Thursday, December 16, 2010

جوامع فيييبرور هذاكه إلّي مزّال

توّه وفات المشاكل مابلاد يا شوطنه متاع راسي ومعّادش فمّه مشاكل في هذه الجنه إلّي ستنّاوي نْصر ونشدد ونثمّن إسمها تونس الخضراء أهّوكه أعلاش ممثلين الشّعب يطالبو بجوامع فيبرور ..أمّاله كيفاش ما يحبّوش النّاس في الخارج تصدّق إلّي العباد تدخل للجوامع بالكوارت مانيتيك وإنّهم قاعدين يحاصروا في العباد في عقايدهم .. يا معلّم على آناهو جوامع يحكيو ، كثرة الجوامع يا مدام مقلقتّك والآذان الّي خارج موش متناسق ، ياخي تحكيلنا على تجربتك الخاصّه وإلا شنوّه ماهو نبهوا على الجوامع إلّي دايرين سيادتك يأذنو فرد وقت و يحترموا أوقات الصلاة بالثّانيه وخرّج ها النّاموسه من مخّك راهو عيب ..توّه أمورنا هانيه وما فمّه مشاكل في البلاد كان التلوّث الصوتي عاده تبسّسولنا باش تحرمونا من أجمل الرّموز الحضاريّه والعقائديّه لبلاد فيها الأغلبيه من النّاس مسلمه .. "ما ناش باش نسمحو بأي تجاوزات" على آذان يدوم دقيقتين توّه موش عيب هذا الكلام ياخي باش نولّيو في سويسرا غادي على الأقل المسلمين أقلّيّه والحكايه تقلبت عليها الدّنيا .. آنا حسب إحصائيّاتكم معظم الشّعب مالكهول بالعربي صونسي يصليوا أما إلّي مزّال ربي ما كتبش عليه التّوبه ويحب يرقد ينجّم يلق حلول  بسيطه يا مدام كيف سدّداة الوذنين أهّوكه يتباعو رخاص في الفرماسي ..حكاية وليداتنا في المكتب هاك الدّليل الدّامغ متاع تأثير التّلويث لصّوتي للآذان على المجموعه البشريّه مانيش باش نجاوبك ..خلّيني نحل الحسينيّه ونعمل ضريبات ... ووووووه على بلاددي قدّاشها مليانا بالذكيّييين ،وووووه على مجلس بلادي قدّاش مليان بالحنينييين ،ووووووه على إنجازات بلادي قدّاشها رياديّه  وتندّب الخدّين ... سامحوني هاني رجعت باش نعطي رايي في المداولات إلّي حكاوو فيه جماعة المجلس على لاذان و التّلوّث الصوتي :')) إسمع يا خانم (متأثره بالمسلسلات التّركيّه )براس لحنينه كان المؤذّن متاع حومتكم صوتو موش ولا بد تنجمو تنسقو معاه وتحطّو لاذان متاع الحرم المكّي وكان المشكله مزّالت مستمرّه معاك تنجّم تعاون أقرب فرماصي بحذاك وتشري البرودوي إلّي قتلك أعليه ليك وللعايله  ..الحمدوالله يا ربّي بالرّغم إلّي مولوده في شعبه عمرك ما خلّيت غيغوز تهتم بالسياسه ..مالّه طلعات ! لله يرحم طلعاتك يا مزغنّي أرحم من تهرديزت نوّاب الشّعب (الهارد موسيقى يا مدام بالعربي إلّي قلتو موش سب ) يا رب الحمدولله إمّيمتي فام أو فوايي تحبّك وتحب الصلاة و الآذان ..جوامع فيييبرور هذاكه إلّي مزّال كان إمكانيّاتك تسمح يا برلمانية الهناء تنجّم تعيش في سويسرا وتجينا وقت المداولات هكّاكه ما نقلقوش بأي رمز من رموزنا الحضاريّه وبالخصوص العقايديّه ..وفى الحديث المسموح بيه لاخر باش نتبادلو مع شواطن مخّي :/

4 comments:

  1. وَمَنْ أَظْلَمُ مِمَّنْ مَنَعَ مَسَاجِدَ اللَّهِ أَنْ يُذْكَرَ فِيهَا اسْمُهُ وَسَعَى فِي خَرَابِهَا أُولَئِكَ مَا كَانَ لَهُمْ أَنْ يَدْخُلُوهَا إِلاَّ خَائِفِينَ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيمٌ
    الاية 114 من سورة البقرة

    ReplyDelete
  2. أهيكة قتلك الحسينية نهارت عاشوراء أحببنا أم كرهنا :(

    ReplyDelete
  3. والله يا ككتوسه (إسمك حلو ) سبحان اللّه هذه الآيه قدّاش تلخص إلّي نحن فيه . والله ربّي يجيرنا من الظلاّم وولاد الحرام اللهم آمين ..

    ReplyDelete
  4. الله غالب يا خويا هي هي وتلزّيتلها ما حبيناش نطيحو في الشّبهه ..حسينيّه أمّا مازّلنا سنّه الحمدوالله لا أكثر لا أقل !

    ReplyDelete