Wednesday, January 6, 2010

مع سابقية الاضمار و الترصّد .. كلنا توانسة

ملّخّر على خاطر مانيش طيّارة في التدوين بالدّارجة .. آنا زادة كيف بنت عايلة عجبتني الشفافية متاع هاك المدوّن الوطني الّ مسمّي روحو مع "سابقية الاضمار و التّرصّد " اي أمالة آش معنتهى خمّم و اتصرّف ..ياسيدي ماني دقني ربي في عوض نخدم على روحي دخلت على التن بلوغ نلقى هاك التيتر الفضولي متاع التونسي الي الحيط دخل في الحيط .. عاد قلت برّة شوف ها الخطاب التثقيفي الي مخبّي ورا العنوان وياليتني ما قريت و ياهول ما رأيت على راي الكابتن خالد حسني ..نلقي سى الاضمار والترصّد شادد خونا الداخل في حيط من خناقو و يقلّو قر (مع ثلاث نقاط فوق القاف ) راك غالط و عامل روحو بو المفهومية و الراصد للحقيقة المطلقة الّي معّادش بعدها كلام عاد بعثتلو كلمتين .. الحقيقة أكثر من فقرتين حبّيت نعرفو فيها بانّو الاضماااار و التّرصّد مهومش  باهين .قتلو يا سيدي قبل ما تعارك العباد صلّح لي باااااااز متاعك يا سي الاضمار عيب تقول على واحد من شعبي .. ' كان جا وطني بالحق' ..  ياخي فمّة تونسي بالحق و تونسي بالعاني .. هات نرجعو لتعريف المواطنة عندي زنسية تونسية على خاطر بابا و أمي توانسة و الا في الأصل أجنبية زنسوني على خاطرني عندي خمسة سنين مقيمة في ها البلاد و أموري مريقلة لو مااااكسيموم بلعربي مافماش تونسي بالحق وتونسي بالعاني و لا تونسي ديفزيون ناسيونال و لا تونسي ديفزيون  كانز وهذيكة أول غلطة يرتكبها سى الاضمار لأنو واضح انّو ياخو وقتو باش يكتب ..المهم قتلو الى هو غلط غلطة ثانية على خاطر أهم "نصيحة "وجّهّها للتونسي الى دخل في حيط  كانت بالعربي تزليطة نامبورت كوا ..قلّو يلزمك تشد صحيح في مواقفك لو ماااااااااكسيموم ..( وقتلّي هو في الحقيقة ما يحكي كان على حديث دار بيناتهم )عاد قتلو حسب رايي المتواضع وبالسوري الي النقاش هو عادة فرصة لاثراء الرأي الخاص بكل طرف بالعربي مهواش جبهيّة محلولة والّى للتونسي الحق في تعديل مواقفو و حتّى تغييرها و انو حتّى مع التّمسّك بقاناعاتو يمكنو انو ينسحب مالخطاب و يعطي بظهرو للّي يحكي معاه اذا كانت عندو قناعة انّو مستوى الخطاب ما يليقش بيه وهذيّة مسألة ذاتيّة كل واحد يقدّرها حسب هو مايراه .  بالعربي نصيحة الاضمار كانت في غير محلها و تنقصو برشة موضوعيّة هذا باش ما نقولش الّي هوّ حب يفرّغ قلبو بنوع من محاولة فرض الوصاية على حريّة العباد و ذاتيّتهم وحقهم باش ' بغدون ' يطفّيوه . و عدّيتلو المسّاااج .. قلت بالكشي الّي وطني و "مناضل" بالحق كيفو ينجّم يفهم غلطتو و يعدّل من سابقيّة الترصّد و يقتنع الّى ها البلاد باش تضم عضيماتنا الكل و قتلّى انموتو.. عادة طفّاني ما جاوبنيش طلع سي وخينا تنقصو الشفافية ايحب يحكي عل العباد .. أما هو مهواش غالط آنا الي سانفابا ياخي حياتى الكل امقاطعة الكلمات الاضمار و سابقية الترصّد ..على خاطر معلوم الى تحكي معاهم تقول تحرث في البحر ..ياخي فماش عبد يدّعي الانفتاح يحكي 'بالتونسي بالحق' والتونسي بالعاني ..ماذابية الّي شاف تونسي باتلعاني يعيّطلي ..خلّيني نذوق منّو شويّة.. يا شباب العلى يا أباها الكلنا توانسة ياخي توانسة في 26/26 ومحناش توانسة كيف انهزّو وننفضو و الا شنوّة ارفعو أيديكم عن المصطلحات و يزّيونا من وطني و موش وطني ..راهو عيب تي حتى عناوين مدوناتكم عيب قلّو وطنيّون أمالة آنا شنوّة جنون في هيّة تونسية ..شوف ..  توّة وحدة كيفي وبعد بحث و تفكير و قراءة قانونية وفقهية وذاتية نعتقد الّي في الدّنيا الكل أربعة ما عندهمشي وجود الغول والعنقاء و الدّيموقراضية و الخلّ الودود ياخي شنوّة تسمّيوني ..على فكرة آنا كيف التونسي الداخل في حيط كل مرة نمشي في الكياس  انعنّق حاجة.. شجرة .. عمود انارة عرصة قصيرة . مادامك طلعت ناقص شفافية ياPENSER ET AGIR  
هاو مسّاج على روس الاشهاد وفي لخّر ربّي يهديكم وتعرفو الى انتومة عاديين موش اكسترا . هاتوّة نحكيو مرّة أخرى على المناضل بالحق والمناضل بالعاني ..يا والله حوال           

7 comments:

  1. شكرا لتدوينة الحلوة
    رغم اني منيش مطالب باش نوضح الراي متاعي الي كنت سابقا و ضحتو
    الا انو لحكاية ومفيها اني رفضت الحوار و هذا من حقي اضافة انو حسيت من النفاق اني ناقش الحرية في موقع محجوب

    مفهمتش علاش البكاء متاعو واتهامي بالتخونيج ؟؟

    ReplyDelete
  2. صارة حتى انت وصلك طش الانكر دو شين و التعتيم الاعلامي؟
    يا مرحبا يا مرحبا

    ReplyDelete
  3. تيتوف عندك الحق باش ترفض انّك تبرّر علاش حبّيت توقف الحوار مع الّى تحب و آنا قريت جوابك وهو على كل حال مقنع .. حتى لو كان من الأول آنا مقتنعة الّى انت ما فسّخت حتّى كومنتار ..شوف آنا ادّخّلت على خاطر طريقة صياغة سى الاضمار مهياشي هي وبالعربي نوع من الهرطقة كيف ما يقولو جماعة المشرق وزيد بعد هذا الكل يا خويا كثرولها عاد من تصريف المواطنة والوطنية براس أمّك احلف يا خويا على أنك تونسي خلّي يقيلونا من ها الصدمة الابداعية متاع تونسي بالحق وتونسي بالعاني كانك مالثانين يجعل كلامي خفيف عليهم قلّي انت فين خلّيني نجيب معايا ت ف 7 وحنبعّل يأرخولي وانا نذوق فيك أختك جاروشة ..دمت بألف خير انشا الله

    ReplyDelete
  4. بنت عايلة ايه يا كبدي طفّاني ..رصّاتلي ناكل في زوز شقايل مقرونة قي الليل ..تضييع وقت ..أختك بوليميك ..و بعدها لقيتو ما أفّيشاش الكومنتار عاد قلت ما نخلّيش بنت عايلة تغلبني في القلب الأكحل وبعد المقاطعة الكلّيّة لظاهرة الوطنية قرّرت باش نعمل كيفك ..أمّا آنا ما نسميهوش تعتيم اعلامي أما نقص في الشفافيّة ..ظهرة صعيبة على سي الاضمار والترصّد الّي ستخايلتو يلمّدلي في شويّة ترصّد قبل ما يعطيني درس و الا دروس في المصطلحات متاع الوطني بالحق و الوطني بالعاني و الّي يلزمو يكبّش في رايو لو ماكسيموم ..الله يهدي مخلق

    ReplyDelete
  5. بنت عايلة نسيت باش انقلّك الّي البوست متاعك تثقيفي بالحق و نتمنى خونا في المواطنة يعمل الّى طلبتو منو دمت بألف خير

    ReplyDelete
  6. على الارض ميزان القوة يميل لصالحهم ولكن في العالم الرقمي ميزان القوى في صالح الاغلبية حتى انه بدون مقاومة فبلاهتهم وفقرهم الفكري سيكون سببا في اندثارهم

    ReplyDelete
  7. نعم الفقر الفكري تلك هي الطامة كل واحد يظن انو ملك الحقيقة و انو هو الخيار الأوحد للامكان يتحوّل من كائن بشري الى زمبي ميت الفكر والوجدان وهو يخسايب روحو حي وقت الّي بنادم يلزم يخدم على امكانياتو ويطوّر فكرو عبر الاحتكاك بالآخر حتي يخرج على التقاعد .أهوكة بلّمارة خالد حسني يقول نبداو الساعة نسمعو بعضنا قبل ..شكرا على المرور يا مواطن ...ههههههه حبّيت انثبّت وبرّة .. شكرا على المرور

    ReplyDelete