الساقطون وطنيا

وقتلي تمت محاولة الإنقلاب على المخلوع و إستعمال الغضب الشعبي لتخويفو ودفعو للرحيل حماية لعايلتو بما فيها إلبوي فراند تاع بنتو .. فمة حلم خلق في عقول بعض التوانسة إلي عمرهم ما تمعشو من النظام البايد وما كانوش سماسرة ولا مقاولين في الوطن: الحق في المواطنة !موش هذه أكيد O,o




قبل ما عايش في بلادنا كان المقاولين إلي تكرشو بالملك العمومي إلي يتباعلهم بالمليم الرمزي وبالقروض إلي تتمدلهم خصوصي من البنوك الوطنية ثم من القوانين إلي تعملتلهم على قياسهم لإسقاط كل الفوايض البنكية كيف قانون إنقاذ المؤسسات مع إستغلالهم للعمال كيف العبيد من غير أي حماية أصحاب نفوذ وحصانة فعلية قضائية وجبائية  ، بلادنا معاهم مرمة كبيرة وكلنا إلا حبابهم مرماجية ..


قبل 14 جانفي كانو بياعة الشراب مستثمرين في قوت العايلة التونسية والمساند الرسمي لتليف الكبد ولحوادث المرور القاتلة في الوطن والإنحراف الإجتماعي بداية من البغاء حتاش بيعان الشراب في النوار .. بياعة الشراب أقوى كرومب ضارب بلادنا فمة إلي جورناطو عشرة لاف يمشي يحطهم في كعبتين شراب يزعدهم في الحومة ويروح يخبط أمو على باكو دخان .. بياعة الشراب غود فاذرز تاع المليارات إلي ما تتعددش وكانو يتمتعو زادة بحصانة جبائية وطورو البزنس تاعهم لتجارة المواد الإستهلاكية وغيرو .. وذبحونا بسكين حافي ..

حنانات ليلى وأصهار الرئيس المخلوع إلي تمتعو بنتايج البريفاتيزاسين وهبطو كيف الجراد على الملك العمومي وعراو لتونس راسها مزالو يتمتعو بمعظم الأموال المنهوبة مع دوريات قارة للحماية وتعويلهم على تخبط الشعب في الفوضى وإستعادة الخدام تاعهم من الدساترة الحكم شيعاودو يرجعو أمجاد الإقطاعية تاعهم وأساسا قاعدين يحاربو لمنع المحاسبة ..




الدساترة إلي تحولو لتجمعيين ثم رجعو دساترة الشبيحة تاع بن علي العواينية ( بالمفهوم السوري للكلمة ) تاع رؤوس الأموال الفاسدة إلي خسرو خبزتهم المعلنة بحل التجمع كيف ذيل الكلب .. صبابة , أعداء الشعب فيسع ملقاو حل والله غالب تبلينا بفؤاد المبزع إلي جاب السبسي ما كانش رانا عرفنا هاك إلي يدورو بالملاين يفرقو فيها الولايات باش المجرمة يحرقو المؤسسات العمومية ويستولاو على الأموال الخاصة والعامة وبالأساس المودعة بالقباضات .. 

معارضة الثلاث ورقات المناشدة لبنعلي والمؤثثة لمعظم مؤتمرات التجمع الشعبوية إلي لمعو صورة النظام خارجيا و توة وقت إلي لبلاد في حالة تأسيس على أنقاض دولة خراب صدفة ولاوولنا آلهة الوطنية .. بلاد خراب .. الفساد نهشها لموال في سويسرا ودبي وفرانسا و الأرجنتين و يحبو يحكموها تقول ذيب يحب يسرح بالعلالش ما بين ماضي التثمين للمنجزات النوفمبرية ( موش كلهم صحيح ) 
بلاد حدودها غير آمنة عام كامل والكناطرية مع كافة رؤوس الأموال الفاسدة عاملين من عذابها صنعة يخرجو حتى في السلع المدعومة وعاقبو الشعب بالمليح ودخلو لهموم الزرقة لبلادنا وحشدو كل جهود الداخلية لمنع الإعتصام بالقصبة وعملو رافل على الزطالة إلي يتعدى بحذة بوليس يعديه على التحليل المجرمة إلي هربو ملحبوسات ضربو بقوة حتى في شهر ماي 2011 .. المعارضة توة إنسحبت وقتها من حكومة السبسي ومع ذلك ورغم حوادث القتل الغريبة إلي صارت في المتلوي والإهمال التام لشهداء الثورة تلهاو باكونباني إلكتورال ودعمو هاكة بياع الشراب إلي موش فاهم كوعو من بوعو وإلا براسك لا غاظتهم إرتفاع الأسعار ولا إعتصام الحوض المنجمي إلي حكومة السبسي طفات عليه الضو وليوم كيف "   " ما لقيتش وصف .. 

مبعد ما هالحكومة شدت الصندي وتلهات بيه ولاو خايفينها تنجح وتركح البلاد معادش ضاهرلهم يعملو بلوك معارضة .. أوووف قلك يحبو حكومة إنقاذ وطني .. تي تونس كان تلقى تزرميكم وتباسي روحها مالي شترتاح منكم ..يقول القايل إنقاذ مناش  ..  وهنا تجي السيناريووات تاع بوليود .. ثورة ثانية سببها دكتاتورية الميات يوم إي معقول تراكمات قوية..  شوية ! وزير الداخلية تجرأ ومنع اتظاهر في شارع حبيب بورقيبة أبي حرية التعبير  يلعن بو فرانسا إلي عاملين عليها رونفوا .. سي في تاعكم حافظينو ما نيش شنعاود نحكي عليه أثبتو إنكم أعداء الشعب وأحد أعداء حلم المواطنة .. كيف الدساترة إلي عملتو معاهم أليونس وانتومة أخطر خاطركم ديفيزيون ناسيونال نفاق وفي الأخير كلكم عواينية مافيا الفساد المالي وعلى راي العلامة الونيس بعد شعار عنقني بيبول 

لن تمروا