برّة قيّد وخمم نهارة الإنتخابات تمشي ولّ لا

ساعات نتمنى كان نشد روحي إنمنتيها مشطة وبونيه حتاش تعرف إنو الله حق ..وتغادر لبلاد على عجل .. إي نعرف هكّاكه نولّي مازو ، أما خير ! ولّا مكهب على لربعين ومزّلت خاضع  لوصاية الداخليه في بلاد التسعه وتسعين بوهالي يمرجلي كبدتي بياع شراب ويفيّس علي خنفوس كان بورقيبه يضرب فيه بلباكيتة .. واش موحّلني في الخضراء نهج نحرق نخلي لغود فاذرس متاع تحطيم لبلاد يحرقوني كيف هاكه 22 ألف .. يتكلم الحر يولّي ملثّم ويهدد في أمن البلاد لا علاش وقتاش بنادم كان مأمّن على روحو يا بوقلب رزق البليك فرّقتوه على بعضكم وفضحتونا في وسط الدنيا تتناطحو مع الصين في الفساد المالي وتحكيوا على سمعة البلاد ..ترميو الحجر من فوق سطح الداخليه على المتضاهرين السلميين ومبعد تقولو هاجو وحّدهم .. عمليّات قنص منظمه و مبعّد تولّيو إدّافعو على رواحكم .. فريعه إمبعد 14 جانفي يبرر أسباب الإعتداء على المعتصمين قدام وزارة الداخليه بأنهم حبو ينكسوا العلم عاد لعوان سخنو عليهم وفسد المحفل .. تذكروه وهو هاز حاجب ومهبط لاخر ويحكيلنا على إحصائيات الداخليه والسبعين ميّت ... تعملتلو محاكمه شعبيه ..  مام با  ! لوحيّد حللنا حزب وأشرولو في الداخليّه وقاعد ينشط .. قرابات 80 حزب تجمّعي من كامورّا السياسه والمجرمين ذوي الياقة البيضاء ورؤوس الأموال الفاسده جايبه علينا الماء ملعين إي تفجعناش حتى كيف ما طالبناش بإقصاءهم ؟ جمله .. بايعين غدوه بلفته .. إي ، أحسن مكاسبنا إنهم ما قنصوناش أيام الإنقلاب لخّر إلّي عرفتّو بلادنا أنا مشيت قيّدت باش إنّخب ما نيش مثيّق حد أمّا زاده خمّمت كان نطفي الضو نسهلها عليهم ..لازم ندرعلهم خواطرهم أصلا قاعدين يدرعولنا في خواطرنا بانعدام الأمن والذي منو باش ناسهم ينقضوا على مراكز الإقتراع في آخر وقت ويربحو يرجعو عاد يفصلو ويخيطو في لبلاد كيف ما يحبو ..غلاو أعلينا العيشه وشدوا البوليسيه لحرار وعملو مضاهره ضد إرهاب الدوله ياربي .. ضد إلّي دافعو على إنسانيتنا .. آنا قيّدت وباش نمشي إنخب إلى نحب ، أي حزب مهواش دستوري ولا تجمعي سابق وحزب الشابي وميه وأحمد إبراهيم والأحزاب إلّي متحالفين مع سياد إمبارح نشكّب عليهم .. نحكي على روحي باش نمشي إنّخب بالك ندرعلهم خواطرهم وفي لخر هذيه إنتخابات مجلس باش يحدد مصير بلادنا من شكل النظام السياسي إلى غربلة القوانين وبالأساس باش يحط دستور تتحدد فيه الحريات والفصل بين السلط بلعربي مهواش طرح بيلوط ينجم العبد يراتيه ويخلّي أشباه النقب الفكريه إلّي أقصى مطامحها إنّو الطبرنات والمواخير يقعدو محلولين يتحكموا فيه .. برشه مناس نسمع فيهم متشائمين ومتخوفين متّدليس يقلّك أعلاش نمشي والنتيجه معروفه .. المره هذه التدليس في صنادق الإقتراع صعيب و أي تجاوز ما ينجم يكون كان في شراء الأصوات حاجه أكيده الهمج حضرولها رواحهم وهنا دورنا في التوثيق بلعربي يلزم نمارسو القواده الإيجابيّه ونخدمو مخبرين لرواحنا (مثلا يقع التنسيق مع مجالس حماية الثوره ) وإلا حلهم لاخر يستراسيونا يكرهونا في رواحنا .. يغليوا علينا العيشه ، يفتعلولنا  الأزمات يضعفو الأمن باش يحسسونا بضعفنا من غير المؤسسه الأمنيه (إلّي مزالت طوع إيدهم ) النتيجه ننهزموا برمي المنديل ويهبطوا هومه بالكعبتين إلّي تابعينهم لصناديق الإقتراع وتنهزم إرادة الشعب بالغياب ويقيموا فيها لاذان ..وين تمشي تسمع كان 100 حزب منين نعرف شكون نختار ! 
شنوه ..وشيه .. شنهو .. واااااااشي ؟ يا شومي ( هذه ماتطلعش علي ) إلّي قتلونا وسرقونا وحطمونا وذلونا وهردونا وحمصونا وعفسونا وردسونا وفضحونا و عملو وزراء علينا والطاغيه في السعوديه  شمتوه فينا أحزاب التجمع المبعوث من جديد ماهمش معروفين وأحزاب المعارضه الكرتونيه إلّي كانو آش يقعد حزب العمال ، حزب النهضه ، حزب المؤتمر من أجل الجمهوريه ما يكفيوش إنهم يعطيوا من النخب متاعهم شكون نستأمنوه على وضع دستور وتطهير مؤسسات الدوله من  خدّام رؤوس الأموال الجشعه .. ما ينجموش يعملوا التوازن الإيديولوجي متاع الشعب إلّي 99 بالمياه منّو خبزيست ؟ حايرين تخممو تقيدو ولّ لا ؟ تنخبو ولّ لا .. راهي مهياش إنتخابات رئاسيه ولّا برلمانيه باش تخمموا علّي ميتين ملكراسي يا ولادي هذا مجلس باش يضمحل مبعد ما يحط أهم نصوص قانونيه باش تحكمنا .. يا شعب  العلا تذكروا السبسي وقتلّي حكى عى سيادو إلّي خرجو لمحاولة إعتصام القصبه ثلاثه قلك المتطرفين اليمينيين واليساريين متخوفين من إنتخابات التأسيسي يحبو يخلبزو لبلاد الله يهلك إلّي مايحشمش توه حزب العمال وحدو أتباعو 10 أضعاف أحزاب التجمع والب د ب و شركاءهما . عاد زعمه علاش بيّع الشراب المتخلق السبسي رمى هاك الكلمتين تجيش تتمه لكذبة الأربعين بلمياه متاع جغام ! أصلا وكان جا ليدي رانا كونّاه المجلس من رجال قانون وعلماء إجتماع مستقلّين ورتحنا ومادام رصّات في إتخابات .. الإختيار موش صعيب عنا ثلاثة حزاب آكهو ونثبتوا في قايمات المستقلّين مبدئيا باش يكونوا فيها ناس نضاف كيف سي مختار اليحياوي وغيرو من الأكادميين القانونيين .. لحكايه مهياش فوبيا التجمّع ولاّ الإستئناس بالعلالش في نظام المعيشه ، لحكايه نرحمو رواحنا من التبهذيل ووضع الدجاجه ولرزاق إلّي تنهبت لحكايه تتعلق بالإنسانيه نجربو نحسو الكرامه ومع أذناب التجمّع إلي خمسين سنه حطمو لبلاد على روسنا ولتوّه بالمبزع متاعهم عاملين جدار صد يحميو في قتالة لرواح والمفسدين و السياسيين الفاسدين والمتورطين في إهلاك وإنهاك الدوله الكرامه ننساوها .. معاكم إلّي طريقة الإقتراع مافيوزيه وفيها سعي باش يتحكموا في إرادة الشعب أمّا يزيينا ما وخرنا لتالي  وخلّيناهالهم خاليه قولش علينا شعب الإنكا كل مره ينقّص منهم السحار كعبات يذبحم للآلهة ولخرين معلابلهمش على خاطر نهارتها منعو ..شوفو كيف خلينا الهيّه يرتعو فيها القطعيه خذاو بيها إلّي يحبو عليه ..  المقاطعة ماعندها ما تعطينا ..إمشي قيّد وناس قبل قالو فجعان الذيب ولا قتلانو ! إنّاورو شعبيّا كيف ماهم قاعدين يناورو فينا وياخذو فينا على قد عقلنا ..
يا ولدي تموت وتخلّي ولادك ما تعرفش يتطرفو بيه الهوكش شيعملولو تذكرو هاك الوليد إلّي قاعد في صالة دارهم وسنايباوه السبسي خرج قلك القناصه إشاعه ،الصيد ما يحبش يتعاون مع هيئة تقصي الحقايق .. القناص عايش ما علابالوش والتونسي العيّاش الحر يدخل للحبس ويتعدّى على القضاء العسكري على خاطر كلمة حق قالها في أفريل وماي وحتاش جويليه أنظف ناس في بر تونس  تتعدى للحبوسات والتجنيد الإجباري .. نقاطعوا لنتخابات علاش ؟ باش يحشموا منا ؟ يهبطو وحدهم ؟ ناس ما حشمتش تقول القناصه ما فماش وحتى شهيد ما خذا حقو في القصاص ، سبعة شهر حتى واحد ما تحاكم من أجل الفساد المالي والإستغلال السياسي والقروض البنكيه المريبه إلى إدّفعت .. إدارة الجبايه عامله دودو واللاك 2 إلى في الأصل ملك دوله خاص قاعد يتبنى ليل ونهار تصورو  درا شكون من االجماعه إياهم درا شنوه طلعلو في مخو جا سكّر ثنيه بسواتر ترابيه تقول يحفز في كريار حجر .. الثنيه فيها كياس يهز ويجيب وفيه فوانيس ونخلات زينه ما يعيّش ألف عايله تونسيه شهر رمضان .. نقاطعو باش يحشموا ما عملوش قبل نتايج بتسعة وتسعين بالميه حشمو
نمشيو نقيدو وانخبو وكيف تطلع ريحة المؤامره  نحضرو رواحنا نعملو آش علينا ندخلو في عصيان مدني ولّا أي حل آخر ! سطوب تركريك التاي و عقليّة الخبزيزت برّه قيّد !