Sunday, November 21, 2010

هازني الواد يا حاكم !

هاك إنهار وانا نقلّب في القناوات وقفت شويّه على فرانس٢٤ نلقاهم يحكيو على صدور حكم بتبرئة مسيحيين جزايرييّن من تهمة الإفطار في رمضان هههه بيناتنا آنا مخونجه شويّه عاد قعدت نحاول نفهم في هاك المتّهمين إلّي حكاو على الحرّيه العقائديّه إممم شكّيت فيهم مسلمين ماهو ربّي أمر الرّسول باش إيقول "لكم دينكم ولي دين " دريّج وفات الفقره جبدو على عزوف الشّباب التّونسي على السّياسه و باش ما يتّهموش صاحبة جرد مدونه كيفي بنشر أخبار كاذبه ما عليهم كان يشوفو برنامج أسبوع بالمغرب العربي على فرانس ٢٤ بالعربي ..المهم لولاد إلّي سألوهم كلهم طلبه و على الأقل في التارمينال كلهم قالو ما نتبعوش السياسه.. إمليح أمّاله شكون يعبّي في هاك المؤتمرات الشعبيّه ! إنهم لوليدات ما نجموش يسمّيو أي حزب سياسي في تونس موش هذاكه الّي لفت إنتباهي أمّه وقت واحد كسّر كرايم إسم الحزب الحاكم ـ مانيش باش إنسمّيه الإشهار ممنوع في بلوغي ـ طحت على ركايبي بالضّحك يا بوقلب حزب يحكم في البلاد من ٥٦ و الشّعب ما يعرفش إسمو ..الحزب إلّي مشارك المولى في صفة الوحدانيّه ما يعرفوش ولد يعمل عمرو ٦٠ ملّ قوّة ولاء وملّ هومه ..أيّه شربة الضحكه وقلت نكمّل نشوف وليداتنا آش يْبيعوا ،عاد يا هول ماسمعت الوليّد يمكن سألوه على مفهوم المعارضه كان جوابو هكّه "المعارضه ..هذوكم مايعجبهم شيء ..المعارضه موش باهيه" .. إي هذا كلام جهّال متفاهمين أمّه لبلاد باش تكمّل القدّام مع أمثال ها الولد يا خي كيفاش نقوْلْبُو العباد باش ما يقعدوش مخاخهم إسطل مَنْقوب ..لولد لاخر إلّي سألوه جاوبهم إلّي هو ما يتبّعش السياسه بإضمار لتجنّب أشياء ما ذكرهاش ولكن الكل نعرفوها ..زعمه إنغلاق الشّباب على السياسه أهم تمظهر إنساني بيه تتحقّق المصلحه العامّه وين باش يرصّي بينا .إذا نحكي على روحي  إنّجّم ندّعي وعي بالسّياسه بدون تحزّب وإنّك ما تخلّيش روحك لقمه سايغه لضْبوعه موش معنتها تفقد إنسانيتك وتولي ميّت حي ..توّه عشرين سنه لتالي قرّرت إنّو باش إنقاطع التّحزّب لإنها رحله محفوفه بالمخاطر..لحكايه بدات عام ثمانيه وثمانين وقتلّي صحيّب مالقسم متاعي قرينا مع بعضنا خمسه سنين ثانوي بعثوه لدار العمّه من أجل الإنتماء لجمعيّه غير مرخّص فيها وأطلبوا اللّطف يلّي تعرفوني بالّيمانات السّبعه الغشّير بوماطان و جيغا على كلام ناس بكري لا يعرف القبله منين وحتى على وقتنا كانوا يطلبوا منّا باش نحفظوا شويّه قرآن سي وخينا كركار ما كانش يحفظ أمّه وتات في مظاهره عُنْقيّه في المدير أعطاهالو عاد ما خرج ملّيسي كان ما فرقة التّدخّل فرحت بيه وبات في قلبو ..باهي بالمنطق كان البهيم يسرح وين جا باش تفرح بيه الضبوعه عاد إستقلّيت بفكري وخلّيت أهل البلاء في البلاء و اعتكفت من غير تحزّب لكن خلّيت روحي منفتحه على الفهم وهذاكه أعلاش ما عمري ما خمّمت إلّي الشيوعيين ملاحده يحبّوا الفساد وما عمري ما ظنيت إلّي الإسلاميين يحبّوا يقيموا دوله إسلاميّه على صيغة دولة الفقيه وإلّا باش يقصّوا الإيدين والريوس ..اليوم آنا بكل وضوح ضد دكتاتوريّة الحزب الواحد لكن زاده حايره في شعب شبابو جاهل وفات فيه الفوت آش كون باش يرجّع الوعي ويفيّق الموتى في جمهوريّة البنديري يا بنديري و ذراعك يا قوّاد والتّيكطونيك كيفاش نلقاو أجيال تفهم آش معنتها المصلحه العامّه وإحترام ذاتيّة الفرد ..حسب البرنامج الشباب منقسم في إهتماماتو بين الستاد و المهرجانات الصّيفية ..إي أعلاش لا آنا زاده نعدّي إسّيزون كامله نخمّم في الجمعيّه والرّشوه وشريان الحكم والبيلانتي الغالطه أمّه زاده كيف نمشي في الكيّاس ونرى العزايز إلّي يكنسو في الكيّاسات و نقرا الرّيفورم متاع الضمان الإجتماعي نعرف إلّي مصيبتنا كبيره بلأغلبيّه البنفسجيّه ونتمنّى تكون عنّا معارضه قويّه كيف في بعض مالبلدان .. في كل الأحوال آنا عزوزه مالّبلاد هاززني الواد أمّه وراس أمّي يا تجمّع عمري لا نقوللكم العام صابه .

10 comments:

  1. هههه تي هوما حتى فالكورة وما يعرفوش يتحاوروا تحبهم يعرفو المعارضة ... سلعة زبالة وربي يلطف من كارثة ... مرة نحكي مع بنية باك+4 إلي يقولك نحكيلها عل 15 أكتوبر في بنزرت كيفاش تبندير وتصفيق وريق ... قاتلي ملة راسيسم في تونس شبيكم انتم برك تعملو إحتفال و جو ؟

    على كل تدوينة حلوة ... أما شنوا الحل ؟؟

    ReplyDelete
  2. الحل موجود إنّو كل عبد يكون مليان ، فاهم ،عندو وعي بمفهوم الدّوله و الجمهوريّه على الأقل عندو وعي بالإنتقاص من إنسانيتو كفرد . ومبعّد كيف يوصل لدايرة القرار يريزيستي ويحترم فكرو موش يولّي ضبع ياكل في الجيفة متاع خوه ولّا خوّاف يبيع روحو للشيطان المهم يستحفظ علّي عندو

    ReplyDelete
  3. متفق معاك مل ناحية هذي ... أما الحل باش الشعب البنفسجي الكريم يولي عارف وواعي ؟
    ما تنجمش توعيهم بالسيف عليهم وما تنجمش تجري وراهم بش تحكيلهم ... اليوم تجي تحكي مع شاب على معارضة مل كلمة لولا يقلك أخطاني لا اطلعني قفة أو يقلك ربي معاهم أنا لاهي بقرايةي ونحب نعمل دار وصغار وخليني ترانكيل و ما يحب يزيد معاك حتى كلمة...
    الحل صعيب أما ممكن ... علاش صعيب ؟ خاطر الحزب التكركيرة ألي شاد البلاد يربيهم ويقرهم إلي يحب وكيف ما يحب مالسغرة !!

    أما باقي ممكن ... وربي يوحسن العاقبة

    ReplyDelete
  4. الحكايه موش ممكن تجي بالماص معنتها موش بالكثره السّيل يبدا بقطره .. و آنا عكسك من راش إلّي فمّه دمغجه في البلاد قد مافمّه سياسة المزود خدّام و ضياع الوقت متاع الشباب ما بين الستاد و المهرجان ..ملهّينهم حتّى يضيع العمر في التّفاهات ..ملهّينهم على الصحيح وهنا يجي دور العايله على قولك الله يحسن العاقبه

    ReplyDelete
  5. t'es passée à côté d'un petit détail,
    les drapeaux kabyles flottaient lors de la manifestation de soutien aux non-jeuneurs

    quant aux jeunes tunisiens, j'ai fait une indigestion à cause de leurs réponses, je prie encore pour que ce ne soit que de la débilité artificielle

    ReplyDelete
  6. تستخايلني ما فقتش لا كبطيط الحكايه أمّه راني حاليّا مركزه على الشّأن الدّاخلي هاتوّه نهار نعمل تدوينه على لأقلّيّات آش عاملين في العالم العربي ..شكرا على المرور من هنا

    ReplyDelete
  7. gyogyoz : Je pense que le désintéressement de la jeunesse à la politique n’est pas une exclusivité dans notre région, le problème est dû en premier lieu aux Etats dictatoriaux qui s’éternisent dans la région, en plus le manque d’attractivités du réseaux associatif qui est le véritable vivier du militantisme .
    quant à l’affaire des non jeûneurs elle est compliquée , ils étaient mis en garde à vue sous le chef d’inculpation de non respects au préceptes de l’islam , qui n’existe pas dans la loi algérienne , des partis politiques se sont approprié cette affaire et notamment le MAK ( mouvement pour l’autonomie de la Kabylie ) , à noter que les inculpés ne sont pas chrétiens , il était question de chrétiens dans une autre affaire du même genre .
    PS : les drapeaux portés par la foule ne sont pas kabyle mais amazigh qui ne sont pas une minorité en Algérie , thanamirth ( Merci ) .

    ReplyDelete
  8. misanthrope tu commençais à me manquais tant mieux que tu as fait signe de vie mon ami :))je suis tout à fait d'accord avec toi pour le premier volet de ton commentaire bienque les réactions aux dictatures a fait naître dans l'histoire la république en réponse à la monarchie ce qui me fait penser que la détérioration de la personnalité de l'individu est à l'origine de tous les vices pour ce qui est du jugement j'ai bien entendu le témoignage de l'un des inculpés il a bien précisé qu'il était chrétien ce qui démontrait l’irrationalité de l'inculpation selon lui ..kabyle :)) ou Amazigh ;)) moi j'adore l’Algérie et croix à la suprématie de l'Etat nation dès lors que l'Etat s'est identifié le nombre de la population selon les ethnies ne compte plus seul le drapeau national doit flotter

    ReplyDelete
  9. Merci , je n’ai pas vraiment le temps dernièrement ni de mettre à jour mon blog ni même d’aller voir ceux de mes amis , occupé à chercher comment gagner ma croûte , mais c’est avec un réel plaisir que je lis ton blog .
    Pour ce qui est de cette rocambolesque affaire des non jeûneurs , il y en a eu plusieurs , la première qui a impliqué deux personnes dont un chrétien , une deuxième aussi en Kabylie (celle que tu as suivi me semble-t-il ) où plusieurs jeunes étaient surpris dans un local en train de manger pendant le ramadan ,cette affaire a connu une grande médiatisation , un autre jeune aussi n’avais pas la chance des autres dans les Aurès parce qu’il a été condamner à 2 ans de prison ferme , c’est quand même grave pour l’Algérie qui n’est pas quand même l’Afghanistan , il faut dire qu’il est toujours simple d’écrouer un jeune qui rompt le jeûne (ce qui fera gagner pour le gouvernement les faveurs des islamistes) que de traquer les grand responsables corrompus .

    ReplyDelete
  10. deux ans ferme tu dis c bien capricieux et n'a rien avec la foi musulmane ! j'approuve que l'on discute le respect de la foi ds une émission télévisée mais inculper les gens pour non jeune c grotesque .ça me rappelle un proverbe tunisien qui dit "t3arafch el3elm , kallou nzid fih zieda " et ça me semble trop capricieux pour gagner les islamistes qui sont dans une majorité bien loin de succomber aux magouilles gouvernementales c peut être le gouvernement qui veut se passer comme de "bons musulmans" pour fausser les convictions de la foule et créer diversion ;))

    ReplyDelete