غيغوز في الحسينيّه

آنا مبدئيا إنسانه مسالمه صحيح متوحشه وبرّيّه أمّا نعطي برشه لخالتك تيريزا للّي مايعرفهاش هذه ببّاصه عدّات عمرها  في خدمة الفقراء في الهند حتى جاها هادم الّذّات ومشى فعلها كيف الرماد في النهار عاصف يلطف بينا ربّي ، أعلاش نحكي هكّه ؟ .. هذه فراز دطّاك الصحيح إنّي حاشمه إنّو في هذه اللّيله باش نرد مدوّنتي حسينيّه ويسامحوني وخيّانّا الشّيعه على الإستعاره أمّا أموري ما تعجبش وباش لأوّل مرّه نستغل هذا المنبر باش نحكي على ذاتي العزيزه (الله يرحمك يا عم الهادي ) ونستعرف ـ إسمع يا الفان ـ نستعرف بلّي آنا وحده ظلاميّه إي نعم لكنّي مسيبه الخلق للخالق ونتصوّر إنّو كل فرد ياخو إلّي كتبلو ..لكنّي وجه محاين كيف 99.99 بالمائه من التوانسه البقيّه هاو باش نحكي عليهم هذوكمه إلّي عاملين من عذابنا صنعه ..أيّه سيدي عندي نهارين هبطت لوسط البلاد مع زميله باش تقضي حاجه وانا مبعّد ما لحت عليّه مشيت معاها ومع ماضي ثلاثه وانا نهدرز ونفلّم يدخلولي زوز إيدين من شبّاك الكرهبه لوحيِّد رجّال إستغل إنّي وقفت في الضو لحمر ومحصوره بالكراهب وغافلني وبْيد جمّدلي راسي وبالثانيه قطّعلى الشّركه من رقبتي توّه بالرّفلاكس شديتلو اليد إلّي فيها الشّركه وعلى غرار عركه في مطهره متاع حمّام نساء عربي قام ينتّشلي في شعري كيف ما تشد هاك النوّاره في الربيع وتقوم تسل في وراقها وتقول يحبني ، لا ، يحبني ،لا ، يحبني آه..وأمرني باش إنسيّب عاد ما غير تردّد قتلو هز ،ياخي آنا تعبت أعليها كيفو  : السّيّد ماخو الرّيسك ووقف أعليها يتشمّس بحذه الضّو وعامل أنفرا روج في عينيه وانا آش عملت ؟ تي هيّ هداتهالي أختي وحتى لبستهالي بالعربي ما تعبتش أعليها .. أمّاله شبيني نفلّم سامبل توّه براس أمكم أعلاش الكذب ياخي وين ندوّر عينيّ الحوله ما نشوف كان الشّعارات مالين البلاد و الغنّيات آش قلّك بلاد الأمان أماله يلّي جرالي في وضح النّهار بحذه وذارات سياديّه حادثه فرديّه  ستنّاوني ندخل للحسينيّه نفرّغ قلبي شويّه :'((
(غايضتني الشّركه خاطر جاتني بلّوشي )  :'((
في اللّيل كان عندي خدمه نكمّلها و ما لقيتش الوقت باش نخمّم وجيعت كرومتي ليوم و بعض آثار العنف ذكروني بهاك الوليّد إلّي براكاني ، زعمه شنيّه بَلْوتو وفين تربّى عند بو فقير يجري مالصباح للّيل و ما يخلطش يعملّو شيء وإلّا عند بو سوكارجي عامل في عذابو صنعه . زعمه مشكلتو عايلتو وإلا حومتو إلّي معبيه بالزّطّاله و النّطّاره وإلّي ناقمين على الوضع ..لوليّد عمرو يعمل عشرين (بلعربي ولد عهد التّغيير )قدّام الحبس القديم قاعد يسترزق كيمه قالتلي وحده عزوزه سخّفها حالي ، مانيش باش نسأل فين ماشين آنا ربّي يعرف إلّي مسامحه لوليّد . إلّي نحن فيه غلطة السّيستام والتزفريت ونحن بخير والسّير والعبادات إلّي قْطعها الشّرفي مالمناهج العلميّة والسرّاق الكبار  إلي حلّوا شاهية الوليدات الصغار للسرقة و غياب الإنسانيّة و التضامن كان في التّفليم في المحافل الدّوليّه آنا تِبْراكيت بالحق وسامحوني على الكلمه مهياش عايليّة مانيش مسيحيّه ولكنّي كيف "مار تيرزا" لو كان نشوف الولد نعطيه خدّي الثّاني يضربو باش يتذكّر إلّي آنا كيفو زوّاليّه .الدّنيا مهياش هيّ هيّ وقت إلّي كان فمّه حشّاد كان التونسي يعرف آش معنتها الإنسانيّه اليوم تقطعت الرحمه مالبلاد والتّونسي  لتّونسي ولّا نار مقديه .. إذا همومنا تحلّت ووفات براس أمكم تعرفوشي غلطتنا فين هي ؟ نسينا ربّي والإبتهالات وعْمَلنا هُبل جديد نعبدو فيه صباح وعشيّه يا ولدي يا سَرّاق ططّاطك غيغوز عسل تنحّيها من فمها وتعطيهالك إذا طلبت منها هيّ .ما نيش باش نسئل على الحنوشات أصلا آنا الوليّد مسامحتو قدّام رب البريّه وتوّه سامحوني خليوني نعمل ضريبات في الحسينيّه