Saturday, October 30, 2010

صاك بوكس يا شعب العلا

قبيله وانا نسيّق في دروج دارنا في ساعة رحمه نتهز و نتّنفض للسماء من جراير شلاكة خويا لا تباركلو  .. إي يلزمكم تعرفو إلّي آنا من أصحاب الأوزان الثقيله و الطّيحه تشبّه لدعثيرة فيل ..المهم ماني هازّه سطل تكركب لخّر الدروج وانا ما مشيتش لبعيد أربعه درجات ووقفت ـ حكاية ميزان ،السّمن ساعات يكون عندو فوايدـ أيواش أعلاش نحكي على طيحه تشمّت العدوان فيّه ؟ سامبل إلّي صار مع الطّيحه ،أوّل حاجه مخّي وقف وبالرّيفلاكس شدّيت في الدّربوز ما غير حتى فكره في مخّي ثنين ما قلتش أحّيت ثالث حاجه شدني الضحك .و ها لومور الثلاثه خلاوني نخمّم وقتلّي خويا جا يجري و قلي ماكش نورمال الدُّب إلّي سمعتها ياخي هذي إنت طحت .رجعت إنخمّم قلت بالكشي ما صحتش خاطرني سوجاعه و رجوليّه ،ومنها بعّدت الفرضيّه هاذي على خاطر لوجيعه كانت كبيره بالعمل بالسّيف ما وقفت ،قلت بالكشي على خاطرني مومنه ،واستبعدتها زاده على خاطر ما قلتش ياربّي ..ومبعّد ما إقترحت إنّو يتم تمكيني من جاوب بنعم أو لا إتذكّرت إنّي عندي خمسه وعشرين سنه عايشه في عهد التّغيير مبعّد عهد حبيب لُمّه و إنّو رجالات البلاد وخصوصي نظام التعليم في تونس علّمني نكون ساك بوكس و الخدمه توّه عشره سنين كملت قضاة عليّ ولّيت ما نردّش الفعل حتى كي نمقِّص روحي بالبهامه مطاعي .. أيواش وراس أمّي من كثر لوجيعه نتحرّك كيف الموعاقه ..أمّه طلع للتّغيير فوايد وانا ما في باليش . الحمدو لله أهّوكه نقول الحق على نفسي ..إصباح جبِدتكم مع العصر طُحتو فيّه ..أيواش الحمد لله 

6 comments:

  1. lloollooll
    أيّا نشالا كل شي يجيك بلطف و مدام صحة لباس هكا إلي بيه الفيدة
    محلاه التغير ;)

    أما وقيت تبدا في ريجيم ... ننصحك بتونس 7 ... تنحي زوز كيلو فاليلة عل الأقل
    :)))

    ReplyDelete
  2. حتّاش نولّي سيّدة تونس الحوله لا للقنوات التّونسيّه و لا جرايد ولا الإذاعات ..حتّاش نظهر فيهم آنا ..فهمتني ؟ بالنّسبه للرّجيم دارنا ناوين يطبقوا عليّ ساسة الطّوارىء ..لكن ناوْيَه نثور أعليهم توّه في عمري حُصِّل ما في الصّدور ! اللهمّ ينحّيو هاك ٧ إمبعّد تونس توّه نولّي نتفرّج

    ReplyDelete
  3. enchallah labes, sinon, pour le régime EL FAN a raison mais attention à consommer avec modération !!!

    ReplyDelete
  4. y'aychek yé venus amma forja fi tounes seb3a jimla belekchi fi eddonya lokhra wakt notleb el visionnage mt3e elinjezet sinon andi akther min 15 ans mokat3a lel entej ettounsi w a3mla bhek elmethel elli fi inek hlé lézem min barra gè

    ReplyDelete
  5. نشاالله باللّطف ، بقطع النّظر على السّمن و إلاّ الضعف الطّياح في حدّ ذاته يدردع المخّ موش ديما في الاتّجاه الغالط هههه ساعات يدردعه و يخلّيه يبدع كيف إبداع هالتدوينة الّي قتلتني بالضحك
    بون ما نتمنّالكش طيحة أخرى و لكن ساعات اتحفنا بطقاطق كيف هذه

    ReplyDelete
  6. ولاّده تقرالي ! يا فرحتي ستنّاني نعمل شطحت البانغوان ونجاوبك يا لِللّه محلاك ! ساعات كنت إنخمّم إذا كان المهم إنّي نعبِّر وإلّا المهم إنّو نتقرا ..لحكايه رصّات في طرح إنباره على شويّه كريتيك حتّاش لقيت هذا الكومّنتار العزيز متاع سيده صاحبة فكر ..لا أكيد المهم إنّو يقراولي .. فرحانه بمرورك ونتمنّى إنّو مجمّع المدونين هذا يرجع يلمّد مدونين مليانين و أصحاب فكر حر ... كيفك

    ReplyDelete