Sunday, October 3, 2010

نكره التجمّع

يا أهل البلاء راني باش نطّرشق منكم ..توّه عندي أكثر من عام على البلوغ سفار كافيه خيري شرّي نعرف إلّي قيقوز باينه ما تحبّش التجمّع ـوعندها الحق ـ أمّه لاهي منتميه الجمعيّه غير مرخّص فيها و لا تنشط بالأماره القانون الأساسي متاع خدمتها يمنعها من ذلك .. وهي تفهم بالعربي .أيواش ـ أمّه قاعده تعمل حساب للرّقيب الإفتراضي عمّار يسكرلها المدونه و ما تنجّمش ترجع بوحده أخرى .لكن سي فيني !.. يزّي !. سامحوني نحكيلكم إلّي صار كيف ما صار ..توّه أمّي قالتلي إلي الضّو جانا ١١٥ دينار واش ..الحقيقة ما قلتهاليش بالسّاهل بداتلي بكلمتها الدراميّه :طلّع قدّاش ؟وكيف قلت : قداش ؟ قالتلي و  جاوبتها :الله يهديك يا مّيمتي طيّحتلي قلبي ..يلزمكم تعرفو الّي الصيف هذا عيلتنا إسترجعت حجمها الطبيعي و أكثر شويّه مع الأنساب :/ وولاد أخوتي :)) كنت نستخايل الحاكم باش يبيّعنا في الصّاله باش انخلصو الماء .. المشكله إنّو قبيله وانا داخله للطوالات ـ سامحوني على الحقيقة أمّه راهو هذاكه ليتينيرار متاع الصّبحيّه متاعي ـ أيّه دخّلت وريقة الماء باش إنطالعها ـ سناسه خايبه بما إنّي ما نّجّمش إندخّل كتبّه إلا بالسّوري دونك باش ما نقعدش نفركس وانا مزروبه نخطف أي حاجه ..دبّوزة الجال متاع خويا نوتيس متاع دواء..واليوم ركبتلي :/ على ورقة الماء ـ و يا هول ما رأيت ٨٤ دينار معلوم إستهلاك الماء ..قرابة ٨٠٠٠ملّيم معاليم قارّه .. قرابة ٩٠٠٠ ملّيم معلوم على القيمة المضافة وشدّو عندكم ٥٦ دينار ٦٣٠ ملّيم شاهدين عليهم مجموع معاليم التّطهير .. يا بوقلب لوناس تاخو منّا فلوس أكثر ما نحنا نستعملو في الماء .. بلعربي المولى يهبّط علينا المطر وهومه يبيعهولنا و يزيدو يطاكسيهولنا مرتين وبعّد هذاكة قناواة الصّرف الصحّي الّي موجوده من عهد الرّوس وإلّي الشعب خلّص تكلفتها تريليون مرّه يتكلّف علينا مشيان الماء المستعمل فيها أكثر مل ماء المزبّل إلّ شربناه وطيبنا وغسلنا وسيّقنا بيه .. أعلاش ياخي لوناس قاعده تهبطلنا في قناواة جوتابل مكلفين عليها بهاك الحسبه؟ آش حال وكان كل مطيره تصب اطّلّع لعوار و تبيّن قدّاش نحن في حاجه باش الدّيوان يجدّد القنوات و يبدّلهم ..تي نحكي على دارنا كل ما يقرب الشتاء نولّيو نحربشو ـ بأردونونس ـ نعالجو من فوبي الطّوفان و الأماكن المغلقه الزّيقوات ـ ومن رهاب ضياع السياره الشعبيّه ..وزد على هذا ياخي ما كم الماء تستغلّو فيه في الفلاحه ـ ياخي ماهو متاعنا بالأماره مخلصينو ياخي تعطيونا في مقابل وإلاّ فالحين كان تمصطو في ماكلتنا و آكهو ..آنا لهذه الأسباب نكره التجمّع الدّستوري لأنّو يمثّل سلطة الإشراف .. نكذب :/ أمّاله الوذره مانا حزب .. و معظم النّوّاب مانا حزب ..آش كون يقرّر الصّوناد , لوناص..هي فوضى .. الغلط مربوط ببعضو من إنطلاق القرار بالتسويف وإستغلال جيب المواطن حتّاش هاك الوريقة الّ تعملنّا كمواطنين أمراض كيف السكّر و ضغط الدّم و بوصفّير زاده .إشهدو عليّ ياخلق راني نكره إتّجمّع الدّستوري وهاني فسّرت أعلاش ١١٥ دينار ..إنشاء الله بارود !

4 comments:

  1. يا بنتي هاو جاتك باللطف،،، ما لا كان نحكيلك على فاتورة الضو اللي خلطتلي عندها نهارين، و هي فاتورة دار لا عندي لا معمل لا قهوة لوكس، و مسجل فيها 673 دينار و فوقهم 300 مليم كان ما حبيتش، الواحد كيف ما هبطش ساكت والديه راضين عليه

    ReplyDelete
  2. ستّمائة و ثلاثه وسبعين ! وراس أمّي نمشي نشطحلهم بالمحارم الحمدوالله يا ربّي ..شنيّه ! و الله كان جاتني راني في دار خالي توّه ..إسمع يا إليزيون آنا راني مانحملش في العباد زاده هذاكه أعلاش توّه زدت كرهت التّجمّع قد صبري في الدّنيا :/

    ReplyDelete
  3. يعطيك الصحة على هل موضوع. احنا نشربو في ماء الجافيل وهوما يشربوا في صافية وفوق اذاكا الكل يسرقوا فينا حتى عن طريق الحاجة الوحيدة إلي المفروض من حق كل انسان عل كرة الأرضية .

    ReplyDelete
  4. المصيبه الّي كل مديده يزيدوا يغلّيو في الفاتوره أهّوكه وقتها سفساريّه و لقصر سمعت الّي يحبّوا أمنه فاخت توّه نغنّيلهم "الحياة صعبت علينا

    ReplyDelete