الخمسه إلّي لحقوا بالجرّه

 توّه عندي نهارين متحزمه ... نلوي ، الله غالب ملّي سمعت في الخطاب كلمة السّر "بحزم ، بحزم " وانا إلّي ما شطحتوش في حياتي شطحتو ، عاطيه لولي الأمر حقّو مالطّاعه . ياخي رجال البلاد برك يضربو الدّونس ويهزّو وينفضوا  كيمه تحبّلهم الشريعه . عاد تحزّمت حتّاش تقطع عليّ النفس وكشكشت كيف الحوته وما تزادلي حتّى شيء العينين على اللّاتّرال وانا مخّي مخلبز لا يجيوني الإرهابيين ويشوهو سمعتي أكثر ملّي هي مبلحصه و يعمرو عليّ الجيران يخرجولي بشعارات تزيد على مرمتي والطّيّحني للديفزيون سطاش و قتها عاد ، ما عندي بيها وين خُرِّيطه أكرملي . حياتي عدّيتها على السّامبلستي و جايبه الواد الواد بوكشّاش بامتياز نعمل حساب السمعه و نتفقّد جيراني في أي كلمه جديده قبل ما نقولها وعلى ماني حاشاكم بهيمه أمّا كل شيء نبلعوا بسهوله إلّا الكلام نرد بالي بالباهي قبل ما ندخلو للطّاسه على خاطر في بلاد التّرننّي صلاة النّبي فيها حصّيله ونص وتنجّم تلقى روحك في دار العمّه على خاطرك تملك سيدي 'عذاب القبر 'مثلا بصوت الشيخ كشك رحمة الله عليه ..المهم جا عليّ وقت عامله بلاكتين على اللّاطرال باش ما نقراش هاك اللّبوردورو إلّي معلقينهم في البلاد تالمون مخّي يْصُوطي من قلّة الهضمان متاع تفشليم و الدّرويش متاع الشّعب . بوردورو من لطرف للأطرف " تونس جودة الحياة " وتحتها شايب مالبلاد مطبّس يلم في الزّبله و يكنس في الكيّاس وقتلّي صناديق الضمان الإجتماعي كان مالأولى تتلهى بيه .. كلمة الإرهاب ولي دريفي متاعها كيف التطرّف والّذي منّو "اللهم أسترنا بما سترت به أنبياءك و أولياءك " غول مسيّب يخوّف وياكل ويزرط لعباد زاده . آنا نسمع الكلمه ونولّي نترعد كيف القصبه توّه إذا كان جاهله كيفي : نكتب إسمي بالسّيف على القلّه نجبد عبد ونقول أعليه قُطعي ياخي ماهو يلزمني تكون عندي برايف . باهي إذا كان نْسب عبد ونقول أعليه مِطرّف وما نبرهنش يتسمّاشي هذاكه تشويه سمعه وتنجّمشي غيغوز تدخل لقلبو ؟ بوسّيبل ..ستنّاوْ هاوْ الجيران خاضو مرجتهم بغنّاية ليله والمزود خدّام هو جاو يشكيو لمّي ..توّه آش عندي نعمل ملّي سمعت كلمة تحزّم ولّا " بحزم " وآنا طراف أعطيه نلوي نخاف نوقّف نلقى روحي في قلبو بتهمة تشويه سمعة تونس والإضرار بقطاع السّياحه  وكان يلقاو باكو خميره في دارنا هاتوّه يسألوني من أين لكم هذا . قدّاش من إرهاااابي في تونس واشكون المطرّف ؟ هاك الزوّالي إلّي يحط نهد قلبو باش يقرّي ولدو وإلّا إلّي يصرف مليارات على الدّعم الثّقافي لمسلسل يتعرض في رمضان وثلاثة أرباع الشّعب يكردي باش يشق فطرو ؟ إلّي كل عامين يصرف مليارات دعم مالي لسينما العراء والعار وإلّا إلّي كادس ربع قرن عايش على الكفاف والكريدي وعلى قاعِدْة كل قديرو وقدرو . آشكون المطرّف إلّي يعطي لممرّن المنتخب ما يحزّم الكوره الأرضيّه وتقوم تشطح والنّاس في صبيطار صالح عزيّز على ريوس بعضهم وإلّا هاك المواطن الطيّب إلّي يموت بالوجيعه وما يقولش أحّيت وإلّا وإلّا .. بالله الذي لا إلاه إلّا هو ( توّه  هذه حقيقة مطلقه موش إسلام سياسي ) إلّي كتب كلمة  "بحزم " عطاها شحنه مقوّيات قبل ما يحطها ..البلاد خلات وجلات ونحن جايبين الواد الواد .. يامّي إيجه حطلي "الخمسه إلّي لحقوا بالجرّه " خلّيني نتحزّم ونهبّطهم حيار ،آش كون يدل غيغوز على خيط للحرقان والله لا يضيع أجر المحسنين راني عازمه على الرّحيل معاّدش فيها يزّي سي فيني

بحزم

أضيّع صلاة الظهر وقد ضيّعت قبلها صلاة الصبح طوال عمري ..لا أجاهر بالسوء ولكن صار لديّ خبل وقتي .. كم طويت الأعوام أدّعي أنّي بالغد سأتريّث وأذكر ما قد يكون منتصف العمر لغريبة قوم مثلي لا أهتمّ حين يأتي اللّيل أكون قد توسّدت العاده وطواني ألمي .. حين كنت أقنع بالهُنا و يلتمّ شملي عليّ لم أكن أهذي بالرّحيل ..البارحه عند الثامنة مساء وبعض زمان أخبرتني روحي عن رغبتها في الإرتحال ولم تجزع نفسي  . أيّ بلاد حتّى العدم أي ربّي أَمْثَلُ لتجتمع فيها عظامي وهذه الرّوح التي ملّت عظيم القوم وزبانيته والبقاء ..أشكوه لربّي للمرّة المليون و أترك ليديّ العنان لتسترخيا بجنْبي وقد أسقط فيهما المكر والجشع وقلّة الحياء ، لولا عقيدة سبقت إلى تهذيب نفسي لناديت الموت للمثول مرحبا به خير خلف لأنكى حياة .. لمّا ولّي علينا بما فينا لم يبق للعزاء موطن ليأوينا و بحزم أدّعي صحّة المثل " إن هم ذهبت أخلاقهم ذهبوا "..وافعل ما شئت ما دمت لا تستحي !

من وحي التحرك النّقابي

هؤلاء لا أعتبرهم من السياسيين فهم نحن وفي تأويل آخر يسمّون بالنّقابيين ولأنّي أعتبرهم من النّقاء والحميّه كروح حشّاد تنطلق في عروقهم وفي سواعدهم وتتقيّأ الإنبطاحيين والمتواطئين والمتلبّسين بالحقوق الشعبيّه والدّعاة على باب الفئويّه فهم لا يجاورون عندي سوى إرادتهم وأنفسهم قرأت شعاراتهم وسمعت أصواتهم ومن كل مكان خرجوا ليدعوا للكرامه ،اللهم بارك في سعي كل نقابي مهما كان طيفه الفكري .أي روحي كم غاب نداء الكرامة عن وطني جميلون حتى في تداخل شعاراتكم المرّه لتحيا تونس النّقابيه  :)) بعيدا عن همجيّة النّخبويين و الوصوليين ومصّاصي الدّماء من الدّاعمين لاستعباد القوم و محترفي اللّصوصيّه .

développement limité

je vous transmet ce poste écrit par notre ami blogueur jaeune tube qui redéfinie notre Tunisie en paroles de maître c'est en titre de "développement limité" blogs url: yellow-net.blogspot.com :
Quand il s’agit de parler de mon pays sur mon blog, je fais très attention à la police, employée…je vérifie bien que le caractère choisi est “ingrat”. Pour commencer voici une citation, si elle n’appartient à personne je me l’approprie : “Quand la justice n’est plus, un miroir suffit pour connaitre le coupable.”  Il faut tuer le père ou briser le miroir. Mais en première partie, je crois qu’il faut commencer par la mère, la patrie : le peuple.

Fellag a dit : “Quand un peuple coule lorsqu’il arrive au fond il remonte, nous lorsqu’on arrive au fond on creuse.”…Ici aussi on est en train de creuser. Surtout qu’en Tunisie, on ne sait pas nager mais –au moins- on sait voler, mais aussi marcher et faire marcher, courir et courir après, sauter; seul ou à plusieurs…etc. Mais étant proche de la mer méditerranéenne, il est primordial de connaitre la nage libre ou la liberté de la nage, la nage papillon et son effet. Indépendamment de tout cela, un peu de natation c’est bien car quand tout est foot, tout est foutu et d’ailleurs le foot en Tunisie est en verlan, le contrôle orienté devient oriental etc. Heureusement, Oussema Mellouli fait l’exception, d’ailleurs cet homme a du souffle et à mon avis il ferait un très bon président.

Le peuple a peur de nager, surtout avec ces requins qui se multiplient et on a peur de prendre le large à cause des pirates qui nous bloquent l’horizon. Parce qu’il se la coule douce, le peuple tunisien statique et passif qui fait couler l’encre pour rien, a jeté l’ancre du progrès, à mains-levées, sans avoir à la rejeter. C’est parce qu’on est une société conservatrice, c-à-d de têtes de conserves, d’ailleurs chez nous la formation des tête est bonne, elle se fait à vide et entre nous elles le restent. Tellement les tunisiens sont cultivés, gastronomiquement,… tellement la culture culinaire est dominante, la partie de l’hémisphère gauche du cerveau responsable du langage (communication verbale) a déménagé du côté des intestins, demain tous les tunisiens seront ventriloques.

Mon pays est à développement limité qui se contente d’un développement imité. Les Tunisiens consommnifères, ne produisent pas, ils se reproduisent ou reproduisent et d’ailleurs le produit tunisien est, par défaut, un produit dérivé. Mon pays, aussi, est un espace privé huis-clos enveloppé par du papier cadeau prêt pour noël comme pour l’été, à vendre ou à louer et ses habitants ne veulent pas encore se racheter. A vue d’oiseau et vol de nuit, mon pays a une image soignée mais de l’intérieur il a besoin d’une carte de soin. On me parle de “tourisme médical” ou “tourisme de santé”, du coup le pays est devenu une polyclinique pour les voisins d’en dessus et surtout d’à côté alors que le citoyen tunisien n’en sort pas apaisé mais baisé. Certains prétendent que c’est une terre d’opportunité pour les investisseurs étrangers, personnellement je la vois comme étant un chantier perpétuel à ciel ouvert.

Deux choses contrôlent le pays : le fric et les flics. Notre système D, qu’on porte sur nos dos, est –comme tout système- un système d’exploitation. Chez nous, tout est sur mesure puisque  -politiquement - tout est correct. L’état est un non masculin et la société est un nom féminin, et comme la société tunisienne est patriarcale, l’état baise la société. D’un côté les poules mouillés et de l’autre les poulets. Une basse-cour; les flics tabassent et les gens courent. Les vrais militants sont mi-rocco, mi-gitans, et les individus concernés sont soit cernés soit consternés.

Où est l’artiste où sont passé les couleurs ? On ne veut pas de couleurs unis pour donner une couleur unie unique, car quand tout est mauve, tout est mauvais, quand tout est violet tout est violé…

ما لقيصر فليبقى له وليكن للشّعب إرادة في الحياة

نستعرف آنا ما نكرهش اليساريين رغم إنّي إناهض فكرهم الكل كان جا منهم خير راهم قدّوا إرواحهم في معاقل الشيوعيّن وقد ثبت إنهم إذا شدوا الحكم يقضيوا على حرّيات العباد والنّظام الدّيموقراطي والدليل إلّي صاير في روسيا وبالذّات في الصين الشعبيّه ..أمّا مع احترامي لقلّه قليله من يساريي تونس أعظم المقوشين عنّا سانتور نوار في كل شيء ما عدى السياسه وكنخب متسيسه أمورهم موش واضحه وأقوى حاجة عاملينها تقشقيش الحناك على خاطر ما ريناهمش جمله في مؤازرة ودعم المجتمع المدني .
نستعرف إلّي آنا ما نكرهش التجمّعيين بالرّغم إنهم إِستغوْلوا و قاموا بالإستيلاء على الحياة السياسيه في البلاد وقاموا باغتيال النّظام الجمهوري بترسانه تشريعيّه لئيمه أقل ما يمكن يتقال عليها إنّها أكثر تعقيد و دراماتكيّه من ملهاة إغريقيّه بلعربي التّجمّعيين وبما أنهم محتكرين مقاعد البرلمان قاعدين يخرجوا في قوانين باسم الشعب وهي قوانين تخدم مصالح فئويّه ضيقة وفي غالبها مضادّه للمصلحه العامّه وهومه في إدارتهم للدّوله يتعاملوا مع لعباد الكل كإنّا مواطنين من الديفزيون كانز نخدمولهم المرافق العامّه ومبعّد كيف نخلصوا إخّر الشهر يتعاملوا معانا على أنها صدقة وتغييبهم لتّعدّديّه السّياسيه دخلت البلاد في حيط باعتبار إنّو إستغْوالهم خلّى العديد من الهياكل الإداريّه تتعامل بمبدأ تجاوز السّلطه على إنّو حق مكتسب وليس جريمه يعاقب أعليها القانون وعلى مستوى هيكلي عنا قضاء إداري بالغ الإستقلالّه ولِّي ما يصدّقنيش أهّوكه المحكمه الإداريّه برّاو إطّلعوا على قراراتها الرّياديّه ضد القرارات الإداريّه الصادره من الوزير حتّاش للغفير لكن التدخّل الحزبي بالطبيعه عامل سونسير على أهم مبدأ للنّظام الجمهوري وهو مبدأ السلطه تحد السّلطه أمّا واحسره علينا التّجمعيين عاملين فينا .
آنا ما نكرهش السّياسيين المستقلّين إلّي كيف نخمّم ما بيني وما بين روحي تحسهم كيف يحكيوا دون كيشوتييّن يا محترفين السب والثّلب العلني وهذه حاجه خبيثه يستعملوها باش يستدرّو إعجاب العامّه بيهم من باب معرفتهم بالحقيقة الكلّيّه إنّو فمّه إضطهاد للعامه في بلادنا وإلّا تلقاهم يعاركو في طواحين الهواء على إنهم عمالقة وقتلّي هومه بعاد على الشعب بدليل إّنا كشعب تونسي ما عنّاش معرفه لا بأشخاصهم ولا بنشاطهم كان كيف يخرجو يحللو ويناقشو في أحداث شعبيّه ما تمتّلهمش بصيله إمبعّد إلّي هومه أطراف نخويّه قاعدين في أبراجهم العاجيّه ما يخرجو كان باش يلفتو الإنتباه لرواحهم فماشي يتعرفوش ما دامهم ما عندهمش القدره على إنهم يعاضدو الشّعب على الطّريقة الشّافازويّه ( يمّيمتي قدّاش هو عسل إلبارح عاودت نشرات الجزيره برك باش نتفرّج فيه وهو يْفِن في وسط شعبو مناسبة الكريسماس وواا حسره علينا ) .
توّه يقول القايل أعلاش ما نكرهش ها الفئات النّخبويه الثلاث رغم ما عددتو من مآخذ أعليهم ..سامبل لأنهم يمثلو كافه النّاشطين السياسيين في تونس والدوله في التعريف القانوني حكومه وشعب وترّيتوار وآنا ما نيش مقتنعه بالفوضى كطريقه لإدارة  المصالح العامّه للمجموعه البشريّه إلّي هومه التوانسه دونك بكلمتين هومه ما نّجموا إنسمّيوه الشّر الذي لا بدّ منه أخذا بعين الإعتبار لحقيقة الوضع السّياسي في تونس إلّي أشبه بالمراهقة الفكريّه وتأجيل الأزمه أكثر منها معالجة الوضع بإداره حكيمه وإنسانيّه لللأزمات بسياسة العصا لكل مواطن أو حتّى إعادة تصنيف الأولويّات في صفوف الفيّة الحاكمه في لبلاد إلّي يتعاملو مع التّونسي بسياسة العصا والجزره . ثاني سبب لعدم كرهي لهؤلاء النخب إيماني العميق بهاك المثل المصري إلّي يقول "آش فرعنك يا فرعون ؟ قال عبيدي !" بلعربي نحن هومه السبب كل واحد فينا تعامل مع ذاتو العزيزه على إنها كاين ناقص المواطنه وإنّو بالرّسمي ديفزيون كانز كل واحد قرا وتعلّم وشد بوست باش يتعامل مع رئيسو على إنو ولي نعمه ويتعامل مع خوه المواطن إلّي يحتك بيه على إنّو عامل مزيّه أعليه ويفرّغ عقد النقص وقلّة إحترامو لحرّيتو أعليه أهّوكه بالأماره لازم كل واحد منّا تعرّض لعمليّة هرسله بالتشكي بيه من أجل الإعتداء على موظّف عمومي عند آداءه لعمله ..
أعلاش ها تقشقيش لحناك الكل متاع أختكم غيغوز سامبل لأنّي خذيت وقت باش فهمت إنّو الغلط فينا أحنا ..إي جماعة سيدي بوزيد غالطين موش كيف واصلو الإضراب الجماهيري رغم الوعود المستقبليّه لحل الأزمه ( الجزره ) وتواصل المداهمات و الإعتقالات في صفوف العامّه (العصا ) الغلطة في أنهم ما حيْدوش الممتلكات العامّه خلال الإحتجاجات كيما ما حيدوش أعوان الأمن من شيره لخره وعملو بهاك المثل إلّي يقول عليّ وعلى أعدائي لا ياسيدي عون الأمن مجعول باش يحافظ على الأمن وهو في لخّر مواطن تونسي كيفنا كيفوا وخدمتوإنّو يشد لعباد ـ تغشّشتو ،تراه خمّو فيها إذا كان مع التّرسانه التّشريعيّه إلّي حكيت أعليها الفوق التضاهر ما يكون كان بترخيص مسبّق ويجي عرف البوليس ويوجّهلو أمر باش يقوم بمحاصرة المتضاهرين آش تحبّوه يعمل ـ نرجع للّي يتضاهرو توّه ما دامك إخترت التّضاهر هل إّنك تعتقد إنّو موش باش تصير إعتقالات تي هذاكه أقل ثمن يمكن دفعو في إطار أي دوله مهما كان الحراك الشعبي السياسي فيها قوي ،أمّاله أعلاش هادّين على المركز باش تسيبو المعتقلين ؟ ومن وقتاش كان التضاهر يستهدف المرافق العموميّه . قد ما شفنا إحتجاجات شعبيّه إلا وكان نطاقها السّاحات العموميّه ياخي بجاه ربّي عون البوليس سياسي هوّ ؟ أش مدخلو خدمتو يشد المخالفين للقانون الموجود أصلا والله ضربك وإنت في ساحه عامّه رجّعلو أمّا الهدّان على المركز وحرقان الكراهب والحرس أعلاش ماهو تتواصل المظاهرات بطريقة سلميّه ويتم المطالبه بتسريح المعتقلين بنفس الطّريقه . راهو المطالبه بالحق مهواش إستعراض للقوّه والحراك الشعبي ما يلزموش يكون ساذج وتلقائي وأكيد موش من الممكن إنّو يكون عدواني لأنّو العنف يولّد عنف مضاد وهكّاكه الشّعب يولّي ياكل في بعضو بوليسيّه وعباد والمسهول الفعلي راقد يفسّي مطمان على نجاعة إدارتو للأزمه وهنا نرجع للجهة إلّي نعتبرها المسؤوله على إلّي قاعد يصير وهوم معروفين وهومه وزير الدّاخليّه بالدّرجه الأولى والإطارات الأمنيّه إلّي يخدمو بأوامرو المباشره على خاطر عون الأمن مهواش يحك في راسو ويعمل آش يحب وإنّما هو يأتمر بالأوامر إلّي تتعطالو بالعربي إذا كان يا سي الوزير لازم من باب المسؤوليّه إنّك تعطي تعليمات باش يتم تعزيز قوّات  الأمن في سيدي بو زيد على أساس حماية الأملاك العموميّه والخاصّه أعلاش ما أكّدتش على الإطارات الأمنيّه باش ما تتعرّضش بالتّضييق على المتضاهرين إلّي خرجوا للشّارع على خاطر الوضع ما يحتملش أي إعتداء أو إضطهاد وإلّي زاد عكّر الوضعية حملت لاعتقالات ياخي رئيس الدّوله إتّخذ قرارات إستثنائيّه لفايدة التحرّك الشعبي وسيادتك تشد في النّاس إلّي ثبت إنهم على حق في مطالبهم ( ما نيش نبندر أما قاعده نبيّن في وجهة نظر  إصحيحه  إنّو مادام عنّا مرافق عموميه واضحة يلزم زاده نلقاو المسهول باعتماد كل مسهول آش نوه إختصاصو في البلاد) . 
باهي مسؤوليّة الوزير في إستعمال الشّرطه للرصاص الحي ،ياخي يا رسول الله برّه نرجعو للتعريف القانوني للدفاع الشّرعي إلّي ما يبرّر إستعمال الحرس للفروده كان إذا كان المواطنين إلّي هدّوا على المركز بأسلحة ناريّة ياخي كيف إرماو أعليهم المولوطوف ما فمّاش دي إكستانتور دو فو  ياخي يا سي الوزير ما سمعتوش بالرّصاص المطّاطي إلّي كان لازم إنّو يتم تمكين الأعوان منّو باعتبارنا في تونس والحمد لله ماناش ندورو بالفروده فمن باب أولى إنّو تكون إجراءات حماية الأعوان لأنفسهم محسوبة من قبل ويتم تمكينهم من آليّات الحمايه المعقوله والمناسبه لمضاهره عدوانيّه إي أمّا زاده لمواطنين عزّل ويني المحاذير إلّي يلزمكم بحكم موقعكم تحطّوها لأعوان الأمن وباعتبار هذيّه أوامر للأعون كارها تكون آليّه من باب الحرص على الأمن الإجتماعي فإدارتك للأزمه إلّي خالفت التوجّه الحكومي المعلن يا تنقصها الحرفيّه يا توزيع أدوار وفي كلتا الحالتين ثبت الخطأ الفاحش في جانبكم وكيف تغلي البرمه الحكمه تقتضي بتنفيس الغطاء موش تكميم الأفواه وترهيب البعض باش يخافو الكافّه راهو على الرّغم من ضعف الفعاليّات الإجتماعيه أمّا دوام الحال ملمحال دونك يا ريّس نطالب بحلول جادّه في تطويق الأزمه بإزالة كل مضاهر  تجاوز السّلطه و البحث بجديه عن وزير داخليّه جديد يكون له من الذكاء ما يكفي لاحتواء الأزمه بعقلانيّة لا بتأجيجها باعتماد سياسه العصا مع جزء من الشّعب ملّو في الواقع الجزره فما بالك بالعصا . مع أمنياتي بأن يحفظ الله تونس كلّها مواطنين وأعوان داخليّة من كل سوء وإنّو رجال سيدي بوزيد يفيقو إنّو الحقد الأبدي على أعوان الأمن  أكبر غلطه يطيح فيها الشّارع من باب الإيمان إنّو بلادنا ماهي منجمه مكمله إلا بقوّة مؤسساتها ومتانة مرافقها العموميّة إلّي حب من حب وكره من كره رزق البيليك موش شارينها جماعة التّجّمع من جيوبهم دونك يا ليت الشعب في سيدي بوزيد يحط محاذير بعدم التعرّض للأملاك العمومية والخاصّه وزاده أعوان الأمن وإنّو النّيقوساسيون تصير من باب قوّة الحق لا قوّة السّاعد ..باش الحلول إلّي تتعطى ما تكونش إعتباطيّه وحربوشيّة وإنّما تخلق حراك سياسي وطريقة جديده في التّعامل ما بين الشعب والحكومه ..وهذا الكلام إجتهاد شخصي بنيتو على فكره سامبل إنّو عبد كيف توجعو عينو يمشي لطبيب العينين موش طبيب جنّيراليست ومادام أهل السّياسه في تونس مهومش يكورو في الإحتراف وإنّما أغلبهم من الهواة فأتمنّى أن نكون واقعيين وأن يكون هناك حوار جاد موش إقصاء مبدئي للطرف الآخر وربّي يحمي تونس اللهم آمين .

سيدي بوزيد ..الحادثه الفرديّه

آش كون يخدم في تونس :آنا ، إنت ،بابا ،بوك ، خالتي علجيّه إلّي تعاون في النّاس ،عم حطاب الحلايبي ،عم بلقاسم الزبّال ، خالتي محرزّيه حارزة الحمام ،عم حبيب الفرملي ،سيدي رشدي المعلّم ، سي الأجهوري الأستاذ الجامعي ،عم مصطفى الموظف وإلّا عم علي البنّاي وإلّاعم محمد العطّار وخالتي حدّه الخضاره باش ما ننساش طالت القايمه شكون يخدم في البلاد ! لمياء بنت المعمل وإلّا الصوجيغاط عم منوّر ،هادي الحوّات وإلّا سسمهم إلّي يحكموا في العباد..آش كون يخدم في البلاد إلّي يجري على كوم ولاد ويحلم غدوه يعيش كيف العباد وإلّا إلّي يخرج في تونس سبعه ويسمّي روحو بالمصدر يحكي عليّ وعليك ويسمّي همْنا بالحادثه الفرديّة ويعدّد إنجازاتهم الحكوميّه في المناطق  الدّاخليّه بأرقام خياليّه ما عمرها تحطّت في يدين أعباد . كيف عاملين شرطه بلديّه خدمتها تحاصر الزوّاليّه والإنتصاب غير ممسوح بيه كان في السّوق اليوميّه منين يجيب الزّوّالي راس المال باش يخلّصكم في المكس وفي أجرة الكراء الشهريّه وقتلّي ماعندو يبيع كان زوز كيلو باطاطا وكعبتين برقغدان كيف يصيح نخدم وين نحب ، مهبول يظن روحو في رزق البيليك تضربوه بالمطراك وسي الوالي يسكّر أعليه الباب وتخرجلنا السيده  المذيعه بغنّايه ألّفها سي المصدر تجبد على التراتيب البلديّه .. ياخي التّراتب متاعكم ما تجعلت كان باش تضيّق على المواطن باش تحلبوه في ثلثين دخلو، وإلّا سيدي بوزيد زاده مليانه بالسوّاح والانتصاب الفوضوي باش يشوه منظر لبلاد . يزّينا عاد يا منظّر يلّي ما عندكش إسم إلّي يسمعكم يستخايل إلّي نحن في مدينة أفلاطون الفاضله وإلّي إنتومه ربوبة الإخصاب و الفضيله والعفاف والعداله ..( الله غالب ما نذّكّرش أساميهم بالإغريقيه أهّوكه إلّي يعرف يترجم على روحو ) توّه  على القليله تعلمو تَحْتويو الأزمه بإنسانيّه يا سيدي ماتقدموش إستقالتكم كيف عمل عبد النّاصر عام 76  عالأقل أحكيو كلام تصدقو العباد كيف تحكيو على التنميه الجهويّه إلّي يسمعكهم يظن إنوا الشعب راقد في كل الجهات وإنتومه قاعدين توصلولو في الخيرات  السبعه ما بين إيديه أمّاله فاش شاب راس بابا وأمّي في لعبان الخربغه وعلاش ماشين لبعيد الوليّد موش إطار آش لزّوا يخدم خضّار ..عيب تحكيو  على حادثه فرديه وقتلّي الوليّد بكامل قدراتو العقليّه بعّد ما ضياقة أعليه ومقت المسهولين عمل فيه شعّل في روحو النّار راهو هذاكه دليل على الخنّار  بيانسور التّونسي صبوري وكان ما جاش يمّن بالجنّه والنّار راهو ثلاثة أرباعو أقدمو على الإنتحار ..ونحيلكم على النّسب الصحيحه متاع الحارقين جوّا وبحرا والمنتحرين إجتماعيّا بالإدمان على الكحول والحرابش والذي منّو هذا دليل دامغ إلّي هدرة الوليّد ربّي يعفو بيه ما عمرها ما كانت حادثه فردية. ونزيد مذبيّه نفهم إذا كان العبد يشقاو والديه ويشقى هو علي الشهاده كل عام وهو يجاهد آش محلّو مالإعراب تعملولو في كابس وهو من حاملي الأستاذية وإلّا البلاد ناقصه بؤر للرّشاوي والمحسوبيّه وإذا كان مبعّد عشريتيين توزيع الثروه والبنيه التحتيّه والحظوظ  في التشغيل متساويه ما بين كافة فئات الشّعب ورّيونا بالأرقام والتصاور على خاطر موش صحيح إلّي تحكيوا فيه والمحسوبيه والجهويّه طاعونين معظم التوانسه يعانيو فيه ..قعدت حكايه إخرانيّه نحب نحكي فيها هاك التّعليق لخراني متاع المسهول بخصوص التّصرّف المسهولي الرّشيد يجعل إسهالو خفيف علينا "الوليّد قاعد يتلقّ في العلاج في مستشفى الحروق الخطيره في بنعروس" (ستنّاو نحل الحسينيّه وينو اللّام ..غنّاية ذيب الغابه ..أهّيكه الفوق على ليمين .... ) إي نثمّن ونناشد ونبارك خطوتكم الرّشيده في نقل الفتى إلى شبه رزق البيليك المسمّى بمستشفى الحروق الخطيره في بنعروس و وضعه في أمانة الإطار الطبّي وشبه الطبّي من مواطني هذا الشّعب الكادح إلّي ثناو  الركبه وسهروا الّيالي باش ولّاو يخدموا في الصبيطار المذكور وماذابيّه الفاتوره إمبعّد تخلصوها إنتومه وتحددّوا بالإسم المصدر المسهول إلّي خلّص مع صوره ضوئيّه من التّحويل البنكي لفايدة المسشفى وجيبو والدين محمّد البوعزيزي يشكروكم ويثمنوا مجهودكم في إحتواء أزمة ولدهم النّفسيّه وإلّي أسبابها عاطفيّه وتبرّئهم من التصرّفات غير المسؤولة لجيرانهم من أهالي سيدي بوزيد ومبعّد حظروا رواحكم على خاطر غيغوز ناويه تترك الحسينيه وتاقف قدّام دار ;'(  عظيم تونس وتشعّل في روحها هيّ .

براقش تدافع على روحها بما تيسّر

توّه آنا نكره لي بوليميك و انفد مالذّاتيّه وعادة إذا موضوع مهواش يخص التونستانيين عامّه ما نحبّش نحكي فيه لإنّو ها المدونه راسها مربّط وتتعامل مع التّدوين بصنعه موش بعصبيّه ... يا ولدي سيبو! ..شكّار  روحو متعدّي والنّاس لخرى وقفوه يبحثوا فيه ..إصحيح باش ما نكذبش نتفاعل بتعليق من هنا و تكشكيشه مع روحي من غادي أمّا مع إحترامي للّي قاعد يصير في سيدي بوزيد نحب نحكي على هاك المشكله ما بين بسيكو آم و غجغج من نساوين تونس توّه الوليّد مواطن تونسي عندو توجّه فكري (لأنّو موش هو إلّي جابو وإنّما هو يتبّع في نسق فكري وهو حر شاء من شاء وكره من كره) وثاني حاجه موش صحيح إلّي غنّاه مبني على نظريّة المؤامره وإلا محاوله منّو للإقصاء وإلا هو وهابي مادام الوهابيّه ولات جريمه ( الفكر الوهابي ثروه إجتهاديّه و قابله للمراجعه أمّا موش حك راسك وتحكي في إلّي  تعرفوا وإلّي ما تعرفوش ) الوليّد مازّال في مرحلة بناء الذّات وعلى كل عطى وجهة النظر متاعو في تأثير الإعلام و أشباه الفنّانين على المجتمع المدني ..هذا المجتمع إلّي ولّى غارق في أزمه قيميّة خطيره برشه نتيجة فقدانو لرّوبار إلّي يلزم يحكم تصرّف الأفراد بعيد ياسر على تصلّي وإلا ما تصلّيش وقريب ياسر من فكرة تاقف حريتك وين تبدا حرّيّة لاخر معنتها كيف وحده تدّعي إنها فنّانه تخرج وتعلّق على مسألة الإلتزام وتحكي على إلّي سمّاتو دمغيج للمرا وتأكّد على ضرورة إنّو المرا التّونسيّة يكونلها دور للرّيادة وفي نفس الوقت تخرج في مونولوجات تهرّج و تقول كلام موش عايلي في قناة تلفزيّة فهي تحط روحها موضع إيدول متاع نسق فكري وإلّا ثقافي وبالتّالي صورتها معادش شخصيه لإنها قدمت روحها كشخصيه عامّه بواسطة إلّي تسمّي فيه فنها و موقفها وغيرو وبالتّالي من الممكن إنّي تكون عرضه للنّقد من نفس المنظار..نرجع للبوليميك توّه منذ أيّام قرطاج السنمائيه وقبل ما يغنّي بسايكو آم على إلّي سمّاه 'مانيبيلاسيون' لي أنترنوط تبادلو تصريحات عظيمة تونس سوسن معالج ملّي إنتقدت بصراحه ضاهرة التّدين ما بين معقّفين وقالت إلّي المرا التونسيه مع إستفادتها مالزخم التشريعي يلزمها تلعب دور ريادي في التّحرّر في المنطقة خاصّة مع وجود هذا الطّاعون إلّي سبق وإنها حدّدتّو بالتديّن كنسق تقول هي موش إيديولوجي أو قيمي وإنّما كمهرب وردّو بالكم هذا كلام عظيمة تونس موش كلامي . وبالتّالي كيف نرجعو للكليب متاع غناية بسيكو نلقاوه حط تصويره عاديّه ليها وغنّى على أساس مرجعيتو الفكريّه إلّي ظاهرلي تخالف تماما الدّعوه إلّي عملتها معالج في هاكه المقابله الصحفيه إلّي عملتها معاها تونس فيزيون (خساره جهلوت في النّات ماكانش راني هبّطهالكم هنا ) المهم لي زانتيرنوط هومه إلّي بربشو وراء سوسن وخرجو تصاورها إزّانتيم وهذيّه غلطه عملتها هي موش في كونها تصورت وقدّامها كاس جعّه كبير وبجنبها فتاة  زغيره تقتدي بالكبار وإنّما إنّو التّصويره تحطّت في شبكه عنكبوتيّه عموميّه وبالتالي يطلع عليها هاك المثل العربي "على نفسها جنت براقش " :) أمّاله باش نجيب ملّخّر إلّي يستخايل شعب الخضرا منحط نقلّو دوّيو صحيح ما ناش نتعاملو بالثمانين جلده بعّد البلعه أمّا زاده محافظين على نظره قيميّه معينه مانجّم يفسّخها حتى حد وهاذاكه إلّي يخلّي ناس فانين و ما عندهمش صك التّوبه يحكيو على فلان وعلّانه بالعربي إلّي يعمل روحو مشهور ما عليه كان يعس على الإيماج دو مارك متاعو وخصوصي آش يقول وكيفاش يتصوّر سينون ما يلوم كان نفسو إذا لامريكان عندهم واتر غايت تحبّو في تونس ما يبداش عنّا معالج غايت التّحاصل معناها سايكو خاطييه وبريء من مشاكل معالج إلّ عملتهم هي في روحها وبالله للوخيّان العلمانيين إلّي كشطه واربط شويّه طوليرونس مع وخيّانكم الرّجعيين راهو الظلاميّه حاله فكريّه زاده وما تستحقّش وصايه واعملو بهاك المثل إلّي يقول أعمل كيف جارك وإلّا حوّل باب دارك راهو غيفارا زاده كان مسيب اللحيه وكان اليوم تقوم مجموعه زرادتشيّه تحل معبد وتعمل شعلة نار تعبدها هاتوّه تقولو حرّيّه عقايديه و من شيره أخرى كيف تمكمك المفكّره ألفه يوسف وتخرج على الملأ تفتي في العقيده لوليّد سايكو ما عمّرهاش وما قاللهاش قول وإلّا إفتي و إذا كان ما عجبوش إلّي تقول فيه أهّوكه فمه قدّو برشه بما فيهم آنا يا رسول الله ياخي الكل باش نخمّموا بنفس الطّريقة ولينا نفس ردود الفعل وبالله أرحمونا من كذبة الهويّه الوطنيّه كل واحد يلعب على درابوه ومبعّد يجي يغنّيلنا غنّاية الهويّه و السّلم الإجتماعي عاد قولو لرواحكم إذا تحب مثلا تعيش الشّذوذ آفون أمورك أمّا موش تردّوهملنا دي زيدول نهار كامل وهومة في القنوات 'الوتنيّه' يلويو كيف الرقّاصات و يتمعجنوا و يبزنسوا على الملأ كان ما عجبناش زاده ..شوفو وين وصلنا الّي يصرفوا السّواد الأعظم مالشّعب على البلعه أكثر ملّي يحطّو على ولادو .. قدّاش من أكسيدونات سببها بلعة يتمت صغار وضيعت عايلات قدّاش من تونسي ولد الزنا يحب يعرف والديه وتحطّم من ظلم النّاس ليه موش معالج السبب فيه أمّا حتّى سايكو خاطيه (توفه القافيه هنا مع غيغوز الظلاميّه باش نرتّح روحي مالتّدوين لمدّه ونقعد نقرا  لحبابي المدونين ونقول لمعالج ها توّه ترجعلك قاعدتك الجماهيريّه أمّا سايس روحك لا تمشي تبحث في الدّاخليّة راهي كلمة قاعدة خطيره ياسر بالرجوليّه )

مرجانه

 المدنية أجمعت خطابها على التنكيل بالقوم .. كان على بابا ومرجانه قد عقدا حلفا مع اللصوصيّه وبات اللّصوص داخل القصور الفخمة ، وحشر النّاس داخل جِرار الخلّ والزّيت الفارغة . لقد غلا العيش والخبز صار مرّا وكذِب جدّي في رَفْع الخرافة قبل أن يمضي .. كنت من محبّي الخرافة حيث أجلس لجدّي زمن إستلقائه على السرير وأتتبّع تفاصيله يرفع سبّابته يتتبّع خيالات الخرافة وكنت أسمع وأنا أريح رأسي الأشعث على راحة يدي وأقول " جدّي أليس علي بابا لصا من اللصوص ؟ "وكان يضحك ولا يجيب .
عندما وعيت وهم الخرافة كان جدّي قد رحل ولم يعد بإمكاني مراجعته في إبتذال علي بابا للبطولة ، لم يكن حسن السّريره ولا مجتهدا سوى في مضاعفة الجهد للفوز بما اجتمع اللصوص على سرقته حتّى صارت له في اللصوصيّة الرّياسه . لو تدري يا جدّي كيف عُقِد الحلف بين اللصوص ومرجانه و رأيت موضعي داخل جرّة الخل ألعق أحزان النّاس ..ووهم الخرافة تبّا لك مرجانه ! لا أقترب من الفهم حتى ..كيف تظل الخطيئة رهن النّساء وأشباه الرّجال ..كان جدّي طيّبا حينما ساق الحكاية وقد علمت عندما اشتدّ عودي بأنّ مرجانة قد قضت على كافّة النّاس دون أن يرفّ لها جفن وظلّت لتعيش ولصوصها الأربعين ومعهم علي بابا ..كان جدّي طيّبا لطالما أرْهقْتُه طلبا للخرافه .. يا أيّها النّجم الصّاعد كلّ ليلة تنطلي خُذ رأسي وأخرجني من الجرّه ..إدفع بي حيث تشاء و أنقذني من لؤم العيش داخل ذات الخرافة .. تتكرّر الصّورة داخل رأسي جنائزيّة .. هنا رقصت مرجانة على جيفنا ولاكت ذواتَنا  كَلِبان وبصقت التّاريخ في وجوهنا .. نشتدّ ونذوي داخل الجرّه لا قِبَل لنا سوى بالإحتراق عن سابق إضمار .. لا تهنىء روحي سوى بالألم ويرمونني بالبهتان كلّما قلت أنّ مرجانه و علي بابا ولصوصهم الأربعين يعيشون خارج الخرافة . ويقولون أيضا بأنّي تلبّسني الحقد و المغالاة في رفع الحكاية عن قومي . أَيْ نفْسي لن تَهنئى ما لم يمُدّ لك النّجم يد المساعدة أو موتي بتلك  النّار التي قادتْها الخرافه موتي ببساطه .

داخل هذا الوطن مفقود

هل من الممكن أن نؤبّن من قتل نفسه أم من الممكن أن نهجوا جلّاديه هل نضع اليد على الجرح لنتركه ينزف حتّى نموت فلا يظلّ لهؤلاء شعب يؤلمونه ولا يهدّدونه ولا ينكّلون به ولا يخافونه .. هل العذاب صار شأنا داخليّا تحت العاده يلوكنا ولا نصرخ ونموت في لجّ البحر محترقين لحظة فرح بالفرار من البلد وها نحن أتينا نحو الساحة هذا الوقود إشتريته بعد الزّياده ، عود كبريت لأفجع أمّي بنبأ الموت ..كما فُجِعْت بنظراتها المتسائلة . متى يا ولدي تدفع عن أمّك التّعب وتبلّط أرضيّة المنزل ومتى لا أظطرّ للسّؤال لنأكل .. أيّها الوالي إفتح نافذتك لتشُمّ دمي المغلي ، أيّها الوالي إفتح عينيك لترى صرختي، أيتها الشّرطة البلديّة تبّا لك لا تغضّي البصر عنّي فهذا عمل إضافي لأعوانك لهذا اليوم ..يا أيّها الغرّ يا من لطمت وجهي تعال أعُدّ معك على مسامع الحكومة أيّام السّهر على الدّرس لم أُعطى الشهادة إلّا بعد الظنى .. ونادوا أبي يعلمكم مبلغ جهده و أعيدوا له ماله المسفوح على أيديكم يا لكذب نشرات الأخبار والأحداث الفردّية ..لست بحدث فردي إن صدّقتم . إفتح النّافذة أيّها الوالي وانظر لوجهي المشتعل وأخبرني ماذا أكلت هذا الصّباح فأنا شربت المر و سيجارة رخيصه على الخواء .. أدعكم مع كلام للكاتب الصحفي أولاد أحمد فما كتبه هنا منذ ما يزيد عن العشريّة يلخّص الأفكار عنّي :
"لم يعد هناك موجب للخوف 
بعد أيّام ستصدر الصحف بعناوين مرحة كشارلي شابلن ، وزاهية مثل حديقة في هذا الشهر ، وستتجوّلون بسلام مع أطفالكم ونسائكم ، وتأكلون البيتزا و تشربون حليب الدجاج في وضح النهار .. كل شيء جاهز ، التعليمات واضحة و صريحه أغصان اللّوز ستتحوّل إلى عصي ،وقوارير الغاز إلى قنابل ، وكلاب الشرطة إلى شرطة إضافيّة ، و الأقلام إلى سلاح أبيض ، وأحمر الشفاه إلى صواريخ عابرة للولايات ، ومضارب التنس إلى شباك للصيد البرّي ..كل شيء جاهز للقضاء على الديموقراطيه : هذا المجرم الخطير الذي أفسد علينا حياتنا ، فظللنا نلاحقه ـ طيلة ثلاثين عاما ـ دون أن نعثر عليه أو من يدلّنا عليه .
والمصلحة الوطنيّة تقتضي ـ في هذه اللحظة بالذات أن نؤجّل خلافاتنا مع أولي الأمر منا ، وأن نضع أرجلنا في أرجلهم ( أيدينا موثوقة إلى خلف ظهورنا ) من أجل إعادة الطمأنينة إلى هذا البلد الطيب .
إن إلقاء القبض على هذا المجرم ثمّ شنقه عاريا في السّاحة العامة ، ودفنه هناك بعيدا في المياه الدوليّة ، هو الطريق الوحيد لتقدم بلادنا نحو ماضينا السحيق : ذلك الزمان الذي رضعنا فيه مبادىء الفاشية السمحه ، وأصول العصبية التي لا يستقيم بدونها عمران .
إنه لا يليق بنا ، بعد كل هذا الماضي من التخلّف و الشعوذة أن نقبل بالتساكن مع مجرم يريد أن يساوي بين السيد والعبد وبين العمامة والبنطال ، بين سوسه وسيدي بوزيد و أخيرا بين الرّجل والمرأة ...
لم يعد هناك موجب للخوف (أصلا لم تعد لنا مشاعر) 
الرجال ، القوانين ، الفتاوى ، المذيعون ، الصحافة الأجنبية ، التاريخ ، الأوسمة ، ، لصوص المعرفة ، الشعراء الصغار ،الخطب ، الأكف ، الأطفال بالمدارس ، كواعب المعامل ، الإعلام ، الخرفان ، الكسكسي ، الشّاي ، اللبن ، الزرابي ، الدقلة في عراجينها (حيث هي في بلاد العكري ). 
نعم كل شيء جاهز للقضاء على الديموقراطية : هذا المجرم الخطير الذي يريد تهجيرنا من جنّة التخلّف إلى جحيم الحضارة ." 
ما دمت قد فجعت يا أمّ فيّ وزاد في صحائف مرّك كأس للعلقم لتشربيه بعد ذلك الذهاب.. أسألك بالله ألاّ تقفي أمام قصر الوالي و الرّجل مهم يا أمّي قد علمت عند مصرعي بأنّي مواطن من درجة يتكتّمون على تصينفها كلّ الشعب يعلم فبالله لا تزيدي من عنجهيّة السيّد ولا في حزن الغوالي ..

نهاية الخبر بلا مبتدأ

تجتمع نهاية العام ومناقشة ميزانيّة الدوله للعام المقبل على خلق جو جائزي داخل الوطن . فالعام و مجلس النوّاب كالميّت لا يردّون للشعب خبر . حين ينتهي العام نكون قد طوينا زمنا في جهل ما نحن عليه فعلا وما تبقّى لنا من الوقت في الجهل أيضا بما سيكون عليه الوطن لمن نخلّف وراءنا . حين ينقضي العام قد نكون غير واعين أصلا بجنائزيّة وضعنا فنستمرّ في ابتلاع حيواتنا ولا نكسب إذا قضي الأمر إلّا قولا بأنّا مضينا على حين غرّه . أمّا مجلسنا الموقّر فتبّا للملهاة الإغريقيّة كم توجز تفاصيله في تكرر المأساة بدون أيّ نهاية ممكنة ، لا يردّ للشعب خبرا كهذا القبر مهما عالجت صمته بالتنقيب لا يردّ لك جوابا و لا يفصح عن أمره . تخضع  الإرادة  الشّعبيّة على مقاعده لموت سريري وكذا الجمهوريّة .. يبترون إرادة الشّعب ويمضون فرحين مسرورين لدورة نيابية أخرى يحترفون الإماء عن آخر إصدارات القوانين الأجنبيّه ولا يدركون أبدا أن للشّعب في الأصل هويّة .. يلطموننا بقوانين عجائبيّة ، بعضها يختلق عناوين مبهتة ، بهتانيّة أو باهتة تقام لها سرادق جنائزيّة للتّثمين و لا يتأدّبون في حضرة الموتى فهم يثمّنون إيلامنا ويسارعون في مسيرة التّهليل بجدّيّة . تدهشني فرحة النّاس في هذا الوقت من العام ..مرحبا ! أنظروا هذه جيفنا وإراداتنا العجائزيّه لا تطالنا الحياة إلّا في انتقاص أعمارنا .. تبّا حين نموت هل تكون تلك ميتتنا الأولى أم إنّا جُبِلْنا على الملهاة ونحيا بالموت كمن يصرع ثمّ يبعث حيّا !؟

جوامع فيييبرور هذاكه إلّي مزّال

توّه وفات المشاكل مابلاد يا شوطنه متاع راسي ومعّادش فمّه مشاكل في هذه الجنه إلّي ستنّاوي نْصر ونشدد ونثمّن إسمها تونس الخضراء أهّوكه أعلاش ممثلين الشّعب يطالبو بجوامع فيبرور ..أمّاله كيفاش ما يحبّوش النّاس في الخارج تصدّق إلّي العباد تدخل للجوامع بالكوارت مانيتيك وإنّهم قاعدين يحاصروا في العباد في عقايدهم .. يا معلّم على آناهو جوامع يحكيو ، كثرة الجوامع يا مدام مقلقتّك والآذان الّي خارج موش متناسق ، ياخي تحكيلنا على تجربتك الخاصّه وإلا شنوّه ماهو نبهوا على الجوامع إلّي دايرين سيادتك يأذنو فرد وقت و يحترموا أوقات الصلاة بالثّانيه وخرّج ها النّاموسه من مخّك راهو عيب ..توّه أمورنا هانيه وما فمّه مشاكل في البلاد كان التلوّث الصوتي عاده تبسّسولنا باش تحرمونا من أجمل الرّموز الحضاريّه والعقائديّه لبلاد فيها الأغلبيه من النّاس مسلمه .. "ما ناش باش نسمحو بأي تجاوزات" على آذان يدوم دقيقتين توّه موش عيب هذا الكلام ياخي باش نولّيو في سويسرا غادي على الأقل المسلمين أقلّيّه والحكايه تقلبت عليها الدّنيا .. آنا حسب إحصائيّاتكم معظم الشّعب مالكهول بالعربي صونسي يصليوا أما إلّي مزّال ربي ما كتبش عليه التّوبه ويحب يرقد ينجّم يلق حلول  بسيطه يا مدام كيف سدّداة الوذنين أهّوكه يتباعو رخاص في الفرماسي ..حكاية وليداتنا في المكتب هاك الدّليل الدّامغ متاع تأثير التّلويث لصّوتي للآذان على المجموعه البشريّه مانيش باش نجاوبك ..خلّيني نحل الحسينيّه ونعمل ضريبات ... ووووووه على بلاددي قدّاشها مليانا بالذكيّييين ،وووووه على مجلس بلادي قدّاش مليان بالحنينييين ،ووووووه على إنجازات بلادي قدّاشها رياديّه  وتندّب الخدّين ... سامحوني هاني رجعت باش نعطي رايي في المداولات إلّي حكاوو فيه جماعة المجلس على لاذان و التّلوّث الصوتي :')) إسمع يا خانم (متأثره بالمسلسلات التّركيّه )براس لحنينه كان المؤذّن متاع حومتكم صوتو موش ولا بد تنجمو تنسقو معاه وتحطّو لاذان متاع الحرم المكّي وكان المشكله مزّالت مستمرّه معاك تنجّم تعاون أقرب فرماصي بحذاك وتشري البرودوي إلّي قتلك أعليه ليك وللعايله  ..الحمدوالله يا ربّي بالرّغم إلّي مولوده في شعبه عمرك ما خلّيت غيغوز تهتم بالسياسه ..مالّه طلعات ! لله يرحم طلعاتك يا مزغنّي أرحم من تهرديزت نوّاب الشّعب (الهارد موسيقى يا مدام بالعربي إلّي قلتو موش سب ) يا رب الحمدولله إمّيمتي فام أو فوايي تحبّك وتحب الصلاة و الآذان ..جوامع فيييبرور هذاكه إلّي مزّال كان إمكانيّاتك تسمح يا برلمانية الهناء تنجّم تعيش في سويسرا وتجينا وقت المداولات هكّاكه ما نقلقوش بأي رمز من رموزنا الحضاريّه وبالخصوص العقايديّه ..وفى الحديث المسموح بيه لاخر باش نتبادلو مع شواطن مخّي :/

مرفأ ..الغباء

جلست أنظر الى الخواء أريح عقلي من الفراغ الذي يعتمر رأسي ..لم يطل بي النظر فلحظات المتعة قصيرة تماما كالعمر انها كشذى الورد العربي الذي يزهر ببلدي ..وهل لي بلد أصلا ..لقد انتبهت أني ومنذ نعومة جهدي قد أقضّت مضجعي بلاد كثيرة على رأسها فلسطين والوطن العربي ثم ازدادة القائمة فصرت أتتبّع أخبار قوميات أخرى و أملأ رأسي بآلامهم ..الشيشان و أفغانستان و باكستان و أدركتم حتما أن وطني حيث الانسان المسلم لايهمّني لسانه و لا اثنيّته و لا فريقه المفضّل أقسم ..قلت أنّي وجدتني كامل يومي في تتبّع محموم لأعراق كثيرة و كالغراب تماما نسيت تماما من أكون ..ولكنّي عكسه لم تكن النتيجة بفعل الأنانيّة وانما ضرورة حتمية صدّقوا ...للانفتاح .. ينعقد ظنّي على أن تشرذمي و جهلي لكلمات السلام الوطني ليس بعيب ,فالولاء يتطلّب أكثر من ذلك و لا بلاء في جهل أسماء أعضاء الحكومة فعلمانيتي الظرفية تجعلني أغرّد داخل السّرب حتما و بكلّ ..انفتاح انتهت اللحظة .. أقصد تلك التى تعنى الاسترخاء و النتيجة واحد لصفر بيني و بين جهدي المضلّل لأنانيّتي المفقودة بصدق ..دفعت الأذى عني بالعبارات المسوفّة التي لا تنطق بما أريد .. لا عزاء للبلهاء , لن أسرّ قولا اذ أنّ لي في الغباء دار مقام استوطنت به عن سابق اضمار و تصميم وهو مرفأ معلوم لكل النجباء .. داخل وعيى يجعلك تحيا حياة الكرام و تصل مبلغا من الدنيا يظاهي صيت فرعون وهامان و قد تفوقهما اذا أردت .. كن غبيا .. و انعم اذا كنت غير مهتم بالتسلّط مثلى بالرضا عمّا يفوتك من الدنيا لأنّ وطنك داخل رأسك متغيّر الحدود و هو حرّ و صلب العود و ديموقراطي و به الأخلاق ريعها في خزنة مفاتيحها داخل جيب كل مواطن يغرف منها بقدر ما يشاء وله اذا شاء على الانسانية أن يجود .. الغباء هو مرفأ لي منذ بلغت الوعي وبه سيستظل جهدي من كظم الغيض الذي أنهكته صروفه ذات ربيع.. اليوم و غدا لن أستبيح الادراك لطواغية بني جلدتي و لا فراعنة الدنيا لأن صوتا ينبأنى من خارج مدارك مرفئى بأن كيد الشيطان ضعيف و أن أولئك السلطويون قد بلغوا خريفهم قبل الأخير و أكاد أسمعهم يهمسون من داخل لج البحر أن آمنا بما آمنت به بنو اسرائيل أستعير خطابك يا سيدى فالملك لك من يوم خلقت الأرض و يوم تبعثنا من مرقدنا و تضع الموازين بالقسط و أنا على غبائى لن أشهد لغيرك بالربوبية فالحمد لك أن قيّضت لي بفضلك هذا المرفأ أجلس فيه لأنادم نفسي و أستلذّ بذلك ثم عدت للتطلع نحو الفراغ أنشد .. الاسترخاء و التريض .. نعم ..

المتواطئون في الضفّة الغربيّة

ألقيت برأسي بين راحتي لا مكان للأمان له في غيرهما أو هو فعل العادة لمستوحدة مثلي تعوزها المدنية ..كأتون يلتهب عقلي بارهاصات السياسة أتسائل عما يدور في الباحة الخلفية لما عقد عليه العزم بعقد مؤتمرات الفتح داخل الكيان المحتل ..وعدت لأذكر سرية الاجتماعات التي كانت تعقد زمن الاحتلال الفرنسي و الأنجليزي من الساسة و المجاهرة بالسلاح من طرف المقاومة و عقدت العزم على الظن أن ما يحصل الآن فعل الأغبياء المتذاكين بتلقّف فتاة الوطن ..لم أتأدب في نعت هؤلاء بما جادت به السوقية المفروضة علي فقد غلى رأسي بالحِلم عليهم طالما أنه لاقبل ليدي بمرمى رؤوسهم لأصيبها بآلاف أحذية منتظر . كنت أنظر لأعضاء السّلطة في الضفّة الغربيّه وقد نزلوا لاجتماعهم من سيارات شبه فارهة  (لن يسمح لهم الكيان بأكثر من ذلك فذلك مقام مريديه من غير الصّهاينه ) السياسة هذا الجرم الذي أرتكب في اليوم آلاف المرات هذا الوباء الذي يثقل راحتي كلما انخت برأسي عليهما ..لماذا ننسى ما فعله المجتمع الدولي بنا ولماذا بعنا القضية لحجج الأغبياء الواهية ولماذا علينا القبول بوثيقة الأمم المتحدة و نزعم الفخر بعضوية الملاحظ فيها و الفيتو عصا بيد الأقوياء يضرب بها قفانا صباحا مساءا ..ومن منا دخل الحرب العالمية أو كان من دعاتها حتى تفرض علينا كل المواثيق التي اعتمدها الغرب في انهاء الحرب المندلعة بينهم أصلا ..نحن تلك القصعة التي تداعى اليها الجياع و قد صار للقصعة خدم يسهلون السبل اليها بما اصطلح على تسميته بحكومات الاعتلال العربي و هؤلاء أشد بأسا علينا .. تتطلب استراتيجيتهم للنجاح نوعين من الناس لدينا سياسي صفيق و شعب ببطن خاوية و أطمئن عقلي بأني من النوع الثاني و ذلك ما يجعله بحالة عدم صلوحية .. و التفكير ليس سوى فعلا غريزيا و منفردا لا يتكرر على ذات النحو و لا يصرف في أي بنك لاتخاذ القرار ..الجهد أن نجمد ما نعقل حتى يظل السلاح صاحي و لا عيب في الاستعارة .. و السياسة التى أحسب أن نحذر الأغبياء منا ..أما القانون الذي أُقر لنا جميعا فهو أن نحترم الانسانية لأهل الداخل و لأهلنا في الشتاة وسلام الله على عقلي المخلوع من كافة المجتمع الدولي بدعوى انتهاء الصلوحية .. البارحة وقد بات الصّبية في العراء في بلدة اللّد و كرّاساتهم في مكان دافىء تحت الرّكام ..حمدت الله أنّه وعد عندما يضع الموازين بالقسط  بحساب  ال "مثقال ذرّه " فحسبنا ممن عبروا بأسمائهم للضّفّة الأخرى أن يحاسبهم ربّنا بهذا العدل .

تونس بألف خير

ويييي يا معلّم تونس بألف خير .. التوانسه منعوشين وزاهيتلهم في النوّار أيّه وقيّت باش نزيدو في سوم ليصانس و المزّوط ودبوّزت الغاز زاده .. صحّه لينا محسوب ثمانيه لاف ويتِّقطع ساعات أمّا نقعدو خير مالمصاروه إلّي يشريوا فيها بهاك الحسبه وتتباع للصهاينه أرخص ونهار يلقاو و 364 يوم لخرين ما فمّاش .. تي آش مدخّلنا في مصر تي هاذوكم ثمانين مليون ونحن عشره ملاين ..شنوّه عشره ؟ تي رانا ولّينا سبعتاش ! أمّا الصحاح ما يحبّوش يقولو باينلي الإحصاء مُكلف و تقسيم الدّواير الإنتخابيّه يلزمو يتبدّل وماو في بالك الشوابّيّه يجيو لولاد برشه ...نحكي وجناحي يرد أعليّ إشششش ..تي راهو المحروقات هذيكه سلعه مدعمه بلّي يزيدو تي نتسمّاو مسلكينها .. لا علاش ؟ ياخي صندوق الدّعم معبّينو من زكاة الغُنيه ؟ أمّاله الآداء على القيمه المضافة هاك إلّي نهار كامل شاحطينّا بيه وين ماشي ولّا نحن السّدره والزّيتونه أولا بيه .. وسكّرت جلغتي قعدت نذّكر في السميغ متاع عامناول أيواش وشكون واصلّو تي النساء تجري شهر كامل على 180 دينار هذا إذا المقاول ما طارشي بيهم وتستخلف المغبونه ربي خير من الجريان في المحاكم ..تونس بألف خير كتبتها غيغوز وأجهشت بالبكاء وفي رواية أخرى دخلت للحسينيه وحلّت كشختها وقالت فيها وووووه . توّه أعلاش الكذب مشكلة غيغوز موش الخمسين فرنك مشكلتها في هاك إلّي زادوها وحك راسك في الصيف زيد في المم حك راسك في الشتاء زيد في المحروقات إشّي إلّي باش يخلّي التوانسه يقتصدو في مرّات التّدويش وماضبيّه لو كان ندورو للصلايط ما نستحقولهاش دبّوزة الغاز و إلّي يشتهى ماكله سخونه يحط سديات أمّك صنّافه تتطلعلو البيعه أرخص ..تونس بألف خير ، كل مرّه نحلف باش ننزعني مالشبوك نلقى كل شيء غلاء كان بنادم محطوط في الصّولد وهو ما في بالوش :/ كل ما قداير ربّي تجبرني باش نمشي للصبيطار .. نرى لعجب النّاس تبدى تتغصور تقولش في نهار الحشر , ماعنديش جمعه هزّينا خويا التّرشّيست للصبيطار ( شفت يا بنفسجييست قدّاش الكليبستيّه حنان ) ما تحرّكنا من غادي كان ما حطّينا قرابات التّسعين دينار على الكونصولطاسيون والإختبارات إلّي عملوهملو , ونحن نستنّاو ريت كيفاش ما يمسّوش المريض إلّا ما تجيبلهم الفيشه معنتها تخلّص الفيزيتا ..دييور نهارتها ولد جايب بوه في كريز متاع آزم خرج من عقلو على خاطر طلبو منّو باش يخلّص إقبل ..الولد يصيح أعطيوو بابا الأكسيجان الساعه وهومه يقولولو خلّص إقبل .. في زمان الغفلة وقبل ما يعملو للصبيطارات جستيون بريفي كانت النّاس تعدّي بثلاثمياة فرنك في خمسه وعشرين سنه تعدي بثلاثة آلاف كان عندك كرني وبسبعة وإلّا عشره كانك ما عندكش وسيادتك بييون (توّه مانيش في عمر الدّيناصورات أمّا ها الربع قرن قدّاش أعملّنّا إنجازات ) أمّا راك مازّلت في شبه رزق البيليك حتى لو كان تشبع كشّان مالبرامديكال قولش أعليك حطّيت إيدك في جيبهم ..يا حبيبي تونس بألف خير أمّاله لو كان جات "           " شنوه باش يصير ? إغلات  الدّنيا كان بنادم قعد الرخيص براس لحنينه يانوّاب الشّعب إذا دخلت أعليكم معزه نهار وقالت " ماااااع بجاه إلّي صوّركم قولو نعم بالإجمااااع " (كلام المزغنّي ،ما نحبش السّرقة ) وقتلّي سمعت أوّل مرّه بْطفله حارقة ومونتها باكو شوكوطوم مخّي وقف واليوم مانيش باش نستغرب كان نلقى عزوزه حاطّه غنّاية  " الحياة صعبت علينا " و إلّا مطلع هاك الغنّايه متاع المزود ـ نشكيك للّي ماينام الّيل ليلة جمعه - وتاقف قدّام دار عظيم تونس ; / وتعمل ضريبات لام إحتجاجا على غلاء المالبورو ..تي الخبز يا غيغوز واش بييييك . يا بنفسج تونس "      "   والحمد لله لا أكثر لا أقل !

غيغوز في الحسينيّه

آنا مبدئيا إنسانه مسالمه صحيح متوحشه وبرّيّه أمّا نعطي برشه لخالتك تيريزا للّي مايعرفهاش هذه ببّاصه عدّات عمرها  في خدمة الفقراء في الهند حتى جاها هادم الّذّات ومشى فعلها كيف الرماد في النهار عاصف يلطف بينا ربّي ، أعلاش نحكي هكّه ؟ .. هذه فراز دطّاك الصحيح إنّي حاشمه إنّو في هذه اللّيله باش نرد مدوّنتي حسينيّه ويسامحوني وخيّانّا الشّيعه على الإستعاره أمّا أموري ما تعجبش وباش لأوّل مرّه نستغل هذا المنبر باش نحكي على ذاتي العزيزه (الله يرحمك يا عم الهادي ) ونستعرف ـ إسمع يا الفان ـ نستعرف بلّي آنا وحده ظلاميّه إي نعم لكنّي مسيبه الخلق للخالق ونتصوّر إنّو كل فرد ياخو إلّي كتبلو ..لكنّي وجه محاين كيف 99.99 بالمائه من التوانسه البقيّه هاو باش نحكي عليهم هذوكمه إلّي عاملين من عذابنا صنعه ..أيّه سيدي عندي نهارين هبطت لوسط البلاد مع زميله باش تقضي حاجه وانا مبعّد ما لحت عليّه مشيت معاها ومع ماضي ثلاثه وانا نهدرز ونفلّم يدخلولي زوز إيدين من شبّاك الكرهبه لوحيِّد رجّال إستغل إنّي وقفت في الضو لحمر ومحصوره بالكراهب وغافلني وبْيد جمّدلي راسي وبالثانيه قطّعلى الشّركه من رقبتي توّه بالرّفلاكس شديتلو اليد إلّي فيها الشّركه وعلى غرار عركه في مطهره متاع حمّام نساء عربي قام ينتّشلي في شعري كيف ما تشد هاك النوّاره في الربيع وتقوم تسل في وراقها وتقول يحبني ، لا ، يحبني ،لا ، يحبني آه..وأمرني باش إنسيّب عاد ما غير تردّد قتلو هز ،ياخي آنا تعبت أعليها كيفو  : السّيّد ماخو الرّيسك ووقف أعليها يتشمّس بحذه الضّو وعامل أنفرا روج في عينيه وانا آش عملت ؟ تي هيّ هداتهالي أختي وحتى لبستهالي بالعربي ما تعبتش أعليها .. أمّاله شبيني نفلّم سامبل توّه براس أمكم أعلاش الكذب ياخي وين ندوّر عينيّ الحوله ما نشوف كان الشّعارات مالين البلاد و الغنّيات آش قلّك بلاد الأمان أماله يلّي جرالي في وضح النّهار بحذه وذارات سياديّه حادثه فرديّه  ستنّاوني ندخل للحسينيّه نفرّغ قلبي شويّه :'((
(غايضتني الشّركه خاطر جاتني بلّوشي )  :'((
في اللّيل كان عندي خدمه نكمّلها و ما لقيتش الوقت باش نخمّم وجيعت كرومتي ليوم و بعض آثار العنف ذكروني بهاك الوليّد إلّي براكاني ، زعمه شنيّه بَلْوتو وفين تربّى عند بو فقير يجري مالصباح للّيل و ما يخلطش يعملّو شيء وإلّا عند بو سوكارجي عامل في عذابو صنعه . زعمه مشكلتو عايلتو وإلا حومتو إلّي معبيه بالزّطّاله و النّطّاره وإلّي ناقمين على الوضع ..لوليّد عمرو يعمل عشرين (بلعربي ولد عهد التّغيير )قدّام الحبس القديم قاعد يسترزق كيمه قالتلي وحده عزوزه سخّفها حالي ، مانيش باش نسأل فين ماشين آنا ربّي يعرف إلّي مسامحه لوليّد . إلّي نحن فيه غلطة السّيستام والتزفريت ونحن بخير والسّير والعبادات إلّي قْطعها الشّرفي مالمناهج العلميّة والسرّاق الكبار  إلي حلّوا شاهية الوليدات الصغار للسرقة و غياب الإنسانيّة و التضامن كان في التّفليم في المحافل الدّوليّه آنا تِبْراكيت بالحق وسامحوني على الكلمه مهياش عايليّة مانيش مسيحيّه ولكنّي كيف "مار تيرزا" لو كان نشوف الولد نعطيه خدّي الثّاني يضربو باش يتذكّر إلّي آنا كيفو زوّاليّه .الدّنيا مهياش هيّ هيّ وقت إلّي كان فمّه حشّاد كان التونسي يعرف آش معنتها الإنسانيّه اليوم تقطعت الرحمه مالبلاد والتّونسي  لتّونسي ولّا نار مقديه .. إذا همومنا تحلّت ووفات براس أمكم تعرفوشي غلطتنا فين هي ؟ نسينا ربّي والإبتهالات وعْمَلنا هُبل جديد نعبدو فيه صباح وعشيّه يا ولدي يا سَرّاق ططّاطك غيغوز عسل تنحّيها من فمها وتعطيهالك إذا طلبت منها هيّ .ما نيش باش نسئل على الحنوشات أصلا آنا الوليّد مسامحتو قدّام رب البريّه وتوّه سامحوني خليوني نعمل ضريبات في الحسينيّه 

الهجره

توّه سيدي رسول الله أمرو ربّي باش يهاجر من مكّه للّمدينه ولحكايه هذه موش كان حل وقتي فقط وإنّما تبيّن في حد ما إنها نهج حياة للمومن إلّي تضياق بيه البلاد إلّي عايش فيها ومعّادش يلقى وين يقبّل باش يمنع بجلدو ؛ عاد يولّي لازمو يهاجر بالتّونسي يُقطع الرّباط (مع ثلاثه نقاط فوق القاف ). بالنّسبة ليّ هنا تاقف رمزية هجرة رسول الله صلّى الله عليه وسلّم ولا محاله تنجمو تخمّموا معايا إلّي واش خص كان في ها لزمان بنادم يكون مأمور باش يهاجر من مكّه للمدينه مع إنّو وخيّانّا غادي زاده يعانيو أمّا يا محلاها جيره حتّى ولو يهبطولي فرقة مالوسّاد تعذّبني ..يا حبيبي ، ساعات في الهم عندك ما تختار . هاو توّه يتّهموني بانعدام الوطنيّه و الإرتباط بالخارج وانا نحيلهم في المقابل على أقوى كلام قريتو وانا غشّيره بتصرّف منّي وما غير باش نذكر مولاه الأصلي على خاطر معّادش نحبّو "الوطن الّذي لا أبات فيه آمنا على عقيدتي ..ليس وطني .." أيواش هاني شدّيت الغارد وماذبيّه تسخنوني بالضريبات الفوق قبل ما تحشّوني من تحت لتحت . يا رسول لله وين تمشي تقطعت الرّحمه في البلاد الصبيطار تدخلو تلقى  معظم الطبّه و البرا مديكال مستلبسين ، تحوقل بصوت عالي تتلفِّتلك ألف عين وقريب يطلبو منّك بحث يشوفوك كلين ولّا كونطاميني ..تقول "لا إلاه إلّا أنت سبحانك إنّي كنت من الظّالمين "يحصروك مع الحيط ويقولولك هاو عامله روحها من الأتقياء . وكان تمشي تصلّي الصّبح حاضر أكيد  راك محطوط في قايمه بنفسجيّه مرشحه إنها تكون سوداء .. وانا خاطي خوك مجرّد مومنه نعتقد بيوم القيامه وبالعربي كل ما نعتقدو إنّو وقت يجيني هادم اللّذّات يلقاني ربّي وين أمرني باش نكون ، معنتها ما عنديش تزييف للعقيدة بالتّونسي وما نعتبرش الحجاب أمر طايفي لإنّو أمر المولى ودايخة في إنّو ها البلاد إلّي عندها مداخيل من دور البغاء العلني (وقاتله روحها باش المرا ما تتّغبنش وراء تقريطه ) وحتى واحد مالمسهولين بوزارة الدّاخليه خمّم باش يوقّف ها المهزله الكونيّه ضد المرا إلّي يدّعيو إنهم أعلنو الجهاد لتحريرها من كل مضاهر الدّونيّه ..الهجره فيها منافع السفر السّبعه وتنجّم تكون داخليّه ، دييّور واتاني إنّي عشت بعض الأعوام في ولاية مدنين ونقسم بالله إنّي فيها حسّيت روحي تخلقت من جديد وحتّى إنّي غادي تعلّمت آش معنتها تكون في معيّة الله .. هجرة الحبيب صلى الله عليه وسلم ، يلزم نفهمو رمزيّتها بالحق وفي ها الزمان إلّي ضياقة فيه الدّنيا على الموحدين وصعبت الفيزا نرى إنّو فمّة هجره رمزيّه ممكنه وحتى حد ما ينجّم يمنعها : معيّة الله ، وهي نسق حياة إنّجمو نفرضوه حب من حب وكره من كره مع التقيّد  بأهم شعار وقاعده دينية : " لكم دينكم ولي دين " يوفى الحديث !

حشّاد

ينام الوطن محتضنا لهفته إليك وباكيا فرصته المهدورة بك .. حزينا كعاشق حضره الموت قبل أن يلتئم جرحه بمودّة من يحب . وإنّك بما أنت شهيدا ، عنوان نجمة في تاريخ لم تألفه تونس بغيرك فتشبث بذكراك يطهّر بها كلّ جراحه ويقوم من سقوطه يُغِير على دورِ العزاء ويعلن أنّك في قلبه حي . فلعلّ كان في تاريخ تونس فرصة لنا ليكون لنا حيث القرار كرامة أو حتى حياة . وما دامت مرثيّتي في يوم رحيلك  كلمات من عبق دمع تجمّع في مقلتيّ على إستحياء ، فأنا أدّعي أنّه لا يصحّ البكاء على الأحياء . وقد حشدت طهرك لتذكّرنا كلّما أوغل الشّتاء فينا بأنّك من هنا عبرت طيرا أخضر ،فننشغل بدفء ذكراك عن قتامة حاضرنا المليء بأشباه المحبّين وأشباه الرّجال وأشباه العاملين على حبّ الخضراء و الشعب أيْ حشّاد .. تحضرني قصيد " كفّوا لسان المراثي " لتميم البرغوثي .. تلك الّتي لها في القول بأس يشدّ القلب الكسير من الهم فأسمعتها نفسي زمن ذكراك .. لتحيا أيها الطّيّب ناصعا لنقول نحن شعب تونس ، أنّ لنا في البطولة : حشّاد .

نوعدكم نبدّل الصحن

قعدت مع الجماعة في أندر التّجمّعات المسموح بيها في بلاد المزود الخدّام ـ ما عدى تجمعات الحزب الدّيموقراطي العفويّه إلّي مسموح بيها كيمه نعرفو صباح وعشيّه ـ على مايدة الفطور مع دارنا .. (وين تستخايلوني بنّكت )، وطحت نجرش على حساب ستّة . نلقى الحنينه عملت صُفرة الباي على ما خلطنا بعد العيد على خاطر الحاكم عاملنا ترشيد مستهلك على طول العام بالقوّه القاهره  . عاد أيّامات العيد نعلنوا في دارنا العصيان المدني وانطيحوا للتّصنيف ـ عملِتلنا شدّو عندكم سلاطه سوري وجلبانه وسلاطه مشويه و طريّح غريياد ..أيّه بديت بالصّندي صحن مشوي على سلاطه مشويه وامبعّد درت صبّيط الجلبانه في صحني وزدت فوقها السلاطه السّوري . وما علقوش دارنا على خاطر فدّو مالبحث إلّي كل مرّه يسمعوه منّي : "هكّايه أبَنْ ياخي ماهم باش يتخلطو في كرشي " وبيناتنا آنا نحسهم الزّوز ولّاو أبن .آنا هكّاكه وذبّانه ضياقة بيها الدّنيا تعمل إلأطريسّاج متاعها في صحني زغّرة فتفوتة خبز ونحّيتها وكمّلت ناكل وما نفيق كان بالكراسي الكل وخروا لتالي عاد هزّيت صحني وجريت تحت الطّاوله قلت ما يكون كان الحاكم هدْ على الدّار وإلّا في تونس لعزيزه منعوا الأكل الجماعي ولّا جماعة الإحصاء رجعّلهم شاهد العقل وتعلموا الشفافيّه وفي طريقهم للمصداقيّه تذكرو عايلتنا .هكّاكه وخاضة في الشّومبري إلّي يقلّي كثّرتلها ولّي يقلّي أنسى ولّي يقلّي هابط للمركز هذاكه خويا التّرشّيست طيّحتو يخدم مع لخرين وآنا نصيح : إلّي عندو حاجه يبلعها لا ترصّيلو في عام وكيلو ـ  يا معلّم ما فهمت شيء كان ما حمامة السلام الحنينة قتلي :
"يا بنيتي مازّال خير ربي ، بدّلت الصحن "
وقتها حسّيت روحي رأفت الهجّان حليّت شفرت هاك الرّفّال متاع الكلام إلّي جاني من كلّ حدب وصوب . رجعت قعدت على الكرسي إمبعد ما اتفرتوا أخوتي وكل واحد منهم قالب وجهو ، الكبير سألني إذا كنت كنّكتي على جزيرة سومطره وإلّا حي قزديري في كراتشي .. جاوبتو :
"لا ،في تونستان ! توّه النّاس راقده تحت الخيم و الرجال تضرب في الرّاغو في الحبوسات وانت تحبني نطيّش صحن مليان على خاطر جرد ذبّانه طاحت فيه ؟ " غزرلي خويا الترشّيست وقطّع شعرو وقلّي : "لا يزّي عيّفتنا في الماكله لا يزّي تحب تبيّتنا نبحثو أنسى تقعد معانا على الماكله ،آخر مرّه" ... وغصّيت .. شنوّه التجمّع الوحيد المسموح بيه لأكثر من شخصين في بلاد الطّرننّي باش نتحرم منّو ؟ كيفاش باش نحس بالمدنيّه أمّالة وإنّي في مجتمع مدني ناقصني كان إدّورو بيّه سور وانولّي مع وخيّاني من أبناء بوفرده كيف كيف .. وخمّمت في الحلول الممكنه باش ما يعاقبونيش العقاب الظّالم هذاكه وحسبتها يا ضْريبه تنقيزة صومو على كرش خويا ها توّه تخاف العيله الكل ـ تكتيك تونستاني بامتياز ـ يا ندّعي الإلتزام بالضوابط إلّي مسموح بيها في العايله والخنفوسه وإلّا البرغوثه إلّي الطّيح نعدّيها للمغّاره وهكّاكه كيف نطلب الجنسيّة متاع الجببنه (اليابان ) يعطيوني .. ولّيت قعدت على ركايبي و بست إيدين العايله الكل ووعدتهم باش إنحسّن من سلوكي ومعّادش إنخل بالنّظام العام ، المهم ما يحرمونيش من حق التّجمهر في دارنا ،شْرِفت و صعيب كان نلقى عايله ديموقراطيّه في تونس تستبناني وإلا طحطني تحت كفالتها وتضمنلي أبسط حقوق المواطن التجمهر التّلقائي .

منافقون

هذه أنا في ما يبدو لي حلَقة عقْلنة للسّب و الهجاء وإن لم أخطىء فهما مترادفان لما يسمّيه العامّه العنف اللّفظي وهو بالنّسبة لي إعلان ذاتي للحقيقة .اليوم أعلن محبّتي لكل شاعر هجّاء بدءا من المتنبّي مرورا بمظفّر النوّاب والأبنودي و أحمد فؤاد نجم و البرغوثي وكلّ من صاروا أطبّاء لقلبي العليل بالغيض لأنّي بقراءة ما يكتبون و كأنّي على شفا الحمقى و أدفع بالمرايا لوجوههم ليروا ما نرى نحن الآخرون من  .. العامّة فيهم ، وعودا لما صار بين يديّ بالصّدفة ، أضع تحت تصرّفكم هذا النّص الجيّد للشاعر أولاد أحمد لتقرّ قلوبكم به على أمل أن تجدوا الكتاب مثلي و تدْعوه لمصاحبتكم والنّص بعنوان منافقون من كتاب تفاصيل :
"يسكنون بعيدا عن الشعب 
بعضهم في قصور فخمه 
وبعضهم في سلسلة من القبور الفخمه 
لا يراهم الشّعب و لا يرونه إلاّ لماما في الأحلام المزعجه وفي الكواليس الدّوريّة التي يتبادلونها ،بمناسبة وغير مناسبة، دعما لأواصر التّوازي الطّبقي المقرّر تاريخيا عليهما .
ولولا أنّهم موجودون فعلا لداخلنا الشّك في أنّهم موجودون فعلا ولحسبناهم كائنات أسطوريّة لا شيء يدلّ على وجودها سوى شبق الخيال العلمي ـ حتى الآن عن تناول قلم أحمر وظبط الخط الفاصلما بين الشّرط الحيوان و الشّرط الإنساني وتحديدا في بلادنا التي تقع ، كماهو معلوم في الحد الأقصى من تدهور القدرة الشرائيّة وفي الحدّ الأدنى من حرّية التفكير .. الكائن في الإعلان العلمي لحقوق الإنسان في الأيّام القليلة الماضية رأينا أحدهم و كان مثقفا مدّاحا لا يعاف حاكما ولا يخجل من محكوم ، ولم تمض ليلة وشمس حتى رأينا آخر يدّعي أنّه شخصية وطنيّة ،ثمّ آخر وكان محاميا ،فآخر وكان طبيبا ،فآخر وكان مشعوذا سياسيا ،وأخيرا رأينا آخرين وكانوا ،كالعادة وطبعا ،واحتراما لأخلاقيّات المهنة ،صحفييّن مدّاحين لا يعفون حاكما ولا يخجلون من محكوم :بعضهم في الإذاعة وبعضهم في التّلفاز ،بعضهم برتبة مخبر ،وبعضهم برتبة رئيس تحرير،بعضهم يفتتح صحيفة بعامود ،وبعضهم ينهيها بعامود دون ن ينسى وضع إصبعه في زاوية ما من رأسه حتى يضفي على صورته جوّا من الوقار الزّئف ويقنع قرّاءه بأنّه يفكّر .
رأيناهم 
وكانو كلّهم ،نعم كلهم مجمعين في ما كتبوا وقالوا على أنّ بلادنا دخلت عصر السّعادة الكبرى بمجرّد التّغيير الحاصل في مؤسسة الرّئاسة ، وهو نفس لكلام الذي دأبوا على قوله ،صباحا و عشيّا لمدّة ثلاثين سنة من السّعادة الكبرى الّتي سبقت هذه السّعادة الكبرى ... حتّى غدت تونس بفضل نفاقهم نسخة طبق الأصل للجنّة الموصوفه .. وغدا رئيسها السّابق (رحمة الله عليه ،هذه من عندي ) بفضل نفاقهم أيضا إنسانا برتبة إلاه .. لا تجيز إلاّ طاعته في كل الأحوال .
وبما أنّ فضيلتهم اليتيمه تتمثّل في كونهم لا يستطيعون إبداء آرائهم "إلاّ"  بصفة شخصيّة ،أو نيابة عن زوجاتهم في أقصى تقدير ، فقد بدا كلامهم عن السّعادة الكبرى وكأنّه نقل أمين لاستشارة شعبيّة قاموا بها في اللّيل . ويمكن إستنتاج ذلك من حشد الكلمات الإمبراطوريّة المتواترة في آرائهم وكتاباتهم إبتداءا من نون الجماعة التي لا تليق بهم وصولا إلى جمع الجمع أي إلى الشّعب الذي لا ينتمون إليه .
يسكنون بعيدا عن الشعب 
ولكن المتطلّبات الماكيافليّة للدولة من ناحية ، ووعيهم الدّيناري بالوطن من ناحية أخرى يستوجبان أن نراهم ونقرأ لهم كلما أصرّت الدّولة على أن تستمرّ بنفس الأسلوب ،وبنفس الرجال (يقصد حسب رأيي نفس المهلّلين ) مع تغيير طفيف في تراتيب المسؤوليّات الّتي حرم الشّعب من المساهمة في تحديد  مضامينها و أهدافها .. " 
"لا أعرف بالضبط من قال : لا تشاهد مسرحيّة نهايتها معروفة ! ولكن الذي يمكن أن يقول ذلك هو الكاتب ، والكاتب فقط . وحده الكاتب يعرف أن السّاسة يأخذون أكاذيبهم اشخصيّة على أنّها حقائق ربّانيّة ..فيما يأخذ هو جميع الحقائق على أنّها محض أكاذيب ." إنتهى النّقل عليكم بالكتاب وهو لدار بيرم للنّشر .