Saturday, November 27, 2010

تعب كلّها الحياة

توّه خمسه سنين لتالي خدمت مع زميل لازم في النهار يقول الجمله هذه إمبعّد ما يخرّج تنهيدة تنّين : يقول "تعب كلّها الحياة "وانا ما غير ما نكون حسوديّه ومن باب كوني من أنصار الآيه إلّي تقول " وأمّا بنعمة ربّك فحدّث "كنت نعض على لساني باش من شدّوش من خناقو ونذكرو إلّي الدّنيا ماشيه معاه و عيب يتفافا عليها و يجبد في التعب على خاطر أمورو هانيه وحساباتو ياسر ضيقة بالعربي ما علابالوش بالنّاس لخرين باش يرمي كلام ما يطلعش أعليه ..تذكّرت كلام سي وخينا وانا نتفرّج في تلفزيون الفضايع على الطّريقة التّونسيّه وحكاية الولد إلّي طردتّو أمّو الزّانيه باش تعيش حياتها .. ولد ظلمتّو أمّو فاستغلّوه باش يعملو بيه فقره في برنامج وقت الّي راس الفتله في عذابو كان كلام النّاس قعد ستّه سنين في الكيّاس على خاطر عذبوه النّاس بلساناتهم جابوه قام فضح روحو قدّام ملاين .. ولو كانت النّيّه صافيه ، ويحبّو يعملولو حل بطلب المساعده من أهل البر ، كان من الممكن إنهم يطلبو منّو باش يستر ما ستر ربّي ويقول إلّي أمّو طردتّو إمبعّد ما عرست واكهو ، راهو عيب تعملو بأعراض لعباد برامج عيب ..تعب هي الحياة يقولها كل صاحب راي في ها لبلاد يجري وراه نزق شلاكه ما يعرفش من الفكر حتّى شيء ويستهدف النّاس برك على خاطرهم يصلّيو الصّبح حاضر في الجامع ..تعب كلّها الحياة يقولها كل واحد يقول ربّي الله يتّهموه بالإرتباط بالخارج ونشر الأخبار الكاذبه على خاطر حكى في الجزيره وقتلّي سفارات أمريكا في بلدان العرب تقدّم للحكومات في تقنيات لوجيستيّه للتّجسّس على المواطن و زاده كيف يجي الدّور تعمل مناورات مع عناصر الأمن باش يحكمو القبضه على الشّعب وتبعث طيّارات بدون طيار تقتل بيهم النساء والصغار ..تعب كلّها الحياة ، تقولها كل عيله باتت مفجوعه في عايلها كلاتو الحبوسات وهو بريء ..قدّاش سوم الكيلو سردينه يا سيّدي الرّئيس ؟ قالتها غيغوز ثمّ أجهشت بالبكاء. شنيّه اللّينك ما بين لحكايات ؟ سامبل معّادش خالطين على السّردينه وهذا أعلاش غيغوز عندها الحق تقول تعب كلّها الحياة . في الختام نطالب رئيس الدّوله يعمل رسكله تثقيفيّه في حاجه إسمها العلوم السّياسيّه للعفارت إلي يخدمو مع فرقة مقاومة الإرهاب باش يعرفو يفرقو ما بين الديك و الدّجاجه على خاطر ضاهرلي فيهم أجهل من صبّاطي ويذكرونا ياسر بهاك البهيم رامسفيلد وفي رواية أخرى يخدمو على النّومبر وموش فاهمين منها والو ..وفي رواية أخرى  :تعب كلّها البلاد .

6 comments:

  1. إبداع يا غيغوز ... تدوينة تعمل 66 كيف :)

    ReplyDelete
  2. أهلا غيغوز

    بدّل الخلفية بربي تعمل مزية... ما تنجم تقرى شي م النص بالطريق هذي، الالوان ياسر متقاربة هكة

    ReplyDelete
  3. un enfant par ci par là kinappé, une personne tuée, un autre faisant la grève de la fin et j'en passe..

    pourquoi cette explosion de malheur maintenant ? est ce que ça n'existait pas auparavant ou est ce que ca existait toujours mais on en parle pas ? et si c'est le cas pourquoi maintenant ?

    Chaque semaine, 10 jours, on nous attire l'attention sur un fait de la société, j'avoue, c'est malheureux, mais c'est fait exprès pour nous aveugler sur l'essentiel !!!!

    ReplyDelete
  4. venus @ je partage bien ton opinion , d’ailleurs ça fait une éternité que le tunisien s'acharne sur le social pour combler sa soif à la liberté d'opinion maintenant ils exposent les malheurs de la population comme des fautes individuelles et ne font jamais l'analyse de la défaillance de la communauté dans la protection de l'individu et c'est doublement immorale :/

    ReplyDelete
  5. مرحبا سي البنفسجيست الوحيد الحر بالفم والملا ;)) لا شيء يضاهي ما تكتب .. بصدق وبدون رمي ورود ! شكرا على مرورك بجانب مناهظة للبنفسجيّه .أقدّر لك هذا !

    ReplyDelete
  6. barbèch @ c'est fait mon ami regardes que dans le dernier back ground j'ai aimé le fauteuil

    ReplyDelete