Tuesday, November 27, 2012

ويظل كيد الشيطان ضعيفا




لبارح تفرجت في دقيقة من لقاء إزوز ضبوعة سليم شيبوب ومعز بن غربية علفايسبوك وقتلي قلو إنت معز من لزلام يقولو عليك .. عاد جاوبو هاك الركاي قلو إي يقولو علي .. ظاهر من سياق السيناريو الهنداوي إلي إزوز لاعبينها هوديني ويعملولنا في إيبنوز .. ما نعرش علاش ذكروني بهل 
القصيدة  




عشنا وشفنا .. السارق ، قتال لرواح ، إلّي هتك أعراض التوانسة ودخل الرجال لحبس إلي ضيع مليارات ملمال العام في لي كابريس تاعو إلي كان يعامل فينا كيف الإقطاعي .. الكلب يلي كان يلحسلو في صباطو .. طلعو شرفاء  ، واحنا الشلايك بو صبع ببببببفففففف .. كل واحد تفرج في البرنامج نحب نقلو لبارح موش بعيد وإن كنت ناسي عدونا أفكرك ..




 القاضي إلي يمكن يكون يباشر في جرايم الفساد المالي تاع سليم شيبوب آش أحوالك يا سيدي الرئيس هوكة المتهم الفار من وجه العدالة أونفان تنجم تقابلو  من خلال قناة التونسية .. برقية الجلب الدولية نفذهالك المواطن الصالح بن غربية عبر الأقمار الصناعية إخدم على روحك عاد بهاك المحضر تاع الإستنطاق لعزيز وما تنساش جرايم غسيل الأموال تاع قانون الإرهاب وقيلة تنجم تحيل عليه أفندينا شيبوب على ما سمعت حط روحو على ذمتك أما في مركز إيقاف سياحي في الخليج .. بوشوشة هذيكة لينا نحن .. 
الضحايا تاع سليم شيبوب .. الموتى والحيين .. آش حوالكم وإنتومة تتفرجو في مجرم فار ملعدالة .. يقدملكم في أعذارو عبر الأقمار  .. الصناعية .. البكاء لا !  تنجموا الطالبو ولد بنغربية البوبالة بحق الرد خلي يستاذنكم ويخرجكم من سينتكم كيف هاك الإمام تاع الجامع إلي تقتل مؤذن الجامع إلّي يصلي  فيه ومبعد يخرجكم صابونكم نظيف تهددو في الأمن العام آكهو .. خطابكم تكفيري تحريضي وخطركم لابد من مواجهتو ويحمل عاد لعريض مسؤولية التسامح معاكم ويا موتى ميسالش إذا ببرنامج حقكم يضيع مرتين وقتلكم يتضرب في إثنين ياخي فانا ديفزيون تكورو ؟! 
المساجين إلي يعديو في ربطية على خاطر نطرو شركة وإلا خاطر سيبو شاك بدون رصيد .. قتالة لرواح إلي يعديو في طولطون .. سليم شيبوب خاطيه راو موش كيفكم يا مجرمة وبلأمارة الشعب بكلو شاهد ! صحيح ما تفرجت كان في دقيقة أما يكفيني باش نقتنع نسيب زعبع من سلالة باكو الأمو ثيقتي في براءتو كيف هاك القناعة بلي بلادنا بلاد الفرح الدائم .. .
 الموقوفين على ذمة أحداث برسيبوليس والعبدلية واسفارة لمريكان إلي جابوهم من ديارهم على أساس  صلاة الصبح في الجامع واللحية و الإعتصام تاع منوبة وأستفيد تاع بوليسي جاهل موش عارف كوعو من بوعو وما يفرقش بين المؤمن الملتزم من الناشط المدني وإلّا السياسي من ولد الشعب الخبزيست .. ضحايا البحّاث لمسطك إلي وقفت ثقافتو على منتسبي فكر الإسلام السياسي  في تهمة المقبور بورقيبة لفية مالشعب على أساس اللبسة والصلاة الحاضرة في الجامع وهذا خوانجي فيتعامل مع ثلث الشعب على إنهم تهديد أمني ! ولاد لبلاد إلي ما يعرفوش القبلة و شدوهم شيلة بيلا خاطر تواجدهم بمكان الإحتجاج على الإعتداء على المولى من كفار الخارج والداخل زاده .. يا موقوفين ستناو جلسة الإستنطاق الجاية وإلي باش يسألكم إستعينو عليه ببن غربية باش إطالبو بحقكم في محاكمة شفافة وسريعة زوز أحلول لوّل تتعداو في البرنامج تاعو وذكرو بانتماءكم الكروي لجمهور الترجي لعزيز لفريقي ما تقضيش راهو حتى بعد الثورة والثاني اتحصنو بإجلالكم لكمال اللطيف حامي حمى  الوطن إلي على خاطرو قريب يعطيو الأنطان لليلى بن علي والطرابلسية باش يلهيو الشعب على المافيا إلّي مزالت تنشط في تونس .. 
المسكارتّو إلي عملو الوبش بن غربية في تعاطيه مع مجرم خطير صادرة فيه بطاقة جلب دولية ومحاولة التستر على الجرايم المرتكبة منّو بتلميع صورتو و الموضة جديدة في إستباق أعمال التحقيق مع متهم محال على قلم التحقيق في حالة فرار بحجة حرية الإعلام تخليني نخمم في هاك القاضي إلي كسر قرار وكيل الجمهورية بمنع البث إذا كان شعرو أصفر وعينيه زرق نقلّو ولد منهو إنت ها عبشّة ! ماكش ولد فرانسا راهو وبن غربية ماهوش روبن هود تونس وإلّا فارس البلاد التونسية .. إذا كنت تعتبر إجراء حوار مع مشتبه فيه هارب ملعدالة وصادرة فيه بطاقة جلب دولية حرية تعبير فيا خيبة المسعى وخذها مني يلعن بو جد والدين أم هلحرية إلي تتكال بمكيال بلاد العكري إلي لاهو من عيارنا ولا يركب على مجتمعنا .. على حساب هكة القضاء التونسي كيف الطرابلسية  باش يولي المساند الرسمي للإنحراف بالعدالة وتهديد الأمن العام ! زعمة قانون الصحافة تاع حكومة السبسي إلي ملقيتلهاش حتى شرعية ولا مشروعية غير ما اصطلح على تسميته بالتوافق قانون تام الشرعية باش يقع الإحتكام ليه والتغاضي على أنو وكيل الجمهورية عندو مارج يجتهد فيها باش يلائم بين ما يسمى بحرية التعبير ومقتضيات النظام العام المتعلقة بسرية أعمال التحقيق إلّي جارية ضد سليم شيبوب .. تهديد الأمن العام إلي البروطاغونيست تاعو أعتى الأقلام وصحفيي الخدمة اللامحدودة لنظام الدكتاتورية السابق بمن فيهم بن غربية مهواش من واجب القضاء التونسي باش يتصدالهم بتحجيم دورهم المريب في تعطيل سير العدالة وبالأخص تحييد أعمال التحقيق الجارية .. نذكر هنا بوضعية المتهمة إلّي كانت خاضعة للتحقيق ولّي صرحت بتعرضها للإغتصاب إلي تم إستضافتها على بلاطو التونسية في برنامج وتم التسويق لروايتها في تعرضها للهرسلة بمجرد التحقيق معاها والتشكيك في حيادية القضاء والإسهام في نشر أخبار زايفة مسّت من سمعة البلاد باش في لخّر يظهر إلي هي عرضت روحها موش وقع إغتصابها ولّي الحرّة أسهمت في تشويه سمعة البلاد مع سبق الإضمار بغطاء إعلامي  تونسي وأجنبي وسكوت تام للنيابة العمومية ! ناقف هنا 


No comments:

Post a Comment