عدالة إنتقاليه حب من حب وكرخ من كرخ

عندي مده وانا شاده روحي على الكتيبه في البلوغ .. لحقيقة آنا لاهيه بالشؤون الداخليه متاع دارنا مونة دار غيغوز و استعدادات رمضان واللّفورو قبل الدنيا وما فيها . أمّا ليوم جاتني فزعة تقول شكون صب عليّ سطل ماء ..آنا نغسل في الماعون ونسمع كان المذيع متاع أخبار تونس سبعة يحوصل في لخبار ويجبد على وذير ما يسمّى بالعدل وهو يتوعّد باش يخرّج قانون جديد للمجلس الأعلى للقضاء وشدّو عندكم قانون جديد للنظام الأساسي للقضاة .. نش عليّ العرق وبردو قوايمي يبرّد ربّي قلب محمد الغنوشي و المبزّع والسبسي إلّي كانو آسطا في ها لوذير ويبرّد ربّي كل من هرموا كرعيه ويلزموا ثمنطاش ساعه نوم ومزّال يخدم في أجندات داخليه وخارجيّه ويكوّر ضد مصلحة الوطن ..
وذير عندو ستة شهر على بيروه مطالب القضاة من أجل عدالة إنتقاليّة صاغتّو جمعيه القضاة التونسيين وتم تنبيهو إلى أن المرحلة إنتقاليه وموش من صلاحيات الحكومه المؤقتة إنها تدفع في إتجاه تنظيم دائم للسلطة القضائيّه بحكم غياب السلطه التشريعيّه إلّي وحدها عندها شرعيّه شعبيه وإلّي مبدئيا باش تفوّض إختصاصها للمجلس التأسيسي إنّو يعمل دستور جديد للدوله يحدد فيه المبادىء الأساسيه لنظام الدولة وتنظيم السلط الثلاث وعلى ضو الدستور يقع مراجعة القانون الأساسي للقضاة .. خربها ما اصطلح على تسميته بوزير ـ لا هو ولا حتى رئيس الجمهوريه المؤقت والشوفالييه متاعو عندهم  شرعيه ولا مشروعيه ـ دونك أصح كلام للحقيقة كيف نجبد على المواطن برتبة وزير الشابي إني نقول عليه ما يسمى بالوزير ..عم الراجل وبابا عزيزي ناكل عليهم طراحة من بابا حياة عمرو ينبّه عليّ  ما نادي حتى حد هكّاكه إلّا إذا كان يستحق .. قلتلكم خربها ما يسمى بالوزير ، رقد على المطالب الصندي متاع العدالة الإنتقاليه ورجعلنا بفيلم متاع النوري بوزيد . قالتلو الجمعيّه التطهير تمترس بالقضاة إلّي خدمو النظام البايد حتاش خرج لسانهم حبل وزعمه زعمه عطاهم في إطار لجنه ، الحريه باش يتصرفو جرابة صافين .. قاموا أزلام النظام البايد بعمليه إعادة إنتشار للقضاة الذين تورطوا في محاكمات الراي ورقاوهم بل وحطّوهم في مراكز حساسه لمحاصرة الحق من جديد .. إممم نفسرلكم خدمة القاضي تخضع لقوانين إجرائيه من بينها إنّو الأحكام تصدر بأغلبية الثلثين معنتها راي الزوز يغلب الراي الواحد  في الدايره إلى فيها ثلاثة قضاة إذا زوز شدو في راي هذاكه إلّي يمشي وفي العادة رؤساء الدواير يكون عندهم دور مؤثر فما بالك إذا الطيح بمتراس مصدّي وقلبو ميت الأغلبيه تولّي منامة عتارس ولّا عيب . رئيس الدايره قريب يحكم وحدو والملفات تولّي تعرف إمّاليها وعمرها ما تدّعثر فيك  إذا راسك صحيح وماكش منسجم ..الحركة لخرانيّه ما حركت حتى منسجم من بقعتو لا وزادة قوّات شوكة الفسّاد مبعّد لقاو شكون يحميهم ويرقّيهم ما يسمّى بلوزير قال للتطهير لا حب من حب وكرخ من كرخ .. جايب قانون ندّابه زعمه زعمه باش ينظم المجلس الأعلى للقضاء ،الرجال تقولّو يا معلّم يا أستاز في غياب الشرعيه الدستوريّه ما عندكش الحق تخمم تصدر قانون ينظم إحدى السلط في الدوله وأهم سلطه محتفظه بشرعيّتها كامله والأستاز لاعبها مصعصع ..الجمعيه عندها أشهره ملّي قالتلو القانون هذا دور بيه بغافل وهو والبارح المستشار متاعو يدّروشوا مبعّد ما خافو من إستنهاض  همّة المجتمع المدني والغضب الشعبي من التعطيل المنظم لسير العداله واستهداف إستقلاليّتها بالكامل وتعطيل محاكمات الفساد المالي في بالهم يراوغو ويستبلهو في الشعب !
يا ما يسمى بالوزير ، يا مواطن الطلبات واضحه مجلس أعلى للقضاء إنتقالي يتم إنتخاب أعضاء متاعو الكل من عموم القضاة يتول إعادة الحركه حسب معيار التطهير كل قاضي ثبت تورطه في محاكمات الراي ولّا ثبت فساده المالي ولّا إرتباطه بالتجمّع الدستوري ولّا خدم النظام البايد ولّا حنّانة للّا ، يجب أن يقع إستبعاده من مواقع القرار ثم محاسبته والإنبطاحيين وقضاة التعليمات إبعادهم أيضا ووضعهم تحت إشراف القضاة الذين ثبت إستقلاليتهم كإعادة تأهيل . ونطالب بإلغاء التوسيع من إختصاص المحكمة العسكريه ..يا رسول الله تي هي تقعد محكمه إستثنائيه وضمانات الإستقلاليه فيها تحت الصفر وحتى هياكلها مهياش مكونه  بكلها تكوين قضائي معنتها مهياش بكلها مكونه ملقضاة .. أعلاش توسعولها في إختصاصها ؟ خلاها المواطن الثمانيني .. عدالة الهشّك بشّك ولّا عداله إنتقاليه ؟ أهوكه يحطو العصا في العجله ومبعّد يقلّك هانا عملنا قانون للقضاة والقضاة مستقلّين  .. ما فمّاش قنااااصه وما فمّاش قضاة ! 
إممممم تذكرو هاك المدام إلّي خرجت في حنبغل وقالت ما عنديش ثقة في القضاة مبعد 14 جانفي بيّامات هي بيدها أستازه في الجامعه نهار 13 جانفي باركت خطاب صانع التغيير وقالت إلّي هي فرحانه وطّالب الشعب باش ينخرط في الحضيره متاع صانع التغيير .. في نفس سياق الدّرويش يخرج المواطن إلّي سمّاووه الناس لخرين متاع تونس وزير عدل ويحكي على قانون خدموه زاده الناس لخرين في الظلام ولّي رفضوه عموم القضاة ويعمل روحو ما في بالوش أهّوكه صنايعيّه متاعو سته شهر وهومه يغنيو في غنّاية إستقلال القضاة كيف إستبطى الشعب المحاكمات وما تحاكم حتى قاتل شهيد بداية من الدكتاتور الفار نهاية بعون الدّاخليه إلّي يرفض وزير الداخليه تقديم قايمه في الأسماء متاعهم حسب ما صرّح بيه  واحد من لجنة تقصّي الحقايق .. الدرويش ، الماسك إلّي تستعمل فيه لحكومه كل ما تفضحت مناوراتها لتكريس النظام الدكتاتوري القايم وتعطيل المحاسبة وقاعده تغنّيلنا في غناية المصالحه باش يطربقو علينا المنداف من جديد كل مرّه الماسك يجي في شكل مبادره تافهه ضاربها الزهايمر ومليانه بالتروقيع .. دوّيو يبطى شويّه كيف يكذبو عليك يا مواطن برتبة وزير ويقولولك إلّي عموم القضاة عندهم أهليّه للحجر عليهم وإنهم عندهم قابليّه باش تحطّهم الكل في المكتوب نعلمك إلّي راك غالط كارك سيّبت عليك لوزاره وروّحت لدارك في الثمانين يا مواطن ما عّادش عندك نفس تتحدى إرادة الشرفاء وهومه أغلبيّه إستنّى وتوّه تشوف كان ما توخرش لتالي وتجبد لايحة جمعيّه قضاة تونس إلّي تعطاطلك في فيفري ستنى الحساب من أجل التواطىء وتعطيل سير العداله وباش تسيّب عليك غيغوز كتايب دارهم موش باش يعملو مطلب في الحجر عليك وإنّما باش يتقدموبشكايه جزائيه ضدّك وكل من سيكشف عنه البحث  في التستر على المجرمين وقد أعذر من  أنذر ..  يوفى لحديث !