايت (فضيحه جنسيّه للرئيس ) أدّات لسقوط الحكومه ونحن إلّي ملطخه إيديهم بدم الشعب مزالو شادّين في الحكومه .
يزّيه الغنّوشي الكذّاب إلّي صرّح إنّو ما كناش على علم بحجم الفساد المالي و تجاوز السلطه إلّي كان يمارسها الرئيس (   بالرغم إعترافوا بأنّو تكلم معاه إمبعّد مغادرتو للبلاد وشرحلو حقيقة إلّي صاير .) غنوشي ما في بالوش وعم علي لحلايبي يجبدلكم على الفساد المالي متاع التجمّعييّن من الألف  للياء على هكّه عم علي أولى يشد وزير أوّل .
نمشيو لفريعه الرجل هذا أوّل ما شد عمل الطوارىء في لبلاد و أكثر المؤسسات إلّي وقع حرقها
 و لإنفلات الأمني صار وقتلّي هو شد الدّاخلية وحتى إنّو إستشهد حوالي عشرين تونسي في اليوم الأول إلّي شد فيه ما تفهمونيش بالغالط السيّد موش هو إلّي أمربقنص الشهداء لأنّو ثبت وهاتوّه يتأكّد ذلك إنّو القنّاصه تم إعدادهم كفرقة خاصه وسريه بالخارج وهي مرتبطه أساسا برئاسة الدوله موش  بالأمن الرئاسي .والأكيد إنّو المواطنين ومن مصدر موثوق ساهموا في شدّان البعض منهم السيّد وزير الداخليه ما عمّمش المعلومه على الشعب باش ياخو حذرو ويمنع هاك التخبّط إلّي وقعو فيه الناس بالظن أنّو البوليسيه هومه إلّي كانو يقتلو في الشعب . السيد ما نجّمش حتى يحافظ على الترابط الأمني لأعوان الدّاخليّه وهيّ غلطه كان جات الدنيا دنيا راهو تقدّم للمحاكمه من أجلها لأنّو هو المسؤول الأوّل على موتان هاك أعوان الدّاخليّه السبعه ولّي لا ذكر عددهم ولا أسماءهم حتى إنّو وبعد إعلان تسلّم الجيش لمقاليد الأمن في البلاد  ما كلفش روحو إنّو يخرج يفسّر للشعب شنيّه إلّي صار ويقدملهم إرشادات أمنيّه للحفاظ على الأمن العام ولّي نعتقد شخصيا إنو كان مقصود باش إنّاس تفد وتخاف ويجهضو الثوره لأنهم يحبو يزيدو يحكمو في البلاد .. السيد خرج يحكي على الثوره على أنها إنفلات أمني أدّى إلى خساير ماليه وبرر التهجم على المتضاهرين في تضاهرهم السلمي نهار  14 بأنهم طلعوا فوق مقر الدّاخليّه وحاولو تنحية العلم كرمز سياده ،تصريح صحافي مبتذل وكاذب وحقير لأنو الثوره سببها شرعي يا سعادة المكبّش في السلطه وهو كثرة الفساد المالي والسياسي وقمع الحريات وكثرة الظلم من الفيّه الحاكمه وكوادر التجمّع و 78 شهيد سببهم يا تواطئكم يا نقص مهنيّتكم وعدم تنفّذكم في إستباق التآمر على الدوله ممن كان يشاركم الحكم أو تشاركونه وأكبر دليل إنهيار المنظومه الأمنيّه إلّي بسياستكم لم تكن موضوعه إلّا لتطحن عضام الشعب فين مخابرات الدوله إلّي كارها كشفت مليشيّات السرياطي ولّا حتى تمكنتش من إجتثاثها وتطويقها أمنيّا ، يحرز الجيش  . . يقول القايل إنّك شدّيت الدّاخيّه آمس في ليّام .. لو كنت سياسي وطنيا و شريف لما قبلت حقيبة الدّاخليه لما تم عرضها عليك من  بن علي ولو لم تكن جزءا من المسرحيّه وواحدا من المتنفّذين فيها لما خرجت ترمي بالاّئمة علينا وتكذب على الشعب فمنذ  17 ديسمبر أثبت هذا الشعب حسّه الوطني و رفع العلم دائما ولم يدنّسه علاش تكذب وتقول إنّو تفريق المضاهره نهار 14 كان بسبب محاولة واحد مالمتضاهين تدنيس العلم وإزالته من مكانه وقتلّي النّاس الكل شفنا المتضاهرين ملتحفين العلم وسعى بعضهم لرفع العلم فوق عواميد الإناره أمام مقرّكم أيها الجلف الذي إذا أردنا الترفّق بك سمّيناك إنتهازيّا وينهم أعوان الدّاخليه الموضوعين تحت إمرتك في أسود أيّام تونس تركتموهم دون أي تعليمات كل مؤسسة حرقت أنت ضالع في حرقها كل شرطي مات يعود لك جرم قتله كل مواطن ذهب ماله ترجع المسؤوليّة في بطالته و ضياع ماله . تخرجو علينا وكأنّكم غير مسؤولين يا سيد مسؤوليّتكم مفترضة بحكم الواجب الوظيفي وإن كانت أيديكم نظيفة من القتل و السرقة فهي مسودّة بالتواطىء علينا وبالإنتهازيه . هذه الدولة سيكون حالها بخير بدونكم فارحلوا جميعا و احتفظوا برتبكم الإداريّه فهي حقّكم الوحيد لدينا كتقنوقراط أمضيتم حياتكم في الإدارة التونسيّه فارحلوا واحتفظوا بمعاشاتكم التي يكفلها القانون .
أيّها الشعب نحن بحاجة لتعديل الدستور والمجلّة الإنتخابية قبل إجراء لإنتخابات الرئاسيّه وإلا فالأربعين حرامي سيعدون لحكمنا كما أننا بحاجة لحل مجلسي البرلمان والمستشارين و الإحتكام لحكومة إنتقاليّه تدير البلاد ثم إخضاع إنتخاب الرّئيس للإنتخاب المباشر من الشعب ممن يترشّحون من التونسيين من كافة الأحزاب و المستقلين وحتى المعارضه غير المعترف بها ورفع كافّة القيود الدستوريه والمذكورة بالمجلّة الإنتخابيّة و خاصّة تلك المتعلّقة بتأشيرتي أعضاء مجلس النوّاب والمستشارين كما نطالب بتغيير النظام  السياسي إلى نظام برلماني يمكن بيه نحاسبو رئيس الدوله والوزره و أهم مطلب حاليا إقالة الوزراء إلّي سبقّلهم المشاركه في حكومة بن علي من الحكم جمله فضلا عن كافّة المطالب إلّي تقدّم بيها الإتحاد التونسي للشغل .وامبعّد لحساب تحت التوته .. يارب من أراد شعب تونس بكيد فاجعل كيده في نحره . آه وهاني إنبّه عليكم تصدقوهم وقت إلّي يخوفوكم مالإرهابيين من 56 مانا عايشين كان الإرهاب إلّي يمارس فيه التجمّع ومسرحيّاتهم في حماية الجمهوريّه كذب ، هومه إلي معبّين الحبوسات بالنّاس فقط بتهمة الإختلاف الفكري السرّاقة والمتنفذين موش عايلة بن علي أو الطرابلسي برك حتى عساس في شعبة كان عامل بعمايلو وفي إنتظار الحساب يسقط حزب الدّستور يسقط جلّاد الشعب !

منصف المرزوقي والمعارض المحنّك برهان بسيّس

موش ساهل انو العبد يفهم إلي قاعد يصير . وإنا نفهمو حاجه ضروريه باش حتى حد ما يعاود  يسرق منا الكرامه و هذاكه أعلاش أهم حاجه إنا نفهمو . آش يلزمنا نفهمو باهي توه مسألة  إحترام الدستور إلي يأكد أعليه برشه عباد كلام معقول لو كان هذا الدستور في فصولو كان حيادي و إذا كانت المجله الإنتخابيه إلّي صاغها جلاّد الشعب الحزب الدستوري من خلال الإلتفاف على الإراده الشعبيّه والتمثيل الفعلي لمختلف فاعليّاته . وانا كيف التوانسه ما نيش مقتنعه بحكومه إئتلافيّه يكون الفاصل فيها محمد الغنوشي ولّي إذا كانت ذمتو الماليّه قد تكون نظيفه ألف بالمائه من سرقة أموال الدوله أو الرشوه إلا أنّو ذمّته السياسيه مهياش في نفس النصاعه وما نيش باش نحكي على عدم الوقوف في وجه الحجاج تي نقصد الرئيس السابق ولكن الإنفلات الأمني المنظم إلي قاعد يصير ولّي الغايه منو تدمير ثورة الشعب إنّجموش نخرجو منو الغنوشي ؟. إنو يحاولو يقنعونا بإنو قسم من أعوان الأمن المختص بأمن الرئيس ولّي قعدو يقنصو في الشعب قرابات ثلاثين يوم وتوه يدورو في الحوم كلهم مليشيا تابعه الصرياطي هومه برك المسؤولين نقوللهم  دوّيو. لا موش صحيح ، المتنفذين في البلاد وهومه جماعة الحزب و الإقطاعيين متاع البلاد عاملين الشارع صاك بوكس باش يحافظو على نفس المسرحيه توه كيف الغنوشي عمل مسرحيّه هاك الجلسه الإستثنائيه متاع مجلس النواب والمستشارين بيدو ما كانش فاهم الشعب وامبعّد ما هَرْبو الزين فهم الشعب ولّا سيادتو ديغول تونس . سلاح الداخليه و أعوان الأمن وتهريب رأس النظام شكون الموراليست العظيم إلّي وقف وراه  ياخي رئيس الحكومه   الغنوشي مغلوب على أمرو حتى مبعد ما مشى الزين وفصع السرياطي . أماله مادامو ضعيف موش ممكن نستنّاو منو يختارلنا حكومه إئتلافيّه تنجم توقّف لبلاد على ساقيها في تونس فمّه نخب فكريه وقانونجيه كبار مستقلّين يدرسو في الجامعات التونسيه نطالبو بإنهم يشكلو لجنه لإعادة صياغة الدستور والمجله الإنتخابيه وذلك بعد إجراء مباحثات مكثفة مع النخب السياسيه المعارضه الفعليه والنقابيين الشرفاء وهومه معروفين نطالبو بأنو يقع التشاور مع  حمه الهمامي و المنصف المرزوقي و ميه الجريبي و راشد الغنوشي وكل أقطاب المعارضه المحضوره . نحن لن نقبل بأي وجه من وجوه النظام البائد ليحكمنا أو ليساهم في تأطير المرحله المستقبليه ونتعامل بكل حذر مع وجوه المعارضه إلّي تحالفو مع المتنفذين في البلاد للعيش برفاهيه داخل البلاد ما غير ما يهتمّو بعذاب العباد  . ولكن ما تنساوش إنو كل وزاره فيها إطارات إداريه مصدرها جامعات تونس و المدرسه العليا للإداره وهومه ناس تقنوقراطيين مهومش تجمّعيست . البلاد عندها مؤسساتها وموظفيها إلي ينجموا يحافظوا على إستمراريّة المرافق العموميّه في  إنتظار تشكيل حكومه وقتيّه واتضاح صورة النخبة السياسيه إلّي لازم تشد البلاد .. وخصوصي تمكين الشعب من التثبت ملّي لازم يختارهم إمبعد سته شهر على الأقل .. نتوقع إنو أصحاب الثروات في تونس باش يحاولو التعميه على رجالات البلاد ظنا منهم إنو ثرواتهم في خطر وانا نقوللهم إلّي ما عندكمش ماش تخافو ماناش سراقة ومناش باش نأمّمولكم ثرواتكم عاد بالله قيلونا وسيبولنا كرامتنا ما حشتنا منكم بشي . كنت أشرت لضرورة تنقيح الدستور و المجله الإنتخابيه لأنو هذاكه المهم أما أكيد إنّو لازم يتم مراجعة برشه قوانين إنجم نقول إنها تكرس الإرهاب والقمع الإجتماعي بداية من قانون الإرهاب الذي يجب إلغاءه إلى قانون الجمعيات إلى مجلة التأمين إلّى جاء فيها تنقيح  يدعم في أرباح شركات التأمين على حساب التونسي وردّوه أرخص من الكفن  إلي يتدفن بيه إمبعّد حادث مرور . فمّه برشه خدمه على مستوى السلطه التشريعيه في تونس لأنو ما غوّل السلطه التنفيذيّه إلّا القوانين المقحوله إلّي وضعها نوّاب الشعب باش يمكّن الخمّاج من إستعباد الشعب . هذه المرحله فيما يتعلّق بالأمن في حاجه إنّو الجيش يحتكر السلاح داخل البلاد مع التنسيق الأمني مع قيادات الأمن الدّاخلي النظاف وهم أغلبيه لأنّو الإنفلات الأمني المنظم أكيد إنو إعتمد على سرّيّة التحرّك باش تنجح المؤامره  موش ممكن إنهم عملو بوق وقالو فيه على مخطّطهم في قنص الثوره الشعبيّه . ما نجموش نكونو متحققين زاده من إنّو الأمن الرئاسي هو إلّي قاد عمليّة التقتيل لكن نحب نوضحلكم إلي فمه فِرق متعدده تخدم في القصر الرئاسي وهذيك خبزتهم لاهم قتالة أرواح ويمكن ما فاتوش الباب البرّاني من القصر وعلى كل حال الناس الكل نقعدو توانسه عاد حتى حد ما ياخذ أعوان الدّاخليه بالشبهة ريت فيديو متاع شباب شادين ثلاثه من أعوان الأمن الرئاسي تي يمكن فمّه ألف عون ملحقين بالقصر وهومه أعوان داخليه وموظفين عموميين ومن الشعب بكل ما تحملو الكلمه من معنى ياخي نقتلوهم و إلا شنيّه . توّه إلي عندو مشكله مع النظام السيادي للدوله (البوليسيّه  ) يقوم يصطادهم ولّا كيفاش بوه على خوه ياخي يفشّو في غلهم ولّا كيفاش ؟ لا يا سيدي ما ينجم يكون إلّا  مخالف لقواعد القانون إلّي تنص على أنو المبدأ  في بنادم  البراءة ونحب نذكّر إنو تسعه وتسعين بالمائه من البوليسيه يدهم نظيفه من الإستهداف المنظم للشعب .عاد موش معقول نتقاتلو بينات بعضنا والبروطاغونيست الحقيقيين متاع الفوضى الأمنيّه قاعدين يجهضو في كرامتنا  .  ياناس فيقوا ! وكلمه في لخر الأعمال   لإنتقاميه  من العايله الموسعه للزين حرام و مادام بالإمكان التحاسب معاهم بالطرق المؤسساتيه فأي عمل يستهدف شخصهم فيعتبر إجرام لأنّو القصاص من الذين يثبت إرتكابهم للإجرام يلزم يقعد بين يدين الدوله والحق العام موش الأشخاص أمّا حرقان  الممتلكات  او السطو عليها فهو إجرام محقق في حق الدوله لأنو معظم أرزاقهم جابوها بقروض من البنوك التونسيه بالسيف كيف حالة صخر الماطري وإلّا أرزاق ناس أخرين عاد بجاه ربي  خلّيو البنوك تسرجع شويه من خسايرها وكذلك الناس  يرجعوا أملاكهم راكم  باش إتّركوا البلاد وتقضيوا على أرزاق الآلاف مالتوانسه .. آنا غيغوز و في الواقع مع إني باش نقعد  هكّاكه نحب نقوللكم إلي آنا قاضي تونسي ( لا يجوز التأنيث ) وراهو معظم مؤسسات الدوله تنجم تكون حياديّه مع الكثير من الإصلاحات شرحتلكم الصفه باش تاثقو في كلامي لأنّو على الأقل النظام الأساسي متاعنا يمنعنا من أي  إنتماء حزبي لضمان الحياديه وباش بالنسبه لشخصي تتأكدو من موضوعيتي تنجمو تخزرو للتدوينات  الْقدم متاعي .الأهم حاليّا إنّا نثبتو مليح في التحول الديموقراطي للدوله و إذا وثقتو فيّه وانجّم نتعزّز أعليكم إتنجموش تعملو صبونصورينغ لسي المنصف المرزوقي باش يكون رئيسنا للمرحله المقبله راهو كاريزماتيك وفي رواية أخرى سياسي محنّك وفي رواية غيغوز عاقده فيه النوّاره والسلام أعليكم وربّي ينجّي تونس ويعطي لدولة الحق جوله عاجلا غير آجل آآآآآمين . 
العنوان حُصّيله باش تقراو التّدوينه على طولها :/ 

كلمة أخيره : الحداد على من رحلوا

الكلام ماهوش عندي شجاعه و لا هو محاوله للفهم الله لا فكّر بعرقي لولاني أصلا وحده مفطسه كيفي كان يهبطوني لسوق النخّاسين ما نجيبش ميتين فرنك أمّاله شنيّه الهدره .. حزينه ، شانعه باش نهبل يا بوقلب النّاس قتلها المقت و حياة الجيست جيست باش في لخّر يقتلها الرصاص الحي : ثمنية ولاّ خمسه عشرين ياهشومييي عهههههععع ندبي وخيّاني ما بين العشرين والتسعين وخيّاني تتفقس عينيهم ليوم ولّا بعد جمعه راقدين تحت الثرى و نار فوق الثرى شاعله في جواجي إلّي يحبوهم وفي جواجيّ وجواجي كل حر ..علاش نكتب سامبل مانيش سياسيّه وما نستعرفش بحتى طيف سياسي في لبلاد لا محترفي التّبسيس ملمعارضه ولا إلّي قاعدين يوزنو في موازين القوى ما بين الشعب والحكومه باش يعرفو آش يعملو وبيان سير ما نستعرفش بالتجمّعيين إلّي يلزم يعملوا دي تاست بسيكياتريك لرواحهم من لكبير للّي يدبي على الحصير ويطردوا من بيناتهم كل إلّي يعانيو ملّي بسيكوز  حتى لو كان الأمر يؤدّي لانقراضهم الكل ..المهم توّه القصاص للّي ماتو كل حالة موت تقتضي فتح بحث تحقيقي كل رصاصه خرجت وضربت معروف مولاها دونك من الضروري إتخاذ إجراءات في حق كل واحد منهم مدى توفّر عنصر الدفاع الشرعي من عدمه لا تحدّده وزارة الدّاخليّه ولا وزارة الإعلام وإنّما القضاء وهذا شيء بديهي في دولة مؤسسات وقانون ، يلزم إيقاف كل أعوان الأمن الذين أطلقوا النّار وإجراء التحقيق قضائيا معاهم ثم محاكمتهم حسب ما تسفر عليه لبحاث .. لا آلهة تمشي بيننا ، لستم أفضل من الشعب ولن أسب ! علّمتني دراسة القانون ألّا أخلط الأوراق وألّا أترك المهم للأقلّ أهمّيّه وألّا أرتكب المحضور عند الحديث عن  الفاجعه لكي لا أخسر النّاس أشياءهم .. عندي ثلاثه جمعات نبلع في الغصّه وانّشّف في دموعي حتى شيء ما يبرر قتل المتضاهرين العزّل في دزاير خرج سياسي مالحزب الحاكم يحكي إنّو تم إصدار أوامر قطعيّه لأعوان الأمن باش ما يطلقوش الرصاص مهما كان التهديد وإنّو سيقع البحث في أسباب إطلاق النار الفرديّه إلّي أدّات لوفاة بعض المتضاهرين وعنّا شنيّه صار ؟
 بالنسبه لقناة تونس طبعه ما لقيتش أبلغ من هذا النص لأولاد أحمد بعنوان : نبي من نيجيريا (على فكره حتى لو لم أكن يساريّه فأنا أقبل بالفكرة الجيّده مهما كان مصدرها لأنّه ألا تنتمي لتيّار فكري لا يعني إستعداءه )
"المذيع الذي مزق أوراق النشرة الإخباريّه ، في مثل هذا الفصل من العام الميت ،أمام سبعين مليون مشاهد نيجيري ، بما في ذلك رئيس الدوله وحرمه ،وفرق التدخل السريع ، وصاح بأعلى صوته وكأنّه يصارع نمرا فارا لتوّه من إحدى حدائق الحيوان :
"لا أستطيع قراءة الكذب "
هذا المذيع الأسمر..
ذو الشجاعة الأسطوريّه ..
والضمير المهني الشاذ ..
يستحق أن يكتب إسمه بماء الذهب على قائمةالأنبياء العاديين .
هؤلاء الذين يدخلون التّاريخ بكلمة واحدة .
ويقادون إلى المقابر من أجل كلمة واحدة .
ويكلف الجيش بحراسة قبورهم خوفا من أن يقول الجن ـ على لسانهم ـ 
كلمة واحده !! 
إنه اللحظة الفاصلة ما بين وظيفتين :
القواد ،،
والصحفي .
وما بين راتبين :
راتب يتضاعف بتضاعف نسبة الكذب ،
وراتب يتضاءل كلما تضاعفت الحقيقة 
... اللحظة التي يحس فيها أي طفل بنه أدفع أخلاقا من الدوله ، وأنّه يستحق حكاما يتحلون بفضيلة واحده غير حمل مذيعيهم على تلاوة الكذب ، و مواطنيهم على تصديقه ، دون شك أو مساءلة إنه .. 
ولا مانع عندي أن يضيف القارىء ما طاب له من النعوت ،تكريما لهذا الرجل النيجيري ، الذي ذكرنا بأن علاقة المواطن الإفريقي بتلفازه ليست في النهايه سوى علاقة مستهلك الكذب بمنتجه .
أو بعبارة أقل تطرّقا : 
علاقة " مواطن في بيته " بمؤسسة وطنية تكذب دائما ... 
فقط ،،
ولكي نكون من مواطني الجنّه ،، علينا أنن نقوم بالفريضة التاليه :
عندما يطلع مذيع على الشاشه ، ويهدد بافتتاح نشرته الإخبارية ،، نستأذن .
ونسرع باتجاه الحمّام "
لن يهمّني بعد هذا أن تعدم مدوّنتي فكاتبة هذه المدوّنه أرخص من حبّة عرق يفرزها أيّ غرّ في شوارع تونس أرخص في وجودها من الألم الجاثم على قلب كل أم فقدت إبنهاإلا البارحة أنا لست مازوشيّة تحب سبّ نفسها ولست أغلى من أي فرد في هذا الوطن أيّا كان طيفه ولن يكون كلامي بالغا ولا مؤثّرا في العشرات الذين يقرؤون لي .. أنا فقط تافهة أعلن قلبها الحداد وفي رواية أخرى أتنفّس بصعوبة من شدّة الحزن .. لن أكتب بعد اليوم فلا آمن على الأحرار أن توفّيهم كلماتي النّافرة حقّهم !

حنَش كلا دوّار وحريّة التدوين

عادة الكلمه لولانيّه إلّي نحطها هي باهي ..لا موش باهي وإلّي قاعد يصير فياسكو وعلى راي خويا يوسف ياخي نحن عبيد وما في بالناش ! لا ماناش عبيد أمّا مسالمين بكيفنا على خاطرنا ما علابالناش بالكراسي أو المناصب أو أملاك الغير دونك أغلبيّة الشعب منسجمه وعاقله بكيفها موش بالقوّه ولّي عندو صك عبوديّه متاعنا يمدهولنا خلّيونا إنّغوسيو حرّيتنا بلّي يحب ..هاك العام خلطت على عشرين دقيقة من برنامج كان مزالي يحكي فيه على أحداث الخبز وقتها تصدمت لإنّي ما تصوّرتش إلّي صار الكل السبب متاعو التكمبين بين الوزره و نعرات شخصيّه ما بين وسيله بورقيبه والبعض مالوزره . ملّي تفرّجت على شهادتو وانا نتعامل مع فكرة الآداء الحكومي بكل تحيّز مع غياب الشعب عن الحياة العامه بصوره تامّه ظهرلي إلي نحن نستاهلو إلّي يجرى فينا ،أمّا وقت إلّي توصل الملاحقات الأمنيّه أفراد الشعب في العالم الإفتراضي فأكيد إنّا وصلنا للّي يسميوه القاع الجموع التّمسحو ودخلو فيها فرندسي ومن رايي إنهم يراجعو رواحهم لأنّو القناعات والعقايد هي أشياء مقاومه للرصاص وللإظطهاد وإلّي يحب يغرّق سفينه بناسها يلزمو يذّكّر إنّو بهيلمانو الذي تنوء العُصبة بمفاتيحوه فوق نفس السفينه وبإذن الله باش يعنّق القاع كيفنا كيفو .. أوّل حاجه آنا ما قريتش لسليم عمامو أمّا نعرف إلّي إمشى لوزارة الدّاخليّه في وقت مالوقات مع مطلب للحصول على أجوبه بخصوص عمليّة الحجب الإلكتروني وشخص بهذا الوعي إنّزهو على التلبّس بأي جنحة من شأنها إنها تكون وراء الإحتفاظ بيه من طرف الظابطه العدليّه وهنا نحب نسئل ياخي ماناش دولة مؤسسات وقانون ثاني حاجه الوليّد إلّي يغني الراب ..أهّوكه سمعت غنّايتو " تونس بلادنا " ولّي ما تضمنت إلّا رؤيه فنيّه خاصّه متاعو ومتاع جزء من الشعب علّي قاعد يصير لا كلام بذيء لا إعتداء على الأخلاق الحميده و لا قذف وبالتّحديد هي وجهة نظر ذاتيّه في مطلق الأحوال علّي قاعد يصير ولّي يعمل ردود فعل متباينه حسب شخص المتلقّي و عمرو وخلافه أمّاله أعلاش تشد ؟ ..مثلا آنا إلّي مكهبه على لربعين ولّي كملت قرايتي عندي أكثر من عشره سنين وما عنديش حتى موهبه فنيّه و ما عنديش الحق باش نمارس التظاهر حطّيت روحي في حالة حداد متواصله على الموتى والموضامين وكل مرّه نهز عيني لربّي ونطلب اللطف لوخيّاني يرجّع شاهد العقل للّي قاعدين يقتلو في رواحهم وإلّا يحاولو يقتلو رواحهم ويعفو بالحيّين الميتين . غيري كيف الجنرال كتب غنّايه وقالها بحزم وهي رؤيه فنّيّه مهياش في حاجه باش توافق المنظور الحكومي للّي قاعد يصير وهذايه مبنى الإختلاف . فمّه زاده شكون خرجو يصهلو علينا ويشطحو ولا على بالهم بشيء ، من قبل ليلة راس العام لتوّه لا هامهم  طابت وإلّا تحرقت .. نعطيوهم شهادة  شرف موش ؟ الإختلاف يا حكومه  ! مهياش غنّايه تفضح العيوب في الآداء الحكومي ولا قصيدة شعر ولا تدوينه مقحوله كيف هذه وإنّما الآداء الحكومي في حد ذاتو . دونك تشدّو شاب وإلّا عشرين من أجل رايهم مهواش باش يغيّر في حقيقة إنّو الأفكار والعقايد غير قابله للإختراق وأنّو كلما كان الآداء الحكومي سيّئا طافت رداءته على السطح ،بل نأكدلكم إنّو الغنّاية ما تنجّمش تكون تعبويّه لأنّي تونس والتوانسه حاله فريده للموت السّريري للشعب وإنّما تراكمات الرّداءه و الغطرسه هي إلّي خلّات النّاس يخرجوا للشّارع بدليل إنّو المعارضه الكارتونيّه والكاذبه ما كانتش موجوده وزاده راهي لانترنات مزّالت تعتبر من الكماليّات ومعظم إلّي خرجو في الكيّاس جورناطتهم دينار ياخذها من أمّو العزوزه باش يشري باكو حلّوزي ويبنّك مع كاس تاي بالصّرف إلّي قعد في القهوه دونك سيبو المدونين والجنرال وشدّوا الآداء الحكومي أعملولو إعادة تقييم باش تسلكوها للرواحكم . راهو عيب إنّو يتم المواصله في سياسة التخويف وقتلّي ثبت عدم نجاعتها بالكامل وزاده تصدير الأخطاء والكذب على لخرين لا يا سيدي السلطه ما تحيا كان بالشعب والظن إنّو أي حدث جماهيري هو حادثه فرديّه أو أعمال شغب موش تعبير عن رغبة الشعب نوع من التّخدير الموضعي أوّل ما يزول التخدير ترجع الوجيعه فيا عظيم تونس سكّر وذنيك على الكل وإسمع الشّعب و الوليّد إلّي مسمّي روحو جنرال فهؤلاء أولى بالسّماع في المرحلة الرّاهنه بالنّسبة للعنوان هذاكة إقتباس من مقطع فكاهي , عدّاووه عندهم برشه في الخرا سبعه ينبرو فيه على قوّة التوانسه في رفع الإشاعه وتناقل الأخبار بإذاعة قالو وبيناتنا هذيكة أقوى خصله في التوانسه إلّي غناتهم على الإعلام المقروء والمسموع وفي رواية أخرى إنها علامة م.ت تونسيّه فبراس لحنينه فيقوا على الوضع وسيبوا المدونين ! .

يحكيو على الشعب

يحكيو على سلطان وما سلطان إلّا الله يغزر للسحاب ويقلّو مطّر وين تحب فين باش تصب شعبي باش يستفاد ( موزّيكا متاع فيولون ) هاك السّلطان كان كلين يفيق للصّبح ويصلّيه جماعه في عاصمة الدّوله والآذان مختارلوأحسن مؤذّن ..لا يُبربر ولا يُوسكي وما عندو في قصر السلطنه إلّي كان مظطر يعيش فيه كان كتاب ربّي . السلطان على ماهو عفيف ينسى روحو شكون إلّا ما يجيه الحاجب ويذكروا بهاك الصّيحه متاعو " سلطان البلاد يحيييييه " يذكّر وقتها روحو وينطلق في نهارو .. يخدم على روحو يخدّم المادّه الشخمه ويحدّد في الأولويّات ما يتعدّاه شيء يبدا بضعاف الحال والعزاوز يامر يتصرفّلهم من مال الدّوله باش يعيشوا ،ثمّ المرضى فالتّعليم . إذكي يدخلّو في النهار ستّلاف شيطان من شياطين الإنس والجن يهبط يكورلهم وحدو أبداها من وزيرو لوّل حتّاش هاك القوّاد إصغير من إذاعة حصل في هذا اليوم .. السّلطان ما كانش معرّس وما عندوش علاقات لا مع جواري ولا مع ملكت أيمانكم ، روحو عفيفة خايف ملمولى إلّي باش يحاسبو على مثقال الذرّه عاد قرّر إنّو يصبر خير ما يتعامل مع النساء وكيدهم السطّاشي ونجّم روحو ، مع مشاكل الدّوله والبطّاله ومناطق الذّل وكان وقتو معبّي وماليه بالتقوى وحنين ورجّال ويحب النّادي الإفريقي ومهواش مكّاس ، شعبو ما يعرف كان الزكاة .. ما يسمح حتى تصويره وإلّا بوردورو تمجيد يتعلقولو في الدّوله يخاف مالعُجب وكل ما يقلّو وزير الإعلام يا سيدي باش الشعب يعرف الإنجازات يقلّو أسكت أعليّ يا خي نصرف أعليهم من رزق الوالد ... ملايكة اليمين شايخة تعبّي في صحايف الخير إلّي يعمل فيهم السلطان وملايكة اليسار شايخة .. مكنجه . السلطان كان يخلص أقل واحد في الشعب وفطورو  وعشاه محمصه كذّابه وإلا مقلي كذّاب من الزرع متاع القصر خوّاف من ربّي ولولا الشّعب إستقلدوه ونصبوه أعليهم راهو خدّام حزام في المملكه . قبل ما يعملها شافاز دزّان فازه الحبيّب في أيّامات الشتاء يدور ويعكل في البلاد إلّي يلقاه في الشّارع يدخلو يبات في القصر ويقوم على خدمتو بنفسو ويفهم منّو إلّي موش ماشي في الدّوله ويغطّيه ويبنّن عليه ومن غدوه ياخو إجراءاتو في دعم رفاهيّة المواطن ما غير إشهار .. ( مزّيكه متاع سوسبانس ) إنهار جا خديمو يقيّم فيه يلقاه الدوام للّه قام يخدّم بيديه وساقيه مالحسرة على المعلّم ومنها رجعلو شاهد العقل وقرب من سيدو يلقاه النّور يشع من وجهو وريحتو فاوحه و الذّكرو وهو يقلّو  لو دامت لغيري ما وصلتلي ..لو دامت الغيري ما وصلتلي ..وقام المواطن من نومو مفجوع ودمعتين تنطرو من عينيه مالحلمه إلّي كان يحلم فيها إذّكّر روحو فين ومنين وقام يسب آش ها العمله حتى في النّوم العبد مغصور في هذه البلاد ! غروطة كرشو إذكّر إلّي رقد بلاش عشاء جبد الغطاء إلّي طاح ورجع تكلفت وارقد .. يحكيو على سلطان ...!

كسكروت التاي لحمر

تولدت مفجوعه أهم حاجه عندي الماكله دونك كل ذكرياتي متعلقة بيها ، الحلوّه والمرّه أهّوكه أعلاش نطمّن المشرفين على هذه المدونه إلّي نتصوّرهم ما صنصرونيش يحبّوا يعرفوا مايا وين يصب إنهم ما يتعبوش رواحهم على خاطرني هاك إلّي يسميوه ححححا إلّي يحمل أسفار ويوفى الحديث ما اتعبوش رواحكم . تذكّرت هذا الصباح وانا نقرا  في خبر موت محمد بوعزيزي كسكروت التاي لحمر إلّي كانت تعملهولي لحنينه لمجه قبل العشاء وقبل ما نخرج نلعب للشارع و هذا من بين الذكريات المرة لإنّي كنت نحل الكسكروت ونشوف هاك الحشيشه الكحله نستغاض برشه أمّه نهزّوا وناكلو وما نخلّي منّو شيء وهنا تنجموا تفهموا قدّاش كنت حيحو و الموقف عندي ياقف في حدود حلّان الكسكروت والتثبيت في الحشيشه ومبعّد زرطانو وكل شيء كيف يبدا بنادم جيعان يعديه ..الله يرحم محمد البوعزيزي ويغفرلو إلّي ذكّرني بخسارة الميّت و خسارة الكفن و الإجراءات المستقبليّه إلّي إتّخذتها الحكومه على خلفيّة إلي صار ولّي تشبّه ياسر لكسكروت التّاي لحمر إلّي كانت تعملهولي أمّي لكن على الأقل إمّيمتي تحبني أمّا لحكومه مسيبه وعود بكسكروت تاي والشعب الكل مزّال جيعان وفي حالة حداد  والخرا (سامحوني  ) السبعه معديه سهريّة راس عام وجايبه كمشه "   " يتريدحو وهكّاكه بان بالمكشوف إنّو تنقيح وزاري غريب كيمه إلّي صار يشبّه زاده لكسكروت التاي لحمر متاع أمّي ، تاكل كردونه خير وكان تبلعو فتأيّد نظرية الإشتباه في إنّك بهيم ظل طريقو للإسطبل ، لإنّو البطالة والشقاء ماهمش في سيدي بوزيد برك ولو إنّو الإحتجاجات بدات منها وإنتشرت تضامنا معاها أمّا في الحقيقة راهي الميزيريه عامّه وبرّاو شوفو  دشر القروان والوسط الغربي والشّمال الغربي إلّي إمّاليه مليان بيهم صبيطار لمهبله في منوبه  دونك شنيّه مضامين كسكروتات التاي إلّي باش تعملوهم لبقيّة ها المناطق وإلّا حتّاش تشنع في كامل مناطق الذّل ! ..
نحب نطلب السماح من وخيّاني إلّي جوانحهم مكسره في سيدي بوزيد لإنّي لمت عليهم في تدوينه سابقة وما رعيتش حرقتهم وإنّو رد فعلهم على الإستفزاز الأمني مهما كان تفاصيلو عندهم الحق فيه وإلّي حسّسني بالخزي وقت إلّي ريت الرصاص الحي إلّي تضرب بيه المتضاهر  في ظهرو و أدّى لوفاتو الله يرحمو وهو في عز الشّباب ..لا يزّي أعزل لا يزّي يتضرب في ظهرو باهي ، آنا ما نحْملش وزير الشّؤون الدينيّه السّابق ولا نعرف وزير الإعلام أمّه ينجّمش واحد فيكم يفسّرلي آش مدخّلهم الزوز في الأحداث الأمنيّه إلّي أدّات إلى وفاة مواطن تونسي على عين المكان والثّاني مبعد نهارين نتيجة الإصابات الخطيره بالرّصص الحي .. ياخي الدوله في شكون تحمي بالتنقيح الوزاري ..الشعب و إلّا شكون ؟ إلّي كارو تنحّى ياخي موش وزير الدّاخليّه ( ما نعرفش إسمو ) موش هو المسؤول المباشر على الوضع الأمني ؟ وموت المتضاهرين الزّوز ما يتسمّاش قضيّة راي عام ؟..قلتلكمش إلّي الهدره رصّات في كسكروت تاي أحمر ! باهي لوليّد الملايكه إلّي تقتل من منزل بورقيبة وأمنا الثمانينية إلّي بهذلو بحالها شكون يتحمّل مسؤولية هذا الكل .. باهي ، قابلين بكسكروت التّاي أمّا على الأقل ما تستبلهوناش راهو كل واحد فاهم فاش قاعد ياكل وآش جاييه في الثنيّه وما ذابيّه ترجعو وزير الإعلام القديم على خاطر المبدأ معاكم هاك المثل "  لا يجييك ما أشوم   !" ونهدي لعظيم تونس غنّاية هبلستان أهّيكه الفوق على ليمين !

البلاد بدون قيمة مضافة !

عظيم تونس ، 
مع علمي الجازم بأنّك لا تهتم .
تصوّر آخر لحظات طفل مريض بالسّرطان ، يلتقط نفسه الأخير ويحشرج مذهولا أمام الموت يفتك به بحزم وأجبني هل نحن محتاجون حقّا كبلد تؤكّدون علينا بأنّه محدود الموارد أن تصرف المليارات كدعم  عمومي للأعمال السنمائيّة الهابطة ثم أعلمني كيف تجد في ليلك طريقا للنوم .
عظيم تونس ، 
تصوّر عجوزا كادحه ، قد جاوزت السّبعين ولها أصابع متيبّسه تحمل قوارير البلاستيك الفارغه على ظهرها مشدودة للجبين ،تنحني إلى الأرض لا تجد إلّا رفع عينيها تتعرّف على الطريق الذي طال بها وكلّت السّير فيه بلا معيل بعد بحثها في القمامه لم تجد في صناديق الدّولة ما يكفل ضعفها ولا هناءها بالتّوقّف عن المكابده فعلى ما يبدو صناديقنا العامّة تبرّ المخرج الكيّس في رفع مشكلي المجتمع ما بين بسيكوز العذاره و ألق المجتمع في تقبّل كل أصناف الدعاره وأعطني من مستقّحات العجوز التي لم يسبق لها أن دفعت لصندوق الضمان مالا من التّغطية الإجتماعيّة أيّ أماره .
عظيم تونس ،
تصور مراهقا لعائلة متفكّكه لا تكاد والدته تجد من المال ما تؤمّن به وجبة الغذاء الرّئيسيّة ،يتلقّى الإهانة من المعلّم و أقران الدّراسه ، فالفتى سيّء الهندام وفي الغالب لا يحمل معه إلّا كرّاسه ،يضيق صدر الفتى ويسأم المهانه وبعد تعثّر دراسي متكرّر لا يلقى إحاطة من هياكل الدّولة للتعليم ولا أي هيئة عموميّة إجتماعيّه فيطرد من التعليم العمومي ويصير تلميذا نجيبا على مقاعد الحياة التّونسيّه وقد ينتهي به الحال داخل سجن ما ليشهد مناقب سياستكم الرّدعيّه و انظر إذا كنتم منصفين حقّا في الإحاطة بكلّ الفئات الشعبيّة .
عظيم تونس ،
كل يوم تفكّر نكرة مثلي في كلّ هؤلاء وغيرهم ممّن لم أذكر لك ، وأعتقد أنّه يتوجّب مراجعة كل القوانين الوضعيّة وطريقة تصريف الأعمال الحكومية وإعداد الموزنات السّنويّة وظبط التّراتيب الإداريّة للحفاظ على كرامة الضعفاء ولا أفهم كيف تنام وبك معلّقة أرواح ملايين الأشقياء ممّن يألمون  بالعيش ..الوطن ليس هذا الإقليم ولا هذه الحكومه ، ولا حتّى رزق البليك إنّما هو هذا الشعب وحيواة النّاس لا أكثر .. تسأل عنهما يوما وأنت في خريف العمر فانظر من حكمة العمر الذي صار وراءك إن كان سيغني عنك سلطانك من سؤال الرّاعي شيئا .
عظيم البلاد ،
أعرف سيّدة إسمها تونس ، وهي أصدقك القول ضعيفة الحال وكما تعلم الأمر مقدّر لها ولا علاقة للحكومة بذلك . كلّما سمعت إسمها ضحكت وقد سألتها يوما بكياسة الحمقى " يا خالتي من سمّاك " فأجابتني ولم تغفل إضهار الغضب من تبسّمي : أبي الوطني ، فهل إنّك مثل والدها تتيمّن بتونس وتسمّي من تحبّ بإسمها !

تحبّوا ربّي ؟

خزرت وبلعت ريقي وقعدت نخمّم إمبعّد خمسه وعشرين سنه على ظهر الدّنيا باعتباري إنسانه مسلمه بالأساس نتسأل "ياخي تحب ربّي ؟" ترهوجت بالمجد ، دوّرت السؤال مليح .. ما كانش ساهل باش نجاوب آنا والكذب العلاقات بيناتنا مقصوصه والفضل يرجع ليدين الوالد يحييه إلّي يعدّي كل شيء إلا الكذب ..نذكّر إلّي قعدت نخمّم كيمه عاملين إنتومه .. نمّن بيه ! تي هذه موش محبّه ! نخاف منّو حشمت ومنها قلت للسّيّد .. "المحبّه آش معنتها ؟ تقصد الطّاعه ؟ "ضحك إلّي سألني وقلّي   "لا ! أمّاله تحب الرّسول راهو ما يكملش الإيمان إلا بمحبتهم  الزّوز ..تذكّرت لحكايه هذه إلّي صارتلي توّه عشره سنين تعلّمت  فيهم أبجديّات الإيمان وحقيقة إنّي نكون مسلمه نحب ربّي ونتشوّقلو كيف ما كانوا السّلف الصّالح ونحب الرّسول ونوقّر سنتو باعتبارها منهج ربّاني  .. موش محبّه الأصفياء أمّا هاك المحبّه متاع العمشه إلّي تشوف الضّو أمّا بصيرتها موش سالكه . تذكّرت  البارح وانا خارجه نقضي والنّاس يهنّيو في بعضهم بنهاية العام ، يلزمكم تعرفوا إلّي آنا مستانسه بالقضيه أمّا صحيح زاده إنّو خرجتي هدفها الأساسي التحضير لعشاء راس العام إلّي عندو سنين واحل في راسي ، آنا ما نبيعش ونشري مع العايله إلّي ديجا راهي موش تحتفل براس العام أمّا في لحقيقة تتحيّن الفرصه كيف أغلبية الشعب الكادح باش تعمل صفرة الباي لمرّة  في العام دونك لا تلقاو في دارنا لا بربر لا تلعويك ولا قناة تلفزه تونسيه ولا مظاهر إحتفاليّه ..تذكّرت السؤال تحب ربّي ؟ وما نجّمتش نفسّخ التكشبيره على وجهي . ملّا بارادوكس يا خي ما نّجّمش نوقّف الإجراءات الاحتفاليّه تعاطفا مع سيدي بوزيد و المحامين الأحرار إلّي كلاو طراحه ، باهي هاني مريضه مالوضع وانخمّم نحرق .. شيء .. أمّاله على خاطر لوليدات الصغار في غزّه .. شيء لوليدات في دارنا يشطحو بدوّارتي ..وقفت في برشه بقايع ولقيت برشه صفوف حبّيت نصيح ونعمل مضاهره غير مرخّص فيها مع الدجاجات الكحل إلّي دايرين بيّه زايد ما نجّمتش كنت إنحب ربّي وما علاباليش بالعياد ووقفت في الصف وروّحت وتعبت في التحضير إنسيبي واختي وولدهم جايين عيب باش ننقلب على الشرعيّه التّونسيه إلّى إسمها الحداثه يا نقب تونس يسامحني خويا مدوّن المتنوشه على هذه الإستعاره .. إخلقت في هذه لبلاد وعدّيت ربع قرن نقرا و نفيّس ونستخايل روحي عبد حتّاش سألوني تحب ربي ؟ والشّعور كان العدم بسبب سياسة الإقصاء الممنهجة للعقيده و تخريب أفكارنا بالملهاة و خلّيتونا حتّى ونحن نمنوا بالله متّخذين إلاها غيره الهوى ، ساعات كيف نشوف المجتمع المدني في أي إثنيّه بدائية نحشم ونستغاض قاتل الله البلادة ..نحلف إلّي ما هنّيتش حتى عبد بألفين وحداش وما رجّعتش حتى ميسّاج ملّي وصلوني واعتبرت هذاكه أضعف الإيمان في إنّو المولى ما يلقانيش وين يكره وزاده لإنّي نحترم كل حر من بنزرت البنقردان والإحتفال عار للّي يفهم . ربّي سبحانو يقول إنّو المسلم للمسلم كالجسد الواحد ، وعنّا : ناس شايخه وناس دايخه في أمرها ، ناس مفعول بيها وناس غالطه في حساباتها ، ناس سارقتها السكّينه وناس سيبة الدّاعي وإلّي كسب ، ناس رقدت ببلعه وناس هردتها الغلبة هازها نوم الغلبه ، ناس تحت اللحود وناس مزّالت مكبشه في هاك المثل كل واحد يضرب على درابوه وتلك منازل الّذين كانوا من قبلنا : كانوا أشدّ منّا قوّه .. تحبّوا ربّي ؟.. وقت للتفكير