مشيت للجبانه عملت عملية مسح بلعينين موش كيف العاده الحاله عاديه زوز كلاب قاعدين يلصلصو من بعيد ... بنكت بحذه إميمتي وهدرزت معاها ودعيتلها ... ومبعد تلفت إنسنس على القبورات إلى تزادو نشوف كوفيرته مغطيه قبر زعمه لمشيت هزيتها على خاطر الكلوف أحسن باس طون للعبد لله ورجعت ندعي بلخير لميمتي طمحمصت في بلاصطي وما ظهرليش هبطت لوريقات إلى مفصكيه فيهم الدعاء ومشيت نجري لصابر لاس دي أف إلي عايش في الجبانه واسألت على الكوفيرته قلى إلى هو رماها على القبر باش يستر بيها الميت مبعد ما تكسرت إحدى اللحود وطاحت عليه ..
خرجو عيني من محاجرهم وعاودت سألتو عل مومن قتلو شفتو قلى إيجا شوف مشيت معاه هز الكوفيرته ريت برتي من كفن خونا إلي عندوعلى كلام صابر جمعتين ملي دفنوه إماليه إي قتلو والبلديه في بالها قلي جاو ليوم عملو تصاور للقبر المكسر وعلمو المقاول إلى هوما نحاووه وتعاركو ما بيناتهم ومشاو إلكل تلفتلو وسألتو وقتاش صارت لحكايه هذه قلى إصباح ... إي وهل مومن الضعيف شكون بيه قلي إنو سمع طرحت البلديه يحكيو إنهم باش يرجعو غدوه .. تلفت لهاك إزويز الكلاب الوحيد فيهم غردفه هو إلي بيدو ولخرين ملميزوني للسلوقي كلهم شراية شبوك أي قلتلهم وعزازة إلي راقده هوني لنخليكم تمسوه . مشيت نجري لجبانه قريبه وشريت لحود واستر صابر المومن وارجعت قعدت آنا بحذا أمي ودخت ويني الحبقة ؟ قمت المره هذي كيف المجنونه نعفس في الدجاج لكحل إلي تجمهر حولي طول هزوني ساقيه لحبقة أمي نلقاها مزروعه بكلها على قبر راجل شفت مرتو السراقة وهي تدعي علي سرقلها ياجوره ثبت مبعد لحساب لي عملتو مع صابر إنو ياجوراتها كاملين تصرعت مديت إيدي قلعت الحبقة وغزرت المولى لقبر وطلبت منو السماح مشكلتي مع المدام إلي تعدات على قبر أمي وخلبزتو وهاني باش نرتحها الغحافه .. الحبقة سرحت بيها وحطيتها فوق قبر ما نعرفوش ورجعت لميمتي كذبت اعليها قلتلها تهنى الأمور تحت السيطره وانا نغلي دخلاني !
يا بوقلب تزين قبر حبيبك بالحوفة ! ومبعد تذكرت ستين عام من الأخلاق الدستوريه والتجمعيه إلى متفشيه في لبلاد ورزق البليك إلي كنزوه جماعة الحزب وكيف ما قال المثل جوع الكرش تستحى العين هوما نهبو لبلاد وفقرو لعباد خلاوهم يشهقو ما يلحقو ومبعد جاهرو بالفساد وظهرو على رواحهم الفلوس الي مغحفينها وخلاو حكاية النهب حالة عاديه حتى إنو مره سمعت متهم في جلسة يقول للقاضي ياخي آنا برك إلي سرقت ..
تلفت لأمي ما نيش نشكر فيها - لا نزكي على الله أحد - أما كانت للات النسا قلتلها يا حبيبتي طلعت مسلكتها مع إصبيارات يامي عزوز إسمو عبد المالك السبوعي في الثمانين مطيشينو جمعتين في قسم لإستعجالي ! تذكر يا ، نهارت رماوك بسته سكر في الإرجانس من لحداش متاع الصباح حتاش العشره متاع الليل إمممم مزلت نحسب عليهم في ربي .. طلعت مسلكتها يامي المومن ما ينجمش يحرك عنيه وهوما مسلسلينلو ساقيه .. تذكرو فريعه هاكه إلي شد وزير داخليه وعمل كوفر فو ماتت فيه الرجال في ديارها هذااكه يامي محال في القتل العمد بحالة سراح وأشرولو باش عمل حزب !
يامي نموت ونعرف هاك الكاين في اصبيطار شارل نيكول فاش شادينو قلبي يقلى إلى هو جان فالجون بلاد الغحافة يا !
يامي كلاو على قلبي وشربو فلول التجمع في البلديه العلالش فوق القبورات ياكلو في العطرشيه ويشربو في صحافي الماء متاع لعصافر و الكلاب يامي عاملين بانده يميمتي قبل ما نجيك نتسلح بلحجر وبعفو ربي الكاتب العام للبلديه وعدني يقيم السور عندو خمسه شهر و العيب في آنا نصدق في دستوري !
البارح نقرا كيفاش الموتى قيدو في إنتخابات المجلس تذكرت بطاقة تعريفك إلى فكتها البلديه عاد مشيتلهم نجري خزرت للي فلغيشي وطلبت نقابل عرفهم .. طلع مهواش موجود سألتني وحده منهم قتلي آش حشتك بيه قلتلها نحب ناخو بطاقة تعريف أمي إلي خذيتوها من خويا نهار 8 مارس وقتلى جا ياخو في إذن بالدفن !
خززرتلي ملفوق للوطه على خاطر وقتها كنت لابسه زي أفغاني هههههه بالصدفة موش عامله بلعاني ! قتلي ما عندكش الحق تسترجعها هذيكه ملك الدوله التونسيه عنا منشور وزاري يفرض علينا ناخذو بطاقة التعريف ! يامي لقيتو الطويو متاع تدليس الإنتخابات .. إينعم قلتلها بروبريتي متاع الدوله ؟ أعلاش باش تعملهم حروز الدولة تستباخت بيهم منشوركم بلوه وشربو ماه مهواش صورس للتشريع علينا توه البطاقة فين ! قتلي بعثناها للمركز لفلاني قلتها داكوردو أمي ماتت مبعد حرقان المركز نمشي ما نلقاش البطاقة نديبوزي بلانت أمي ما نخبتش الدساتره حيه ما نخليش فلولكم تستغل شخصها وهي في عفو ربي !
عجاجه للمركز ، شافوني جاوني هههههعععععع الزي بيناتنا شبهة .. أيا فسرتلهم لحكايه الحق يامي فركسو لرشيف و ما لقاوش بطاقة التعريف إلى أكدولي على كون أعوان البلديه ما عندهمش الحق ياخذوها يعني لحكايه الحوله متاع التنسيق دعايه ملبلديه وتفاهمت معاهم نثبت في القايمه الإنتخابيه كان نلقاك جايه تنخب نرجع نشكي هههههه كثر الهم يضحك يامي بنادم معادش يعرف علاش يبكي وعلاش يفرق دمعو مؤسسات الدوله طلعو فالصو لحميه كان مع الخماج يا .. البوليسيه حضبه وغول كل ما كان الناس في مضاهره للمطالبه بإسقاط دولة الفساد و يوليو عبابث كلما كانت فما عملية نهب منظم جماعي وتقاتل عروشي جماعي وإحتكار للأسعار جماعي وإخلال منظم بالأمن العام جماعي وفرار من السجون جماعي ..
وزره يامي يخلصو هلبة فلوس باش يمرمدونا ويتواطئو علينا ولا باش مايعملو شي ! إنجاز وزير الداخليه الإنساني الوحيد زيارتو الإعلاميه للمطهرين بصبيطار الداخليه يا !
ضربتني الشمس وانا نحكي تكوخرت إسبعه متاع العشيه .. شوية أخرى يجيو السوكارجيه للجبانه أيه بره نمشي نروح ! نلقى صابر في باب الجبانه يرى في غيغوز حمارا قلى ستنى و مشى يجري للبيت جاب تصويرة مرا مزيانه قلى هذه أمي توحشتها .. تلفت للبيت كعبات البيرا الفارغة عامله مسد .. تي علاش عامل في روحك هكه قلي إلى هو فد مالدنيا بيناتنا عندو الحق يفد مشى للقهوه ورجع في الليله السابقة يلقى السراق خلعو البيت كملو سرقولو ريسبتور ومراولو ومايملك .. أمو ياسر مزيانه يامي وهو يسخف طردو بوه مبعد ما عاود عرس ضياقة عليه ادنيا سكن في الجبانه وضياقة الدنيا على السراق سرقوه يامي طيبتلو خاطرو ووعدتو نغحف لولاد أخوتي في مراول ونهزهملو روحت للدار .. رتحت يا غاليه كان موش رحمة ربي راهو عجلنا لعذاب وأمطرنا مطر السوء ولا صرعنا كيف قوم عاد سراق من تحت سراق هلبلاد وكل واحد شنيه سرايقو من مريول خوه لحبقة فوق قبر أمي لسرقة دوله وحوس تفهم ياغيغوز ..
التيتر تتليفة باش البوليس السياسي يقرا البوسط شريان شبوك ! فوالا ! سلام ..
No comments:
Post a Comment