Monday, January 3, 2011

كسكروت التاي لحمر

تولدت مفجوعه أهم حاجه عندي الماكله دونك كل ذكرياتي متعلقة بيها ، الحلوّه والمرّه أهّوكه أعلاش نطمّن المشرفين على هذه المدونه إلّي نتصوّرهم ما صنصرونيش يحبّوا يعرفوا مايا وين يصب إنهم ما يتعبوش رواحهم على خاطرني هاك إلّي يسميوه ححححا إلّي يحمل أسفار ويوفى الحديث ما اتعبوش رواحكم . تذكّرت هذا الصباح وانا نقرا  في خبر موت محمد بوعزيزي كسكروت التاي لحمر إلّي كانت تعملهولي لحنينه لمجه قبل العشاء وقبل ما نخرج نلعب للشارع و هذا من بين الذكريات المرة لإنّي كنت نحل الكسكروت ونشوف هاك الحشيشه الكحله نستغاض برشه أمّه نهزّوا وناكلو وما نخلّي منّو شيء وهنا تنجموا تفهموا قدّاش كنت حيحو و الموقف عندي ياقف في حدود حلّان الكسكروت والتثبيت في الحشيشه ومبعّد زرطانو وكل شيء كيف يبدا بنادم جيعان يعديه ..الله يرحم محمد البوعزيزي ويغفرلو إلّي ذكّرني بخسارة الميّت و خسارة الكفن و الإجراءات المستقبليّه إلّي إتّخذتها الحكومه على خلفيّة إلي صار ولّي تشبّه ياسر لكسكروت التّاي لحمر إلّي كانت تعملهولي أمّي لكن على الأقل إمّيمتي تحبني أمّا لحكومه مسيبه وعود بكسكروت تاي والشعب الكل مزّال جيعان وفي حالة حداد  والخرا (سامحوني  ) السبعه معديه سهريّة راس عام وجايبه كمشه "   " يتريدحو وهكّاكه بان بالمكشوف إنّو تنقيح وزاري غريب كيمه إلّي صار يشبّه زاده لكسكروت التاي لحمر متاع أمّي ، تاكل كردونه خير وكان تبلعو فتأيّد نظرية الإشتباه في إنّك بهيم ظل طريقو للإسطبل ، لإنّو البطالة والشقاء ماهمش في سيدي بوزيد برك ولو إنّو الإحتجاجات بدات منها وإنتشرت تضامنا معاها أمّا في الحقيقة راهي الميزيريه عامّه وبرّاو شوفو  دشر القروان والوسط الغربي والشّمال الغربي إلّي إمّاليه مليان بيهم صبيطار لمهبله في منوبه  دونك شنيّه مضامين كسكروتات التاي إلّي باش تعملوهم لبقيّة ها المناطق وإلّا حتّاش تشنع في كامل مناطق الذّل ! ..
نحب نطلب السماح من وخيّاني إلّي جوانحهم مكسره في سيدي بوزيد لإنّي لمت عليهم في تدوينه سابقة وما رعيتش حرقتهم وإنّو رد فعلهم على الإستفزاز الأمني مهما كان تفاصيلو عندهم الحق فيه وإلّي حسّسني بالخزي وقت إلّي ريت الرصاص الحي إلّي تضرب بيه المتضاهر  في ظهرو و أدّى لوفاتو الله يرحمو وهو في عز الشّباب ..لا يزّي أعزل لا يزّي يتضرب في ظهرو باهي ، آنا ما نحْملش وزير الشّؤون الدينيّه السّابق ولا نعرف وزير الإعلام أمّه ينجّمش واحد فيكم يفسّرلي آش مدخّلهم الزوز في الأحداث الأمنيّه إلّي أدّات إلى وفاة مواطن تونسي على عين المكان والثّاني مبعد نهارين نتيجة الإصابات الخطيره بالرّصص الحي .. ياخي الدوله في شكون تحمي بالتنقيح الوزاري ..الشعب و إلّا شكون ؟ إلّي كارو تنحّى ياخي موش وزير الدّاخليّه ( ما نعرفش إسمو ) موش هو المسؤول المباشر على الوضع الأمني ؟ وموت المتضاهرين الزّوز ما يتسمّاش قضيّة راي عام ؟..قلتلكمش إلّي الهدره رصّات في كسكروت تاي أحمر ! باهي لوليّد الملايكه إلّي تقتل من منزل بورقيبة وأمنا الثمانينية إلّي بهذلو بحالها شكون يتحمّل مسؤولية هذا الكل .. باهي ، قابلين بكسكروت التّاي أمّا على الأقل ما تستبلهوناش راهو كل واحد فاهم فاش قاعد ياكل وآش جاييه في الثنيّه وما ذابيّه ترجعو وزير الإعلام القديم على خاطر المبدأ معاكم هاك المثل "  لا يجييك ما أشوم   !" ونهدي لعظيم تونس غنّاية هبلستان أهّيكه الفوق على ليمين !

12 comments:

  1. التّاي الأحمر أنواع...أماّ البرّاد الرّسمي سطل و تاينا طايب على نار اللّي ماتو بالحرقة بأنواعها

    ReplyDelete
  2. المصيبه في الكسكروت .. ساعات كيف نخمّم شويّه نقول كان أمّي قتلي إستنّى للعشاء خير ! ولّي قلتو صحيح :'(

    ReplyDelete
  3. باش فكرتني ... أنا زادة كنت من عشاق الكسكروت بالتاي :)
    يا بنتي حلاوة التكوير وفي يدك كسكروت بالتاي وساقيك مدبرة وإنت عرقك شرتلة وتجري ساقيك حافية وهاي حجرة دقتك هاي ساقك تلوات في حفرة ... هاذم الكل بش نحكهم في تدوينات "أيام زمان" أما أهوكة عندك إيكسكلوسيفيتي :)

    بالنسبة للموضوع متع التدوينة خاصةً حكاية الوزارة نتصور ثمة مشروع خفي (بخلاف زيادة التعتيم) جعل التغيير يصير في أسرع وقت ... ربي تستر

    للطفل إلي قتلوه ... مسكين يا زوالي ... هاك الشنتي منتصر قلبو عليه الدنيا وهذا ... برى نندب وإلا فك ؟؟

    ReplyDelete
  4. حر تعرف كسكروت التّاي لحمر :)) آااه صارموش كان عيلتنا ديفزيون كانز أمّاله ما تقلّيش تعرف كسكروت الزّيت بالسكّر ..أيّه غر خلّيني نشوف الخبرات المتفشيه في الشعب التونسي ..التّغيير الوزاري مانا قلنا كسكروت بالتّاي لحمر ! والوليّد إنشاء الله ذنبو في رقبة إلّي قتلو ووزير الدّاخليّه !

    ReplyDelete
  5. salam soeur,
    ohhh w nzidek zeda kaskrout bejben (ama maghir jben)kaskrout bel salami(maghir salami) welista twila.. (cheya7 ma3neha w enti tebda testkhayel wa7dek chnoua fi wostou hihihiii lé w yebda bniiiiiiiiin chay min 3jab, w kaskrout bel sokr akahaw mch lezem ezit w kaskrout betmatem ken lzeem looooooooool barcha kaskroutet lmouhem, lmouhem trasi fi kaskrout mato93odch 3la ri9ek ;) (n7eb n9oul eli el 9ana3a 9adech ma7leha ama zeda fama far9 bin 3andek chwaya wala 7ata ma3andekch jemla w tebda 9ana3 w mabin tebda tra fel khir 9odemek w enti matnajem ken tmadhmidh hohoohooo)
    Merci sœur

    ReplyDelete
  6. أهّوكه الكسكروتات إلّي حكيت أعلاهم الكل جرّبتهم والحمد لله إلّي حفظنا مالجشع وما خلّاناش وقت إلّي كبرنا نوليو جواعه نسرقوا مال النّاس و إلّا نحسدوهم .. كيف ما قلت يا خويا الحمد لله على القناعه :)) شكرا على المرور

    ReplyDelete
  7. نحب نعلن انضمامي الرسمي لمجموعة اكلة الكسكروتات اعلاه هههه
    الناس الكلها كيف كيف، نتفكر سيرتو خويا الصغير نقزها مرحلة الكسكروتات هاذوما و ديراكت تعدى للياغرت يوقو الى غير ذلك من الملذات الطفولية
    محلاه استغلالك لمثل الكسكروت بالرسمي باش يخليونا هكاكة يظهرلي حتى الكسكروت في بلاصتو شلبوق و مشطة

    ReplyDelete
  8. عيدودي مرحبا بيك يا خويا إي حتى كسكروت التاي لحمر رمز الفقر ماهمش باش يعطيوهولنا وانشاء الله ربّي يعطينا من عندو ما خير ..إسمع ياخي في عوض الهوتسبوت موش كان تحل بلوغ آخر خير على الأقل العبد ينجم يخلي عندك كومنتار ..

    ReplyDelete
  9. حبيت نبدل الادريسة اما ما عرفتش كان تبقى القديمة في تن بلوغز ولا تتبدل
    على كل حال انشاء الله من توة للجمعة الجاية نقعد قعدة صحيحة نريقل فيها الحكاية

    ReplyDelete
  10. كسكروت بالتاي , ايييييييييييييييييييييييييييه , تنهيدة من الاعماق و الله رجعتني لزمان كان الواحد فيه باي زمانو لا يدري على خلا بوها وين و لا هامتو في شي ,
    و زيد مع الغربة قداش تحلا اكي الذكريات الصغيرة و لكن معانيها كبيرة ,
    @بنفسج
    كانك حاضر , تكويرة و كسكروت بالتاي , اما التاي متاعنا اخضر موش احمر
    @ عيدودي , ظاهرلي الجيل هذا الكل باستثناء البعض , كلا الكسكروت بالتاي في الصغر, ما نتصورش كان فما حد عندو الرغبة انو اولادو يجربوه , سيرتو بعد ما تعودوا عالدليس و الدانات

    ReplyDelete
  11. خويا الغريب : يا خويا صحّه الهجره وربّي يباركلك أنا ساعات نعمل ضريبات وقوف على الأطلال لا نودّك لا نشهيك تفريكة خبز مع حليب بالقهوه الكحله ، كل شيء إلا كسكروت التاي لحمر لإنّو يمثلّي حلقة من حلقات الإضطهاد لروحي لعزيزه أهّوكه بنادم كيف يتعدّى بيه الزمان يولّي حتى الخايب باهي لإنّو من زمان الغفله وقدّاش العبد مستحقّلها :)

    ReplyDelete