دديكاس للبحيري : رحلة السقوط تبدأ بالتنازل عن المبدئية

 أي سيدي .. منين نبدا آااه بيانسور من الرياضة الشعبية لولى .. الله أحد ،  الله أحد  البحيري ما كيفو حد يحييك يا شيخ يا معتصم بأمر الله يا خطيفة ربيع العدالة يا روبن دو بوا الوسط الحقوقي إي ما فماش كلام يوفيك قدرك من الإستقامة .. أيّ سيدي أول حاجة غالط يا سي منصر وزير العدل مش خايف ملقضاة أما يقرص ويدو تحتو ..إمممم نستينف الجملة لخره نسحبها لا يليق كيفاش البحيري كرّم الله وجهه .. كرّم الله وجهه .. كرّم الله وجهه . إذا وعد أنجز جا الفارس الهمام وقلك هاني قاعد ننجز باهي .. في فيفري 2011 جات جمعية القضاة وطالبت بالتطهير ، ستناو في بلاد مبرّكها الفساد أنظف قطاع هو العدلي ههههععع براس لحنينة السبان لا هاو نفسرلكم وأموركم ، أيا شكونهم القضاة الساعة .. في الوضع الحالي لقوانين الدولة هومة شبه موظفين عموميين بخاتيسيان ماعون الصنعة تاعهم قوانين الّي حطها مجلس النواب تاع زعبع ينظروا في النزاعات ويطبقو عليها القانون الموجود إذا يطفيو الضو علقاعدة القانونية تتكسر أحكامهم .. يقول القايل مالة الأحكام الجايرة منين طلت .. أوّل حاجة لقات أرضية خصبة في القوانين الجايرة كيف قانون الإرهاب وثاني حاجة الفراغ التشريعي إلّي دعم إنتهاكات حقوق الإنسان والأمن الوطني الإقتصادي والإجتماعي .. يقول القايل باهي ، فمة قانون خايب والأحكام الثقيلة إلي زهقت أرواح الناس وحطمت عايلات وفكت الأرزاق شكون نطق بيها سارتانمون قضاة معروفين وعندهم إسم من قديم زمان : قضاة الإدارة .. هاذم تلقاهم في كل محكمة وفي العادة ما يفوتوش صوابع  اليد تدجاب بيهم الأحكام وتتعطالهم القضايا تاع فلان وسي علان باقي القضاة ما يبداش عندهم حتى دور ولا حتى علم ، مارجيناليزي و كونسيدري غير منسجمين ما يضويوهم في شي وإذا تلزو بيهم يجيبو عليهم الماء على خاطر يلزم تعرفو إلي الأحكام تجي بأغلبية الأصوات يعني إثنين يغلبو الواحد في الهيئات القضائية وممنوع علقاضي بالقانون إنو يمتنع  عن إمضاء الحكم إلي يصير فيه النصاب  القانوني .. فمة زادة القضاة المرتشين وهاذمة الواحد فيهم تلقاه في كريار زغيرة خدم بالتسمسير مع مياة محامي سمسار .. وعنا القضاة التجمعيين وهاذوم سبونسوريزي خلقي ومباتشين على تخديم المخ وانظام البايد ملخر هاذوم الكل طلبت جمعية القضاة في فيفري 2011 تطهير  القضاء  من هاك ادينوزور لزهر القروي الشابي .. وهذا مثبت ببيان تحط على بيروه في فيفري أيا بضغط ملمحامين خرج ستة قضاة بآلية تضحك إسمها الإعفاء وما وفا العام إلا ما زاد عزز موقع الفاسدين وتخدمت حركة عالمية حسست غالبية القضاة بالغبن والإحساس بأنو الوطن مزال سجين في يد الدكتاتورية و بقايا المجلس الأعلى للقضاء وتذكرو في مارس خرج القضاة يوم تحرير القضاء ورفعوا شعار " القضاء على عصابة القضاء " .. عاد للتمويه على المحاسبة عملو عملية تجييش ضد القضاء إعلاميا ولي كانو في السلطة مع حكومة السبسي رفضو تنفيذ البطاقات القضائية وما عطاو حتى معلومة لتسهيل التحقيقات حتى إختصاص المحكمة العسكرية إلي تعطالها بموجب فصل في القانون إلي يحكم القوات اداخلية كان من الممكن تجاوزو بمرسوم يسند الإختصاص للقضاء العدلي إلي عندو إمكانيات بشرية وتوزع جغرافي أشمل فضلا عن التقاضي على درجتين وزيد أهم حاجة إنو إلي حكمو وقتها كملو السيناريو الإنقلابي إلي تعمل لزابا وكملوه مع الشعب التونسي تي إلي تقتلو مبعد 14 جانفي أكثر ملي تقتلو قبلو .. ومبعد عظيم بياعة الشراب في تونس ، ماو قلكم إلي عندو قناص يجيبهولي ! براف المافيا إلي لليوم تمارس في الإرهاب المنظم فسخت في الأشهرة لولى كل آثار الجرايم هوكة اعلاش القضاة ما عندهم ما يبيعو مع السلطة التنفيذية إلي عام لتالي بأسلوب ممنهج سعات للتعتيم على الحقيقة وكان جات الدنيا دنيا راهو تعملت جلسات مسائلة لكل السياسيين والأمنيين والوزراء من 17/12/2010 حتاش 23/10/2011 كيف ما يصير في الكونغرس الأمريكي لكن شتحب تعمل .. 

باهي وبالنسبة لملفات الفساد ياخي هاك اللجنة إلي ورّثها زعبع للثورة وقتاش مدت تقريرها تعرفو عملوها كيف جدار الصد وعطاو الوقت للفاسدين يوليو عصاميين كان جات الثورة صندي راو تصادرت كل الثروات إلي تعملت من 1956 لتوة وتبنات على نهبان رزق البيليك .. المجلس الوطني لجمعية القضاة كيف لقى السلطة التنفيذية متغولة أكثر من قبل طالب بتكوين لجنة لضبط أسماء القضاة الفاسدين والقايمة إلي تخدمت على أساس الإثباتات والقراين المقدمة من عموم الأفراد الشعب تستنى في الهيئة الوقتية باش  تتمدلها لأنو القضاة تعلموا درسهم مليح السيايين في تونس الكل كيف العادة حساباتهم ضيقة وملتوية تقول إنت 1 + 1 تساوي موان لانفني عاد ..

بالله آش باش يعمل القاضي في حالة الفراغ التشريعي بل في حضرة قوانين جايرة توة عامين زادو دعمو الفساد التشريعي وينو المجلس التأسيسي راو القضاة كسلطة مجعولين باش يطبقو قوانين الدولة موش يصيغو فيها كيف يفصلو فلقضايا سينون تولي فوضى وبرة آش باش يسلكها ..

عاد مرجوع حديثنا للبحيري إلي ضربة ضربتين القضاء مستقل و هو في عهدو تحلت لحبوسات للإعلام التافه باش مجرمي الحق العام يوليو ملايكة ويزيدو يشككو في مصداقية القضاء والذكرو هاك المجرمة إلي مع عشيقها قامت بقتلان بنتها الصغيرة وهي تستجير تقول رابعة العدوية .. وما نحكيش عالإعتداءات الممنهجة على المحاكم حرق وعنف حتى عايلات قتالة الأرواح ولات تصدم علمحاكم يحبو 
يروحو بولادهم و لوزير ..

باهي بلاد يحكي فيها السياسيين على إعادة بناء الدولة فصيل وحيد في التنظيم المؤقت للسلط ماتمش تفعيلو بخصوص القضاء إلي قاعد يخدم علهامش ووزارة العدل إلي كانت بؤرة الفساد ، مع البحيري قعدت تخدم بسيستام الدكترة المعلم قاعد يحمص ويبارك لروحو بمذكرات العمل عيّن محكمة كاملة وكيف تمسو تسمع حسو  قلّك عندو تاريخ نضالي والله كيف تبدا في نقاء الإمام البنا نقولولك هز يدك علقضا !

وين جا فرد ياخو بقعة مجلس وشكونك إنت و شنية معاييرك وشنية ظوابط إنك ما ادعثرتش في فسّاد دوزيام رون ولا في قلابت الفيستة .. وأصلا كممثل للسلطة التنفيذية آش مدخلك في تعيين القضاة ! آااه نسيت إستقلالية القضاء بلايص بلايص كيف الرجولية تحضر وتغيب .. عاد كيف إنت مسهول .. ضغط مع حكومتك على المجلس التفصيصي باش يخرج قانون الهيئة الوقتية العليا لتنظيم القضاء العدلي أما باين عامل جهدك في خدمة العدالة ..

وزيد آش بيك كل مرة تعطي بحث ، ياخي هاك متمسك برئاسة النيابة العمومية مالة شبيه كل ما يتسيب مشبوه تهز يديك الفوق وتقول خاطيني القضاة أحرار .. إي وهاك فكطيت ومشكيت ويني بشاير تجهبيذك ..

في لخر بالله ماكش حاشم من هاك المشروع إلي حضرتو للهيئة عاد هاي دكتاتورية بورقيبة وزعبع أرحم في تناولها للسلطة القضائية منك يا مناضل يا حبيب تونس كيفاش سلطة تكون مستقلة في ديموقراطية دونكيشوتية ( هشة ) كيف ما في بلادنا تكون ممكنة مع ناس بانتماءات حزبية .. للي مقراش المشروع إلي محظرتو لوزارة العتيدة ذات الميول الديموقراطية : يحبو يدخلو في إعداد الحركة قلك خمسة شخصيات وطنية يعينهم المجلس التفصيصي إي ! الله يرحم حشاد وجعيط و الفاضل بن عاشور والصادق بن يوسف و الدغباجي إلي ماتت معاهم الوطنية توه حتى رابطة حقوق الإنسان مليانة بالمتسيسين .. شخصيات وطنية ! آكهو بن تيشة و بن مبارك زادة شخصيات ..

 آااه يا ريت السيد هذا جا وزير العدل علقليلة شاورو هو موش تجيب التعيس لزهر القروي الشابي تتشاور معاه وهاي حقيقتو  

باهي وهاي الحركة في لخر شتخرج من تحت إيدك وحدك برجولية مرضنا مالإستقلالية يا باشا : المحاكم ولات مداس وإنت ما علابالك .. إنحرافات وظغوط إعلامية على محاكمات جارية وإنت قاتل روحك في خدمة العدالة : المحامين ولات عندهم حصانة دو فات بالرغم إلي مصلحة المواطن إلي يشاركو فيه بالنسب في التعويضات والمليّع منهم تتعارض مع هالحصانة الفعلية .. الإعلاميين إلي من أكثر العامة جهلا بالمنظومة القانونية والقضائية عندهم عام ونصف وهومة يستهدفو بإضمار في أهم ركايز الدولة القضاء وإنت عطيتهم حصانة دو فات .. 

رضي الله عنك وأرضاك يا مرحوم الوالدين كان عاطي ربي راك عملت خلية كوارث تتولى مراجعة قوانين الدولة الجايرة كيف قانون الإرهاب و قانون المنافسة والأسعار وقانون إنقاذ المؤسسات إلي لتوة يعاون في رؤوس الأموال الفاسدة على الأغناك وعديتو للمجلس التأسيسي شيخدمو على رواحهم  ويحللو شهاريهم وفي عوض ما تقتل روحك باش تكون فارس التضييق على القضاء وتولي كيف  بوك لحنين بورقيبة إلي تمدتلو تونس على طبق من ذهب عاد قيم الوطن على سلطة وحدة فأهلك الحرث والنسل والجمهورية .. فيق يا شفيق ورد بالك تحط روحك تحت مظلة المسائلة من المولى يتقالك " يا بحيري شعملت في الأمانة " تقلو راو فمة 150 قاضي فساد على 2200 عاد خذيت مسهولية الرقابة خوف ملفساد .. هاو انبه عليك راك شتسأل حساب عسير هوكه مشروع الجمعية يقتضي إقصاء القضاة التجمعيين وإلي ساهموا في الأحكام السياسية ولي شدو قبل في المجلس القديم وزيد الجمعية ناوية على ربي تقدم الليستة إلي مؤيدة بالوثايق للهيئة عاد .. باش من أول نهار تحل ملف الفساد ويتحاسبو المجرمين ..

بالمنطق .. القضاة إلي خدمو مع بعضهم يعرفو مليح الصالح والطالح وفمة 2000 قاضي على 2200 ماهم مورطين في شي وقانونجية ضالعين موش مستحقينك تفرض عليهم الوصاية أتعس من أيامات الدكتاتورية ! البحيري ( ما نعرش إسمك ) بالثلاثة : إتق الله .. إتق الله .. إتق الله .