Thursday, September 15, 2011

كونفاسيون كوالة صباااااااطه

 أول  حاجة نهار ليوم نستسمح روحي في وقت مستقطع من إهتمامها بالشان العام  و زيارة  أردوغان والتبسي المدموغ ههههههه ليوم ولد أختي دخل للتحضيري وانا قلبي ممروج نذكر أيامات الغبينه في المكتب لا تردهم .. 
المكتب أول منداف في السيستام يطرشق عليك ...آنستي وريدة باش تعرفو هذه معلمة السنه الأولى ورحمة أمي مزال خيالها في عيني نذكرها مطروماتيزم إلى طبعني بيه المكتب وبيانسور الدار تي إزح  قبل  ما تدخل  الكتاب يقولولك آش تحب تولي ومبعد أول نهار قرايه .. بره إخدم دروسك ! وتبدا رحلة الحرمان تنقص الفرجة فلكومييكات ، واللهيط ( الكلمه هذه  نعرف فخار بكري خرجت هكااكة وتفسيرها الجري ) في الكياسات والبيس والزربوط ولعب الوراق على الحيط  .. ودمغان ولد الجاره بلحجر .. هذومه كل لعبتهم وزيدوهم التنوقيز على ديار الناس والفصعة والتزحليق بقبقاب بابا في الهبطه بحذة حومتنا !
أول تراحة من عبد براني تاكلها في المكتب .... إإإإإإيه إلعبد آش شاف وعدا ! عام إلكااطريام أنعم علي ربي بمادام منيره !  ضخمه يذكرها ربي بلخير ميتين كيلو  تجيبهم جري وتقوت في روحها ببلباهي مبعد نصف ساعه على  بداية الحصه تتكسل مع نص باقات مليانه بالزبدة ولمعجون وكيف تتكسل علي تشد لعصا ملوسط ! تايبه لله تقول طحت بيدي من الطابق الرابع !
المدرسه أول بؤره للفروستراسيون في بلادنا وكيف تبدا أحول ومفطس كيفي تتسمى شريت إشبوك وكبش في كلمة أمي عاد وما تستعرفش بكلمة ماما ... نهارك أنحس من حكومة الغنوشي يا غيغوز 
آه يا قلبي آش عديت ملمكتب ! سامبل باش تفهموا إلي تعدى علي نعلمكم إلى توه وانا عزوزه كيف يغفلق قلبي  وانحب إنفس على روحي ناقف ورا برسيان دارنا ونغزر للمكتب إلي قدام دارنا ونهبطهم أحيار هههههععععع !
عندي ثلاث عقود ملي سيبت المكتب كيف نشم ريحة طاباشير تضربني الفشله وتلعب علي الدوخه وكيف نشوف تلميذ نبدا نطلبلو في العفو من ربي يلطف بيه .. معلمين وتلامذة بكري كان فيهم لهون توه وحيد كيف ولد أختي  يعيط لأمو  باسمها ولأختي لكبيره ماما ولي انا قلبي بثلاث نقاط علقاف كيفاش باش يسلكها في التحضيري ..
ومنين باش يسلكوها وبابا التبسي بلبزها ويهدد في الشعب بقانون الطوارىء لبلاد كبولها سعدها الوزره  و عايلة الطرابلسيه وأصهار الرئيس  الماطري و مبروك إلي ماخلاوش جريمه إلا ما عملوها حتى اسلاح عندهم .. والطوارىء يعملها  لمبزع على الشعب إلي قتلوه وقمعوه و سرقوه وحرقوه للطليان باش  يبهذلوه وكيف ما يخرج يطالب بلمحاسبة للي قتلو حبابهم يهد عليهم البوليس فلجامع ويشبعهم قنابل غازيه وسبان وتولي المظاهرات إخلال بالنظام  العام !
ياخي ادساتره و التجمعيين إلى هلكو لبلاد وظلموا وسرقوا الناس بما فيهم  إلي حكموا مع بوهم لحنين الزين فرخوا أربعين حزب أشرتلهم لوزاره للعمل السياسي ووخرولهم إنتخابات التأسيسي باش يخلطوهم والشعب الخبزيست ولا يمثل تهديد !
هاو جا ولد أختي ملمكتب بادج معلقة في كرومتو ,  وهو في وضعية فرحا مسرورا بلعت كلامي العقد متاعي ما دخلوش بيهم سي روحي أصلا سيادتو حربي وعندو عامين تجربه مع الميتراس و صحابو ! دونك فروييت جلغتي علأسئلة ومصيتلو خدودو ببوستين وخزرتلو مليح بوغووس ملبريما طراحتو ماكلها على بكري موش كيف هاك لوليد إلى حمملي قلبي الصباح وهو أمو تجبد فيه وهو حارن كيف العلوش إلى هازينو للبطوار !
خذيت تصويره لود أختي وقلبي يحكيلي في شعر قال " إليك يا مدرستي " الباقي بارادوكس معلي تكب الفوق مانيش باش  نحطو

No comments:

Post a Comment