Wednesday, March 28, 2012

نهضة فيق الشعب هو إلي ينخب فيك !




حكاية موقف النهضة مالتنصيص على الشريعة حسسني بروحي قولش علي هاك السنجاب في الكوميك تاع العهد الجوراسي إلي فلق الدنيا على خاطر كعبة البوفريوة إلي طايح فيها لوف .. أول حاجة عملت سياسة ظبط النفس باش ما نشدش الحزب نسلخو بإبرة وباش كيف ما قال ولدي كينغ وهو يمخط  في خناينو  ما نشمتش أبلا طازا فييييااا .. إي وعملت شوية يوغا تي حكاية عشرين  ثانية تنفس  عميق ، جاوني فيها الشقنوس نوفل الورتاني والكاينات الهلامية إلي لا عندها وجه لا قفا أمثال بن مرزوق و بن تيشة وجوهر من مبارك وبياع الشراب الشبسي آاااه هو في الأصل جلاد من جلادي بورقيبة والنسا الديموقراطيات آااه وأبطال فرانسا إلي حالتلهم بلاتووات فرانس 24 باش يرعشو ويبكيو من سلفيي تونس ويطلبوا حماية أمهم فرانسا يحرقهم ربي هومة وياهم فرد النفس تذكرت ولد بووه الحنين ال **** .. تسكر علي النفس آآآبي ووالوزرة تاع النظام البايد مرجان البكوش فريعة .. الدساترة السراق .. قتالة الأرواح اللحاسة العواينية الشبيحة إعلام البرونوغرافيا .. تونس سبعة ..التمويل الأجنبي للجمعيات المشبوهة وقلت فيها وووووه .
وذكرت الغناية الحولة هاو قالو عملنا ثورة أبّي وقتاش .. حزب إسلامي لايت .. يديه باردة  على الثوابت نهار كامل وهو ينادي بحرية التعبير وعلويتها حتى مع ماخور كيف نقمة تي في ! ..الديسيبسيون عنوان المرحلة .. يا ولادي آش مدخل المسائل المبدئية في التعايش السلمي آش مدخل إنو رعاع تونس وعرابيدها يحبو يقررو للأجيال الجاية ما يجب أن تكون عليه حياتهم وتواصل الإفلاس القيمي في حياة بنادم في هالبلاد  إلي خلى واحد فاشل دراسيا وسارق وعميل للكيان الصهيوني يحكم في شعب بمثقفيه والنخب تاعو وإطاراتو وابطالو ربع قرن . 
يا ولدي كلمة التوافق فلقتولنا راسنا بيها .. آشبيه عنا أقليات ، يا نهضاوية الحكم شبيكم ديما تتنازلو على المواقف المبدئية يا خويا تعلمو من حليفكم في الترويكا بن جعفر رئيس المجلس التفصيصي الحداثي على قوة جهدو مسكين " التنصيص على الشريعة على جثتي "   توة بالله شينخبوكم أعداكم إذا مشيتو بهواهم شنوة المفسدة إلي باش تمنعو لبلاد منها يا خويا ماو عبرو على موقفكم وخليوهم يربحوكم بالتصويت في التأسيسي .. تعرفو مليح إنو الشريعة عماد حياة بنادم وإنو التنصيص عليها كمصدر من مصادر التشريع باش يحمي الناس من إصدار قوانين مجحفة مخالفة للعقيدة منها إلي يتعلق بالسلوك وإلا بالنظام المالي والإقتصادي .. دونك أعلاش تخليتو على موقف مبدئي وهل إنو باش تواصلو في نهج التوافق في الثوابت سورتو كيف يبداو رعايا البلاد من أصحااب المحن و المثليين يتبكاو باش تضمنولهم حقوقهم وبرة عاد آش باش يسلكها . 
فمة برشة ملجهال أربكو فكر العامة  بالحديث على ثقافة بلدان عربية إلي مبنية بالأساس على أعراف  خاصة وإثنة للمجتمعات هذيكة ويمررو فيها على إنها سلبية القراءات المختلفة للشريعة .. والنهضة عاونتهم ، الإئتلاف السياسي لمجابهة فلول التجمع وبقايا النظام البايد وفهمناها أما باش يولي عندكم آداء علماني وتنصهرو في التقدمية التافهة متاع إلي ما يعرفو ملقرآن كان سورة الإخلاص فيا خيبة المسعى .
خترتو الطريق  الساهل في مواجهة خصومكم السياسيين .. تنازلكم على أهم رافد لحياة الفرد والجماعة فوط غراف يا سادة ! وحدة مالناس كان عيني بالعلمانيين راني نخبت المؤتمر على خاطر فيه سياسيين  نحترمهم ياسر .. أما نخبتكم لأنكم إسلاميين عاد نستناو منكم تحكيو بيقين العارف بالله ياخي حلفاكم ماو يعرفو إختلافكم عنهم شنوة هتخلويض ياخي جبناكم تعاونو فينا على قبر بونا هربتولنا بالفاس .. أمالة هوكة الجورشي هاك التقدمي الهمام شكركم ويستناو فيكم تزيدو تسهلو عليهم تضمين مجلة الأحوال الشخصية بالدستور .. المسكين يحب بالدكترة يمنع مراجعة أحكامها على الأجيال اللاحقة..  وانتومة أقعدو الدروشو علينا بالحفاض على السلم الأهلي وانساو قول الرحمان "تلك حدود الله فلا تقربوها ". 
بقراركم حسيت بالرسمي قداش بلادنا مفلسة أخلاقيا ، إذا كنتم أبتليتم لدرجة كبيرة لأكثر من عقدين في ميدان نزال ربحكم فيه قليل فما بالكم توة وقتلي المولى مكنكم في الأرض فتخليتم عن نصرة الحق .. يا إسلاميي الحكم إنظبطو بأخلاق السلف الصالح ولا تجعلو من أنفسكم الشر الذي لا بد منه فوالله لو دعيت للإنتخاب الساعة لانتخبتكم على مضض لأنه لا وجود لحزب آخر ذي مرجعية إسلامية  . آداءكم السياسي رديء وموش منطقي دييور تعرفو مليح إلي فزاعة السلفيين سبلة للجيعان بالظبط كيف ما عملولكم فإذا كنتو متحفظين على نصرت إلي عذبهم النظام البايد ووليتو تدعيو فيهم للإنظباط وقتلي هومة يعملو في رد فعل على الإعتداءات  الممنهجة على عقيدة الناس إلي تكررت بطريقة ماصارتش حتى وقت المخلو فيا خيبة المسعى وإذا كان باش تغفلو مشكلة بلادنا الأمنية وعصابات الإجرام المنظم إلي قاعدين يستعملو فيهم باش يحرقو المؤسسات ويسرقوها وتوليو كيف حداثيي البلاد مركزين على فزاعة السلفيين فيا خيبة المسعى . وهاي في لخر نصيحة : 
نهضة فيق الشعب هو إلي ينخب فيك !

4 comments:

  1. المولى مكنكم في الأرض ؟؟؟ بجدك و إلا تفدلك، موش الاتتخابات توه ولا المولى ؟ ها المنطق المريض متاع المسلمين الي في حرب ضد كفار قريش و الله متم نوره و هات ماك اللاوي فوق أنه سخيف و ماعادش يوكل أما بكثرة البهايم ها الايمات الي ممكن تصدقه ينجم يهزنا لحرب أهلية

    و على كل نحن لها

    ReplyDelete
  2. هههه ايا الحمد لله الحمد لله الحمد لله الي ظهرت عندي نظرة استشرافيّة :)

    قلنا النهضة حزب لا مرجعية اسلامية لا وذني و هوما بقوا يطبلولنا بالمساجين و صبرنا و تعذبنا و ايام الجمر و ما تزايدوش علينا ..تي في الرييييييييييح ...الدين ما فيشو نتنازل و نعدي و ننبطح خلي العجلة ادّور ..الدين نصدع بالحق و ما نخافش ..قلك الفصل الاول من الدستور هو الشريعة ...ضحك على الذقون هذا ...ليا فترة مش نتبع في البوليتيك و الحمد لله النفسية ارتاحت


    قيقوز مقالك هذا معبي غش

    ReplyDelete
  3. أبوتييوزيس @ أول حاجة توة داخل لمدونة تاع خوانجية شنية شتلقى فيها زعمة ؟ " غناية يا نجوم الليل" ماو سي نورمال شتلقى من هاك اللاوي وأون + هاني مانيش شنجاوبك على تعليقك على الآية " والله متم نوره ولو كره الكافرون " خاطر معملتش سبيسياليتي محو أمية .. وعلى الحرب الأهلية هههههععععع ! تعبيو زويتن زعمة ! يا مرحبا بيك ( في قريان لي بوسط موش الحرب خاطر المهاتما غاندي ولد عمي )

    ReplyDelete
  4. شيمار@ ماك شفت كيفاش يتشقنسو علينا قولش اعلينا أنصار دين جديد .. ساعات نخلط بينهم والتكتل قريب يوليولنا علمانيين ! البلاد خالينها عصابات الإجرام المنظم وفلول الدساترة ورؤوس الأموال الفاسدة ، وهومة ولاو مكبشين في كذبة السلفيين وهذا يدل على قلة فهم للواقع الإجتماعي في بلادنا .. إجماعة قعدو ياسر في الحبس تخديم المخ صعيب عليهم ظاهرلي يعملو كيف برنامج من يربح المليون ويستعينو بخليفة حمد يبعثلهم محللين سياسيين من مركز الجزيرة للدراسات وإلا شنعمل رونفوا على التحرير هاكة بلحاج فاهم لومور خير .. الغش تاعي ما يفوتش خشمي : نحب الخوانجية ! الله غالب

    ReplyDelete