الخمسه إلّي لحقوا بالجرّه

 توّه عندي نهارين متحزمه ... نلوي ، الله غالب ملّي سمعت في الخطاب كلمة السّر "بحزم ، بحزم " وانا إلّي ما شطحتوش في حياتي شطحتو ، عاطيه لولي الأمر حقّو مالطّاعه . ياخي رجال البلاد برك يضربو الدّونس ويهزّو وينفضوا  كيمه تحبّلهم الشريعه . عاد تحزّمت حتّاش تقطع عليّ النفس وكشكشت كيف الحوته وما تزادلي حتّى شيء العينين على اللّاتّرال وانا مخّي مخلبز لا يجيوني الإرهابيين ويشوهو سمعتي أكثر ملّي هي مبلحصه و يعمرو عليّ الجيران يخرجولي بشعارات تزيد على مرمتي والطّيّحني للديفزيون سطاش و قتها عاد ، ما عندي بيها وين خُرِّيطه أكرملي . حياتي عدّيتها على السّامبلستي و جايبه الواد الواد بوكشّاش بامتياز نعمل حساب السمعه و نتفقّد جيراني في أي كلمه جديده قبل ما نقولها وعلى ماني حاشاكم بهيمه أمّا كل شيء نبلعوا بسهوله إلّا الكلام نرد بالي بالباهي قبل ما ندخلو للطّاسه على خاطر في بلاد التّرننّي صلاة النّبي فيها حصّيله ونص وتنجّم تلقى روحك في دار العمّه على خاطرك تملك سيدي 'عذاب القبر 'مثلا بصوت الشيخ كشك رحمة الله عليه ..المهم جا عليّ وقت عامله بلاكتين على اللّاطرال باش ما نقراش هاك اللّبوردورو إلّي معلقينهم في البلاد تالمون مخّي يْصُوطي من قلّة الهضمان متاع تفشليم و الدّرويش متاع الشّعب . بوردورو من لطرف للأطرف " تونس جودة الحياة " وتحتها شايب مالبلاد مطبّس يلم في الزّبله و يكنس في الكيّاس وقتلّي صناديق الضمان الإجتماعي كان مالأولى تتلهى بيه .. كلمة الإرهاب ولي دريفي متاعها كيف التطرّف والّذي منّو "اللهم أسترنا بما سترت به أنبياءك و أولياءك " غول مسيّب يخوّف وياكل ويزرط لعباد زاده . آنا نسمع الكلمه ونولّي نترعد كيف القصبه توّه إذا كان جاهله كيفي : نكتب إسمي بالسّيف على القلّه نجبد عبد ونقول أعليه قُطعي ياخي ماهو يلزمني تكون عندي برايف . باهي إذا كان نْسب عبد ونقول أعليه مِطرّف وما نبرهنش يتسمّاشي هذاكه تشويه سمعه وتنجّمشي غيغوز تدخل لقلبو ؟ بوسّيبل ..ستنّاوْ هاوْ الجيران خاضو مرجتهم بغنّاية ليله والمزود خدّام هو جاو يشكيو لمّي ..توّه آش عندي نعمل ملّي سمعت كلمة تحزّم ولّا " بحزم " وآنا طراف أعطيه نلوي نخاف نوقّف نلقى روحي في قلبو بتهمة تشويه سمعة تونس والإضرار بقطاع السّياحه  وكان يلقاو باكو خميره في دارنا هاتوّه يسألوني من أين لكم هذا . قدّاش من إرهاااابي في تونس واشكون المطرّف ؟ هاك الزوّالي إلّي يحط نهد قلبو باش يقرّي ولدو وإلّا إلّي يصرف مليارات على الدّعم الثّقافي لمسلسل يتعرض في رمضان وثلاثة أرباع الشّعب يكردي باش يشق فطرو ؟ إلّي كل عامين يصرف مليارات دعم مالي لسينما العراء والعار وإلّا إلّي كادس ربع قرن عايش على الكفاف والكريدي وعلى قاعِدْة كل قديرو وقدرو . آشكون المطرّف إلّي يعطي لممرّن المنتخب ما يحزّم الكوره الأرضيّه وتقوم تشطح والنّاس في صبيطار صالح عزيّز على ريوس بعضهم وإلّا هاك المواطن الطيّب إلّي يموت بالوجيعه وما يقولش أحّيت وإلّا وإلّا .. بالله الذي لا إلاه إلّا هو ( توّه  هذه حقيقة مطلقه موش إسلام سياسي ) إلّي كتب كلمة  "بحزم " عطاها شحنه مقوّيات قبل ما يحطها ..البلاد خلات وجلات ونحن جايبين الواد الواد .. يامّي إيجه حطلي "الخمسه إلّي لحقوا بالجرّه " خلّيني نتحزّم ونهبّطهم حيار ،آش كون يدل غيغوز على خيط للحرقان والله لا يضيع أجر المحسنين راني عازمه على الرّحيل معاّدش فيها يزّي سي فيني