حكومة ممقوتة تشبه للغطاء الصوف إلي زفر عليه الترينو و لا تصلح للسوق ولا للبردعة حمدوالله قعدو 27 يوم وتنزاح على قلوبنا بإنجازاتها البنفسجيه لصالح أذناب الدكتاتوريه ! و غلاء الأسعار والحملة الوطنية غير المعلنه لإخضاع الشعب للتحليل للكشف على مستهلكي الزطله ..
البلاد هذه يلزمها شيوعيه على الطريقة ستالينيه خلي نتجاوزوا صعوبات إثبات سرقة رزق البيليك كل شي يرجع للدولة .. كل طبة أرض شراها سارق كبير بالمليم ولا الدينار الرمزي تتفك بلي فوقها وننسفوا مجلة التشجيع على الإستثمار عفوا على الحوفة إلي خلات مجلس الدواب يخرج قانون تتعطى فيه أراضي الدولة للمستثمر الأجنبي الإماراتي بالدينار الرمزي إإإإإيه بلادنا تطلع عليها غناية الشيخ ليمام بقرة حاحا النطاحة !
ولما سبق ولأنو المجلس التأسيسي بحاجة لعقلية الشيوعيين في التعامل مع الاقطاعيين السراقة ننصح إلي من الشعب رقدتلو يد وساق ملحوافة لكبار ويحب يفدي ثارو قبل ما يموت عليه بحزب العمال الشيوعي ينخب قوايمو نأكدلكم إلا ما يفدولكم بثاركم ..
حكومة ممقوتة كدست الزبابل وما تحضر كان في الشر ، متكلفة علينا أكثر من خرافة الهولوكوست على للمان وزير أول لسانو فالت مع الشرفاء ويستخايل كبار الحومة ماتو يخوف فينا بالإنظباط وهو وفا عمرو وهو ناقص تربية واخلاق ومبعد ما سترجعو ولادو أكبر نقاط بيع بنت العنب بحيث ينتظر بياعة الشراب خلسه حمله بوليسيه لا تبقي ولا تذر نتسائل شكون حللهم طبرناتهم مبعد ما الطرابلسيه تفتفوهم وقصولهم جوانحهم وعند لخر هل وزرة يخلصو على ميزانية الدولة ملاين متالفة .. إلي فدو كيفي من حكومات اطبرناجية وأصحاب المراقص الليلية والمليارات إلي تدفع على أفلام البرونوغرافيا وعذاب النفسي للمثليين والمحواسه في الحمام العربي إلى عافو رواحهم من الطاكسوات واحتكار شركة المزرعة لتوزيع ادجاج في تونس وفي لخر يطلع صابونها نظيف مع إدارة الجبايه ، ولي تقهرو من تحطيم حياتهم بقانون الإرهاب وماتو حبابهم في لحبوسات من جراير صلاة الصبح في جامع الحومة ولي تعذبو في أقبية الداخلية ولقاو رواحهم موزرين وتماناو الموت باش يرتاحو حشتكم بناس تخاف ربي ما يبيعوش الشراب وماهمش ناوين ، يدافعو على حرية العقيدة ويدفعو لمراجعة القوانين الجايره ناس عندهم أخلاق ويدفعو نحو تكافل إجتماعي بالحق موش بلعاني ناس يطوعو الأنظمة الأساسية للسلط العموميه باش تكون في خدمة الوطن موش في خدمة حزب مافيوزي إلي يحب ينهض بمستقبل ولادو لا يجيهم ظالم يفكلهم رزقهم ولا يحطهم في قلبو علينا بحزب النهضة !
حكومة ممقوته معاها قتالة لرواح تحوس والسراقة تبني ليل ونهار في اللاك دو والبني قاعد يطلع على جنب بنك الزيتونه تقول نسيب لمعلم مزال هوني وفرق أمنية مختصه قارة مركزة أمام شمس آف آم وبنك الزيتونة من ثمنية شهر خايفين على رزق الشعب مالشعب .. بعدما ثبت بالمكشوف إنو السراقة هم الوزراء وأعضاء الحكومة وأصهار الرئيس وعايلاتهم علعرق لولاني ردان البال ما كانش منهم بل من الشعب التونسي المنهوب من ستين عام لتوه .. يتبراكا و ينفسولو لحبوسات والعروشيه وقريب يجيبولو شواطن يمرجوه شكون يعس على الشعب ؟ كل مره قايمه لقيامه سمعتوشي بعدد السجناء الهاربين إلي رجعوهم للحبوسات في بلاغ رسمي للداخليه ؟
أهوكه ليوم حكاو على القبض على عصابة خطيرة ملقمارجيه إلي تهدد أمن تونس الاقتصادي شدوهم في النصر في وضح النهار أما إلي خالينها إحتكار وغلاو أسعار لحديد ووسقوا خيرات بلادنا لليبيا .. إلقمارجية لكلاب بمستقبل الأجيال هاذم مسيبين على طلق ذراعهم يتكتكو كيف ما يحبو
إلي يحب يتخلص ملقمارجيه بالرسمي إلي تاريخهم أظلم والبيلتان نومرو 2 متاعهم تبرز إنهم تجمعي سابق ، إلي يكره القواده وأشباه الرجال إلي عداو عمرهم في وضعية إنبطاح للحجامة ، إلي يكره إلجهال إلي يتعلطو على مجلس هو سلطه أصليه باش توضع الدستور الجديد للدولة وينقح المجلة الإنتخابية والأنظمة الأساسية للسلط العموميه : ينخب قايمة المؤتمر من أجل الجمهورية !
ولي عندو فوبيا للأحزاب يعمل يوغا وكان كبشت فيه الفوبيا فما قايمة المستقلين من رجال القانون الشرفاء كيف سي المختار اليحياوي ولا لأستاذ الصادق بلعيد ياتوانسه تسعه شهر تعداو إلى سقاو بدمهم كياسات تونسنا البية خلاوولنا وصيه كيف إنخبو المره هذه يلزم نقضيو على المافيا التجمعية كيف ما قال الأستاذ محمد الناصر العويني يلزمنا نفكو السلطة .. تكبييررر
No comments:
Post a Comment