الّي في عينك حلا موش من المنتخب جا" "

آنا في الحقيقة نفهم في الكورة على خاطر ملّي خلقت و آنا انتبع في الافريقي الّي في الحقيقة عندي أحب من المنتخب و لأسباب عديدة انو جمهور الافريقي .. طلعت و الا هبطت الهيئة المديرة .. ينجم في كل مرة تفسّد الأمور انو يوقّفها عند حدها أما الشّعب التونسي ما عندو حيلة جامعة الكورة تتعامل معانا قولش عليها مونارشي من القرون الوسطى تخبطلنا في عصابنا كيف القرنيطة وما عندنا ما نأثروا فيها هذاكة علاش و لأني عندي أنتسدون في العيلة متاع مرض السكر انحب الافريقي أكثر من المنتخب ..اي حتى في هاك العشرة السنين الشايحين..كمشة كبارات يجبدو في المالية من جيب الدولة ويمدو فيها للقورة راتي ما يفهموا شي في الكورة   ..عملة صعبة و كان تحطت في تنمية العباد والبلاد خير.. تتمد لقمة باردة لأجنبي جاي ما نعرف منين ولا من رقيب . ياخي معقول انّو منتخب وطني تتلمّدلو على الأكثر توانسة يعيشو في خمسين األف دولة أجنبية لا يعرفوا بعضهم و لا لعبوا ضد بعضهم و لا عندهم لحمة ياخي هذومة كيفاش يلعبوا على المريول .نهارت الّى تحكى على البنزرتي باش يراني المنتخب ردّوه حكايتو فارغة و الّى هومة أدرى بمصلحة البلاد ياخي موش هومة الّي مكسريلنا روسنا بشعار "الى في عينك حلا موش كان من البرة جا " الله لا تربح الّي ما يحشمش .شوفو المنتخب الجزايري الّي على الرغم من نصف الخسارة لعب و أقنع أما نحن يا كبدي ناقص كان باش يقعدو يعملو شيشة في وسط الملعب .. من البارتي متاع الذهاب ضد نيجيريا بانت الحكاية أهوكة علاش سمعت التوانسة تصفق ضد المنتخب في آخر اللعبة في المقهى الّي مقابل الدّار ومعظم التوانسة تأسفوا أكثر على المنتخب الجزايري الّي انشاالله يتمكّن من الترشح على خاطر ملاعبيتو رجال وقفوا اليوم كيف ما يلزم و عكستهم الكورة ..بالله عاد أرحمونا و فكّونا من هاك الكمشة وجوه المصددّة الّي كل مرّة يجيبونا التالي ونتمنّاو انو الفلوس الضايعة على منتخب الضايعين والمدربين الفاشلين تتحط في حاجة تصلح و كان فمّة فلوس زايدة وما عندكم فين تحطّوها أبداو قيدو أسامي هاني من جملة اللي باش يتطّوعو باش تعطيوني غرفة ...و مدّو للشعب الكريم خلّيه يعيش ياخي هاك المدرب الفرنساوي لومار اللي ما يشم شي في الكورة يخلص بالعملة الصعبة يا كبدي ما يحزّم الكورة الأرضية باش تقوم تشطح و آنا الي باش تدفن عظامي في ها الأرض نموت هكّاكة ... يزيّيونا عاد على القليلة طردو المدرّب و أعضاء جامعة كورة القدم الكل ومالاخّر ماضبية الملاعبية يبداو من تونس ويلعبو في تونس على القليلة يعرفو لعب بعضهم و تكبسهم العيشة في البلاد موش يهز فاليجتو ومعادش يهمّو طابت و الا تحرقت .و بالنسبة للافريقي الي نموت عليها ماضبية زادة الطردو هاك الأنترينور الله يهلكو باش يقضي علينا ها الفرنسيس ماوراهمش الربح و دامت الافريقي جمعيتي الحبيبة الغالية و انشالله تفرحنا في موسم التسعينية سنون ميسالش و انشالله مربوحة للجزاير الماتش الجاي .